“Cənubi Qafqaz regionunda alman məskənlərinin salınması”…

Qərb Universitetinin politologiya və beynəlxalq münasibətlər kafedrası “Cənubi Qafqaz regionunda alman məskənlərinin salınması” mövzusunda müsabiqə elan edir. Universitetdən Azərtac-a bildirilib ki, cari il oktyabrın 30-da keçiriləcək müsabiqədə bakalavr səviyyəsində politologiya, beynəlxalq münasibətlər, regionşünaslıq ixtisasları üzrə təhsil alan tələbələr iştirak edə bilərlər. Layihənin məqsədi multikultural cəmiyyətin formalaşdırılmasında Azərbaycanın rolunu və əhəmiyyətini göstərməkdir. Müsabiqədə iştirak etmək istəyənlərin müvafiq mövzu ilə bağlı təqdimatları oktyabrın 15-dək təhvil verilməlidir. Təqdimatlar təşkil olunan komissiya tərəfindən qiymətləndiriləcək. Müsabiqədə birinci yerin qalibi təhsil haqqından 20 faiz, ikinci yerin qalibi 15 faiz, üçüncü yerin qalibi isə 10 faiz güzəşt əldə edəcək.xeber100.com

Bilik günü ilə əlaqədar tədbir keçirilib

Bakı Şəhər Mədəniyyət və Turizm Baş İdarəsinin Xətai rayon Mərkəzi Kitabxanasında 15 sentyabr - Bilik günü ilə əlaqədar “Bilik öyrənməyi ar bilən hər kəs, dünyada mərifət qazana bilməz” başlığı altında tədbir keçirilib. Azərtac xəbər verir ki, rayonda yerləşən bir sıra məktəb və liseylərin şagirdlərinin iştirak etdiyi tədbirdə ölkəmizdə təhsilin inkişafından, müasir tələblər səviyyəsində və yüksək standartlara cavab verən yeni-yeni təhsil müəssisələrinin inşasından, uşaqlara, gənc nəslə dövlət tərəfindən göstərilən diqqət və qayğıdan danışılıb. Tədbirdə məktəblilərin ifasında N.Gəncəvinin, B.Vahabzadənin, T.Bayramın şeirləri səsləndirilib, səhnəciklər təqdim olunub. Həmçinin, kitabxanada sərgi də təşkil edilib. Sonda şagirdlər fəxri fərmanla mükafatlandırılıb.xeber100.com

“Açıq qapı günü” keçirilib

Sentyabrın 9-da Azərbaycan Dövlət Dəniz Akademiyasında “Açıq qapı günü” – yenicə tələbə adını qazanan gənclər və onların valideynləri ilə görüş keçirilib. Azərtac xəbər verir ki, görüşdə gəmiçiliyin rəhbər işçiləri, donanma rəisləri, gəmi təmiri zavodlarının direktorları, Bakı Gəmiqayırma Zavodunun və gəmiçiliyin alyans tərəfdaşı olan “Caspian Marine Services” şirkətinin nümayəndələri iştirak ediblər. Azərbaycan Dövlət Dəniz Akademiyasının rektoru Çingiz Əliyev builki tələbə qəbulunun yekunları, akademiyada tədrisin təşkili, tələbələr üçün yaradılan şərait barədə məlumat verib. Bildirib ki, 2016-2017-ci tədris ili üçün müəyyən edilmiş qəbul planında nəzərdə tutulan 370 yerə 309 abituriyent daxil olub. İlk dəfə olaraq onların arasında 600-dən yuxarı bal toplayanlar da var. Hazırda Dəniz Akademiyasında 1200-ə yaxın tələbə təhsil alır. Son iki ildə onların müvəffəqiyyət göstəricilər 67,5 faizdən 80,45 faizə, keyfiyyət göstəriciləri isə 13,5 faizdən 36,7 faizə yüksəlib. Bu gün akademiyada 63 tələbə əlaçı, 305 nəfər isə əla və yaxşı oxuyanlardır. Ç.Əliyevin sözlərinə görə, Azərbaycan Dövlət Dəniz Akademiyasının beynəlxalq əlaqələri genişlənir. Artıq 10 ölkədən 17 ali məktəb ilə əməkdaşlıq edilir. Onların arasında Rusiya, Türkiyə, Polşa, Ukrayna, Latviya, Bolqarıstan və sair ölkələrin aparıcı dənizçilik universitetləri və akademiyaları var.xeber100.com

İranda Azərbaycan dili və ədəbiyyatı fakültəsi açılacaq

Gələn təhsil ilində İranın Azərbaycan vilayətindəki universitetlərin birində Azərbaycan dili və ədəbiyyatı fakültəsi açılacaq. Bu barədə məlumat verən İranın təhsil nazirinin müavini Müştəba Şəriətian bildirib ki, İranda yaşayan xalqların hüquqları və milli dillərində təhsil almaq haqları dövlət tərəfindən təmin edilir.xeber100.com

Beynəlxalq Təhsil Sərgisi keçiriləcək

Oktyabrın 7-dən 9-dək Bakı Ekspo Mərkəzində Təhsil Nazirliyinin dəstəyi ilə 10-cu Yubiley Azərbaycan Beynəlxalq Təhsil Sərgisi keçiriləcək. “Caspian Event Organisers” (“CEO”) şirkətindən Azərtac-a bildiriblər ki, “Təhsil” sərgisi “Karyera” sərgisi ilə eyni vaxtda keçirilir və Azərbaycanda təhsil xidmətləri üzrə ən böyük tədbirdir. Sərginin təşkilatçısı qismində “Caspian Event Organisers” (“CEO”) şirkəti çıxış edir. Bu il “Təhsil” sərgisində Azərbaycan, Almaniya, Latviya, Litva, Polşa, Macarıstan, İordaniya ölkələri ali təhsil müəssisələrinin, kollec və başqa təhsil təşkilatlarının nümayəndələri ziyarətçiləri təhsil proqramları ilə tanış edəcəklər. xeber100.com

Tələbə Qəbulu üzrə Dövlət Komissiyasının məlumatına görə…

Carı il sentyabrın 7-dək “Dərslik portalı”ndan (derslik.edu.az) 1 milyon 356 min 717 dəfə istifadə edilib. Tələbə Qəbulu üzrə Dövlət Komissiyasından Azərtac-a bildiriblər ki, portaldan 2 min 456 nəfər qeydiyyatdan keçib. Ay ərzində ünvanlanmış suallar ekspertlər və müəlliflər tərəfindən cavablandırılıb.xeber100.com

“Məktəb icmaları” layihəsi çərçivəsində yarmarka keçiriləcək

Sentyabrın 8-dən 11-dək Təhsil Nazirliyinin, Bakı Şəhəri üzrə Təhsil İdarəsinin (BŞTİ), Yasamal Rayon Bələdiyyəsinin və Azərbaycan Milli Elmlər Akademiyası Azərbaycan Milli Ensiklopediyası Elmi Mərkəzinin dəstəyi ilə “Community.az” portalı tərəfindən “Məktəb icmaları” layihəsi çərçivəsində məktəb yarmarkası keçiriləcək. Təhsil Nazirliyindən Azərtac-a bildiriblər ki, Milli Ensiklopediya Mərkəzində keçiriləcək yarmarkada müxtəlif müəssisələr və təşkilatlar təmsil olunacaqlar. Yarmarkanın təşkilində əsas məqsəd valideynlərin az zaman sərf etməklə dərs vəsaitlərini, keyfiyyətli məktəb ləvazimatlarını güzəştli qiymətlərlə əldə etmələrinə kömək etməkdir. Yarmarka zamanı məktəb ləvazimatlarının, dərsliklərin, kitabların satışı və müxtəlif həvəsləndirici aksiyaların keçirilməsi nəzərdə tutulur.xeber100.com

Qərb Universiteti əlavə qəbul elan edib

Qərb Universiteti əlavə ali təhsil (distant) almaq istəyənlər üçün qəbul elan edib. Universitetdən Azərtac-a bildirilib ki, qəbul 17 ixtisas - politologiya, dizayn (interyer, qrafik, landşaft), tərcümə (ingilis, alman, fransız), filologiya (ingilis dili və ədəbiyyat), filologiya (Azərbaycan dili və ədəbiyyat), beynəlxalq münasibətlər, regionşünaslıq (qərbşünaslıq), dünya iqtisadiyyatı, maliyyə, menecment, turizm və otelçilik, iqtisadiyyat, biznesin idarə edilməsi, informasiya texnologiyaları, kompyuter mühəndisliyi, psixologiya, ekologiya ixtisasları üzrə aparılır. Qəbul olmaq istəyənlər I ali təhsil haqqında sənədi (diplom və diplomun əlavəsi), 6 fotoşəkil (3x4), şəxsiyyət vəsiqəsinin surətini, tibbi arayışı, oğlanlar üçün hərbi bileti və ya SHXÇDX-də hərbi qeydiyyat haqqında vəsiqənin surətini təqdim etməlidirlər. Təhsilini müvəffəqiyyətlə başa vuranlara dövlət nümunəli bakalavr diplomu veriləcək.xeber100.com

Yeni tədris ilinin başlanması münasibətilə tədbir keçirilib

Sentyabrın 5-də Bakı İstedadlar Təhsil Kompleksində (BİTK) yeni tədris ilinin başlanması münasibətilə tədbir keçirilib. Azərtac xəbər verir ki, tədbirdə yerli və xarici müəllimlər, məktəbin heyəti, şagird və onların valideynləri iştirak ediblər. Bu il açılış tədbirinə məktəbin tərəfdaşı olan SOCAR-ın prezidenti Rövnəq Abdullayev də iştirak edib. Məktəbin direktoru Siqve Austem məktəbdə Kembric Əsas Tədris planının tədris olunduğunu qeyd edib. Bildirib ki, bu il məktəb tərəfindən 8 azərbaycanlı müəllim Nottinqem Universitetinə PGCEi ixtisas artırma kurslarına göndərilib, gələn ildə də yerli müəllimlərin ixtisas artırma təlimlərinə göndərilməsi nəzərdə tutulur.Qeyd edək ki, Bakı İstedadlar Təhsil Kompleksi 2012-ci ildə Britaniya məktəbi kimi SOCAR-ın dəstəyi ilə təsis olunub. Məktəbdə tədris Britaniya kurikulumu əsasında yerli və xarici müəllimlər tərəfindən aparılır.xeber100.com

Tələbə Qəbulu üzrə Dövlət Komissiyasının məlumatı…

2016/2017-ci tədris ili üçün tam orta təhsil bazasında (11 illik) orta ixtisas təhsili müəssisələrinin boş qalan plan yerlərinə keçirilmiş müsabiqənin nəticələri açıqlanıb. Tələbə Qəbulu üzrə Dövlət Komissiyasından (TQDK) Azərtac-a bildiriblər ki, abituriyentlər müsabiqənin nəticələrini komissiyanın internet saytından və ya mobil telefonla iş nömrəsini 7727 nömrəsinə göndərməklə öyrənə bilərlər. Boş qalan 1220 plan yerinin müsabiqəsində iştirak etmək üçün 5 min 629 abituriyent ərizə təqdim edib. Onlardan 1077 abituriyent orta ixtisas təhsili müəssisələrinə qəbul olub. Qəbul olanlar sentyabrın 6-dan 10-dək (saat 9:00-dan 17:00-dək) sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər. Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul haqqında əmri orta ixtisas məktəbinə göndərilməyəcək.xeber100.com