Portuqal dili bilən tərcüməçi vəzifəsinə vakansiya elan edilib

Qərb Universiteti beynəlxalq layihə çərçivəsində işləmək üçün portuqal dili bilən tərcüməçi vəzifəsinə vakansiya elan edir. Universitetdən Azərtac-a bildirilib ki, namizədlər portuqal və Azərbaycan dillərini mükəmməl bilməlidirlər. Bundan əlavə, namizədlər arasında üstünlük ingilis və rus dillərini bilənlərə veriləcək. Maraqlananlar CV-lərini [email protected] ünvanına göndərə bilərlər.xeber100.com

“Məktəblinin dostu” layihəsinə start verilib

Yeni tədris ilindən Bakı məktəblərində Təhsil Nazirliyi və Azərbaycan Prezidenti yanında Vətəndaşlara Xidmət və İnnovasiyalar Agentliyinin birgə həyata keçiridiyi “Məktəblinin dostu” layihəsinə start verilib. Layihənin koordinatoru Rüstəm Ağayev Apa-ya açıqlamasında deyib ki, ilkin olaraq paytaxtda icra olunacaq pilot layihənin məqsədi tədris prosesinin sağam, təhlükəsiz, əlverişli psixoloji mühitdə təşkil edilməsi, valideynlərin övladlarının təhsil şəraiti barədə məlumatlılığının və məmnunluğunun artırılmasıdır. Onun sözlərinə görə, ölkəmizin təhsil sistemində ilk dəfə olaraq gerçəkləşdirilən "Məktəblinin dostu" layihəsi dünyanın müxtəlif ölkələrində çeşidli adlarla uğurla sınaqdan çıxarılıb. Burada əsas hədəf məktəb-təhsilalan-valideyn üçbucağının tərəfləri arasında üfüqi ünsiyyətin qurulması və hədəf olaraq təhsilalana ahəngdar özünü gerçəkləşdirmə imkanları yaratmaqdır. Məktəblinin dostu olmaq üçün 21-30 yaşa kimi ali təhsilli hər bir insan müraciət edə bilər: “Onlar məktəbdə iş vaxtının əvvəlindən sonuna kimi məktəb ərazisinə nəzarət edəcək. İş dinamik olduğuna görə, burada cavanların olması məsləhətdir. Məktəblinin dostunun əsas vəzifəsi məktəblinin təhlükəsizliyini qorumaq, fövqəladə hal baş verdikdə müəllim heyətinə və şagirdlərə ilkin yardım göstərməkdir. Məktəblilərin dostu gülərüz, uşaqların məsləhətçiləri, böyük qardaş və bacıları olacaqlar”.xeber100.com    

Bakı Dövlət Universiteti yeni tədris ilinə hazırlaşır

Bakı Dövlət Universiteti (BDU) ənənəvi olaraq yeni tədris ilinin başlanğıcında tələbələrini yüksək səviyyədə qarşılamaq üçün iyul-avqust aylarında bir tərəfdən tədrisin yeni formatları üzərində, digər tərəfdən auditoriyaların və bütövlükdə universitetin təmiri ilə bağlı müvafiq işlər aparır. Universitetdən bildiriblər ki, bu il BDU-da bakalavr pilləsində filologiya istiqaməti üzrə türk dili və ədəbiyyatı, fars dili və ədəbiyyatı, magistratura pilləsində isə informasiya hüququ, Qafqaz xalqlarının tarixi, media və kommunikasiya sistemləri, televiziya və radio yayımları menecmenti, su ehtiyatlarının inteqrasiyalı idarə edilməsi, biomüxtəliflik və təbiətin mühafizəsi, bioekologiya, radiasiya materialşünaslığı və atom və nüvə fizikası kimi yeni ixtisas və ixtisaslaşmalar açılıb. Hər il oldugu kimi, bu il də yeni dərsliklər və dərs vəsaitləri, metodiki göstərişlər, fənn proqramları, tədris planları yazılıb.xeber100.com  

2016-2017-ci dərs ilində…

2016-2017-ci dərs ili üçün Bakı şəhəri üzrə I sinfə 48 minə yaxın şagirdin qəbul olunacağı gözlənilir. Bakı Şəhəri üzrə Təhsil İdarəsindən (BŞTİ) Azərtac-a bildiriblər ki, bugünkü məlumata əsasən, “mektebeqebul.edu.az” saytı vasitəsilə 45 min 742 valideyn məktəb, lisey və gimnaziyalara sorğu yerləşdirib. Onlardan 42 min 892 nəfəri övladlarının təhsil alması üçün ümumtəhsil məktəblərini, 2 min 850 nəfəri isə lisey və gimnaziyaları seçib. Məktəblərdə I sinfə qəbul prosesi sentyabrın 15-də yekunlaşacaq. Uşaqlarının I sinfə qəbulu üçün qeydiyyatdan keçməkdə gecikən valideynlər isə oktyabrın 15-dək BŞTİ-yə ərizə ilə müraciət edə biləcəklər. Qeyd edək ki, Azərbaycan Respublikası təhsil nazirinin müvafiq əmrinə əsasən, 2016-2017-ci dərs ili üçün I sinfə şagird qəbulunun elektron sistem vasitəsilə həyata keçirilməsi prosesinə cari il martın 1-də başlanılıb.xeber100.com

Təhsil Nazirliyinin məlumatına görə…

Təhsil Nazirliyinin Telefon Məlumat Mərkəzinə (“Qaynar xətt” xidməti, telefon: 146) daxil olan zənglərlə və Vətəndaşların Qəbulu Mərkəzində 2016-cı ilin avqustunda vətəndaşlara göstərilən xidmətlərlə bağlı statistika açıqlanıb. Nazirlikdən Azərtac-a bildiriblər ki, qeyd olunan müddət ərzində vətəndaşlarla iş bölməsinə 23 min 891 müraciət daxil olub. Statistikaya əsasən, Telefon Məlumat Mərkəzində 18 min 746 zəng (2013-cü ilin müvafiq dövrü ilə müqayisədə 17,2, 2014-cü ilin müvafiq dövrü ilə müqayisədə 2,7, 2015-ci ilin müvafiq dövrü ilə müqayisədə 2 dəfə çox) qəbul edilib. Vətəndaşların Qəbulu Mərkəzində isə bu dövrdə 5 min 145 vətəndaşa xidmət göstərilib. Telefon Məlumat Mərkəzinə və Vətəndaşların Qəbulu Mərkəzinə daxil olmuş müraciətlərin (əsasən sorğu xarakterli olub) əksəriyyəti dərhal cavablandırılıb və operativ həll olunub. Vətəndaşların Qəbulu Mərkəzində 1587 sənəd (1013 ərizə, 491 məktub, 83 digər sənəd) qəbul olunub və qeydiyyata alınıb. Daxil olan müraciətlər daha çox müəllimlərin işə qəbulu və yerdəyişməsi, ali təhsil sənədlərinin (diplomların) tanınması (nostrifikasiya), ilk peşə-ixtisas təhsili müəssisələrinə qəbul, tələbələrin yerli ali təhsil müəssisələrinə köçürülməsi və bərpası, təhsil haqqından azad olunma ilə bağlı məsələləri əhatə edib.xeber100.com

Təhsil Nazirliyinin məlumatına əsasən…

2016-2017-ci tədris ili üzrə ilk peşə-ixtisas təhsili müəssisələrinin boş qalan yerlərinə əlavə ixtisas seçimi sentyabrın 1-dən 6-dək həyata keçiriləcək. Təhsil Nazirliyindən Azərtac-a bildiriblər ki, dövlət vəsaiti hesabına ilk peşə-ixtisas təhsili almaq istəyənlər Bakı və Gəncə şəhərlərində fəaliyyət göstərən “ASAN xidmət” mərkəzlərinə müraciət edə bilərlər. Əlavə ixtisas seçimində birinci mərhələdə iştirak etməyən namizədlərin də müraciətlərinə imkan yaradılacaq. Bu il avqustun 11-dən 26-dək keçirilən ilk mərhələ üzrə 3 min 245 nəfər ilk peşə-ixtisas təhsili müəssisələrinə qəbul olunub. Qeyd edək ki, “ASAN peşə” layihəsi Təhsil Nazirliyi ilə “ASAN xidmət” arasındakı əməkdaşlıq çərçivəsində pilot olaraq reallaşdırılır. “ASAN peşə” layihəsi vətəndaşların rahatlığının təmin olunması, Təhsil Nazirliyi ilə “ASAN xidmət”in əməkdaşlığının səmərəliliyinin artırılması və ilk peşə-ixtisas təhsili müəssisələrinə şagirdlərin qəbulu prosesində subyektiv amillərin aradan qaldırılması məqsədlərinə xidmət edir.xeber100.com

Bakı Dövlət Universiteti – 97

Bakı Dövlət Universitetinin (BDU) yaranmasından 97 il ötür. 1919-cu il sentyabrın 1-də Azərbaycan Xalq Cümhuriyyəti Bakıda universitetin təsis edilməsi ilə bağlı qərar qəbul edib və onun nizamnaməsi təsdiq olunub. Beləliklə, Avropa və Asiyanın qovuşuğunda yeni bir ali təhsil ocağı – Bakı Dövlət Universiteti yaradılıb. İlk tədris ilini tarix-filologiya, tibb fakültələri və 44 müəllimlə başlayan BDU 97 illik fəaliyyəti dövründə Azərbaycanın elm, təhsil və mədəniyyət tarixində böyük rol oynayıb. Universitetin məzunları respublikada ali təhsil şəbəkəsinin qurulmasında, elmi məktəblərin genişlənməsində, ziyalı təbəqəsinin formalaşmasında və müstəqil Azərbaycanın çiçəklənməsində xüsusi xidmətlər göstəriblər. Bu gün təbiət, fundamental, humanitar və sosial elmlər sahəsi üzrə çoxprofilli ali təhsil ocağı olan BDU-nun 17 fakültəsində bakalavriat pilləsində 60, magistratura pilləsində isə 37 ixtisas və 204 ixtisaslaşma üzrə təhsil alan tələbələrin sayı 21 mindən çoxdur.xeber100.com

Tələbə Qəbulu üzrə Dövlət Komissiyasının məlumatına görə…

Növbəti SAT imtahanının oktyabrın 1-də keçirilməsi nəzərdə tutulur. Tələbə Qəbulu üzrə Dövlət Komissiyasından Azərtac-a bildiriblər ki, imtahanda iştirak etmək istəyənlərin qeydiyyatı artıq başlayıb və sentyabrın 2-si saat 9:00-dək davam edəcək (gözləmə siyahısı üçün qeydiyyat isə sentyabrın 21-dək davam edəcək).xeber100.com

İxtisaslar üzrə yerləşdirilmə prosesi başa çatıb

“ASAN peşə” layihəsi çərçivəsində ilk peşə-ixtisas təhsili müəssisələrinə sənəd qəbulu və ixtisaslar üzrə yerləşdirilmə prosesi başa çatıb. Təhsil Nazirliyindən Azərtac-a bildiriblər ki, bu qurum ilə “ASAN xidmət” arasındakı əməkdaşlıq çərçivəsində hazırlanmış “ASAN peşə” layihəsi avqustun 11-dən 26-dək pilot olaraq Bakı və Gəncə şəhərlərində reallaşdırılıb. Dövlət vəsaiti hesabına ilk peşə-ixtisas təhsili almaq istəyənlərin sənəd qəbulu “ASAN xidmət” mərkəzlərində aparılıb. “ASAN peşə” layihəsi üzrə 4 min 66 nəfər müraciət edib. Onlardan 3 min 245 nəfər ilk peşə-ixtisas təhsili müəssisələrinə qəbul olunub. İxtisas seçimindən müvəffəqiyyətlə keçən şəxslər aşağıda göstərilən sənədləri avqustun 27-dən sentyabrın 1-dək (şənbə və bazar günləri daxil olmaqla) qəbul olunduqları ilk peşə-ixtisas təhsili müəssisəsinə təqdim etməlidirlər: təhsil haqqında sənədin əsli; tibbi arayış; şəxsiyyət vəsiqəsi (surəti); 3x4 sm. ölçüdə dörd ədəd fotoşəkil; hərbi mükəlləfiyyət barədə sənəd (hərbi mükəlləfiyyətlilər). Boş qalan yerlərə əlavə ixtisas seçimi sentyabrın 1-dən 6-dək Bakı və Gəncə şəhərlərində fəaliyyət göstərən “ASAN xidmət” mərkəzlərində aparılacaq. İxtisas seçimindən müvəffəqiyyətlə keçən şəxslərin siyahısı Təhsil Nazirliyinin internet saytında yerləşdirilib.xeber100.com

Respublika müsabiqəsi keçiriləcək

Təhsil naziri Mikayıl Cabbarov təhsildə informasiya texnologiyalarının tətbiqi sahəsində “Elektron Təhsil” Respublika müsabiqəsinin keçirilməsi barədə əmr imzalayıb. Təhsil Nazirliyindən Azərtac-a bildiriblər ki, əmrə əsasən təhsildə informasiya texnologiyalarının tətbiqi sahəsində “Müəllim”, “Şagird” və “Məktəb” istiqamətləri üzrə “Elektron Təhsil” Respublika müsabiqəsi keçiriləcək. Müsabiqə ilə bağlı nəzərdə tutulan tədbirlərin həyata keçirilməsini təmin etmək Təşkilat Komitəsinə tapşırılıb.xeber100.com