“İngilis dili mütəxəssisi” layihəsi çərçivəsində dərs müşahidələri keçirilir

Paytaxtdakı ümumi təhsil müəssisələrində “İngilis dili mütəxəssisi” layihəsi çərçivəsində dərs müşahidələri keçirilir.Bakı Şəhəri üzrə Təhsil İdarəsindən (BŞTİ) Azərtac-a bildiriblər ki, layihə bu qurumun və ABŞ-ın Azərbaycandakı səfirliyinin əməkdaşlığı çərçivəsində reallaşdırılır. Layihənin həyata keçirilməsinin əsas məqsədi xarici dilin tədrisi üzrə mövcud ehtiyaclar, tələblər əsasında müəllimlərə müvafiq dəstək göstərmək və beynəlxalq təcrübənin məqsədəuyğun tətbiqi baxımından mütəxəssislərin peşəkar inkişafı üçün səmərəli platforma yaratmaqdır.Dərs müşahidələri ingilis dili müəllimlərinin dil və tədris bacarıqlarının təkmilləşdirilməsi və beynəlxalq təcrübələrinin dərslərdə tətbiqi məqsədlərinə xidmət edir.Müşahidələr zamanı müəllimlərin dərsləri amerikalı təhsil eksperti Rey Roberts və Təlimə Dəstək Mərkəzinin xarici dillər istiqaməti üzrə mentorları tərəfindən dinlənilir. Təhsil eksperti tədris prosesini “Sinfin idarə olunması” komponenti üzrə qiymətləndirir. Dərslərin yekununda ekspert tədris prosesinin təkmilləşdirilməsi istiqamətində yerli mütəxəssislərlə fikir mübadiləsi aparır və müəllimlərə inkişafetdirici tövsiyələr verir.xeber100.com  

Müəllimlərin 1-ci forumu keçirilib

Mayın 19-da “Hayatt Regency” mehmanxanasında “SABAH”ın müəllimi” adlı ali məktəb müəllimlərinin 1-ci forumu keçirilib.Azərtac xəbər verir ki, tədbirdə təhsil nazirinin müavini Ceyhun Bayramov müasir dünyada təhsilin mühüm rolunu qeyd edib, “Azərbaycan Respublikasında təhsilin inkişafı üzrə Dövlət Strategiyası”nın tələblərinə uyğun olaraq təhsil sahəsində reallaşdırılan tədbirlərdən, qazanılan uğurlardan danışıb.Tədbirdə məlumat verilib ki, “SABAH” qrupları Təhsil Nazirliyinin təşəbbüsü ilə 2014-2015-ci tədris ilində yeddi ali təhsil müəssisəsində yaradılıb. “SABAH” layihəsinin əsas məqsədi ali təhsildə keyfiyyətin yüksəldilməsi, yeni və fərqli mühitin yaradılması, müasir tələblərə uyğun kadr hazırlığının təmin edilməsidir.Hazırda “SABAH” qrupları 11 ali təhsil müəssisəsində fəaliyyət göstərməklə 45 ixtisası və 2.300-dən artıq tələbəni əhatə edir. Bu tədris ilində 740-dan artıq “SABAH” tələbəsi məzun olacaq.xeber100.com

Məktəblilərarası ikinci məntiq olimpiadasının nəticələri açıqlanıb

Lütfi Zadə adına məktəblilərarası ikinci məntiq olimpiadasının nəticələri açıqlanıb.Bakı Şəhəri üzrə Təhsil İdarəsindən (BŞTİ) Azərtac-a bildiriblər ki, olimpiadanın final mərhələsində paytaxt üzrə 1.859 şagird iştirak edib. Nəticələrə əsasən, 59 şagird finalda 80 faiz həddi keçərək mükafatçılar siyahısına düşüb. 842 məktəbli isə 50-80 faiz aralığında nəticə göstərərək olimpiadanın final turunda fəal iştirakına görə sertifikata layiq görülüb.Qeyd edək ki, olimpiadanın final turunun nəticələri artıq məktəblərə göndərilib. Nəticələrlə bağlı narazılığı olan şagirdlər BŞTİ-də mayın 20-dək fəaliyyət göstərən Apellyasiya Komissiyasına müraciət edə bilərlər.BŞTİ-nin və “İstək” liseyinin birgə təşkilatçılığı ilə keçirilən olimpiada zamanı şagirdlərin bədii, mücərrəd və verbal məntiqi təfəkkürü qiymətləndirilib.Olimpiadanın təşkilinin əsas məqsədi şagirdlərin məntiqi biliklərinin artmasına təkan vermək, onlara beynəlxalq, yerli olimpiadalar və bu kimi digər bilik yarışlarında iştirak təcrübəsi qazandırmaq, istedadlı, xüsusilə məntiqi təfəkkürü daha yaxşı inkişaf etmiş şagirdləri aşkara çıxarmaq, onları həvəsləndirmək və elmə olan maraqlarını artırmaqdır.xeber100.com

Təhsil Nazirliyinin məlumatı

Azərbaycanın bütün bölgələrində fəaliyyət göstərən, peşəkarlığı ilə seçilən müəllimlərin mediatəqdimatı davam edir.Təhsil Nazirliyindən AZərtac-a bildiriblər ki, “Bizim müəllim” layihəsinin növbəti təqdimatı Samux rayonunda fəaliyyət göstərən müəllimlərə həsr olunub.xeber100.com

İqtisad Universitetinin məlumatına görə…

İqtisad Universitetinin (UNEC) təqdim etdiyi təhsil imkanları barədə regionlarda məlumat vermək, burada təhsil alan bacarıqlı və savadlı abituriyentləri universitetə cəlb etmək məqsədilə müəllim heyətinin Azərbaycanın bölgələrinə səfərlərinə başlanılıb.Universitetdən Azərtac-a bildirilib ki, UNEC nümayəndə heyəti Quba, Salyan və Göyçay rayonlarının qabaqcıl məktəblərində olublar.Görüşlərdə bu ali məktəb haqqında ətraflı məlumat verilib. Bildirilib ki, UNEC ölkədə dörd dildə təhsil verən və xarici ölkədə filialı olan yeganə universitetdir.Dövlət İqtisad Universitetinin beynəlxalq ikili diplom və xüsusi təqaüd proqramları, beynəlxalq əlaqələri şagirdlərin xüsusi marağına səbəb olub. Onlar “SABAH” qrupları və mübadilə proqramları ilə maraqlanıblar.Görüşlərdə UNEC-in tanıtım videoçarxı göstərilib, şagirdlərə məlumat kitabçaları paylanılıb.xeber100.com

“Qəhrəmanlar unudulmur” adlı tədbir keçirilib

Mayın 17-də AMEA-nın Milli Azərbaycan Tarixi Muzeyində Azərbaycanın Milli Qəhrəmanı Şahlar Şükürova həsr olunmuş “Qəhrəmanlar unudulmur” adlı tədbir keçirilib.Azərtac xəbər verir ki, tədbirdə çıxış edənlər Milli Qəhrəman Şahlar Şükürovun həyatından, keçdiyi şərəfli döyüş yolundan danışıb, onun mənalı ömür yolunun gənclərə ən layiqli örnək olduğunu vurğulayıblar.Sonra məktəblilər Vətən, torpaq, qəhrəmanlıq haqqında şeirlər söyləyiblər, ədəbi-bədii kompozisiya nümayiş etdirilib.xeber100.com

Bakı Şəhəri üzrə Təhsil İdarəsinin məlumatı

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil məktəblərində “Ekoloji aylıqlar” layihəsi çərçivəsində may ayı “Sağlam həyat tərzi” mövzusuna həsr olunub.BŞTİ-dən Azərtac-a bildiriblər ki, verilmiş mövzunun reallaşdırılması baxımından təhsil müəssisələrinə sərbəstlik verilib.Mövzunun seçilməsinin məqsədi şagirdlərin diqqətini sağlam həyat tərzinə yönəltmək, onları bu barədə daha geniş maarifləndirməkdir. Mayın sonunda mövzuya uyğun olaraq “Ayın ən sağlam məktəbi” nominasiyası üzrə qalib məktəb seçiləcək.Bakı şəhərinin 12 inzibati rayonun hər birində pedaqoji kollektiv və məktəblilər tərəfindən “Sağlam həyat tərzi” mövzusu üzrə elmi konfrans, müsabiqə, yarış, “açıq dərs”, sərgi və ekskursiyaların keçirilməsi, müxtəlif araşdırmaların aparılması nəzərdə tutulub.Qalib məktəb orijinallıq, mövzunun əhatəliliyi, fəaliyyətin müxtəlifliyi, şagirdlərin bacarıqlarının formalaşdırılmasına xidmət edən fəaliyyət zənginliyi, layihədə müxtəlif yaş qrupunu təmsil edən şagirdlərin iştirakı, mövzunun ekoloji problemləri əhatə etməsi, hesabatların təqdim edilməsində təsdiqləyici materialların mövcudluğu (foto və s.) kimi meyarlara əsasən müəyyənləşdiriləcək.xeber100.com

Bakı Dövlət Universitetində elmi şuranın iclası olub

Mayın 16-da Bakı Dövlət Universitetində (BDU) elmi şuranın genişləndirilmiş iclası olub.Azərtac xəbər verir ki, iclasda BDU-nun rektoru, akademik Abel Məhərrəmov müasir dünyada elmin, təhsilin mühüm rolunu qeyd edib, BDU-da bu sahənin inkişafı istiqamətində reallaşdırılan tədbirlərdən, qazanılan nailiyyətlərdən danışıb.BDU-nun tədrisin təşkili və təlim texnologiyaları üzrə prorektoru, professor İradə Əliyeva 20016-2017-ci tədris ilində yaz semestri imtahan sessiyasının təşkili və yekun dövlət attestasiyasına hazırlıq haqqında məlumat verib.Sonra cari məsələlərə baxılıb, müzakirələr aparılıb.xeber100.com

Dövlət İmtahan Mərkəzinin məlumatı

Magistratura və rezidenturaya qəbul imtahanının ikinci mərhələsində iştirak üçün qeydiyyat davam edir.Dövlət İmtahan Mərkəzindən Azərtac-a bildiriblər ki, magistraturaya qəbul imtahanının ikinci mərhələsində iştirak üçün bakalavrlar tələb olunan məbləği şəxsi kabinetlərinin hesabına əlavə edib mayın 22-dək öz elektron ərizələrinə daxil olmaqla bitirdikləri bakalavr ixtisasına uyğun qəbul proqramını seçib təsdiqləməlidirlər.Rezidenturaya qəbul olunmaq istəyənlər də ixtisas fənləri üzrə biliklərin qiymətləndirilməsi imtahanında (II mərhələ) iştirak üçün tələb olunan məbləği şəxsi kabinetlərinin hesabına əlavə edib mayın 22-dək qeydiyyatdan keçməlidirlər.Göstərilən müddətdə elektron ərizələrinə daxil olub qeydiyyatdan keçməyənlər imtahanların ikinci mərhələsinə buraxılmayacaqlar.xeber100.com

Qərb Universitetinin məlumatına görə…

Qərb Universitetində tədrisin keyfiyyətinin yüksəldilməsinə yönəlmiş əsaslı yenidənqurma işləri davam etdirilir.Universitetdən Azərtac-a bildirilib ki, bu ali məktəbin infrastrukturunun, maddi-texniki bazasının yaxşılaşdırılması üçün burada müasir qurğu və cihazlarla təchiz olunmuş laboratoriyalar qurulur. Xüsusilə mühəndislik istiqamətləri üzrə ixtisaslarla bağlı müasir standartlara cavab verən laboratoriyalar formalaşdırılır.Laboratoriyaların təşkilinə bu sahədə böyük təcrübəsi olan ABŞ və Avropa şirkətləri cəlb edilib. Mexatronika və robototexnika mühəndisliyi, maşınqayırma, həmçinin meşəçilik, ağac emalının texnologiyası ixtisasları üzrə də laboratoriyaların qurulmasına başlanılıb. Ağac emalı ilə bağlı əldə olunacaq qurğular ölkədə ilk dəfə Qərb Universitetində tətbiq ediləcək.xeber100.com