“İslam sivilizasiya və mədəniyyətinin vəhdəti” adlı sərgi açılacaq

Dekabrın 25-də İran İslam Respublikasının ölkəmizdəki səfirliyinin Mədəniyyət Mərkəzində “İslam sivilizasiya və mədəniyyətinin vəhdəti” adlı sərgi açılacaq. Sərgi Azərbaycan Rəssamlar İttifaqı, İranın ölkəmizdəki səfirliyinin mədəniyyət mərkəzi, Fələstinin ölkəmizdəki səfirliyi və Türkiyə səfirliyinin mədəniyyət və tanıtım müşavirliyinin dəstəyi ilə reallaşacaq.Bu barədə Azərtac-a sərginin layihə rəhbəri Elnurə İsgəndərova məlumat verib. “Təşkilatçısı rəssam Aygün İsgəndərova olan sərgidə 150 fırça ustasının 200-dək sənət əsəri nümayiş olunacaq. “İslam Həmrəyliyi İli” çərçivəsində reallaşacaq sərgi bir gün davam edəcək. Sonda fırça ustaları diplom və sertifikatlarla təltif olunacaqlar”, - deyə E. İsgəndərova söyləyib.xeber100.com

Opera və Balet Teatrının məlumatı

Opera və Balet Teatrında bəstəkar Qara Qarayev və bəstəkar Fərəc Qarayevin musiqisi əsasında “Qoyya” baletinin quruluşu üzərində fəal iş aparılır.Teatrın rəhbərliyi tamaşanın quruluşunu həyata keçirmək üçün adlı-sanlı mədəniyyət xadimlərindən ibarət beynəlmiləl yaradıcı heyəti sənət ocağına dəvət edib.Teatrdan bildirilib ki, baletin quruluşçu xoreoqrafı Estoniyanın Əməkdar artisti Vasili Medvedyevdir.Tamaşanın quruluşçu rəssamı Dmitri Çerbadji, libretto müəllifi türkiyəli yazıçı Yana Temiz, xormeysteri Sevil Hacıyevadır.Görkəmli bəstəkar Qara Qarayevin 100 illiyi çərçivəsində nümayiş olunacaq səhnə əsərinin premyerası gələn il fevralın 3-nə nəzərdə tutulur.xeber100.com

“YARAT” Müasir İncəsənət Mərkəzi təqdim edir

Dekabrın 23-də “YARAT” Müasir İncəsənət Mərkəzində “Müsbət proqressiv valideyn” adlı maarifləndirici təlim keçiriləcək.Azərtac xəbər verir ki, Ülviyyə Tağızadənin müəllifi olduğu layihə çərçivəsində reallaşacaq tədbir rus dilində təşkil ediləcək. Müəllifin fikrincə, valideynlər təcrübəli olsalar belə, öz biliklərini daim mükəmməlləşdirməlidirlər. Ailələrdə valideynlər və uşaqlar arasında baş verən xırda münaqişələr bəzən ciddiyə alınmadığı təqdirdə sonradan zəncirvari təkrarlanmağa başlayır. Təlim-tərbiyədə səhvlərə yol verilməməsi üçün valideynlər üçün kurslar mövcuddur. Həmin bu kurslar layihənin məğzini təşkil edir.Qeyd edək ki, 2017-ci ildə Londonda yaranan layihə ABŞ, Böyük Britaniya və Avstraliya kimi ölkələrdə təhsildə uğurla tətbiq olunur.xeber100.com

Oskar mükafatı uğrunda mübarizə aparacaq filmlərin siyahısı açıqlanıb

ABŞ Kinematoqrafiya Sənət və Elm Akademiyası Oskar mükafatının əsas nominasiyası uğrunda mübarizə aparacaq filmlərin geniş siyahısını açıqlayıb.Rusiya KİV-ləri xəbər verir ki, "İlin ən yaxşı filmi" nominasiyası üzrə 341 film təqdim olunub.Mükafata əsas namizədlərin sırasında “Möcüzə-qadın”, “Ülgüc üzərində qaçış 2049”, “Karib dənizinin quldurları: Ölülər nağıl danışmır”, “Dünkerk”, “Kinqsman: Qızıl üzük” və başqa filmlər yer alıb.Qeyd edək ki, Oskar mükafatının təqdimetmə mərasimi gələn il martın 4-də Los-Ancelesdə keçiriləcək.xeber100.com

Qısametrajlı bədii film layihələri müsabiqəsində

Dekabrın 19-da Nizami Kino Mərkəzində qısametrajlı bədii film layihələri müsabiqəsində iştirak etmək arzusunda olan ssenarist, prodüser və rejissorları maraqlandıran məsələlərlə əlaqədar təşkilatçılarla görüş keçirilib.Azərtac xəbər verir ki, tədbirdə Azərbaycan Mədəniyyət və Turizm Nazirliyinin kinematoqrafiya şöbəsinin sektor müdiri Yusif Şeyxov, şöbənin əməkdaşı Elşad Əliyev çıxış edərək müsabiqə barədə məlumat veriblər. Bildirilib ki, müsabiqədə film istehsalı ilə məşğul olan müstəqil kino şirkətləri iştirak edə bilərlər. Müstəqil fəaliyyət göstərən gənc müəlliflər müsabiqədə iştirak etmək üçün layihələrini prodüser mərkəzlərinə təqdim etməlidirlər. Kino layihəsinin prodüseri və rejissoru 35 yaşadək kinematoqrafçılar olmalıdır. Müsabiqə üçün sənədlər eyni deviz altında olan iki bağlı zərfdə gələn il aprelin 20-dək nazirliyə təqdim edilməlidir. Birinci zərfdə çəkilişi rəqəmli daşıyıcıda nəzərdə tutulan, istənilən növ, janr və formatda az büdcəli qısametrajlı bədii filmin ədəbi ssenarisi, adları qeyd edilmədən filmin rejissoru və prodüserinin gələcək film haqqında bir səhifəlik şərhləri, layihənin təxmini smeta dəyəri və istehsalı haqqında məlumat daxil ediləcək. Üzərində eyni deviz qeyd edildiyi ikinci bağlı zərfdə müsabiqə iştirakçısı olan kino şirkətinin adı, dövlət qeydiyyatı haqqında şəhadətnamənin surəti, poçt və bank rekvizitləri, həmçinin rejissor, ssenari müəllifi və prodüserin adları, əlaqə telefonları qeyd olunur. Sənədlər paketi tam olmadığı halda layihə buraxılmır.xeber100.com  

Milli Dram Teatrının təqdimatında

Azərbaycan Dövlət Akademik Milli Dram Teatrının yaradıcı heyəti hazırladığı yeni səhnə əsərini tamaşaçılara təqdim edib.Azərtac xəbər verir ki, “Qətibə İnanc” adlı ikihissəli səhnə əsəri görkəmli Azərbaycan yazıçısı Məmməd Səid Ordubadinin “Qılınc və qələm” romanının motivləri əsasında Çingiz Ələsgərli tərəfindən yeni səhnə versiyasında işlənib.Xalq Artisti Mərahim Fərzəlibəyovun quruluşunda təqdim olunan tamaşa Gəncə hakimi Əmir İnancın qızı Qətibə İnancın Şeyx Nizamiyə olan məhəbbətindən bəhs edir. Şeyx tərəfindən məhəbbəti rədd ediləndən sonra Qətibə İnancda hamıya qarşı nifrət yaranır. Bu nifrətinə görə Qətibə sevmədən Məhəmməd Cahan Pəhləvana ərə gedir.Qeyd edək ki, ilk dəfə 1977-ci ildə görkəmli rejissor Tofiq Kazımov “Qılınc və qələm” əsərini tamaşaya hazırlayıb.xeber100.com

“Muğam axşamları” layihəsi çərçivəsində

Beynəlxalq Muğam Mərkəzində “Muğam axşamları” layihəsi çərçivəsində növbəti konsert “Xaric segah” muğamına həsr edilib.Mərkəzdən Azərtac-a bildirilib ki, Əməkdar Artist Sevinc Sarıyevanın iştirakı ilə reallaşan konsert Beynəlxalq Muğam Mərkəzi və “Mədəniyyət” kanalının birgə təşkilatçılığı ilə gerçəkləşib.Xanəndəni “Buta” instrumental ansamblı müşayiət edib. Ansamblın bədii rəhbəri tarzən Rövşən Qurbanovdur.Layihənin növbəti konserti dekabrın 27-də “Arazbarı”, “Ovşarı” və başqa ritmik muğamlara həsr ediləcək.xeber100.com

Azərbaycanın UNESCO-ya üzvlüyünün 25 illiyi münasibətilə…

Azərbaycanın UNESCO-ya üzvlüyünün 25 illiyi münasibətilə dekabrın 19-da “Muğam klub”da tədbir keçiriləcək.Azərtac xəbər verir ki, tədbir çərçivəsində Azərbaycanın UNESCO siyahılarında yer alan maddi və qeyri-maddi mədəni irs nümunələrinə həsr olunmuş rəsm sərgisi açılacaq. Həmçinin UNESCO üzrə Azərbaycan Milli Komissiyasının sədr və sədr müavinlərinin çıxışları dinləniləcək, UNESCO-nun Yubileylər Proqramına daxil edilmiş Azərbaycanın görkəmli şairi İmadəddin Nəsiminin vəfatının 600 illiyinə həsr edilmiş konsert proqramı təqdim olunacaq.xeber100.com

Əməkdaşlıq memorandumu imzalanıb

Dekabrın 14-də Cənubi Qafqaz Boru Kəməri Şirkətinin (CQBKŞ) texniki operatoru olan BP ilə Azərbaycanın Mədəniyyət və Turizm Nazirliyi arasında Cənubi Qafqaz boru kəmərlərinin genişləndirilməsi işləri zamanı aşkar edilmiş mühüm arxeoloji tapıntıların tam təhlil edilməsi üzrə əməkdaşlıq üçün qarşılıqlı anlaşma memorandumu imzalanıb.Azərtac xəbər verir ki, imzalanma mərasimində mədəniyyət və turizm naziri Əbülfəs Qarayev çıxış edərək Goranboy rayonunun Kərpiclitəpə ərazisində aşkar edilmiş tarixi əhəmiyyətli tapıntı ilə bağlı işlərin maliyyələşdirilməsinə göstərdiyi dəstəyə görə BP-nin Azərbaycan, Gürcüstan və Türkiyə üzrə regional prezidenti Qəri Counza təşəkkürünü bildirib. Qeyd edib ki, bu gün imzalanan sənəd hər iki tərəfin Kərpiclitəpə ərazisində aşkar edilmiş tapıntılarla bağlı Azərbaycanın mədəni irsinə dəstək göstərilməsində əməkdaşlıq etmək niyyətini təsdiqləyir. Qeyd edilib ki, bu sənəd çərçivəsində yerinə yetiriləcək işlərə Azərbaycan Milli Elmlər Akademiyasının Arxeologiya və Etnoqrafiya İnstitutunu təmsil edən altı arxeoloq tərəfindən iki ay müddətində əlavə qazıntı işlərinin aparılması daxildir. Görüləcək işlər nəticəsində arxeoloji sahənin üçölçülü modelinin hazırlanması imkanına da baxılacaq. Aşkar edilmiş bütün arxeoloji faktlar müvafiq qaydada qeydiyyata alınacaq və qorunub saxlanılacaq.xeber100.com

Gənc Tamaşaçılar Teatrı təqdim edir

Hər həftə olduğu kimi, bu həftə də Gənc Tamaşaçılar Teatrı tamaşaçıları üçün maraqlı repertuar tərtib edib.Teatrdan Azərtac-a bildirilib ki, dekabrın 15-də M.F.Axundzadənin “Hekayəti-Xırs quldurbasan” tamaşası və “Koroğlu” dastanı əsasında hazırlanmış “Eşq-i Nigar” nümayiş ediləcək.Dekabrın 16-da L.Nurenin “Mən gəldim, qızlar”, dekabrın 17-də isə D.Fo, P.Filipponun “İtalyansayağı xoşbəxtlik” komediyası təqdim edəcək.Heç şübhəsiz ki, teatr daimi və sevimli kiçik yaşlı tamaşaçılarını da hər zaman olduğu kimi diqqətdən kənarda qoymayıb.Belə ki, kollektiv dekabrın 16-da saat 12:00 və 14:00 –də C.Rodarinin “Çipollino”, dekabrın 17-də isə C.Sviftin “Qulliver cırtdanlar ölkəsində” adlı yeni tamaşaları ilə balaca dostlarını sevindirəcək.Tamaşalarda rolları əməkdar artistlər Kəmalə Hüseynova, Leyli Vəliyeva, Nübar Novruzova, Qurban İsmayılov, Vahid Əliyev, Nofəl Vəliyev, aktyorlar Günel Məmmədova, Səbinə Məmmədova və başqaları ifa edəcəklər.Biletləri bütün mərkəzləşdirilmiş kassalardan, “ASAN” xidmət mərkəzlərindən və filiallardan əldə etmək olar.xeber100.com