Əməkdaşlıq memorandumu imzalanıb

Dekabrın 14-də Cənubi Qafqaz Boru Kəməri Şirkətinin (CQBKŞ) texniki operatoru olan BP ilə Azərbaycanın Mədəniyyət və Turizm Nazirliyi arasında Cənubi Qafqaz boru kəmərlərinin genişləndirilməsi işləri zamanı aşkar edilmiş mühüm arxeoloji tapıntıların tam təhlil edilməsi üzrə əməkdaşlıq üçün qarşılıqlı anlaşma memorandumu imzalanıb.Azərtac xəbər verir ki, imzalanma mərasimində mədəniyyət və turizm naziri Əbülfəs Qarayev çıxış edərək Goranboy rayonunun Kərpiclitəpə ərazisində aşkar edilmiş tarixi əhəmiyyətli tapıntı ilə bağlı işlərin maliyyələşdirilməsinə göstərdiyi dəstəyə görə BP-nin Azərbaycan, Gürcüstan və Türkiyə üzrə regional prezidenti Qəri Counza təşəkkürünü bildirib. Qeyd edib ki, bu gün imzalanan sənəd hər iki tərəfin Kərpiclitəpə ərazisində aşkar edilmiş tapıntılarla bağlı Azərbaycanın mədəni irsinə dəstək göstərilməsində əməkdaşlıq etmək niyyətini təsdiqləyir. Qeyd edilib ki, bu sənəd çərçivəsində yerinə yetiriləcək işlərə Azərbaycan Milli Elmlər Akademiyasının Arxeologiya və Etnoqrafiya İnstitutunu təmsil edən altı arxeoloq tərəfindən iki ay müddətində əlavə qazıntı işlərinin aparılması daxildir. Görüləcək işlər nəticəsində arxeoloji sahənin üçölçülü modelinin hazırlanması imkanına da baxılacaq. Aşkar edilmiş bütün arxeoloji faktlar müvafiq qaydada qeydiyyata alınacaq və qorunub saxlanılacaq.xeber100.com

Gənc Tamaşaçılar Teatrı təqdim edir

Hər həftə olduğu kimi, bu həftə də Gənc Tamaşaçılar Teatrı tamaşaçıları üçün maraqlı repertuar tərtib edib.Teatrdan Azərtac-a bildirilib ki, dekabrın 15-də M.F.Axundzadənin “Hekayəti-Xırs quldurbasan” tamaşası və “Koroğlu” dastanı əsasında hazırlanmış “Eşq-i Nigar” nümayiş ediləcək.Dekabrın 16-da L.Nurenin “Mən gəldim, qızlar”, dekabrın 17-də isə D.Fo, P.Filipponun “İtalyansayağı xoşbəxtlik” komediyası təqdim edəcək.Heç şübhəsiz ki, teatr daimi və sevimli kiçik yaşlı tamaşaçılarını da hər zaman olduğu kimi diqqətdən kənarda qoymayıb.Belə ki, kollektiv dekabrın 16-da saat 12:00 və 14:00 –də C.Rodarinin “Çipollino”, dekabrın 17-də isə C.Sviftin “Qulliver cırtdanlar ölkəsində” adlı yeni tamaşaları ilə balaca dostlarını sevindirəcək.Tamaşalarda rolları əməkdar artistlər Kəmalə Hüseynova, Leyli Vəliyeva, Nübar Novruzova, Qurban İsmayılov, Vahid Əliyev, Nofəl Vəliyev, aktyorlar Günel Məmmədova, Səbinə Məmmədova və başqaları ifa edəcəklər.Biletləri bütün mərkəzləşdirilmiş kassalardan, “ASAN” xidmət mərkəzlərindən və filiallardan əldə etmək olar.xeber100.com

Kukla Teatrı yeni səhnə işi hazırlayır

Kukla Teatrı məktəblilərin qış tətili günləri və Yeni il münasibəti ilə balaca tamaşaçıları üçün yeni səhnə işi hazırlayır.Teatrın mətbuat xidmətindən Apa-ya verilən məlumata görə, yaradıcı heyət teatrın quruluşçu rejissoru Anar Məmmədovun səhnələşdirdiyi “Qış nağılı” adlı yeni tamaşa ilə uşaqların görüşünə gələcək.Quruluşçu rəssamı teatrın baş rəssamı İqbal Əliyev olan və musiqi tərtibatı əsasında hazırlanan tamaşada əsas qəhrəman Şaxta baba və Qar qızdır. Balacaların sevimli qəhrəmanı olan personajlar ətrafında cərəyan edən hadisələr uşaqlara fədakarlıq, cəsurluq və dürüstlük kimi dəyərləri təlqin edir.Tamaşada rolları teatrın aparıcı aktyorları Elmira Hüseynova, Cavid Telman, Elxan İsmayılov, Cəmilə Allahverdiyeva, Rəhilə İbadova, Elnur Xəlilov və başqaları ifa edirlər.27 dekabrda premyerası gerçəkləşəcək tamaşa yanvarın 3-dək hər gün 4 seans olmaqla nümayiş olunacaq. Üç seans Azərbaycan, bir seans isə rus dilində göstəriləcək.Tamaşaya biletlərin qiyməti 3 manatdır və dekabrın 15-dən etibarən teatrın kassasından əldə oluna bilər.xeber100.com

İncəsənət Universitetində ustad dərsləri keçiriləcək

Tarzən Ramiz Quliyev Tehranın Mədəniyyət və İncəsənət Universitetində ustad dərsləri keçirəcək.Bu barədə məlumat verən universitetin rektoru Susan Tağıpur bildirib ki, dekabrın 16-da və 17-də keçiriləcək ustad dərslərində tələbələrlə yanaşı, gənc müəllimlər də iştirak edəcəklər.Dekabrın 21-də və 22-də isə Tehranın “Vəhdət” Mədəniyyət Sarayında Ramiz Quliyevin konserti olacaq. Konsertdə Azərbaycan bəstəkarlarının əsərləri səsləndiriləcək.xeber100.com

“YARAT” Müasir İncəsənət Mərkəzinin təqdimatında

Dekabrın 19-da “YARAT” Müasir İncəsənət Mərkəzində rusiyalı rejissor Nikolay Jukovun "Buludlar səmanı tərk edirlər" adlı filmi nümayiş ediləcək.Azərtac xəbər verir ki, xronometrajı 90 dəqiqə olacaq ekran əsərinin təqdimatı Dağıstan Respublikasının Azərbaycandakı nümayəndəliyi ilə əməkdaşlıq nəticəsində təşkil olunacaq.xeber100.com  

MDB ölkələri Yaradıcı və Elmi Ziyalılarının XII Forumu keçirilir

Moskvada MDB ölkələri Yaradıcı və Elmi Ziyalılarının XII Forumu keçirilir. MDB Dövlətlərarası Humanitar Əməkdaşlıq Fondunun (DHƏF) təşkilatçılığı ilə keçirilən forumda Azərbaycan, Belarus, Qazaxıstan, Moldova, Tacikistan, Türkmənistan, Özbəkistan, Ukrayna, Ermənistan və Rusiyadan nümayəndələr iştirak edir. Ölkəmizi tədbirdə Azərbaycan Dillər Universitetinin rektoru Kamal Abdullayev, Xalq Yazıçısı Çingiz Abdullayev, Azərbaycan Memarlar İttifaqının sədri Elbay Qasımzadə, Milli Məclisin deputatları Elmira Axundova, Naqif Həmzəyev, Pərvin Kərimzadə və digərlərindən ibarət böyük mötəbər nümayəndə heyəti təmsil edir.Azərtac xəbər verir ki, tədbirin açılışında Rusiya hökuməti sədrinin müavini Olqa Qolodets Rusiya Prezidenti Vladimir Putinin forum iştirakçılarına təbrik məktubunu oxuyub.DHƏF-in İdarə Heyətinin sədri, Azərbaycanın Rusiyadakı səfiri Polad Bülbüloğlu açılış mərasimində çıxış edib.Tədbir çərçivəsində Azərbaycan Rəssamlar İttifaqının sədri, Xalq Rəssamı, Rusiya Rəssamlıq Akademiyasının fəxri üzvü Fərhad Xəlilova “Birlik ulduzları” mükafatı təqdim edilib.xeber100.com

Milli İncəsənət Muzeyi təqdim edir

Azərbaycan Milli İncəsənət Muzeyi “Symmetria” Sağlamlıq Mərkəzi ilə birlikdə ziyarətçiləri Yeni il ərəfəsində muzeyə dəvət edir.Muzeydən Azərtac-a bildirilib ki, qonaqlar burada simmetrik və assimetrik kompozisiyalı harmonik, eyni zamanda, ilhamverici unikal incəsənət əsərləri ilə tanış ola biləcəklər. Muzeyə giriş biletlərinin qiymətləri artıq “Symmetria” Sağlamlıq Mərkəzi tərəfindən ödənilib.Azərbaycan Milli İncəsənət Muzeyinin rəhbərliyi mədəni irsin qorunması və iştirakında göstərdiyi dəstəyə görə “Symmetria” Sağlamlıq Mərkəzinə öz təşəkkürünü bildirir.xeber100.com

Opera və Balet Teatrı təqdim edir

Dekabrın 16-da Opera və Balet Teatrında Üzeyir Hacıbəylinin “Koroğlu” operası növbəti dəfə nümayiş olunacaq.Teatrın mətbuat xidmətindən bildirilib ki, səhnə əsəri Bülbülün 120 illiyi çərçivəsində təqdim ediləcək.Görkəmli sənətkarın xatirəsinə həsr olunmuş səhnə əsərində Koroğlu partiyası Əməkdar Artist Fərid Əliyev tərəfindən ifa olunacaq.C.Cəfərovun idarə edəcəyi operada eyni zamanda Ə.Əsgərov, F.Hacıyeva, İ.Əfəndiyeva, C.Qurbanov , Ə.Poladov, Ə.İbrahimov, S.Əliyev və b. çıxış edəcək.xeber100.com

“Yeni il gəlir” adlı konsert proqramı təqdim olunacaq

Dekabrın 21-də Heydər Əliyev Sarayında tanınmış müğənnilərin ifasında “Yeni il gəlir” adlı konsert proqramı təqdim olunacaq.Sarayın mətbuat xidmətindən Azərtac-a bildiriblər ki, “Mədəniyyət” kanalı ilə birgə təşkil olunacaq konsertdə Xalq artistləri Mənsum İbrahimov, Nazpəri Dostəliyeva, Nəzakət Teymurova, Aygün Bayramova, Gülyaz Məmmədova, Gülyanaq Məmmədova, Zaur Rzayev, Əməkdar artistlər Zakir Əliyev, Babək Niftəliyev, Manana, Ədalət Şükürov, Bəyimxanım Vəliyeva, Ehtiram Hüseynov və başqaları iştirak edəcəklər.xeber100.com

Mədəniyyət və turizm nazirliyinin məlumatı

Dekabrın 7-də Mədəniyyət və turizm naziri Ə.Qarayev TÜRKSOY-un baş katibi Düsen Kaseinovun rəhbərlik etdiyi nümayəndə heyəti ilə görüşüb.Nazirlikdən Azərtac-a bildirilib ki, TÜRKSOY-un nümayəndə heyəti Molla Pənah Vaqifin 300 illik yubileyi və Kabardin-Balkar şairi Qaysın Quliyevin 100 illiyinə həsr olunmuş tədbirlərdə iştirak etmək məqsədilə ölkəmizə gəlib.Qonaqları salamlayan nazir Əbülfəs Qarayev TÜRKSOY-un fəaliyyətinin bütövlükdə türkdilli xalqların birliyinə xidmət etdiyini deyib. Bildirib ki, türk mədəniyyətini, xalqlarımızın milli adət-ənənələrini beynəlxalq aləmə birlikdə çıxarmalıyıq.Düsen Kaseinovu yenidən təşkilatın rəhbəri seçilməyi münasibətilə təbrik edən nazir qurumun səmərəli fəaliyyətinin bundan sonra da davamlı olacağına ümidvar olduğunu diqqətə çatdırıb. Vurğulayıb ki, UNESCO və ISESCO ilə də sıx əməkdaşlıq edən TÜRKSOY müxtəlif beynəlxalq forumlarda yaxından iştirak edir, türkdilli xalqların mədəniyyətinin təbliğini həyata keçirir: “2017-ci il təşkilat üçün çox aktiv il olmuşdur. Çoxsaylı tədbirlər həyata keçirilmiş, görkəmli şəxsiyyətlərin yubiley tədbirləri, mədəniyyət paytaxtları elan olunmuş şəhərlərdə türk tarixinin araşdırılması istiqamətində, türk xalqları arasında dostluq və qardaşlıq əlaqələrinin möhkəmlənməsinə yönəlmiş tədbirlər reallaşdırılmışdır”.xeber100.com