Abdulla Şaiqin mənzil-muzeyində “Muzeylər və mədəni landşaftlar” devizi altında “Milli mədəni irsin qorunmasında memorial muzeylərin rolu” mövzusunda tədbir keçirilib. Mədəniyyət və Turizm Nazirliyindən Azərtac-a bildirilib ki, tədbirdə muzeyin direktoru, Əməkdar Mədəniyyət İşçisi Ülkər Talıbzadə, Azərbaycan Turizm və Menecment Universitetinin müəllimi, professor Minaxanım Əsədli və başqaları çıxış edərək mövzunun aktuallığından danışıblar. Bildirilib ki, muzeylər qeyri-maddi mədəni irsin qoruyucuları olmaqla yanaşı, mədəni landşaftın ayrılmaz tərkib hissəsinə çevrilib. Muzeylər tarixlə və təbiətlə qarşılıqlı əlaqədə olaraq ölkənin mənzərələrini sevdirməklə insanı təbiətin bir parçasına çevirir, torpağını onun qürur mənbəyi edir, soy-kökünə bağlılığını təmin edir. Qeyd olunub ki, şair, nasir, dramaturq, pedaqoq, ədəbiyyatşünas alim, tərcüməçi Abdulla Şaiq əsərlərində Azərbaycan təbiətinə, onun flora və fauna aləminə xüsusi yer verib. O, milli düşüncəyə sahib nəsil yetişdirməyə, Azərbaycan dilini, folklorunu, o cümlədən təbiətini sevdirməyə çalışıb. Daha sonra tədbirdə “Abdulla Şaiq yaradıcılığında təbiət hadisələrinin inikası”, “Abdulla Şaiq nəsrində Azərbaycan təbiəti”, “Abdulla Şaiq poeziyasında təbiət təsviri” mövzusunda məruzələr dinlənilib. Sonda tədbir iştirakçıları gənc rəssamların Abdulla Şaiqin Azərbaycanın təbiətini vəsf edən əsərlərindən ilhamlanaraq çəkdikləri əsərlərinə baxıblar.
