“Jara 2019” Dördüncü Beynəlxalq Musiqi Festivalının açılışı olub

İyulun 25-də Xəzər dənizinin sahilindəki ən gözəl istirahət mərkəzlərinin birində keçiriləcək "Jara 2019" Dördüncü Beynəlxalq Musiqi Festivalının açılışı olub.Azərtac xəbər verir ki, konsertin ilk günüdə Filipp Kirkorov, A’Studio, Vera Brejneva, Bosson, Rita Dakota, Dmitri Matatov, Mozgi, Qlyuk’oza, Nikolay Baskov, Kristina Orbakayte, Burito, Emin Ağalarov, Elina Çaqa, Zivert, Aleksandr Panayotov, Slava, Qriqori Leps, Ani Lopak, Lolita, Sergey Lazarev, Albina Canabaeva, Maks Barskix, Artik & Asti, Olqa Buzova, Alessandro Safina, Mişa Romanova, Çingiz Mustafayev, MONATIK, Zülfiyə Xanbabayeva, Vremya & Steklo qrupları və başqaları çıxış ediblər.İfaçılar öz repertuarlarında hit mahnıları səsləndiriblər. Qeyd edək ki, festivalın təşkilatçıları Emin Ağalarov, Qriqori Leps və Sergey Kojevnikovdur.xeber100.com

Milli Kino Gününə həsr olunmuş tədbir keçiriləcək

Mədəniyyət Nazirliyinin təşkilatçılığı ilə avqustun 2-də Nizami Kino Mərkəzində Milli Kino Gününə həsr olunmuş tədbir keçiriləcək.Nazirlikdən Azərtac-a bildirilib ki, mədəniyyət və incəsənət xadimlərinin iştirak edəcəyi tədbirdə dövlət studiyalarında son illər ərzində görülmüş işlər haqqında videoçarxlar vasitəsilə məlumatın verilməsi və bir qrup kino xadiminin mükafatlandırılması nəzərdə tutulur.Həmçinin tədbir çərçivəsində dövlət sifarişi ilə istehsal olunmuş, gənc rejissorlar Kamal Yaşarın “Dan yeli”, Pərviz Həsənovun “Soraq”, eləcə də Orxan Ağazadənin müstəqil şəkildə çəkdiyi “Oturacaqlar” qısametrajlı bədii filmləri nümayiş olunacaq.xeber100.com

“İtalyan baharı” kinofestivalı keçiriləcək

Çinin Xaynan vilayəti ilin sonunda keçiriləcək “İtalyan baharı” kinofestivalının açılışına hazırlaşır.TASS agentliyi xəbər verir ki, kino həvəskarları iyulun 26-dan avqustun 4-dək böyük ekranlarda italyan kinematoqrafiyasının peşəkarlarının çəkdiyi film dəryasına baş vura biləcəklər.Mərasim Çinin Sanya, Xaykou, Vanin, Dunfan, Tyunçjun şəhərlərində keçiriləcək. Hər həftəsonu tamaşaçılar italyan kino sənətinin 10 ən yaxşı filmlərini izləmək şansı əldə edəcəklər.Kinofestival rejissor Canluka Vannuççinin “Məşhur olmaq üçün yeddi gün” (7 Days to Get Famous, 2019) komediyası ilə başlanacaq.xeber100.com

Kinematoqrafçılar İttifaqının Konfransı keçirildi

Nəhayət ki, gözlənilən an çatdı, Azərbaycan Kinematoqrafçılar İttifaqının konfransı baş tutdu. 16 iyul tarixində Azərbaycan Kinematoqrafçılar İttifaqının üzvləri bir araya gələrək konfransın gündəliyi, yeni nizamnamə, idarə heyətinin üzvlərini  seçilməsi məsələsini müzakirə etdilər. Konfransı açıq elan edən AKİ katibi Əli İsa Cabbarov neçə illik fasilədən sonra üzvlərin bir araya gəlməsinin və uğurlu bir dönəmin başlanmasını elan etdi və ilk sözü Azərbaycan Kinmatoqrafçılar İttifaqının sədri Rüstəm İbrahimbəyova verdi. İttifaq üzvlərini salamlayan R.İbrahimbəyov öz çıxışında bildirdi ki, AKİ yenidən  aktiv fəaliyyətinə start verdi: “Böyük bir tarixə malik Azərbaycan Kinematoqrafçılar İttifaqının fəaliyyəti hər zaman diqqət mərkəzində dayanıb. Bu da o deməkdir ki. AKİ öz fəaliyyəti, gördüyü işlərlə diqqətdədir. Bu gün bir araya gəlməyimizin səbəbi: biz hər zaman olduğu kimi, yenə də öz işimizin başındayıq və hər zamankı kimi Azərbaycan kinosunun inkişafında görəcəyimiz işlərlə böyük rol oynayacağıq”.R.İbrahimbəyovun çıxışından sonra AKİ katibi Əli İsa Cabbarov konfransın nizamnaməsini təqdim etdi, təkliflər irəli sürüldü, qurultayın neçə ildən bir keçirilmə məsələsi müzakrə edildi. Müzakirədən sonra səsvermə yolu ilə AKİ-nin yeni sədri seçildi, Rüstəm İbrahimbəyov yenidən sədr oldu.Daha sonra idarə heyətinin üzvləri və katibliyin də seçiminə səs verildi. Yeni heyət aşağıdakılardan ibarətdir -Əli İsa Cabbarov (kinorejissor, ssenarist, prodüser, Azərbaycan Kinematoqrafçılar İttifaqının katibi) -Cəmil Fərəcov (rejissor, əməkdar incəsənət xadimi, Azərbaycan Kinematoqrafçılar İttifaqının katibi) -Rüstəm İbrahimbəyov (Xalq yazıçısı, “Şöhrət” ordenli, Azərbaycan Kinematoqrafçılar İttifaqının sədri -Firəngiz Qurbanova (quruluşçu rejissor, əməkdar artist) -Baba Məsimov(şair, ssenarist, Azərbaycan Kinematoqrafçılar İttifaqının katibi) -Məbud Məhərrəmov (aktyor, xalq artisti) -Anar Rzayev (Xalq yazıçısı, rejissor, Azərbaycan Kinematoqrafçılar İttifaqının katibi -Şükufə Yusupova (aktrisa, xalq artisti) -Əsəd Əsədov(səs rejissoru, əməkdar mədəniyyət işçisi) -Həmidə Ömərova (aktrisa, xalq artisti) -Nizami Abbas (operator, rejissor, əməkdar incəsənət xadimi -Rasim Balayev (aktyor, Xalq artisti, prezident təqaüdçüsü) -Tahir Əliyev (kinorejissor, prodüser) -Lalə Əfəndiyeva (prodüser, “Azəbaycanda Dünya Kinosunun 100 illiyi Fondu” İctimai Birliyinin direktoru) -Ziya Şıxlinski (rejissor, əməkdar incəsənət xadimi) -Oleq Səfərəliyev (rejissor, ssenarist, Azərbaycan Kinematoqrafçılar İttifaqının katibi).xeber100.com  

“YUĞ” Dövlət Teatrının 30 illiyi qeyd olunacaq

Yeni teatr mövsümündə “YUĞ” Dövlət Teatrının 30 illiyi qeyd olunacaq.Teatrdan Azərtac-a bildirilib ki, Mədəniyyət Nazirliyinin dəstəyi ilə reallaşacaq yubiley tədbiri ilin sonlarına planlaşdırılır.Bununla yanaşı, teatrın qurucusu Vaqif İbrahimoğlunun 70 illik yubileyinə həsr olunmuş təntənəli yubiley tədbirlərinin keçirilməsi də nəzərdə tutulur.Sənət ocağı yaxın aylarda xarici səfərlərini davam etdirəcək, tamaşaçılar üçün yeni səhnə əsərləri hazırlayacaq.xeber100.com

“Emmy” mükafatlarına namizədlərin adları açıqlanıb

ABŞ-da televiziya dünyasının ən nüfuzlu “Emmy” mükafatlarına namizədlərin adları açıqlanıb. BBC telekanalı xəbər verir ki, 2019-cu ildə mükafata namizədliyi irəli sürülənlər arasında məşhur “Taxt-tac oyunları” serialı 32 nominasiya və HBO və SKY yayım-produksiyon şirkətlərinin lentə aldığı “Çernobıl” filmi isə 19 nominasiya üzrə jüri tərəfindən qiymətləndiriləcək.Ən yaxşı kişi aktyor mükafatına isə Kit Harinqton (“Taxt-tac oyunları”), Sterlinq Braun (Bu, bizik”) və digər tanınmış simalar namizəd göstərilib. Emilia Klark (“Taxt-tac oyunları”), Cudi Komer (“Qətl ərəfəsi”) və digərləri isə ən yaxşı aktrisa mükafatı uğrunda mübarizə aparacaqlar. Bundan başqa, ən yaxşı komediya filmləri, ikinci dərəcəli obrazların ən yaxşı ifaçısı və digər nominasiyalar üzrə mükafatlar öz sahiblərini tapacaq.Bu il 71-cisi təşkil olunacaq “Emmy” mükafatlarının təqdimatı mərasimi sentyabrın 22-də Los-Ancelesdə keçiriləcək.xeber100.com

“YARAT” Müasir İncəsənət Məkanının təşkilatçılığı ilə…

“YARAT” Müasir İncəsənət Məkanının təşkilatçılığı ilə “Little YARAT” və “Little Master” layihələrinin növbəti yarımillik fəaliyyətinin yekun sərgisi açılacaq.Azərtac xəbər verir ki, balaca fırça ustaları rəssamlar Babi Bədəlov və Vaciko Çaçxianinin əsərlərindən, XX-XXI əsrlər Azərbaycan Rəngkarlığı Muzeyində isə Əşrəf Muradın “Sevgi və etiraz” sərgisindən ilhamlanaraq müxtəlif ustadların rəhbərliyi ilə çoxsaylı əsərlər yaradıblar.Ziyarətçilər “YARAT” Müasir İncəsənət Mərkəzi və XX-XXI əsrlər Azərbaycan Rəngkarlığı Muzeyində hər iki layihənin növbəti yarımillik fəaliyyətinin yekun sərgisini izləməklə yanaşı, həm də maraqlı və əyləncəli proqramda iştirak edə biləcəklər.xeber100.com

II Beynəlxalq Mədəniyyət Festivalı keçiriləcək

İyulun 26-27-də Latviyanın Gulbene şəhərində “İki Yuliya” adlı II Beynəlxalq Mədəniyyət Festivalı keçiriləcək.Azərtac xəbər verir ki, festival Latviyanın iki məşhur tətbiqi sənət ustası Yuliya Madernieks və Yuliya Straumemin xatirəsinə həsr olunub. Festival çərçivəsində keçiriləcək elmi konfransda Azərbaycan, Latviya, Gürcüstan, İran və Rusiyadan dəvət olunmuş mühazirəçilər çıxış edəcək.Festival 5 hissədən ibarət olacaq və hər bir hissə müxtəlif tarixi məkanda baş tutacaq. Tədbirlər sırasında sap rəngləmə, dülgərlik, yun toxuma və sairə üzrə ustad dərsləri, habelə mövzulara dair sərgilərin keçirilməsi nəzərdə tutulub.xeber100.com

Rüstəm İbrahimbəyov: “Azərbaycanda gənc kinematoqrafçılar ordusu yaranıb”

Azərbaycan Kinematoqrafçılar İttifaqı noyabr qurultayına hazırlığı davam etdirir. Kino Məktəbi, Kino Evinin bərpası prosesi gedir, Bakı haqqında Filmlər Muzeyi yaradılır, gənc kinematoqrafçılara dəstək proqramı hazırlanır. Kinodramaturq, Azərbaycan Kinematoqrafçılar İttifaqının sədri Rüstəm İbrahimbəyov Turan-a bunlar haqda danışıb: "Son illər Azərbaycanda gənc kinematoqrafçılar ordusu yaranıb. Onların çəkdiyi tammetrajlı və qısametrajlı filmlər nüfuzlu beynəlxalq festivallarda mükafat alıb. Bu gün onların əksəriyyəti Azərbaycandan kənarda yaşayır, çünki burada özlərini reallaşdıra bilmirlər. Kinematoqrafçılar İttifaqının vəzifələrindən biri bu insanların öz ölkəsində işləməsinə imkan yaratmaqdır. Yeni kino istehsalı modelinin tətbiqi ümid verir. Dövlət tərəfindən xüsusi komissiya yaradılıb və bunun üzərində işləyir. Yaxşı olardı ki, elə bir struktur yaradılsın ki, özündə ssenariləri, rejissorluğu və istehsalat işini birləşdirən layihələr üçün dövlət dəstəyini almağa imkan yarada bilsin. Qonşu Gürcüstanda, Rusiyada və digər ölkələrdə oxşar sistem mövcuddur. Bu, müstəqil studiyalara və yaradıcı birliklərə böyük yaradıcılıq azadlığı verir", - o bildirib. "Yeni struktur kimin tabeliyində olacaq?" sualına kinodramaturq cavab verib ki, "çox güman ki, Mədəniyyət Nazirliyinin. Qarşıdakı qurultayda bütün bu məsələlər hərtərəfli və predmetli şəkildə müzakirə olunacaq. Dövlət nəzarəti yaradıcılıq maraqlarına xələl gətirməməlidir. Dövlət vətənpərvərlik, tarixi, uşaq kinoları sifariş verməklə filmin kino istehsalının ümumi siyasətini müəyyən etməlidir. Yəni, kinematoqrafçılar yaradıcılıq təşəbbüsü ilə eyni vaxtda dövlət tapşırıqlarını yerinə yetirməlidirlər", - R.İbrahimbəyov vurğulayıb."Özünü belə bir kino strukturunun rəhbəri rolunda görürmü" sualına kinodramaturq mənfi cavab verib. "Mən 1967-ci ildən Kinematoqrafçılar İttifaqında çalışıram və əminəm ki, ictimaiyyətin kinematoqrafiya rəyini ifadə edən bu yaradıcı təşkilat dövlət qurumları ilə konstruktiv dialoq vasitəsilə milli kinoda vəziyyətə mühüm təsir göstərə bilər. Ümumiyyətlə, mən ölkə həyatına ictimai təsirin artmasının tərəfdarıyam. Məhz bu məqsədlə bir neçə il əvvəl öllkənin mədəniyyət və elm xadimlərini bir arada birləşdirən Ziyalılar Forumu yaradıldı. Biz hakimiyyətin bu gün müzakirə etdiyi problemləri orada müzakirə edirdik. Təəssüflər olsun ki, o zaman bizim təşəbbüsümüz bəzi adamlarda mənfi reaksiya yaradırdı. Həmin şəxslər indiyədək dövlət orqanlarında mühüm mövqe tuturlar", - R.İbrahimbəyov bildirib."Hazırda vəziyyət dəyişibmi?" sualının cavabında R.İbrahimbəyov deyib ki, bu suala zamanla cavab verə biləcək. "Atılan addımlar məni sevindirməyə bilməz. Onlar sistemli xarakter alacaqmı? Bunu zaman göstərəcək", - dramaturq vurğulayıb.R.İbrahimbəyov Azərbaycanda iki Kino İttifaqının olmasını ölkənin ölçüsünü və film istehsalının həcmini nəzərə alaraq çox adlandırıb. "Azərbaycan Kinematoqrafçılar İttifaqı 1958-ci ildə bizim kinonun görkəmli xadimləri tərəfindən yaradılıb. İkinci qurumu bir neçə il əvvəl süni şəkildə yaratdılar".Eyni zamanda, o deyib ki, kimsə ilə münasibətləri aydınlaşdırmaq niyyətində deyil. "Biz öz vəzifəmizi kino sənəti maraqlarının və hər yaşdan olan istedadlı kino xadimlərinin müdafiəsində görürük. Lakin gənclər xüsusi diqqət tələb edirlər, onlar hiss etməlidirlər ki, Vətən onlara dəstəkdə və onların uğurlarında maraqlıdır. Biz onları Kino Məktəbi ilə işə cəlb edəcəyik. Bu məktəb bədii, sənədli və cizgi filmləri üçün rejissorlar və ssenaristlər, həmçinin aktyorlar hazırlayacaq. Ümid edirəm ki, planlarımızı həyata keçirməyə gücümüz yetəcək. Ancaq dövlət dəstəyi olmadan mümkün deyil. Təkrar edirəm ki, biz bunu hiss edirik və mən ümid edirəm ki, bu yaxınlara qədər mətbuatda mənə qarşı geniş təbliğat kampaniyası təşkil edən insanlar buna mane olmayacaqlar", - Rüstəm İbrahimbəyov fikrini yekunlaşdırıb.xeber100.com

MDB ölkələri Turizm Şurasının iclası keçiriləcək

İyulun 9-10-da Özbəkistanın Səmərqənd şəhərində Müstəqil Dövlətlər Birliyinin (MDB) iştirakçısı olan ölkələrin Turizm Şurasının iclası keçiriləcək.Azərtac bunu MDB İcraiyyə Komitəsinin mətbuat xidmətinə istinadla bildirir.Şuranın üzvləri 2020-ci ilə qədər dövr üçün tədbirlər planının icrasına yekun vuracaq və 2021-2030-cu illər üçün analoji strategiya layihəsini müzakirə edəcəklər. Şengen müqaviləsi prinsipi üzrə birləşdirilmiş Mərkəzi Asiya vizasının yaradılması təşəbbüsü də nəzərdən keçiriləcək.Görüş iştirakçıları Birlik ölkələrinin illik turizm yarmarkasının təsis edilməsi barədə Özbəkistan tərəfinin təklifini müzakirə edəcək, turizm sahəsində Özbəkistanın dövlət siyasəti sistemi barədə məlumat əldə edəcək və II Avropa Oyunları kimi iri beynəlxalq idman tədbirləri ərəfəsində turizm imkanlarının yaradılması və turizm məhsullarının reallaşdırılması sahəsində Belarusun təcrübəsini öyrənəcəklər.Birlik ölkələrinin Turizm Şurası 1994-cü ildə yaradılıb. Onun fəaliyyəti beynəlxalq turizm əlaqələrinin inkişafına əlverişli şəraitin yaradılmasına yönəldilib.xeber100.com