“Ölən dünyanın yaddaşı” adlı film nümayiş olunacaq

Oktyabrın 28-də Beynəlxalq Muğam Mərkəzində ARB “Aranfilm” yaradıcılıq mərkəzinin istehsal etdiyi “Ölən dünyanın yaddaşı” adlı film nümayiş olunacaq.Azərtac xəbər verir ki, ekran əsəri Xalq yazıçısı İsmayıl Şıxlının 100 illik yubileyinə həsr edilib.Qeyd edək ki, tədbir Prezident İlham Əliyevin görkəmli ədibin 100 illik yubileyinin qeyd olunması haqqında imzaladığı müvafiq Sərəncam əsasında hazırlanmış tədbirlər planına uyğun olaraq təşkil edilib.Xalq yazıçısı İsmayıl Şıxlı koloritli xarakterlər və yüksək mənəvi-əxlaqi keyfiyyətlərə malik zəngin yaradıcılığı ilə Azərbaycan xalqının bədii fikir salnaməsinə yeni parlaq səhifə yazmış söz ustalarındandır. Onun yaradıcılığı bədii dilin obrazlılığı, daxili aləmin təsvirinin genişliyi və əlvanlığı ilə seçilir. Eyni zamanda, xalqımızın taleyüklü məsələlərinə daim vətəndaş, ziyalı mövqeyi nümayiş etdirmiş İsmayıl Şıxlının fəaliyyəti bütövlükdə azərbaycançılıq məfkurəsinə sədaqətin və ənənəvi dəyərlərə ehtiramın bariz nümunəsidir.xeber100.com

Bəstəkarlar İttifaqının 85 illiyinə həsr olunmuş festival keçiriləcək

Oktyabrın 25–dən 28-dək Bakıda Azərbaycan Bəstəkarlar İttifaqının 85 illiyinə həsr olunmuş musiqi festivalı keçiriləcək.Bəstəkarlar İttifaqından Azərtac-a bildirilib ki, oktyabrın 25-də festival iştirakçıları Fəxri xiyabanı və Şəhidlər xiyabanını ziyarət edəcək. Sonra Azərbaycan Bəstəkarlar İttifaqının konfrans zalında KİV nümayəndələri üçün mətbuat konfransı keçiriləcək.Festivalın açılışı elə həmin gün Ü.Hacıbəyli adına Azərbaycan Dövlət Simfonik Orkestrinin (dirijor – M.Mehmandarov) iştirakı ilə M.Maqomayev adına Azərbaycan Dövlət Akademik Filarmoniyasında reallaşacaq.Festival çərçivəsində Kamera və orqan musiqisi zalında orqan musiqisi və Q.Qarayev adına Azərbaycan Dövlət Kamera Orkestrinin konserti, M.Maqomayev adına Azərbaycan Dövlət Akademik Filarmoniyasında Azərbaycan Dövlət Xalq Çalğı Alətləri Orkestrinin konserti, Azərbaycan Bəstəkarlar İttifaqında “Son illərdə Azərbaycan musiqi mədəniyyətinin nailiyyətləri və perspektivləri” mövzusunda elmi konfrans, Ü.Hacıbəyli adına Bakı Musiqi Akademiyasında kamera konserti, Azərbaycan Dövlət Akademik Opera və Balet Teatrında Fikrət Əmirovun “Sevil” operasının tamaşası, R.Behbudov adına Dövlət Mahnı Teatrında Zabitlər Evinin “Sərhədçi” İnstrumental Ansamblının konserti və Azərbaycan Bəstəkarlar İttifaqında kamera-instrumental və vokal musiqisindən ibarət konsert təqdim ediləcək.xeber100.com  

“Muğam axşamları” layihəsi çərçivəsində “Şur” muğamı təqdim olunacaq

Oktyabrın 25-də Beynəlxalq Muğam Mərkəzində “Muğam axşamları” layihəsi çərçivəsində “Şur” muğamı təqdim olunacaq.Mərkəzdən Azərtac-a bildirilib ki, muğam dəsgahları içərisində ən sanballı, irihəcmli dəsgahlardan biri sayılan “Şur” muğamı bu dəfə Əməkdar artist Səbuhi İbayev və Muğam televiziya müsabiqəsinin qalibi Səbinə Ərəbli tərəfindən ifa ediləcək.İfaçılar Rövşən Qurbanovun rəhbərliyi ilə “Buta” instrumental ansamblı tərəfindən müşayiət olunacaq.xeber100.com

Azərbaycan Teatr Xadimləri İttifaqının XIV konfransı işə başlayıb

Oktyabrın 22-də “Park Inn” otelində Azərbaycan Teatr Xadimləri İttifaqının XIV konfransı işə başlayıb.Azərtac xəbər verir ki, konfransda respublikanın tanınmış mədəniyyət və incəsənət xadimləri, habelə Mədəniyyət Nazirliyinin rəhbərliyi iştirak edir.Azərbaycan Teatr Xadimləri İttifaqının sədri, Xalq artisti Azər Paşa Nemətov çıxış edərək konfransın əhəmiyyətindən söz açıb. Bildirib ki, konfransa 84 nəfər nümayəndə seçilib. Onlardan 82 nəfəri hazırda tədbirdə iştirak edir, digər iki nəfər isə üzrlü səbəbdən konfransa qatılmayıb.O, Azərbaycan teatrının keçdiyi inkişaf yolundan, bu sahəyə göstərilən dövlətin diqqət və qayğısından bəhs edib.Sonra Azərbaycan Teatr Xadimləri İttifaqının fəaliyyətinə həsr edilmiş videoçarx nümayiş olunub.Tədbir çıxışlarla davam edir.xeber100.com

Pantomima Teatrı noyabr ayının repertuarını təqdim edir

Gələn ay Azərbaycan Dövlət Pantomima Teatrının səhnəsində maraqlı səhnə əsərləri göstəriləcək.Azərtac repertuarı təqdim edir: 2 noyabr – “Ağ bığlılar” 3 noyabr- “İt gəzdirən xanım” 9 noyabr – “Dejavü” 10 noyabr – “Qoca və Mələk” 16 noyabr – “Underground” 17 noyabr – “Kişilər və qadınlar” 23 noyabr- “6+1 № PALATA” 24 noyabr – “Katarsis” 30 noyabr – “Kişilər və qadınlar” Tamaşalar müvafiq olaraq saat 18:00-da nümayiş ediləcək.xeber100.com  

Azərbaycan turizminə həsr olunmuş seminar keçiriləcək

Noyabrın 19-da Polşanın paytaxtı Varşavada yerli turizm agentlikləri üçün “Polşa və Azərbaycan arasında turizmin inkişafı” mövzusunda seminar keçiriləcək.Azərtac xəbər verir ki, Polşanın İnvestisiyalar və Ticarət üzrə Agentliyi tərəfindən təşkil olunacaq seminarın əsas məqsədi iki ölkə arasında turizm sahəsində əməkdaşlığı genişləndirməkdir. Tədbir zamanı iştirakçılar Azərbaycanın turizm potensialı, həmçinin mədəniyyəti, təbiəti, mətbəxi ilə yaxından tanış olmaq imkanı əldə edəcəklər.Seminarın sonunda iştirakçılardan bir neçəsi Azərbaycana səyahət paketi qazana biləcək.xeber100.com

Beynəlxalq Muğam Mərkəzində “Unudulmayanlar” layihəsi çərçivəsində

Oktyabrın 19-da Beynəlxalq Muğam Mərkəzində “Unudulmayanlar” layihəsi çərçivəsində xanəndə Sara Qədimovanın xatirə gecəsi keçirilib.Azərtac xəbər verir ki, gecənin aparıcısı yazıçı-publisist Mustafa Çəmənli istedadlı xanəndənin həyat və yaradıcılığı barədə danışıb. O qeyd edib ki, Sara Qədimova öz adını Azərbaycan musiqisi tarixinə qızıl hərflərlə yazdırıb, onun yaradıcılığı ölkə hüdudları xaricində də yaxşı tanınırdı.M.Çəmənli diqqətə çatdırıb ki, özünün muğam, xalq və bəstəkar mahnılarının unikal ifa tərzi ilə məşhur olan Sara Qədimova peşəkar karyerasına dahi Üzeyir Hacıbəylinin xeyir-duası ilə başlayıb. O, Qurban Pirimov, Zülfi Adıgözəlov, Əhməd Bakıxanov, Hüseynqulu Sarabski, Seyid Şuşinski, Xan Şuşinski kimi ustad sənətkarların yetirməsi idi.Aparıcı Sara Qədimovanın “Şur dəsgahı”, “Mahur-hindi”, “Bayatı-şiraz”, “Rast”, “Segah”, “Qatar”, “Şahnaz” kimi mürəkkəb muğamları gözəl ifa etdiyini vurğulayıb. Həmin ifalar Azərbaycan Dövlət Teleradio Şirkətinin Qızıl Fondunda saxlanılır.Sonra tanınmış muğam ustalarının ifasında məşhur xanəndənin repertuarından əsərlər səsləndirilib.xeber100.com

Milli Dram Teatrında ikihissəli komediya-tamaşa nümayiş olunub

Azərbaycan Dövlət Akademik Milli Dram Teatrının səhnəsində Cəlil Məmmədquluzadənin “Ölülər” pyesi əsasında hazırlanmış eyniadlı ikihissəli komediya-tamaşa nümayiş olunub.Azərtac xəbər verir ki, tamaşada görkəmli bəstəkar, Xalq artisti Qara Qarayevin “Ölülər” əsəri üçün bəstələdiyi musiqi yeni versiyada təqdim edilib.Mədəniyyət Nazirliyinin sifarişi ilə hazırlanan səhnə əsərinin elmi məsləhətçisi akademik İsa Həbibbəylidir.“Ölülər”in Şeyx Nəsrullahı Xalq artisti Nurəddin Mehdixanlı, Kefli İsgəndəri isə Əməkdar artist Anar Heybətov olub.Tamaşada digər rolları Xalq artistləri Laləzar Mustafayeva, Rafiq Əzimov, Hacı İsmayılov, Sabir Məmmədov, Əjdər Həmidov, Əməkdar artistlər Aslan Şirin, Elşən Rüstəmov, Əli Nur, Elxan Quliyev, Məzahir Cəlilov, Kazım Həsənquliyev, Mirzə Ağabəyli, aktyorlar Elçin Əfəndi, Ramin Şıxəliyev və başqaları canlandırıb.Xronometrajı 130 dəqiqə olan səhnə əsərində rəsmlərin quruluşu Azər Paşa Nemətova məxsusdur.Əsərdəki mənəvi əsarət, fanatizm və cəhalət böyük cəsarətlə aktyorların ifasında özünəməxsus çalarlarla açılır. Belə ki, yaradıcı heyət Cəlil Məmmədquluzadə düşüncələrini yüksək məharətlə ifa edərək XX əsrin əvvəllərində Azərbaycanda baş verən prosesləri, mövhumat və cahilliyin poetik və dramatik lövhələrini dolğun təcəssüm etdirə bilirlər.xeber100.com

“Türkdilli Dövlətlərin Əməkdaşlıq Şurası-10” adlı kitab sərgisi açılıb

Oktyabrın 13-də Milli Kitabxanada Türkdilli Dövlətlərin Əməkdaşlıq Şurasının yaradılmasının 10 illiyi münasibətilə “Türkdilli Dövlətlərin Əməkdaşlıq Şurası-10” adlı kitab sərgisi açılıb.Kitabxanadan Azərtac-a bildiriblər ki, sərgidə türkdilli dövlətlərin ölkəmizlə siyasi, iqtisadi, mədəni əlaqələri, türkdilli ölkələrin tarixi, ədəbiyyatı, siyasəti, mədəniyyəti, incəsənəti və türk dünyasının tanınmış şəxsiyyətləri haqqında Azərbaycan dilində və xarici dillərdə kitab, dövri mətbuat materialları nümayiş olunur.Sərgi bir həftə davam edəcək.xeber100.com

“Art Tover” rəsm qalereyasında xalça sərgisi açılacaq

Oktyabrın 12-də İçərişəhərdə yerləşən “Art Tover” rəsm qalereyasında “Azərbaycan xalçaları” adlı sərgi açılacaq.Azərtac xəbər verir ki, sərgi “İçərişəhər” Dövlət Tarix-Memarlıq Qoruğunun dəstəyi, “Arts Council Azerbaijan” təşkilatının təşəbbüsü ilə reallaşacaq.Dekorativ Tətbiqi Sənət Festivalı çərçivəsində təşkil olunacaq sərgidə müxtəlif növ xalçalar nümayiş ediləcək. Sərginin təqdimatında hər kəs iştirak edə bilər.xeber100.com