Təhsil Nazirliyinin məlumatına görə…

Ümumtəhsil müəssisələrinə müəllimlərin işə qəbulu üzrə müsabiqənin test mərhələsi davam edir.Təhsil Nazirliyindən Azərtac-a bildiriblər ki, iyulun 16-da keçirilən imtahanda ibtidai sinif üzrə 3195 nəfər iştirak edib. İyulun 17-də isə imtahanda 3520 namizədin iştirakı gözlənilir.İmtahanlar Azərbaycan Texniki Universitetinin İdman Kompleksində keçirilir. Namizədlərə ixtisaslarına uyğun olaraq ümumtəhsil məktəblərinin fənn proqramının məzmunu üzrə 40, metodika, təlim strategiyaları üzrə 10 və məntiq üzrə 10 sual olmaqla ümumilikdə 60 sualı cavablandırmaq üçün 90 dəqiqə vaxt verilib.Qeyd edək ki, ibtidai sinif üzrə iyulun 19-dək, ingilis dili üzrə iyulun 19-dan 20-dək, alman dili üzrə iyulun 20-də, riyaziyyat üzrə iyulun 23-dən 24-dək, informatika və təsviri incəsənət üzrə iyulun 24-də, Azərbaycan dili və ədəbiyyat üzrə iyulun 25-dən 26-dək, rus dili, rus dili və ədəbiyyatı, Azərbaycan dili, fransız dili və musiqi üzrə iyulun 26-da, tarix və kimya üzrə iyulun 27-də, fizika və texnologiya üzrə iyulun 28-də, biologiya üzrə iyulun 30-da, fiziki tərbiyə üzrə iyulun 30-dan 31-dək, coğrafiya üzrə iyulun 31-də test imtahanları keçiriləcək.xeber100.com

İqtisad Universiteti 2018/2019-cu tədris ilinə yeniliklərlə başlayacaq

Azərbaycan Dövlət İqtisad Universitetinin (UNEC) Zaqatala filialı 2018/2019-cu tədris ilinə yeniliklərlə başlayacaq.UNEC-dən Azərtac-a bildiriblər ki, Zaqatala filialına yeni tədris ilindən I və II ixtisas qrupu üzrə tələbə qəbulu həyata keçiriləcək. Birinci ixtisas qrupunu seçən abituriyentlər informasiya texnologiyaları ixtisası üzrə əyani təhsil ala biləcəklər. İkinci qrupda isə ixtisasların sayı artırılıb. İkinci ixtisas qrupu üzrə iqtisadiyyat, maliyyə, mühasibat uçotu və audit, biznesin idarə edilməsi, turizm və otelçiliklə yanaşı, menecment, marketinq ixtisasları da tədris olunacaq.Tələbə və valideynləri sevindirəcək daha bir yenilik isə Zaqatala filialında təhsil haqları ilə bağlıdır. Belə ki, filialda ixtisaslar üzrə təhsil haqları qiyabi və əyani təhsildə əhəmiyyətli dərəcədə azaldılıb. Filiala qiyabi qəbul planında və keçid ballarında da dəyişikliklər olunub. Filiala keçid balları azaldılıb.Yeni tədris ilindən Zaqatala filialında tədrisin keyfiyyətinin artırılması məqsədilə Elektron Universitet Modeli tətbiq olunacaq. Biliyin qiymətləndirilməsində şəffaflıq və operativliyin təmin olunması üçün imtahanlar elektron qaydada mərkəzləşdirilmiş test üsulu ilə aparılacaq. Filialda tələbələr arasında sağlam rəqabət mühitinin yaradılması məqsədilə ötən tədris ilində olduğu kimi, bu il də imtahanlarda ən yüksək nəticə göstərən tələbə təhsilini bir semestr ərzində Bakıda davam etdirə biləcək. Eyni zamanda, imtahanlarda ən yüksək nəticə göstərən üç tələbəyə 100 AZN məbləğində xüsusi təqaüd veriləcək.xeber100.com

IX və XI sinfi bitirən məzunlara attestatların verilməsi davam edir

Bakı Şəhəri üzrə Təhsil İdarəsinin (BŞTİ) tabeliyindəki məktəblərdə IX və XI sinfi bitirən məzunlara attestatların verilməsi davam edir.BŞTİ-dən Azərtac-a bildirilib ki, XI sinfi xüsusi nailiyyətlərlə başa vuran məzunlara xüsusi nümunəli (qızıl və gümüş medallar), əlaçılara fərqlənmə, digər hallarda isə tam orta təhsil haqqında adi attestat verilir. Ötən ildən etibarən IX sinfi bitirən məzunlara şəhadətnamə deyil, attestat təqdim olunur.Attestatlarda təhsil müddətində hər bir fənn üzrə tədris olunan saatların ümumi miqdarı, illik və imtahan qiymətləri yazılır. Tam orta təhsil haqqında attestatda şagirdin bitirdiyi sinfin təmayül istiqaməti də qeyd olunur.Qızıl medalla təltif olunan məzunların tam orta təhsil haqqında xüsusi nümunəli attestatının üzlüyü sarı (qızılı), gümüş medala layiq görülən məzunların xüsusi nümunəli attestatının üzlüyü boz (gümüşü), fərqlənmə attestatının üzlüyü qırmızı, adi attestatın üzlüyü isə yaşıl rəngdədir.Qeyd edək ki, attestatlar Nazirlər Kabinetinin qərarı ilə təsdiq edilmiş “Ümumi təhsil pilləsində təhsil haqqında dövlət sənədlərinin nümunələri və onların verilməsi Qaydası” əsasında məzunlara təqdim olunur.xeber100.com

İyulun 10-da keçirilmiş imtahanların nəticələri açıqlanıb

Dövlət İmtahan Mərkəzi (DİM) iyulun 10-da keçirilmiş imtahanların nəticələrini elan edib. İmtahanların nəticələri artıq mərkəzin internet saytında yerləşdirilib. Abituriyentlər DİM-in internet saytında imtahanın nəticələri və cavab kartının qrafik təsviri ilə tanış ola bilərlər. İmtahan nəticələrini mobil telefonla 7727-yə iş nömrəsini göndərməklə də öyrənmək mümkündür.DİM-dən Azərtac-a bildirilib ki, imtahan nəticələrinə əsasən, ali təhsil müəssisələrinin V ixtisas qrupuna (xüsusi qabiliyyət tələb edən ixtisaslara) və kolleclərə qəbul olmaq üçün qeydiyyatdan keçmiş 18116 abituriyentdən 3001-i imtahana gəlməyib. İmtahanda iştirak edən abituriyentlərdən 12-si imtahan qaydalarını pozduğu üçün xaric olunub və nəticələri ləğv edilib.Ümumi (9 illik) orta təhsil bazasında orta ixtisas təhsili müəssisələrinə qəbul olmaq üçün qeydiyyatdan keçmiş 4437 abituriyentdən 721-i imtahana gəlməyib. İmtahana qatılan abituriyentlərdən biri qaydaları pozduğuna görə xaric olunub və nəticələri ləğv edilib.Eksternat qaydasında attestasiyada iştirak etmək üçün qeydiyyatdan keçmiş və üzrlü səbəbdən buraxılış imtahanlarına qatılmayan IX sinif və XI sinif şagirdlərinin də nəticələri saytda yerləşdirilib.Qeyd edək ki, imtahanların nəticələri ilə əlaqədar müraciətlərə baxılması üçün Apellyasiya Komissiyası yaradılıb. Komissiya Bakı şəhəri, Nəsimi rayonu, A. Salamzadə küçəsi, 28 ünvanında fəaliyyət göstərir. Şagirdlər Apellyasiya Komissiyasına iyulun 12-dən 13-nə kimi saat 10:00-dan 17:00-dək şəxsiyyəti təsdiq edən sənədin əslini və surətini gətirməklə şəxsən müraciət edə bilərlər.xeber100.com

Dövlət İmtahan Mərkəzinin məlumatı əsasında…

Ali təhsil müəssisələrinin və Azərbaycan Milli Elmlər Akademiyasının magistratura səviyyəsinə qəbul olunan bakalavrların qeydiyyatı bu gün sona çatır.Dövlət İmtahan Mərkəzindən Azərtac-a bildiriblər ki, bakalavrlar qeydiyyatdan keçmək üçün tələb edilən sənədlər barədə məlumatı qəbul olduqları təhsil müəssisəsindən öyrənə bilərlər.Sənədlərini təqdim etməyən və qeydiyyatdan keçməyən bakalavrlar qəbul olunanlar siyahısından xaric ediləcəklər. Onlar boş qalan yerlərin müsabiqəsində də iştirak edə bilməyəcəklər.xeber100.com

Növbəti imtahanlarda 26014 nəfərin iştirak edəcəyi gözlənilir

Dövlət İmtahan Mərkəzi (DİM) iyulun 10-da növbəti imtahanlar keçirəcək.DİM-dən Azərtac-a bildiriblər ki, doqquz şəhər və rayonda – Bakı, Naxçıvan, Gəncə, Şəki, Bərdə, Göyçay, Şirvan, Lənkəran və Xaçmazda təşkil olunacaq imtahanlarda ümumilikdə 26014 nəfərin iştirak edəcəyi gözlənilir.Bu imtahanlarda ali təhsil müəssisələrinin V ixtisas qrupuna (xüsusi qabiliyyət tələb edən ixtisaslara) və tam (11 illik) orta təhsil bazasında orta ixtisas təhsili müəssisələrinə (kolleclərə) sənəd vermiş 18116 nəfər əvvəlki illərin məzunları; ümumi (9 illik) orta təhsil bazasında orta ixtisas təhsili müəssisələrinə (kolleclərə) sənəd vermiş 4437 nəfər əvvəlki illərin məzunları; eksternat qaydasında attestasiyada iştirak etmək üçün qeydiyyatdan keçmiş, həmçinin üzrlü səbəbdən buraxılış imtahanlarında iştirak edə bilməmiş cari ilin məzunu olan 847 nəfər IX sinif, 2614 nəfər XI sinif şagirdinin iştirakı nəzərdə tutulur.İmtahanların idarə olunması üçün 170 imtahan rəhbəri, 2073 nəzarətçi-müəllim ayrılıb.Bu imtahanlarda iştirak edəcək şagirdlər (abituriyentlər) “İmtahana buraxılış vərəqəsi”ni internet vasitəsilə çap edib götürə bilirlər. Buraxılış vərəqəsi ilə yanaşı onlara “Yaddaş kitabçası”ndan çıxarış da təqdim olunur. Burada şagirdlərə (abituriyentlərə) imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılır.Şagirdlər (abituriyentlər) imtahana aşağıdakı sənədləri gətirməlidirlər: “İmtahana buraxılış vərəqəsi”; şəxsiyyəti təsdiqləyən sənədin əslini:a) Azərbaycan Respublikasının vətəndaşları (16 yaşı tamam olmayan şagirdlər də daxil olmaqla) şəxsiyyət vəsiqəsini;b) əcnəbilər şəxsi pasportları və icazə vəsiqələrini, vətəndaşlığı olmayan şəxslər şəxsiyyət vəsiqələrini və icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini;- Şəxsiyyət vəsiqəsində şəkli olmayan şagirdlər digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışı (arayışa şagirdin 3x4sm ölçülü şəkli yapışdırılır və şəkil möhürlə təsdiqlənir).Qeyd edək ki, göstərilən sənədlərindən biri olmayan və ya sənədləri arasında uyğunsuzluq aşkarlanan şəxslər imtahan binasına buraxılmayacaqlar.xeber100.com

Rezidenturaya qəbul imtahanının II mərhələsi keçirilib

Bu gün Dövlət İmtahan Mərkəzi (DİM)2018/2019-cu tədris ili üçün Azərbaycan Respublikasında baza ali tibb təhsili əsasında həkim-mütəxəssislərin hazırlanması məqsədilə rezidenturaya qəbul imtahanının II mərhələsini (ixtisas fənləri üzrə biliklərin qiymətləndirilməsi) keçirib.DİM mətbuat xidmətindən Apa-ya verilən məlumata görə, imtahan saat 11:00-da başlanıb və 2 saat 30 dəqiqə davam edib.İmtahan prosesinin idarə olunması üçün DİM-də operativ qərargah fəaliyyət göstərib, müntəzəm olaraq imtahanın keçirildiyi binalarla əlaqə saxlanılıb və imtahan prosesinin gedişi nəzarətdə olub. Bütün binalarda imtahan təlimata uyğun şəkildə keçirilib, namizədlərin öz bilik səviyyələrini nümayiş etdirmələri üçün zəruri şərait yaradılıb.İyulun 9-dan etibarən imtahan protokollarının və cavab kartlarının emalı aparılacaq. Nəticələrin yaxın günlərdə elan edilməsi nəzərdə tutulur.Qeyd edək ki, rezidenturaya qəbul imtahanının ikinci mərhələsi (ixtisas fənləri üzrə biliklərin qiymətləndirilməsi) ilə əlaqədar namizədlərin müraciətlərinə baxılması üçün Apelyasiya Komissiyası yaradılıb. Apelyasiya Komissiyası Nəsimi rayonu, A. Salamzadə küçəsi, 28 (keçmiş Bakı Asiya Universitetinin binasında) ünvanında fəaliyyət göstərəcək. Namizədlər Apelyasiya Komissiyasına 9-11 iyul 2018-ci il tarixlərində saat 10:00-dan 17:00-dək şəxsiyyəti təsdiq edən sənədin əslini və surətini təqdim etməklə şəxsən müraciət edə bilərlər.xeber100.com

Dövlət İmtahan Mərkəzinin məlumatına görə…

Dövlət İmtahan Mərkəzi (DİM) tərəfindən vakant inzibati vəzifələr üzrə dövlət qulluğuna qəbul üçün mayın 22-də elan edilmiş ümumi müsahibədə qeydə alınmış namizədlərlə müsahibələrin keçirilmə qrafiki müəyyənləşib.DİM-dən Azərtac-a bildirilib ki, namizədlərlə müsahibələrin mərkəzin Bakıdakı inzibati binasında keçirilməsi nəzərdə tutulur. Müsahibələrin Azərbaycan Respublikası Hesablama Palatası, Energetika Nazirliyi, Təhsil Nazirliyi, Maliyyə Nazirliyi, Əmlak Məsələləri Dövlət Komitəsi, Dini Qurumlarla İş üzrə Dövlət Komitəsi, Şirvan Apellyasiya Məhkəməsi, Lənkəran Ağır Cinayətlər Məhkəməsi, Şabran Rayon Məhkəməsi üzrə elan edilmiş vakant vəzifələri əhatə etməklə iyulun 9-dan 19-dək aparılması planlaşdırılır.Ümumi müsahibəyə çıxarılan vəzifələr arasında daha çox rəqabət Hesablama Palatasının ümumdövlət xidmətlərinin auditi şöbəsi, ümumdövlət xidmətləri üzrə digər sahələrin auditi sektorunda məsləhətçi (bir vakant vəzifəyə 19 müraciət), Energetika Nazirliyinin insan resursları və dövlət qulluğu şöbəsi, dövlət qulluğu sektorunun müdiri (bir vakant vəzifəyə 14 müraciət) vəzifələri üzrə müşahidə edilir.xeber100.com

Cari ilin məzunu olan IX sinif və XI sinif şagirdləri üçün imtahan keçiriləcək

Dövlət İmtahan Mərkəzi (DİM) tərəfindən iyulun 10-da ali təhsil müəssisələrinin V ixtisas qrupuna (xüsusi qabiliyyət tələb edən ixtisaslara) və tam (11 illik) orta təhsil bazasında orta ixtisas təhsili müəssisələrinə (kolleclərə) sənəd vermiş əvvəlki illərin məzunları, ümumi (9 illik) orta təhsil bazasında orta ixtisas təhsili müəssisələrinə (kolleclərə) sənəd vermiş əvvəlki illərin məzunları, eksternat qaydasında attestasiyada iştirak etmək üçün qeydiyyatdan keçmiş, həmçinin üzrlü səbəbdən buraxılış imtahanlarında iştirak edə bilməmiş cari ilin məzunu olan IX sinif və XI sinif şagirdləri üçün imtahan keçiriləcək.Çap üçün kompüterə Adobe Reader proqramı quraşdırılmalıdır və brauzerin “Pop-up blocked” sahəsindən qeyd işarəsi götürülməlidir. Şəxsiyyəti təsdiq edən sənədində şəkli olmayan şagirdlərə buraxılış imtahanı üçün təhsil müəssisəsi tərəfindən verilməli olan arayışı DİM-in saytından yükləmək olar.xeber100.com

IX sinif şagirdləri üçün buraxılış imtahanı keçirilir

Dövlət İmtahan Mərkəzi (DİM) Bakıdakı xüsusi təyinatlı orta məktəblərin və Şəmkir, Gədəbəy, Ağstafa, Qazax, Tovuz, Mingəçevir, Balakən, Zaqatala, Qax, Yardımlı, Cəlilabad, Masallı, Lerik, Göyçay, Ağdaş, Ucar, İsmayıllı, Qobustan, Ağcabədi, Füzuli, Beyləqan, Salyan, Neftçala, Hacıqabul, Qusar, Quba, Siyəzən, Xızıdakı orta ümumtəhsil müəssisələrinin IX sinif şagirdləri üçün mərkəzləşdirilmiş qaydada buraxılış imtahanı keçirir.Azərtac xəbər verir ki, saat 10:00-da başlanan imtahan 1 saat 30 dəqiqə davam edəcək.İmtahanların keçirilməsi üçün ümumilikdə 111 imtahan binası ayrılıb. İmtahanda Bakıda 702, Şəmkirdə 2446, Gədəbəydə 837, Ağstafada 943, Qazaxda 1017, Tovuzda 1958 , Mingəçevirdə 1310, Balakəndə 884, Zaqatalada 1237, Qaxda 612, Yardımlıda 590, Cəlilabadda 2337, Masallıda 2135, Lerikdə 597, Göyçayda 1330, Ağdaşda 1256, Ucarda 925, İsmayıllıda 980, Qobustanda 377, Ağcabədidə 1804, Füzulidə 823, Beyləqanda 1102, Salyanda 1422, Neftçalada 822, Hacıqabulda 710, Qusarda 1042, Qubada 1962, Siyəzəndə 471, Xızıda 164 doqquzuncu sinif şagirdinin iştirakı nəzərdə tutulub.xeber100.com