“Azərbaycan Xəzər Dəniz Gəmiçiliyi” QSC profilaktik tədbirləri davam etdirir

“Azərbaycanda yeni koronavirus xəstəliyinin yayılmasının qarşısının alınmasına dair fəaliyyət planı”nın icrasını təmin etmək məqsədilə “Azərbaycan Xəzər Dəniz Gəmiçiliyi” QSC (ASCO) profilaktik tədbirləri davam etdirir.ASCO-dan Azərtac-a bildirilib ki, müəyyənləşdirilmiş qrafikə uyğun olaraq növbəti dezinfeksiya işləri “Qubadlı”, “Geofizik-1”, “Geofizik-3”, “PS-153”, “Qaradağ-4”, “Narva”, “Vixr-9”, “Bunkerovşik-4”, “Naxçıvan”, “BMK-7220”, “BMK-1058”, “BMK-4211”, “Aura”, “Balakən”, “Qarabağ” gəmilərində, 674 saylı üzən emalatxanada aparılıb.Proses ASCO-nun Sosial inkişaf və nəqliyyat şöbəsinin əməkdaşlarının nəzarəti ilə yerinə yetirilib.xeber100.com

Bakı Nəqliyyat Agentliyinin məlumatına görə…

Tibbi Ərazi Bölmələrini İdarəetmə Birliyi (TƏBİB) ilə aparılan müzakirələrin nəticəsi olaraq avtobuslarda sərinləndirmə sistemlərinin işə salınmasına qərar verilib.Bakı Nəqliyyat Agentliyindən Azərtac-a bildirilib ki, sərinləndirmə sistemlərinin işlədilməsi mütəxəssislərin tövsiyə etdiyi qaydalar nəzərə alınmaqla həyata keçiriləcək. Bununla bağlı daşıyıcı şirkətlərə də müvafiq tapşırıqlar verilib və mərhələ ilə sərinləndirmə sistemlərinin işə salınması təmin olunacaq.xeber100.com

AZAL 217 Azərbaycan vətəndaşını Nyu-Yorkdan Bakıya gətirib

İyunun 11-də “Azərbaycan Hava Yolları” (AZAL) aviaşirkəti tərəfindən 217 Azərbaycan vətəndaşı çarter reysi ilə Nyu-Yorkdan Bakıya gətirilib.AZAL-dan Azərtac-a bildirilib ki, müəyyən edilmiş prosedura əsasən sözügedən reysin sərnişinləri karantinə yerləşdiriliblər. Milli aviadaşıyıcı həmvətənlərimizin qaytarılması üzrə çarter reyslərini Nazirlər Kabineti yanında Operativ Qərargah tərəfindən müəyyən edilmiş plana əsasən yerinə yetirir.xeber100.com

Bakı Fond Birjasında hərrac keçirilib

İyunun 10-da Bakı Fond Birjasında (BFB) Azərbaycan Respublikasının Mərkəzi Bankının (AMB) 50102179S dövlət qeydiyyat nömrəli, 100 milyon manat həcmində, 28 gün tədavül müddətli qısamüddətli notlarının yerləşdirilməsi üzrə hərrac keçirilib.BFB-dən Azərtac-a bildirilib ki, hərrac zamanı 8 investor tərəfindən qiyməti 99.4773 AZN (6.76 faiz) olan 16 sifariş təqdim edilib. Sifarişlərin nominal qiymətlə ümumi məbləği 98 milyon 266 min 200 AZN olub. AMB-nin qərarına əsasən notların kəsmə və orta ölçülmüş qiyməti 99.4773 AZN (6.76 faiz) müəyyən edilib. Hərrac nəticəsində notların yerləşdirilmiş həcmi 98 milyon 266 min 200 AZN təşkil edib. Notlar iyulun 8-də ödəniləcək.xeber100.com

Beynəlxalq hava əlaqəsinin bərpası planlaşdırılır

Qazaxıstanla Azərbaycan arasında beynəlxalq hava əlaqəsinin bərpası iyunun 15-ə planlaşıdırılırdı. Lakin koronavirusa yoluxamaların sayında artım səbəbindən Qazaxıstanla Azərbaycan arasında hava əlaqəsinin bərpası məsələsi iyulun 1-nə kimi təxirə salınıb. Bu tarixdən sonra avireyslərin bərpası müzakirə olunacaq.Azərtac xəbər verir ki, Qazaxıstan və Türkiyə arasında beynəlxalq aviareyslərinin iyunun sonunda bərpa olunması planlaşdırılır. Bu barədə Qazaxıstanın Sənaye və İnfrastruktur İnkişafı naziri Beybut Atamkulov deyib.Ölkədə beynəlxalq aviareyslərin mərhələli şəkildə bərpası planlaşdırılır. Mayın 1-dən etibarən Nur-Sultan və Almatıdan Qazaxıstanın 20 şəhərinə daxili reyslər mərhələli şəkildə bərpa olunub. Hazırda daxili reyslər həftədə 44 dəfə 349 uçuş (gündə 49 reys) tezliyi ilə həyata keçirilir və təxminən 188 min aviabilet satılıb.İyunun 1-dən etibarən 54 cüt sərnişin qatarı bərpa olunub. İyunun 8-nə olan məlumata görə, mayın 15-dən 645 min bilet satılıb.Qeyd edək ki, Qazaxıstanda koronavirus epidemiyası səbəbindən fövqəladə vəziyyət rejimi zamanı 450-dən çox aviareys ləğv edilmişdi.xeber100.com

“Reuters” agentliyinin məlumatı əsasında

BP cari ilin sonuna kimi işçilərinin sayını 15 faiz azaldacaq.Azərtac xəbər verir ki, bu barədə “Reuters” məlumat yayıb. Bildirilir ki, BP koronavirus səbəbindən bu ilin sonuna qədər işçi qüvvəsini 15 faiz azaldacaq.Şirkətin sözçüsü məsələ ilə bağlı şərh verməkdən imtina edib.Qeyd edək ki, BP-nin baş icraçı direktoru Bernard Luni şirkətin işçi qüvvəsini 10 min nəfər azaltmağı planlaşdırdığını bildirib. Bu, ilin son rəqəmlərinə görə ən çox işçi ixtisarı olacaq.xeber100.com

OPEC Nazirlər Şurasının 179-cu iclası keçirilir

İyunun 6-da OPEC Nazirlər Şurasının videokonfrans formatında 179-cu iclası keçirilir.Azərtac xəbər verir ki, Əlcəzairin Energetika naziri, OPEC Konfransının prezidenti Məhəmməd Arkabın sədrliyi ilə baş tutan iclas canlı yayımlanır. İclasda qlobal neft bazarının vəziyyəti, inkişaf tendensiyaları və hasilatın azaldılması öhdəliklərinin icrası müzakirə edilir.Bakı vaxtı ilə saat 18:00-dan daha sonra isə OPEC və qeyri-OPEC ölkələrinin nazirlərinin 11-ci videogörüşü keçiriləcək. Görüşdə Azərbaycanın Energetika naziri Pərviz Şahbazov da iştirak edəcək.İclasda “OPEC+” üzrə gündəlik neft hasilatının 9,7 milyon barrel azaldılması ilə bağlı mövcud “Əməkdaşlıq Bəyannaməsi”nin müddətinin iyundan sonra da uzadılması məsələsinə baxılması və müvafiq sazişin imzalanması nəzərdə tutulur.Xatırladaq ki, “OPEC+” ölkələri nazirlərinin bu il aprelin 9-u və 12-də keçirilən görüşlərinin nəticəsi olaraq qəbul edilmiş və gündəlik xam neft hasilatının may-iyunda 9,7 milyon barrel, iyul-dekabrda 7,7 milyon barrel, 2021-ci ilin yanvarından 2022-ci ilin aprelinədək isə 5,8 milyon barrel azaldılmasını nəzərdə tutan “Əməkdaşlıq Bəyannaməsi”nə Azərbaycan da qoşulub.2018-ci ilin oktyabr ayında gündəlik xam neft hasilatı 718 min barrel olan Azərbaycan yeni razılaşma çərçivəsində hasilatı bu ilin may-iyun aylarında həmin səviyyədən 164 min barrel azaltmalıdır. Bu müddət ərzində Azərbaycan gündəlik xam neft hasilatını 554 min barrel həcmində saxlamalıdır.Azərbaycanın öhdəlikləri iyul-dekabr aylarında 131 min barrel, 2021-ci il və 2022-ci ilin aprel ayı ərzində isə 98 min barrel müəyyənləşib. Kvotalara müvafiq olaraq ölkəmizdə gündəlik xam neft hasilatının həcmi iyulun 1-dən ilin sonunadək 587 min barreli, 2021-ci ilin yanvarından 2022-ci ilin aprelinədək isə 620 min barreli keçməməlidir.Mayın 1-dən etibarən “Azəri-Çıraq-Dərinsulu Günəşli” yataqlarında, “Azneft” İB, Birgə Müəssisələr və Əməliyyat Şirkətləri üzrə gündəlik hasilatın azaldılması prosesi həyata keçirilir.xeber100.com    

“Azərbaycan Hava Yolları” Ankaradan Bakıya çarter reysi həyata keçirib

İyunun 5-də “Azərbaycan Hava Yolları” Ankaradan Bakıya çarter reysi həyata keçirib.“Azərbaycan Hava Yolları” QSC-nin mətbuat xidmətindən Azərtac-a bildirilib ki, həmin reyslə 144 nəfər Azərbaycan vətəndaşı Bakıya çatdırılıb.Ölkəyə gələn bütün sərnişinlər mütləq qaydada karantinə yerləşdirilib.Qeyd edək ki, həmyerlilərimizin vətənə çatdırılması üçün çarter reysləri AZAL tərəfindən Azərbaycan Respublikasının Nazirlər Kabineti yanında Operativ Qərargahın müəyyən etdiyi plana uyğun həyata keçirilir.xeber100.com

TAP boru kəmərinin təklif mərhələsi gələn il başlayacaq

Azərbaycan təbii qazını Avropaya çatdıracaq TAP boru kəmərinin bazar sınaqları (market test) üzrə təklif mərhələsi gələn il başlayacaq.Azərtac xəbər verir ki, bu barədə boru kəmərinin operatoru olan TAP AG şirkəti məlumat yayıb. Üç ötürücü sistem operatoru – TAP AG, “Snam Rete Gas” və “DESFA” davam edən bazar sınaqları üzrə məcburi təklif mərhələsinin 2021-ci ilin iyul ayında baş tutacağını elan edib. Hər 3 operator son bazar şərtlərini nəzərə alaraq, enerji bazarlarının bərpa olunmasına daha çox vaxt ayırmaq istəyir.Xatırladaq ki, ötən il iyulun əvvəlində TAP konsorsiumu təbii qaz tədarükçülərinin maraqlarını ifadə etməyə imkan verəcək bazar sınaqlarına başlayıb. Məqsəd sonrakı mərhələdə TAP-ın genişləndirilməsi imkanlarını araşdırmaqdır.Qeyd edək ki, TAP layihəsi çərçivəsində Yunanıstanda sınaq işləri tamamlanıb. Mayın 20-dən isə təbii qazın TAP-ın Albaniyadakı 4 kilometrlik hissəsinə - Yunanıstan-Albaniya sərhədində və Bilisht regionunun yaxınlığındakı ölçmə stansiyasına nəqlinə başlanılıb. Bu hissə istifadəyə verildikdən sonra qazın qarşıdakı həftələrdə və aylarda boru kəmərinin Albaniyadakı digər hissələrinə tədricən daxil edilməsi həyata keçiriləcək.xeber100.com

Marşrut avtobusları yeni qaydalarla fəaliyyət göstərəcək

Rayonlararası müntəzəm marşrut avtobusları yeni qaydalarla fəaliyyət göstərəcək.Azərtac xəbər verir ki, bu barədə Dövlət Avtomobil Nəqliyyatı Xidmətinin (DANX) İctimaiyyətlə əlaqələr sektorunun müdiri Nuridə Allahyarova deyib.O bildirib ki, Tibbi Ərazi Bölmələrini İdarəetmə Birliyinin tövsiyələrinə əsasən avtobuslar hazır vəziyyətə gətirilib. Nazirlər Kabineti yanında Operativ Qərargah rayonlararası müntəzəm sərnişindaşımaya qoyulan məhdudiyyəti ləğv edən zaman avtobuslar yenidən fəaliyyətə başlayacaq. Lakin avtobuslar səfərlərə tam dolu şəkildə çıxmayacaq. İstirahət üçün nəzərdə tutulan yerlərdə DANX-ın müfəttişləri də olacaq, onlar 3 saat müddətindən çox səfər edən avtobusların sərnişin və heyətinin həmin istirahət mərkəzində asudə vaxtlarının təmin edilməsinə nəzarət edəcəklər.N.Allahyarovanın sözlərinə görə, avtobusların salonu həmin müddətdə tamamilə boşaldılacaq, təmizlik işləri aparılacaq. Bununla yanaşı, heç bir sərnişin maskasız avtobusa buraxılmayacaq. İlkin olaraq maskasız sərnişinlər avtovağzal və avtostansiyalarda maska ilə təmin ediləcək. Ancaq sonradan sərnişinlər özləri qaydalara riayət edərək maska ilə gəlməlidirlər.DANX-ın nümayəndəsi qeyd edib ki, avtobuslarda qiymət artımının olmamasına da xüsusi nəzarət ediləcək.xeber100.com