Türkiyə Fransaya yollanacaq vətəndaşlarına xəbərdarlıq edib

Türkiyə Xarici İşlər Nazirliyi Avropa çempionatını izləmək üçün Fransaya yollanacaq vətəndaşlarına xəbərdarlıq edib. Apasport.az saytının məlumatına görə, müraciət yayımlayan XİN vətəndaşlardan xüsusilə ictimai nəqliyyatlarda və insanların kütləvi toplaşdığı məkanlarda diqqətli olmağı tövsiyə edib. Müraciətdə bir müddət öncə Fransada baş verən terror hadisələrindən sonra yerli hökumətin fövqəladə hal vəziyyətini qitə birinciliyi ilə əlaqədar 2 ay daha uzatdığını vurğulayan qardaş ölkə rəsmiləri oyunların baş tutacağı stadionlarda görüləcək təhlükəsizlik tədbirlərinə uymağa və qaydalara riayət etməyə çağırıb.xeber100.com

Litvada şahmat festivalı keçirilir

Litvanın Panevejis şəhərində şahmat festivalı keçirilir. Festivalın proqramına beş turnir daxildir. Azərtac xəbər verir ki, turnirdə Azərbaycan nümayəndələri qrossmeyster Azər Mirzəyev və FİDE ustası Rüstəm Bünyadov iştirak edirlər. Qrossmeysterlərin turnirində dörd turdan sonra 4 xal toplayan polşalı şahmatçı Marsel Kanarek liderdir. Rusiyalı Sergey Matsenko liderdən bir xal, Azərbaycan təmsilçisi Azər Mirzəyev 1,5 xal geri qalır. Beynəlxalq usta normasını nəzərdə tutan turnirdə 4 xalla ev sahibi Titas Stremaviçyus irəlidədir, rusiyalı Mixail Bereslavski bir xal geri qalır. Azərbaycan şahmatçısı Rüstəm Bünyadov 2 xalla beşinci yerdədir.xeber100.com

Futbol liqaları üçün transfer dönəminin vaxtları müəyyənləşib

2016/2017-ci il mövsümündə Azərbaycanda keçiriləcək futbol liqaları üçün transfer dönəminin vaxtları müəyyənləşib. Azərtac Peşəkar Futbol Liqasının (PFL) rəsmi saytına istinadla xəbər verir ki, yay transfer dönəmi iyunun 9-dan avqustun 31-dək, qış transfer dönəmi isə yanvarın 4-dən 31-dək olacaq.xeber100.com

“Qarabağ” futbol komandası Vyanada həvəskar klublar liqasının kubokunu qazanıb

İyunun 7-də Vyana ikinci əyalət liqasında mübarizə aparan “Qarabağ” komandası həvəskar klublar arasında kubok yarışının finalında Avstriya paytaxtının “SV Gersthof” klubu ilə qarşılaşıb. Mübarizə apardığı ikinci əyalət liqasının cədvəlində liderliyi və növbəti mövsümdə yuxarı liqaya yüksəlməyi təmin edən “Qarabağ” yaşıl meydana favorit kimi çıxıb. Qarşılaşmanın ilk yarısında qapılar qarşısında gərgin vəziyyətlər qeydə alınsa da, hesab açılmayıb. İkinci hissədə təşəbbüsü tam ələ alan “Qarabağ” hücumların sayını və kəsərini daha da artırıb. Matçın 66-cı dəqiqəsində “Qarabağ”ın hücumçusu Srdan Pavlov komandasını hesabda irəli çıxarıb. O, 77-ci dəqiqədə 11 metrlik cərimə zərbəsini də dəqiq yerinə yetirərək dubl edib və hesab arasındakı fərqi artırıb. Beləliklə, oyunda 2:0 hesabı ilə qələbə qazanan “Qarabağ” komandası 2015-2016-cı il mövsümündə həvəskar klubların yarışdığı Toto Kubokunun qalibi olub.xeber100.com

8 illik fasilədən sonra…

İyunun 17-dən 19-dək Bakıda keçiriləcək “Formula-1” Avropa Qran-prisində mübarizə aparacaq iddialı komandalardan biri də Britaniyanın “McLaren” klubudur. Komanda müxtəlif dövrlərdə fərqli yarışlarda uğurla çıxış edib. Beş dəfə “CanAm”, üç dəfə 500 mil İndianapolis, bir dəfə Le-Man və Sebrinq yarışlarının qalibi olub. “Mclaren” 8 dəfə “Formula-1” üzrə konstruktor kubokunun sahibidir. Komanda 1963-cü ildə “Formula-1” pilotları Bryus Maklaren və Tedd Mayer tərəfindən Tasmaniya avtomobil yarışı üçün Yeni Zelandiyada yaradılıb. Bryus Maklaren həmin il Tasmaniya avtomobil yarışının qalibi olur və növbəti iki ildə “Formula-1” yarışlarında “Kuper” komandasının heyətində çıxış edir. “McLaren” komandası “Formula-1” yarışlarında 1966-cı ildə Monako Qran-prisində debüt edir. “McLaren M2B”ni idarə edən Bryus Maklaren 3 xalla mövsümü 14-cü pillədə başa vurub. Növbəti ildə də komanda 3 xal toplayır. “Mclaren” komandası ilk yüksək nəticəni 1968-ci ildə qazanıb. İspaniya Qran-prisində komandanın pilotu Denni Xyum ikinci, daha sonra Belçika mərhələsində isə Bryus Maklaren birinci olub. Həmin il komanda konstruktorlar kubokunda ikinci yerin sahibi olub. Bir il sonra komanda konstruktor kubokunu dördüncü pillədə başa vurub. 1970-ci il komandanın tarixində böyük faciə ilə yadda qalıb. Belə ki, Bryus Maklaren “CanAm” seriyasında yeni avtomobili sınaqdan keçirərkən faciəvi şəkildə həlak olub. Hazırda komandanın əsas pilotlarından biri Fernando Alonso Bakıda təşkil olunacaq “Formula-1” Avropa Qran-prisinin rəsmi elçisidir. Komandanın digər pilotu isə Censon Battondur. “Mclaren” komandası hazırki çempionatda 24 xalla yeddinci sırada qərarlaşıb.xeber100.com

Sərbəst güləş üzrə dünya kuboku yarışları keçiriləcək

Los-Ancelesdə böyüklər arasında sərbəst güləşi üzrə dünya kuboku yarışları keçiriləcək. Yarışda Azərbaycanla yanaşı, ABŞ, Rusiya, İran, Türkiyə, Gürcüstan, Monqolustan və Hindistan güləşçiləri iştirak edəcəklər. Azərbaycan Güləş Federasiyasından Azərtac-a verilən xəbərə görə, dünya kuboku yarışları iyunun 11-dən 12-dək davam edəcək. Püşkatmanın nəticəsinə əsasən, Azərbaycan güləşçiləri İran, ABŞ və Hindistan komandaları ilə “B” qrupunda mübarizə aparacaq. “A” qrupunda isə Rusiya, Türkiyə, Gürcüstan və Monqolustan komandaları qüvvələrini sınayacaq. Yarışda yığma komandanın məşqçisi Sadruddin Ayqubovun rəhbərliyi altında 10 güləşçimiz iştirak edəcək. Heyətdə Mahmud Məhəmmədov (57 kq), Cahid Həsənzadə, Əhmədnəbi Qvarzatilov (hər ikisi 61 kq), Məhəmməd Müslümov (65 kq), Hacımurad Ömərov (70 kq), Əşrəf Əliyev (74 kq), Aleksandr Qostiyev, Məhəmmədhacı Xatiyev (hər ikisi 86 kq), Aslanbek Alborov (97 kq) və Səid Həmidov (125 kq) yer alıb. Yarışın proqramına əsasən, iyunun 11-də qrup görüşləri keçiriləcək. Qrup liderləri finalda, qrup ikinciləri isə üçüncülük uğrunda görüşəcək. Görüşlərin idarə edilməsində ölkəmizi beynəlxalq dərəcəli hakim Sədi Quliyev təmsil edəcək. Xatırladaq ki, ötən il keçirilən analoji yarışı sərbəst güləşçilərimiz üçüncü sırada tamamlamışdı.xeber100.com

Bakı “Formula-1” Avropa Qran-prisinə tam hazırdır

Bakı şəhər halqası “Formula-1” Avropa Qran-pri yarışını yüksək səviyyədə keçirmək üçün tam hazırdır. Son müşahidələrimiz bunu deməyə əsas verir. Azərtac xəbər verir ki, bu barədə Bakıda təşkil ediləcək “Formula-1” yarışından əvvəl trekdə görülən hazırlıq işlərinin gedişini yoxlamaq üçün ölkəmizdə səfərdə olan Beynəlxalq Avtomobil Federasiyasının (FİA) yarış direktoru və təhlükəsizlik məsələləri üzrə səlahiyyətli nümayəndəsi Çarli Vaytinq iyunun 6-da keçirdiyi mətbuat konfransında məlumat verib. Bakıya növbəti səfərindən məmnunluğunu bildirən C.Vaytinq deyib ki, trekin “Formula-1”in şəhər yarışına hazırlıq səviyyəsini öyrənmək üçün keçirilən sonuncu baxışdan indiyədək bir ay keçib. FİA nümayəndə heyətinin baxışı zamanı ötən müddətdə burada xeyli iş görüldüyünün şahidi olduq. Çəkilən yol artıq tam hazırdır. Yol və onun ətrafında quraşdırılmış obyektlər yüksək keyfiyyətlidir. Bu işləri ərsəyə gətirdiyimizdə şəhərdə paralel olaraq nəqliyyatın hərəkətini də təmin etmək vacib idi. Bakı şəhər halqası boyunca hazırlıq işləri tamamlanıb. İşlərin planlaşdırdığımız kimi aparılması məni valeh etdi. Ümumilikdə işlər beynəlxalq standartlar səviyyəsində görülüb. Təhlükəsizlik baryerləri və çəpərlərlə bağlı müəyyən işlər qalıb. Bütün bu işlər başa çatdıqdan sonra yarış keçiriləcək. Ç.Vaytinq deyib ki, Bakıda yağışlı havanın yarışa elə də təsir etməyəcəyini düşünürəm. Çünki yarış avtomobillərinin təkərləri olduqca qalındır, onlar sürüşməyə tab gətirə bilir. Ancaq həddən artıq güclü yağış yağarsa, avtomobili idarə etmək çətin olacaq və bu, eyni zamanda, pilotlar üçün yeni bir çağırış olacaq. Güclü leysan yağışları xoşagəlməz hadisələrin baş verməsinə səbəb olduqda isə yarışlara nəzarət edən heyət müəyyən qərarlar qəbul edəcək. “Yarışla bağlı görülmüş təhlükəsizlik tədbirlərindən tam məmnunam. Son iki il ərzində biz bu məsələləri müzakirə etmişdik. Lazımı tədbirlər görülüb. İçərişəhər divarları boyunca trekin 8-ci dövrədən başlayaraq 11-ci dövrəyə qədər davam edən yoxuşlu dar küçə ən ensiz hissəsidir. Ancaq bu treki tərtib edənlər və həmçinin mühəndislər əllərindən gələni ediblər ki, trasda təhlükəsizlik tam şəkildə təmin olunsun. Burada bolidlərin qarşısını kəsə biləcək hər hansı mane yoxdur”, – deyə Ç.Vaytinq vurğulayıb. FİA-nın eksperti qeyd edib ki, qəza baş verərsə pilotlar üçün ən təhlükəli məsələ avtomobillərin təkərləridir. Biz bu sınağı elə apardıq ki, avtomobillər saatda 200 kilometr sürətlə hərəkət etdiyi zaman təkər çıxdıqda pilotlar zədə almasın. Bu baxımdan testimizi apardıq və nəticələrdən razıyıq. Bakı şəhər halqasını yarışlar üçün rəsmən hazırlamaq üçün gələn həftədə paytaxtınızda olacağam. Qeyd edək ki, gələn həftədən etibarən “Formula-1” rəhbərliyi, Beynəlxalq Avtomobil Federasiyasını nümayəndələri, komandalar və turistlər Bakıya gələcəklər.xeber100.com

“Cıdır-şans oyunlarının təşkili və keçirilməsi Qaydaların”da dəyişiklik edilib

Nazirlər Kabineti “Cıdır-şans oyunlarının təşkili və keçirilməsi Qaydaların”da dəyişiklik edib. Apa-nın məlumatına görə, Cıdır-şans (totalizator) oyunları – mülkiyyət formasından asılı olmayaraq, Azərbaycanda fəaliyyət göstərən bütün atçılıq yarışı meydanlarında bu Qaydalara uyğun olaraq, atların rəsmi sınağı ilə birgə keçirilən idman mərc oyunlarıdır. Bu oyunlar atçılıq idman növünün inkişaf etdirilməsi üçün əlavə maliyyə vəsaitlərinin cəlb edilməsinə, atçılıq yarışı meydanlarının maddi-texniki bazasının möhkəmləndirilməsinə və sahənin gəlirlə işləməsinə xidmət edən mərc sistemidir. Cıdır-şans (totalizator) oyunları Nazirlər Kabinetinin müəyyən etdiyi qaydada Gənclər və İdman Nazirliyi tərəfindən akkreditasiya olunmuş hüquqi şəxs (bundan sonra – operator) vasitəsilə həyata keçirilir. Dəyişikliyə əsasən bundan sonra operator idman mərc oyunlarının təşkili və keçirilməsinə nəzarəti həyata keçirən Maliyyə Bazarlarına Nəzarət Palatasına həmin qurum tərəfindən müəyyən edilmiş məbləğdə və qaydada haqlar ödəyəcək.xeber100.com

Cüdo üzrə açıq Avropa çempionatı start götürdü

Bu gün İspaniyanın paytaxtı Madriddə cüdo üzrə açıq Avropa çempionatı start götürdü. Apasport.az saytının məlumatına görə, 2 gün davam edəcək yarışa Azərbaycan millisi də qatılacaq. Ölkəmizi çempionatda 14 idmançı təmsil edəcək. Məşqçilər korpusu Madriddə Elbrus Zamanov, Oruc Vəlizadə, Davud Məmmədsoy, Sadiq Məhərrəmov (hamısı 60 kq), Elvin Mustafayev, Orxan Əsgərzadə (hər ikisi 66 kq), Telman Vəliyev, Samir Ağayev, Hidayət Heydərov (hər üçü 73 kq), Afiq Səfərli, Hüseyn Rəhimli (hər ikisi 81 kq), Tural Səfquliyev (90 kq), Cəlil Şükürov (100 kq) və Nadir Hüseynova (+ 100 kq) şans verəcək. Qeyd edək ki, yarışa 27 ölkədən 279 cüdoçu qatılacaq.xeber100.com

Yoxlama oyunu keçirilib

Dünyanın yaşıl meydanlarında milli komandalar arasında bir neçə yoxlama oyunu keçirilib. Apasport.az saytının məlumatına görə, FİFA üzvlüyünə qəbul edildikdən sonra ilk rəsmi oyununa çıxan Kosova millisi Farer adalarını 2:0 hesabıyla məğlub edib. Berqamoda keçirilən Albaniya - Ukrayna oyununda ukraynalılar 3:1 hesabıyla qalib gəlib. Gürcüstan millisi isə Rumıniya ilə oyunda darmadağın olub - 1:5. İsveçrə millisi evdə Moldovanı 2:1 hesabıyla məğlub edib. Maraqlıdır ki, baş tutan matçlarda Azərbaycan çempionatında çıxış edən 3 futbolçu meydana çıxıb ki, onlardan hər üçü məğlubiyyətə üzlüb. Gürcüstanda “İnter”li Nika Kvekveskiri, Moldovada AZAL-lı Stanislav Namaşko və Albaniyanın heyətində “Qarabağ”lı Ansi Aqolli komandalarına kömək edə bilməyiblər. Yoxlama oyunları 3 iyun İsveçrə - Moldova - 2:1 Qollar: Cemaili, 12, Mehmedi, 75 - Qinsari, 69. Kosova - Farer adaları - 2:0 Qollar: Bunyaku, 44. Berişa, 90+4 Rumıniya - Gürcüstan - 5:1 Qollar: Adrian Popa, 2, Amisulaşvili, 3 (öz qapısına), Stanku, 49. Torxe, 80; 87 - Motj, 68. Albaniya - Ukrayna - 1:3 Qollar: Sadiku, 13 - Stepanenko, 9. Yarmolenko, 49. Konoplyanka, 87