Mərkəzi Bank depozit hərracının nəticələrini açıqlayıb

Mərkəzi Bank tərəfindən vəsaitlərin cəlb edilməsi üzrə depozit hərracının nəticələri açıqlanıb.Bankdan Azərtac-a bildiriblər ki, aprelin 16-da Mərkəzi Bank tərəfindən vəsaitlərin cəlb edilməsi üzrə keçirilmiş növbəti depozit hərracında tələb 783,8 milyon manat, hərracın nəticəsində bağlanılmış depozit əqdləri üzrə orta ölçülmüş faiz dərəcəsi isə 8,01 faiz təşkil edib.xeber100.com

“COTTM 2018” beynəlxalq turizm sərgisində

Çinin paytaxtı Pekində keçirilən “COTTM 2018” beynəlxalq turizm sərgisində ölkəmizi Mədəniyyət və Turizm Nazirliyi təmsil edir.Nazirliklə yanaşı, eyni zamanda, sərgiyə Azərbaycan Konqreslər Bürosu, “Şahdağ” Turizm Mərkəzi QSC, Azərbaycan Hava Yolları QSC (AZAL), “İçərişəhər” Dövlət Tarix-Memarlıq Qoruğu İdarəsi” publik hüquqi şəxs, eləcə də 18 yerli turizm şirkəti və 3 mehmanxana təmsilçisi də qatılıb.Nazirlikdən Azərtac-a bildirilib ki, sərgidə respublikamızın turizm imkanlarını əks etdirən 40 kvadratmetr sahədə xüsusi layihə əsasında milli stend quraşdırılıb və sərgiyə gələn ziyarətçi və iştirakçılara paylanması üçün çin və ingilis dillərində müxtəlif növ reklam-çap məhsulları ilə təmin olunur.Aprelin 18-dək davam edəcək sərgidə Azərbaycanla yanaşı, 70-ə yaxın ölkə və 550-yə yaxın şirkət təmsil olunur.xeber100.com

İqtisadi Əməkdaşlıq Təşkilatının iclası keçiriləcək

Aprelin 17-də Tacikistanın paytaxtı Düşənbə şəhərinə İqtisadi Əməkdaşlıq Təşkilatına (İƏT) üzv dövlətlərin Nazirlər Şurasının 23-cü iclası keçiriləcək.İclasda üzv dövlətlərin xarici işlər nazirləri təşkilat çərçivəsində həyata keçirilməsi nəzərdə tutulan layihə və proqramların icrası məsələlərini, eləcə də İƏT-in digər beynəlxalq təşkilatlarla əməkdaşlıq əlaqələrinin genişləndirilməsini müzakirə edəcəklər.Nazirlər təşkilatın “2025-ci ilə qədər perspektivlər” adlı yeni proqramını da nəzərdən keçirəcəklər.xeber100.com

“Azərbaycan Xəzər Dəniz Gəmiçiliyi” QSC-nin məlumatı

“Azərbaycan Xəzər Dəniz Gəmiçiliyi” QSC-nin (AXDG) rəhbər heyəti Xəzər Dəniz Neft Donanmasının dənizçiləri ilə görüşüb.Gəmiçiliyin mətbuat katibliyindən Azərtac-a bildirilib ki, onların qayğıları ilə maraqlanmaq, suallarına cavab vermək məqsədilə baş tutan görüş gəmiçiliyin rəhbəri Rauf Vəliyevin təşəbbüsü ilə reallaşıb.“AXDG” QSC-nin sədri dənizçilərin çoxsaylı suallarını cavablandırıb. Bildirib ki, gəmiçiliyin rəhbərliyi, əməkdaşların sosial rifahının yaxşılaşması və onların təcrübəli dənizçilər kimi inkişaf etməsində hər zaman maraqlıdır. Onun sözlərinə görə, bu məqsədlərə tam nail olmaq üçün hazırda bir sıra layihələr icra olunur və proses növbəti dövrlərdə də davam etdiriləcək.R.Vəliyev “AXDG” QSC-nin strateji hədəflərindən danışıb. “Təbii ki, siz dənizçilərin əzmkarlığı sayəsində bir çox uğura imza atmışıq. Amma qarşıda xeyli görüləcək işlərimiz var. Hazırkı əsas hədəflərimizdən biri peşəkar kadr hazırlığıdır. Bunun üçün təcrübəli dənizçilər gəmilərə gələn gənclərdən köməkliklərini əsirgəməməlidir. Nəzərə almaq lazımdır ki, yenilənən və müasirləşən donanmalarımızda savadlı və gənc dənizçilərin olması daha böyük uğurlara yol aça bilər,”- deyə sədr qeyd edib.Bundan başqa, R.Vəliyev bu il gəmiçiliyin 160 illik yubileyinin qeyd olunacağını da bildirib. Əlavə edib ki, yubiley ilində dənizçilərin sevincinə səbəb olacaq bir sıra maraqlı layihələr həyata keçiriləcək.Müzakirələr zamanı “AXDG” QSC-nin üzən heyətinin aprelin 11-də ölkəmizdə baş tutan prezident seçkilərində yüz faizlik iştirakı da qürurla xatırlanıb. Bildirilib ki, İlham Əliyevin yenidən Azərbaycan Respublikasının Prezidenti seçilməsini dənizçilər də bayram əhval-ruhiyyəsi ilə qarşılayıb. Onun ölkəmizə rəhbərliyi dövründə dənizçilərə göstərilən diqqət və qayğının daha da artdığı, gəmiçilik donanmasının xeyli yeniləndiyi vurğulanıb. Bunun nəticəsidir ki, indi gəmilərimiz təkcə Xəzər dənizində deyil, xarici sularda da Azərbaycan bayrağını dalğalandırır.Görüşdə dənizçilər göstərilən diqqət və qayğıya görə təşəkkürlərini bildiriblər.Qeyd olunub ki, bu formatda görüşlər mütəmadi keçiriləcək.xeber100.com

“Azərbaycan Avtomobil Yolları” Dövlət Agentliyinin məlumatı

Avtonəqliyyat vasitələrinin rahat və maneəsiz şəkildə hərəkətini təmin etmək, paytaxt yollarında sıxlığın azaldılması istiqamətinə “Azərbaycan Avtomobil Yolları” Dövlət Agentliyi tərəfindən Heydər Əliyev prospektində, Bakı Olimpiya Stadionunun qarşısında yeni avtomobil tunelinin inşası davam etdirilir.“Azərbaycan Avtomobil Yolları” Dövlət Agentliyindən “Apa-Economics”ə verilən məlumata görə, tunelin ümumi uzunluğu 655 metr, qapalı hissəsinin uzunluğu isə 125 metr təşkil edir. Avtomobil tuneli hər biri 4,5 metr eni olan 2 hərəkət zolağından ibarət olacaq.Yeni tunelin ümumi eni isə 11,5 təşkil edəcək.Tikinti layihəsinə uyğun olaraq, tunelin prospektin altından keçməsi üçün svay vurma və qazıntı işləri tam olaraq yekunlaşdırılıb, qazılmış tunelin üstü betonlanaraq asfaltlanıb, tunelin içərisində kanalziasiya-drenaj xətləri çəkilib, yaxınlıqdan keçən yüksək təzyiqli kommunikasiya boruların üzərindən 1 aşırımlı və 21 metr uzunluğunda körpü inşa edilib.Hazırda ərazidə layihənin sonuncu mərhələsi həyata keçirilir.Tikinti işlərinin yaxın müddət ərzində yekunlaşdırılması planlaşdırılır.xeber100.com

COMEX-də sonuncu hərraclarda qızılın unsiyasının qiyməti…

Amerika fond bazarında "Dow Jones" indeksi 0,50% - 24 360,14 bəndədək, "S&P 500" 0,29% - 2 656,30 bəndədək, NASDAQ isə 0,47% - 7 106,65 bəndədək ucuzlaşıb."Apa-Economics" xəbər verir ki, Avropa fond bazarlarında "FTSE 100" indeksi 0,09% - 7 264,56 bəndədək, Almaniya DAX-ı 0,22% - 12 442,40 bəndədək, Fransa CAC-40-ı 0,11% - 5 315,02 bəndədək bahalaşıb.COMEX-də sonuncu hərraclarda qızılın unsiyasının qiyməti 6,70 dollar bahalaşaraq 1 348,60 dollara, gümüşün unsiyasının qiyməti 0,17 dollar artaraq 16,65 dollara satılıb.xeber100.com

“Azercell” yeni tarif təqdim edir

"Azercell Telekom" MMC fakturalı və fakturasız xətt sisteminə aid nömrələrdə mövcud olan tariflər üzrə SMS-in qiymətini dəyişdirir.Şirkətdən “Apa-Economics”ə verilən məlumata görə, bu ilin mayın 15-dən etibarən fakturasız (SimSim) xətt sisteminə aid nömrələrdə mövcud olan “Azercellim”, “Bizimkilər”, “Hər yerə”, “GəncSim”, “Bölgə” və “Tələbə birliyi” tarifləri çərçivəsində hər bir SMS-in qiyməti 5 qəpik təşkil edəcək. Eyni zamanda, “Gənc ol” və “Kombo” tarifləri çərçivəsində təqdim edilən paketdən əlavə göndərilən hər bir SMS-in qiyməti 5 qəpik təşkil edəcək.Bundan başqa, mayın 15-dən etibarən fakturalı xətt sisteminə aid nömrələrdə mövcud olan “Bizimkilər”, “Hər yerə”, “Biznes200”, “Dövlətcell”, “SOCAR” və “Mediacell” tarifləri çərçivəsində hər bir SMS-in qiyməti 5 qəpik təşkil edəcək. Eyni zamanda, “Hədsiz” və “Hədsiz Zəng” tarifləri çərçivəsində təqdim edilən paketdən əlavə göndərilən hər bir SMS-in qiyməti 5 qəpik təşkil edəcək.xeber100.com

“Kapital Bank” müştərilərə öz kartlarını təklif edir

"Kapital Bank" müştərilərə 3 valyutaya malik "Visa Trio Gold", "Visa Trio Platinum" və "Visa Trio Infinite" kartlarını təklif edir.Bankdan Azərtac-a bildiriblər ki, artıq müştərilər AZN, USD və EUR valyutasında olan Visa kartlarını birləşdirərək, Visa Trio kartları üzərində istifadə edə bilərlər. Kartın hər üç hesabını bir PİN kod vasitəsilə idarə etmək mümkündür.Kartları müəyyən miqdarda məbləği hesaba əlavə etməklə pulsuz əldə etmək olar. Ödəniş kartları avtomatik olaraq Mobil və İnternet Banking, SMS İnfo, həmçinin SMS Banking xidmətlərinə pulsuz qoşulur. 3D Secure təhlükəsizlik xidmətlərinə qoşulmaq üçün isə "Kapital Bank"ın 196 Sorğu Mərkəzinə müraciət etmək lazımdır."Visa Trio Gold" kartını, həmçinin 1000 AZN ilkin mədaxil etməklə pulsuz əldə etmək olar. Bundan başqa kartın hər 3 hesabı arasında komissiya olmadan Card to Card əməliyyatını etmək mümkündür.xeber100.com

“Azeri Light” markalı neftin qiyməti ucuzlaşıb

Dünya birjalarında neftin qiyməti ucuzlaşıb.Azərtac xəbər verir ki, “Azeri Light” markalı neftin bir barrelinin qiyməti 1,11 dollar ucuzlaşaraq 73,37 dollar olub.Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,16 dollar ucuzlaşaraq 71,86 dollar, Nyu-Yorkun NYMEX (“New York Mercantile Exchange”) birjasında “Light” markalı neftin bir barrelinin qiyməti isə 0,15 dollar azalaraq 66,92 dollar təşkil edib.xeber100.com

“Azərbaycan Dəmir Yolları” QSC-nin məlumatı

Bakı-Kiyev sərnişin qatarının hərəkət cədvəlində dəyişiklik ediləcək.“Azərbaycan Dəmir Yolları” QSC-nin ictimaiyyətlə əlaqələr şöbəsindən Azərtac-a bildirilib ki, dəyişikliyə əsasən, aprelin 21-dən etibarən 369-370 nömrəli Bakı-Xarkov sərnişin qatarının marşrutu Kiyev stansiyasına kimi uzadılacaq. Həmin tarixdən etibarən yeni 369-370 nömrəli Bakı-Kiyev qatarı təyin edilir. Qatar Xarkov, Poltava, Mirqorod və Lubnı stansiyalarından keçəcək.Bakı-Kiyev qatarı Bakı sərnişin stansiyasından həftədə bir dəfə - həftənin VI günləri saat 01:35-də yola düşəcək, Kiyev stansiyasına aprelin 23-dən etibarən həftənin I günləri saat 11:46-da çatacaq və həmin gün saat 14:37-də əks istiqamətə yola düşəcək. Qatar aprelin 26-dan etibarən həftənin IV günləri saat 04:10-da Bakı sərnişin stansiyasına çatacaq.xeber100.com