200 milyon manat ayrılacaq

“2015-ci il ərzində manatın iki dəfə devalvasiyaya uğraması və neftin qiymətinin kəskin düşməsi 2016-cı il üçün təsdiq edilən dövlət büdcəsinə yenidən baxılmasını zəruri etdi. Büdcə təsdiq edilən zaman neftin qiyməti 50 dollardan götürülmüşdü, hazırda isə qiymət 30 dollar civarındadır. Ona görə yeni büdcədə neftin qiyməti 30 dollardan hesablanıb”. Bunu Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bildirib. O, qeyd edib ki, büdcənin həm gəlir, həm də xərclər hissəsinə təxminən 2,3 milyard manat əlavə var: “Əvvəl gəlirlər 14,5 milyard idisə, indi 16,8 manatdır. Xərclər əvvəl 16,2 milyard idisə, hazırda 18, 5 milyarddır. Bunun da 1,6 milyard manatı Dövlət Neft Fondundan transfer edilib,1,7 milyard manatı isə əlavə vergilər hesabına ödəniləcək. Vergilərin əsas hissəsi Vergilər Nazirliyi tərəfindən 6,2 faiz , Gömrük Komitəsi tərəfindən 13 faiz artırılıb”. V.Əhmədov bildirib ki, 2,3 milyard əlavə hissənin 8 milyon manatı Prezident İlham Əliyevi verdiyi sərəncama uyğun olaraq əmək haqqı, pensiya, təqaüd, sosial müavinətlərin artırılmasına, 400 milyon manatı müdafiə xərclərinə, 525 milyon manatı dövlət borcu üçün, 300 milyon manatı isə digər sahələrə ayrılıb. Deputat insanları narahat edən ipoteka məsələsinin də tezliklə həll ediləcəyinə inandığını deyib: “Əsas məsələlərdən biri də ipotekadır. İpoteka üçün 50 milyon manat vəsaitin ayrılması nəzərdə tutulub. Amma dövlət başçısının göstərişinə əsasən, bu sahəyə əlavə 200 milyon manat ayrılacaq. Maliyyə naziri də bildirib ki, hazırda məsələyə baxılır. Yəqin ki, öz müsbət həllini tapacaq. Ən ciddi məsələlərdən biri 2016-cı il üçün kənd təsərrüfatını daha da inkişaf etdirilməsinə nail olmaq, ixrac yönümlü məhsulların istehsalını artırmaq, xüsusilə suvarma sistemlərinə nəzarəti artırmaqdır”. Xəbər100

“Atrabank”ın lisenziyası bərpa oluna bilər

Ötən ay bağlanmış Azərbaycan banklarından daha birinin lisenziyası bərpa oluna bilər. Söhbət “Atrabank”dan gedir. Bankdan verilən məlumata görə, məhkəmə lisenziyanın bərpa edilməsi ilə bağlı müvafiq qərar qəbul edib. Hazırda Azərbaycan Mərkəzi Bankının (AMB) bu qərarı icra etməsi gözlənilir. AMB-dən isə bununla bağlı hələ ki, heç bir məlumat olmadığı bildirilib. Xatırladaq ki, “Atrabank”ın lisenziyası bu il, yanvarın 27-də “Qafqaz İnkişaf Bankı” ilə birlikdə ləğv edilib. Bir qədər sonra hər iki bank Əmanətlərin Sığortalanması Fonduna üzv bankların reyestrindən çıxarılıb və Fonddan ona verilmiş şəhadətnamə ləğv olunub. Amma bəzi məqamlar «Atrabank»ın hələ «kitabının bağlanmadığını» göstərir. Məsələ bundadır ki, ilin əvvəlindən 7 bankın lisenziyası ləğv edilib. Bunlar «Bank of Azərbaycan», «Gəncəbank», «Yunayted Kredit Bank», «NBC BANK», «Atrabank», «Qafqaz İnkişaf Bankı» və «Texnikabank»dır. Doğrudur, sonradan banklardan birinin - «NBC Bank»ın lisenziyası bərpa edilib. Digər banklardan isə «Bank of Azərbaycan», «Gəncəbank», «Yunayted Kredit Bank» və «Texnikabank»ın əmanətçilərinə ƏSF tərəfindən kompensasiyaların qaytarılmasına başlanıb. Göründüyü kimi, «Atrabank» və «Qafqaz İnkişaf Bankı»nın əmanətçilərinə kompensasiyaların verilməsinə hələ başlanmayıb. Qeyd edək ki, bunun üçün həmin banklarda sığopta hadisəsinin baş verdiyi elan edilməlidir. Bununla belə, ƏSF hələ ki, “Atrabank”da sığorta hadisəsinin baş verdiyini bəyan etnəyib və bankın əmanətçilərinə kompensasiya ödənilməsinə başlanmayıb. Baxmayaraq ki, «Atrabank»dan sonra lisenziyası alınmış «Texnikabank»da bu proses artıq başlanıb. Fondun icraçı direktoru Azad Cavadov fins.az-a bildirib ki, qanunvericiliyə əsasən, bankda sığorta hadisəsinin baş verib-vermədiyini AMB-nin müraciəti əsasında məhkəmə müəyyən etməlidir. Bununla bağlı isə qərar yoxdur. Üstəlik, fond rəhbəri istisna etməyib ki, “Atrabank”da və “Qafqaz İnkişaf Bankı”nda sığorta hadisəsi ümumiyyətlə baş verməsin. Bu prosesin nəticsi kimi, bankdan fins.az-a verilən məlumata görə, məhkəmə bankın lisenziyanın bərpa edilməsi ilə bağlı müvafiq qərar qəbul edib. Hazırda Azərbaycan Mərkəzi Bankının (AMB) bu qərarı icra etməsi gözlənilir. Azərbaycanda bağlanmış bankın lisenziyasının bərpa edilməsi halına 2 dəfə rast gəlinib. Bu il, yanvarın 26-da lisenziyası ləğv edilmiş “NBC Bank” bu ayın əvvəli bazara qayıdıb. Bir neçə il bundan əvvəl isə “Kövsərbank”ın (indiki “Caspian Development Bank”) lisenziyası bərpa edilmişdi.

Pendir istehsalı zavodu tikiləcək

Niderlandın “Scherjon” şirkəti İmişli rayonunda süd məhsulları istehsal edəcək zavodun tikilməsi ilə bağlı layihə hazırlayıb. Fins.az xəbər verir ki, bu barədə şirkətin prezidenti Şeryon Hilko vergilər naziri Fazil Məmmədovla görüşündə bildirib. Onun sözlərinə görə, Azərbaycanda əlverişli investisiya mühitin mövcuddur, investorların hüquq və mənafeləri qorunur, xarici sahibkarlara əlverişli iş şəraitinin yaradılıb. Buna görə də, “Scherjon” şirkəti Azərbaycana investisiya qoymağa maraq göstərir. “Scherjon Dairy Equipment Holland BV” şirkətinin təqdim etdiyi avadanlıqlarda “Gouda” və “Edam” növlü holland pendirlərinin istehsalını nəzərdə tutan bu layihə gələcəkdə digər layihələrin də reallaşdırılmasına zəmin yaradacaq.

Müdafiə xərcləri artır

Azərbaycan 2016-cı ildə müdafiə xərclərini 391 mln. manat və ya 21,3% artırır. APA xəbər verir ki,  bu, "Azərbaycan Respublikasının 2016-cı il dövlət büdcəsi haqqında" qanunda dəyişikliklər layihəsində əksini tapıb. Qanun layihəsində bu il üçün müdafiə xərcləri 2 mlrd. 229 mln. manat nəzərdə tutulub. Bu vəsaitin 2 mlrd. 114 mln. manatı müdafiə qüvvələri, 108 mln. 895 min manatı milli təhlükəsizlik, 2 mln. 422 min manatı müdafiə və təhlükəsizlik sahəsində tədqiqatlar, 3 mln. 022 min manatı isə digər kateqoriyalara aid edilməyən xərclərin payına düşür. Qeyd edək ki 2016-cı ilin təsdiqlənmiş büdcəsində cari il üçün müdafiə xərcləri 1 mlrd. 838 mln. manat səviyyəsində proqnozlaşdırılmışdı. Bu vəsaitin 1 mlrd. 723 mln. manatı müdafiə qüvvələri, 108 mln. 895 min manatı milli təhlükəsizlik, 2 mln. 422 min manatı müdafiə və təhlükəsizlik sahəsində tədqiqatlar, 3 mln. 022 min manatı isə digər kateqoriyalara aid edilməyən xərclərin payına düşür. Müdafiə xərclərinin artmasının səbəbi müdafiə qüvvələrinə xərclənəcək vəsaitin 391 mln. manat artırılması ilə bağlıdır.xəbər100  

Dövlət büdcəsi layihəsinin detalları məlum olub

Milli Məclisin fevralın 23-də müzakirə edəcəyi 2016-cı ilin yeni dövlət büdcəsi layihəsinin detalları məlum olub. Layihədə büdcənin gəlirlər hissəsi 2 milyard 256 milyon manat və yaxud 15,5% artırılaraq 16 milyard 822 milyon manata, xərclər hissəsi isə 2 milyard 231 milyon manat və yaxud 13,7% artırılaraq 18 milyard 495 milyon manata, büdcə kəsiri isə 25 milyon manat azaldılaraq 1 milyard 673 milyon manata çatdırılıb. Gəlirlərin strukturunda Vergilər Nazirliyinin öhdəliyi 6,2% artımla 7 milyard 10 milyon manat, Dövlət Gömrük Komitəsinin öhdəliyi 13,8% artımla 1 milyard 810 milyon manat nəzərdə tutulub. Dövlət Neft Fondundan transfertlər isə 26,9% və yaxud 1 milyard 615 milyon manat artırılaraq 7 milyard 615 milyard manata çatdırılıb. Bu, büdcə gəlirlərinin 45,3%-i qədərdir. Digər gəlirlərin isə 13 milyon manat artırılması planlaşdırılır. Xərclərin strukturuna gəlincə isə sosial istiqamətdə ayırmalar 1 milyard 290 milyon manat artırılıb. Ümumiyyətlə isə, büdcə xərclərinin 65,5%-i cari xərclər, 24,9%-i kapital qoyuluşu xərcləri, 9,6%-i isə dövlət borcu ilə bağlı xərclərdir. Yeni büdcənin layihəsində neftin 1 barrelinin qiyməti 2 dəfə azaldılaraq 25 dollara salınıb.

Meyvə-tərəvəz məhsulları ciddi yoxlanılır

Azərbaycanda ümumilikdə 9388 kiloqramdan çox meyvə-tərəvəz məhsulu satışdan çıxarılaraq məhv edilib. Kənd Təsərrüfatı Nazirliyi yanında Dövlət Fitosanitar Nəzarəti Xidmətininin mətbuat katibi Rövşən Ziyanın lent.az-a verdiyi məlumata görə, fevral ayında Bakı şəhərində, eyni zamanda respublikanın bütün bölgələrindəki kənd təsərrüfatı məhsullarının topdan və pərakəndə satış yerlərində aparılan fitosanitar monitorinqlər nəticəsində məhv edilən məhsullar arasında alma (2377 kq), armud (58 kq), heyva (32 kq), nar (79 kq), üzüm (101 kq), sitrus (571 kq), xirnik-xurma (89 kq), kartof (3518 kq), kələm (217 kq), kök (157 kq), soğan (698 kq) və pomidor (114 kq) üstünlük təşkil edib. Bundan başqa, monitorinqlər zamanı istifadəyə yararsız 346 kiloqramdan çox banan meyvəsi satışdan çıxarılaraq məhv edilib. Araşdırma nəticəsində məlum olub ki, məhsulların saxlanılması və qablaşdırılması zamanı müvafiq qaydalara əməl olunmadığı üçün məhsullar qısa müddət ərzində istifadəyə yararsız vəziyyətə düşür və xəstəliklərə yoluxur. Xidmətdən bildirilib ki, hazırda istehlak bazarlarında bütün meyvə və tərəvəz məhsulları ciddi yoxlanılır, məhsullardan götürülmüş nümunələr Dövlət Fitosanitar Nəzarəti Xidmətinin Respublika Karantin Ekspertiza Mərkəzinə və Respublika Toksikologiya Keyfiyyətə Nəzarət Mərkəzinə təqdim edilir və müvafiq analizlər aparılır. Əgər analizlər zamanı məhsulun istehlak üçün yararsız olduğu aşkar edilərsə, dərhal satışdan çıxarılaraq məhv edilir.

Yeni neft nəhəngi yarandı

Böyük Britaniya-Hollandiyanın "Royal Dutch Shell" şirkəti və Britaniyanın "BG Group" şirkəti birləşiblər. Qafqazinfo xarici KİV-ə istinadən xəbər verir ki, analitiklərin fikrincə, bununla da, dünya neft-qaz bazarında ikinci böyük şirkətin əsası qoyulub. Shell-in rəhbəri isə açıqlamasında bildirib ki, fevralın 15-dən etibarən BG Group Royal Dutch Shell-in bir hissəsi olub. Onun sözlərinə görə, bu birləşmə sayəsində daha rəqabətə davamlı şirkətin əsası qoyulub.  

İran Avropaya neft satdı

İran İslam Respublikası sanksiyaların ləğvindən sonra neftlə dolu ilk tankeri Avropaya yola salıb. Rusiyanın "Lukoil" şirkətinin yüklərinin daşınmasını həyata keçirən "Litasco" şirkətinə məxsus tanker Fars Körfəzindəki Xark adasında yerləşən terminaldan yola çıxıb. "Bloomberg" agentliyinin verdiyi məlumata görə, yaxın saatlarda Fransa, İspaniya və Çin şirkətlərinə məxsus tankerlərə də neft yüklənərək Avropaya göndəriləcək. İxrac olunacaq neftin ümumi həcmi 4 milyon bereldir. Qeyd edək ki, İranın vitse-prezidenti Eshaq Canahgiri mart ayına qədər neft ixracının gündə 1, 5 milyon barelə çatıdrılacağını söyləyib.xəbər100  

Kreditlə ərzaq…

  Bəzi supermarketlərdə diskont kartlar qüvvədədir. Yaxın zamanlarda Azərbaycan vətəndaşları ərzağı kreditə alacaqlar. Bu barədə echo.az-a Azərbaycanın Azad İstehlakçılar Birliyinin sədri Eyyub Hüseynov bildirib: “Əsasən kənd yerlərində və paytaxtın bir neçə kiçik mağazasında satıcılar tanış vətəndaşlara ərzaqları borc verirlər, onlar isə aldıqları ərzaqların pulunu tədricən ödəyirlər. Hesab edirəm ki, böhran şəraitində iri hipermarketlər də ərzaqları kreditə verə bilərlər, ən yaxşısı isə bu, faizsiz və ya maksimum 5% kreditlə olardı”, - E.Hüseynov bəyan edib. Onun sözlərinə görə, ərzağı kreditə almaq üçün kartların nominalı 50 AZN-dən çox olmamalı, bir ay müddətində ödənməlidir, bu əsasən iri hipermarketlərə aid olmalıdır. Dayanıqlı İnkişafın Tədqiqi Mərkəzinin sədri Nəriman Ağayev öz növbəsində echo.az-a bildirib ki, Azərbaycan üçün ərzaqların borca verilməsi yenilik deyil, bu ənənəvi şəkildə həyata keçirilir. “İndiyə qədər bizdə kənd yerlərində, ərzaq mağazalarında “nisyə” mal götürürlər. Amma bir qayda olaraq bunu yalnız etibar etdikləri adamlara verirlər. Bəzi supermarketlərdə diskont kartlar qüvvədədir, bu alıcılara ərzaqları müəyyən imtiyazlar ilə almaq imkanı yaradır. Rusiyanın ərzaqları kreditə vermə təcrübəsinin necə işlədiyinə baxmaq və sonradan iri hipermarketlərimiz bu təcrübəni tətbiq edə bilərlər. Bu gün bəzi mağazalar faizsiz borc verirlər. Mən bir sıra mağazalar tanıyıram ki, yoxsul təqaüdçülərə ərzaqları pulsuz çatdırırlar. Sadəcə bütün bunlar gizli edilir, geniş ictimaiyyət üçün yox”, - o qeyd edib. Bununla yanaşı Rusiyada Primorskaya ticarət şəbəkəsi öz alıcılarına ərzaqları kreditə almağı təklif edir. Krediti mikromaliyyə təşkilatı təqdim edir, Reuters məlumat yayıb. Üç, beş və on min rubl (60, 90, 199 manat) dəyərində hədiyyə kartlarını keçən ilin dekabrında Yeni il bayramları ərəfəsində verməyə başlasalar da, onlardan geniş ictimaiyyət indi xəbər tutub. Ticarət şəbəkəsində mal əldə etmək üçün istehlakçı kreditini bir aydan üç aya kimi götürmək olar, faiz dərəcəsi kredit müddətindən asılıdır və 3, ya 5 faiz arasında dəyişir. Aksiya martın 30-da başa çatacaq. Şəbəkənin marketinq şöbəsinin rəisi qeyd  edib ki, bu təklif əsasən imtahanı qeyd etmək istəyən  tələbələr üçün sərfəli ola bilər. Əsasən spirtli içkilərin və delikateslərin götürüldüyü qeyd edilib, satışların pik həddi Yeni il ərəfəsinə olub. Buna bənzər ərzaq alışı sistemi “Aşan” ticarət şəbəkəsində də istifadə edilir. Bu şəbəkədə müştərilərə ani istifadə imkanı ilə istehlakçı kreditini qeydiyyatdan keçirmək imkanı verilir.    

17 mərtəbə, 3 blok, 255 mənzil…

  “Jurnalistlər üçün tikilən ikinci binada hazırda təmir işləri davam edir” Bu barədə azvision.az-a Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli bildirib. “Jurnalistlər üçün tikilən binada işlər dayandırılmayıb, davam edir. Hələ ki, heç bir yenilik yoxdur. Yenilik olan kimi mətbuata açıqlama veriləcək”,-deyə V.Səfərli vurğulayıb. Binanın bu il təhvil veriləcəyi gözlənilir. Qeyd edək ki, yeni tikilən bina 17 mərtəbədən, 3 blokdan, 255 mənzildən ibarət olacaq. Xatırladaq ki, 2010-cu il iyulun 22-də Prezident İlham Əliyev mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədi ilə KİV-in İnkişafına Dövlət Dəstəyi Fonduna 5 milyon manat vəsait ayırıb. 2013-cü il iyulun 22-də jurnalistlər üçün Bakının Bibiheybət qəsəbəsində tikilmiş çoxmərtəbəli bina istifadəyə verilib. Ümumilikdə 156 jurnalist mənzillə təmin olunub. Prezident İlham Əliyevin sərəncamı ilə jurnalistlər üçün tikiləcək ikinci binanın təməli isə 22 iyul 2013-cü ildə qoyulub.Xəbər100