“Muğam aləmi” 7-ci Beynəlxalq Musiqi Festivalı keçiriləcək

Azərbaycanın zəngin musiqi irsinin incisi olan muğam sənətini beynəlxalq miqyasda tanıtmaq məqsədilə Heydər Əliyev Fondu və Mədəniyyət Nazirliyinin təşkilatçılığı ilə “Muğam aləmi” 7-ci Beynəlxalq Musiqi Festivalı bu il 17–22 iyun tarixlərində keçiriləcək. Mədəniyyət Nazirliyindən bildirilib ki, festivalda Türkiyə, Almaniya, İspaniya, Mərakeş, İraq, Cənubi Koreya, Özbəkistan, Tacikistan, Kanada, Hindistan, Norveç, Rusiya, Böyük Britaniya, ABŞ, Yaponiya, İsveçrə, ümumilikdə 25-dən çox ölkədən 50-dən çox ifaçı, tədqiqatçı və qonaq iştirak edəcək. Festivalın açılış mərasimi iyunun 17-də Bakıda – Heydər Əliyev Sarayında “Bayatı” adlı konsert-tamaşa ilə reallaşacaq. Festival çərçivəsində Azərbaycan, Türkiyə, Tacikistan, Özbəkistan, Səudiyyə Ərəbistanı və Çindən olan gənc istedadların beynəlxalq muğam müsabiqəsi keçiriləcək. Müsabiqədə ümumilikdə 30-dan çox gənc xanəndə və instrumental ifaçı iştirak edəcək. Festivalın proqramına İçərişəhərdə Azərbaycan radiosunun 1950-60-cı illərin “Muğam saatı” proqramı əsasında interaktiv səs performansının, XIII əsrin görkəmli musiqişünası Səfiyəddin Urməvinin nəzəri və praktik irsi ilə bağlı simpoziumun, “Muğam 12” musiqi marafonunun keçirilməsi daxildir. Festival boyunca Azərbaycanın tanınmış muğam ifaçılarının iştirakı ilə ustad konsertləri də olacaq. Müsabiqənin bağlanış mərasimi muğamın beşiyi olan azad Qarabağda – Ağdam Muğam Mərkəzində keçiriləcək.xeber100.com  

Görkəmli aktrisa Amaliya Pənahovanın 80 illik yubileyidir

Xurşidbanu Natəvan, Tomris, Medeya, Burla Xatun, Məhsəti, Larisa, Ofeliya, Linza kimi obrazların əvəzsiz ifaçısı, Dövlət mükafatları laureatı, Bakı Bələdiyyə Teatrının yaradıcısı, Xalq artisti, "Şərəf" və "Şöhrət" ordenli Amaliya Pənahovanın doğulduğu gündür, 80 yaşı tamam olur. Müasir Azərbaycan mədəniyyətində özünəməxsus yer tutan Amaliya Pənahova 15 iyun 1945-ci ildə dünyaya göz açıb. Azərbaycan Dövlət İncəsənət İnstitutunun “Dram və kino aktyoru” fakültəsində təhsil alıb. Tələbə vaxtlarından Azərbaycan Dövlət Akademik Milli Dram Teatrına dəvət alan aktrisa bu sənət ocağında 28 il çalışıb. İlk dəfə Milli Dram Teatrının səhnəsində görkəmli yazıçı İlyas Əfəndiyevin “Sən həmişə mənimləsən” tamaşasındakı Nargilə rolunda çıxış edən aktrisa burada çalışdığı illər ərzində onlarla maraqlı və rənfarəng obrazlara imza atıb, ömrünün 50 ilini Azərbaycan mədəniyyətinin, incəsənətinin təbliğinə, inkişafına həsr edib. O, 1964-cü ildən ömrünün sonunadək teatrda, kinoda, televiziya tamaşalarında 500-dən artıq müxtəlif səpkili, Azərbaycan teatr sənətinin silinməz tarixinə çevrilən parlaq obrazlar yaratdı. Zəngin yaradıcılıq axtarışları sayəsində milli teatr və kino sənətinə dəyərli töhfələr vermiş görkəmli aktrisa lirik-psixoloji üslublu aktyor məktəbinin yaradıcılarından biri idi. Və səhnəyə ilk gəlişində lirik-psixoloji üslubda fəaliyyət göstərməyə başlasa da, sonralar romantik faciə, dramatik-psixolojiv rolları ifa edərək də uğurlar qazanıb. Aktrisa Azərbaycan səhnəsində ilk dəfə Medeya oynadı. Onun Medeyasını görüb səhnəyə gələnlər çoxluq təşkil edirdi. Xalq yazıçısı Elçin 1982-ci ildə “Qobustan” jurnalında fransız dramaturqu J.Anuyun “Medeya” pyesi əsasında rejissor Mərahim Fərzəlibəyovun eyniadlı tamaşasına dair “Təzadların faciəsi” məqaləsində yazırdı ki, Amaliya Pənahova Medeyanın təbiəti və taleyindəki layları bir-bir qaldırır və göstərə bilir, həm də bu zaman əlvan, təzadlı, yağlı boyalardan da, güclə seziləcək akvareldən də istifadə etməyi bacarır… A.Pənahovanın rejissor kimi quruluş verdiyi Şıxəli Qurbanovun "Sənsiz"i ötən əsrin 80-ci illərinin sonunda başlanan Azərbaycan xalqının milli-azadlıq mücadiləsi ərəfəsində sanki dövrün tələbi üzərində qurulmuşdu, hadisələri bir qədər qabaqlayırdı. Tamaşada Sevincin (Amaliya Pənahova) və Tərlanın (Füzuli Hüseynov) timsalında dünyada repressiyaya məruz qalmış bütün ailələlərin faciəsi öz əksini tapıb. Amaliya xanımın həm rejissor kimi, həm də əsas obrazda olan ifası zərgər dəqiqiliyi tələb edirdi ki, aktrisa da bunun öhdəsindən məharətlə gələ bilmişdi. Əslində belə mövzular məharətlə yanaşı, cəsarət də tələb edirdi və aktrisa məhz bu məsuliyyəti öz üzərinə göptürməyi bacarırdı. O, eyni zamanda cəsarəti ilə, vətənpərvər ruhu ilə  seçilən incəsənət xadimi idi. Məhz bu xüsusiyyəti, özünü xalqımızın ən ağır vaxtlarında göstərdi. 90-cı illərdə ölkəmizin haqq səsini dünyaya çatdırmağa böyük səy göstərdi. A.Pənahova ictimai işlərlə fəal məşğul olmuş, 2000-2005-ci illərdə Azərbaycan Respublikası Milli Məclisinin millət vəkili, sosial-siyasət daimi komissiyasının üzvü, MDB Parlamentlərarası Mədəniyyət, İnformasiya, Turizm, İdman daimi Komissiyasının sədri, İtaliya-Azərbaycan Parlamentlərin işçi qrupunun sədri kimi fəaliyyət göstərib. Yaradıcı fəaliyyəti ilə daima diqqətdə dayanan aktrisa, xarakter baxımından da həmkarlarından seçilirdi, haqsızlığa biganə qala bilmirdi. Azərbaycanın çətin bir dövründə siyası və dövlət xadimi, Ulu öndər Heydər Əliyevin təşəbbüsü ilə Bakı Bələdiyyə Teatrını yaratması və teatrın sayəsində sənətdə yeni vətənpərvərlik modelini ortaya qoyması yaxın keçmişdə baş verdi. Teatrla bərabər, eyni vaxtda kinoda da müxtəlif xarakterləri canlandırıb, 30-a yaxın filmdə bir-birindən maraqlı rollar oynayıb. “Qərib cinlər diyarında”, “Babək”, “Həyat bizi sınayır”. “Xatirələr sahili”, “Səmt küləyi”. “Mezozoy əhvalatı”, “Gözlə məni, “Mən mahnı bəstələyirəm və s. lirik-psixoloji ekran personajları yaradıb. Bundan başqa, aktrisanın müxtəlif janrlı filmlərdə səsləndirdiyi Aişə (“Alma, almaya bənzər”), Lalə (“Ürək… Ürək…”), Ağbəniz (“Qızıl uçurum”), Selcan (“Dədə Qorqud”), Balış (“Qanun naminə”), Tanya (“Bizim Cəbiş müəllim”), Əsmər (“Gün keçdi”) və başqa obrazlar da məhz onun səsi ilə tamaşaçı auditoriyasında maraq yaradıb. Aktrisa olmaq üçün dünyaya gələn, sənət taleyi hələ dünyaya gəlməzdən əvvəl müəyyən olunan görkəmli aktrisamızı 80 illiyində böyük sevgi, hörmət və ehtiramla yad edirik!

Müstəqillik Gününə həsr olunmuş “Üçrəngli bayrağın kölgəsində” adlı konsert keçirilib

Şəhriyar adına Mədəniyyət Mərkəzində 28 May – Azərbaycan Respublikasının Müstəqillik Gününə həsr olunmuş “Üçrəngli bayrağın kölgəsində” adlı konsert keçirilib. Tədbir “İrəli” ictimai birliyinin təşəbbüsü, Şəhriyar adına Mədəniyyət Mərkəzinin dəstəyi və Azərbaycan Dövlət Uşaq Filarmoniyasının iştirakı ilə təşkil olunub. Əvvəlcə tədbir iştirakçıları Ümummilli Lider Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərin xatirəsini bir dəqiqəlik sükutla yad ediblər. Sonra Müdafiə Nazirliyinin Əlahiddə Nümunəvi Orkestrinin ifasında Azərbaycan Respublikasının Dövlət Himni, “Cəngi” rəqsi və “Koroğlu” operasından uvertüra səsləndirilib. Konsert proqramının davamında səhnədə Azərbaycanın Xalq artisti Ağadadaş Ağayev, Əməkdar artistlər Gülistan Əliyeva, Sevinc Sarıyeva, Almaz Orucova, Şölə Səfərəliyeva, Zakir Əliyev, eləcə də sevilən gənc ifaçılar Leyla Rəhimova, Cavidan Fatihi, Fərid Qaragöz, Mətləb Qurbanov, Aysel Əlizadə, tar və balaban ifaçıları Nurlan Cəfərlinski və Anar Vəlizadə, Məqsəd Əzizovun rəhbərlik etdiyi “Balabançı” ansamblı, caz pianoçuları Ülvi İsmayıl və Mehdi Allahverdiyev, Dövlət Uşaq Filarmoniyasının “Şəms” rəqs qrupu, “Pərilər” vokal ansamblı çıxış ediblər.xeber100.com

Bakı Bələdiyyə Teatrının səhnələşdirdiyi “Vəfa” tamaşasının premyerası keçirildi

Mayın 27-də Bakı Bələdiyyə Teatrının Azərbaycan ədəbiyyatının görkəmli nümayəndəsi, ictimai xadim, şair, dramaturq Rəsul Rzanın “Vəfa” pyesi əsasında səhnələşdirdiyi eyniadlı tamaşasının premyerası keçirildi. Rəsul Rzanın Böyük Vətən Müharibəsi mövzusunda qələmə almış olduğu “Vəfa” pyesi pyesi inam, dostluq, sədaqət, dönüklük, ara qarışdırmaq kimi müsbət və mənfi keyfiyyətləri özündə əks etdirir. Pyesdə Böyük Vətən müharibəsində göstərilmiş şücaət ümumxalq hünəri kimi təqdim edilir. Vətəni sevmək, xalqına bağlı olmaq pyes boyu müəllif tərəfindən vurğulanır. Tamaşanın quruluşçu rejissoru, Xalq artisti Mərahim Fərzəlibəyovdur. Rejissor səhnə əsərində müəllifin şerlərindən, Krım cəbhəsində yazdığı məktublardan istifadə edib. Azərbaycan Dövlət Akademik Milli Dram Teatrının səhnəsində baş tutan premyerada dövlət və hökumət rəsmiləri, tanınmış elm və mədəniyyət xadimləri, ictimaiyyət nümayəndələri - Azərbaycan Respublikası Milli Məclisi sədrinin müavini, filologiya elmləri doktoru,  akademik Rafael Hüseynov, Azərbaycan Respublikası Milli Məclisi və Rusiya Federasiyası Federal Məclisi Dövlət Dumasının parlamentlərarası əməkdaşlıq komissiyasının sədri Ziyafət Əsgərov, Azərbaycan Respublikası Prezidentinin Administrasiyasının humanitar siyasət məsələləri şöbəsinin müdiri Fərəh Əliyeva, Bakı Şəhər İcra Hakimiyyətinin başçısı Eldar Əzizov, Azərbaycan Yazıçılar Birliyinin sədri, Xalq yazıçısı Anar, Azərbaycan Kinematoqrafçılar İttifaqının sədri, Xalq artisti Rasim Balayev, Azərbaycan Teatr Xadimləri İttifaqının sədri, Xalq artisti Hacı İsmayılov, Azərbaycan Bəstəkarlar İttifaqının sədri, Xalq artisti Firəngiz Əlizadə, Bakı Musiqi Akademiyasının rektoru, Xalq artisti Fərhad Bədəlbəyli, ictimai-siyasi xadim, Xalq şairi Sabir Rüstəmxanlı, General Akif Rəfiyev, AKİ-nin I katibi, Xalq artisti Şəfiqə Məmmədova, kinorejissor, Xalq artisti Oqtay Mirqasımov, rejissor, Xalq artisti Ramiz Həsənoğlu, Əməkdar incəsənət xadimi, professor İlham Rəhimli və b. iştirak edirdilər. Tamaşadan öncə ölkəmizin ərazi bütövlüyü uğrunda həlak olan şəhidlərimizin əziz xatirəsi bir dəqiqəlik sükutla yad edildi, Azərbaycanın Dövlət himni səsləndirildi. Sonra söz Azərbaycan Respublikası Milli Məclisi sədrinin müavini  Rafael Hüseynova verildi. R.Hüseynov tədbir iştirakçılarını salamlayaraq görkəmli şairin zəngin yaradıcılığı, ibrətamiz həyat yolu barədə fikirlərini bölüşdü. Qeyd etdi ki, böyük şairimiz, unudulmaz Rəsul Rzanın 115 yaşı münasibətilə illər sonra yenidən təqdim olunan, Bakı Bələdiyyə Teatrının səhnələşdirdiyi “Vəfa” tamaşasının nümayişinin bu günə təsadüf etməsi heç də təsadüfi deyil.  28 may müstəqillik günü ərəfəsində hazırlanan tamaşa əslində Rəsul Rza yaradıcılığının bütövlükdə Azərbaycanımızı azad görməsi və daima yaradıcılığında bunu xüsusilə qeyd etməsi şairin böyük arzusu, istəyi idi. Və bu gün bu premyera bayram əhval-ruhiyyəsi yaradır. R.Hüseynov onu da qeyd etdi ki, unudulmaz şairin Böyük Müharibəsi dövründə yazdığı pyesin onun yubileyində müstəqillik günü ərəfəsində tamaşaçılara təqdim olunması  Rəsul Rzanın ruhunu şad edir və bayram ovqatını daha da artırır. Fürsətdən istifadə edib diqqəti Bakı Bələdiyyə Teatrının fəaliyyətinə yönəldən R.Hüseynov qeyd etdi ki, 1992-ci ildə çətin bir dövrdə belə bir teatrın Xalq artisti Amaliya Pənahova tərəfindən yaradılması böyük cəsarət, əmək tələb edirdi və teatr kraliçamız bunun öhdəsindən böyük əzmkarlıqla gəlməyi bacardı. Rafael Hüseynov daha sonra səhnəyə Bakı Bələdiyyə Teatrının baş rejissoru, “Vəfa” tamaşasını səhnələşdirən Xalq artisti Mərahim Fərzəlibəyovu dəvət edərək tamaşaçılara rejissorun 50 ili əhatə edən yaradıcılığı haqqında qısa məlumat verdi və onu da qeyd etdi ki, o, xoşbəxt rejissordur ki, uzun illər səhnədən uzaq qalan pyesə yenidən can verərək onu səhnələşdirib. Və hər il görkəmli şairin doğum günü ərəfəsində təqdim edilən Rəsul Rza Mükafatını tamaşaçıların alqış sədaları altında ona təqdim etdi. M.Fərzəlibəyov mükafatı teatr adına alaraq bu mükafatla BBT-nin yaradıcıları, Xalq artistləri Amaliya Pənahova və Yusif Muxtarovun ruhunun şad olduğunu qeyd etdi. Çıxışdan sonra tamaşa başladı. Tamaşaçı səhnədə Böyük Vətən Müharibəsi dövrüylə üz-üz qaldı, dövrün haqsızlıqları, müharibə, göz yaşı, həsrət hamısı gözlərimiz önündə canlandı. Sanki illər keçməsinə baxmayaraq tarix yenidən təkrar olunur, müharibələr, əsgərlərin ölümlə üzbəüz qalması, yarımçıq qalan xoşbəxtliklər tamaşanın ana xəttini təşkil edirdi. Qeyd edək ki, tamaşa üçün seçilən musiqi, mahnı parçaları hadisələrlə həmahəng  seçilmişdi, tamaşaçıları bilavasitə baş verən hadisənin iştirakçısına çevirirdi. Aktyorların dövrə uyğun geyimləri, qrimləri, obrazların daxili aləminə siyarət etməsi geniş tamaşaçı auditoriyası tərəfindən böyük alqışlarla qarşılanırdı. Tamaşa anşlaqla keçdi, rejissor, aktyor heyəti tamaşaçılar tərəfindən gül çələnginə büründü... Ənənəyə sadiq qalaraq daima tarixi pyeslərə müraciət edən Bakı Bələdiyyə Teatrı bu dəfə də yaddaqalan bir premyeraya imza atdı. Tamaşaçı alqışı bunun bariz nümunəsidir. Tamaşanın yaradıcı heyəti: Quruluşçu rejissor, Mərahim Fərzəlibəyov, quruluşçu rəssam İlham Əsgərov(Əməkdar mədəniyyət işçisi), musiqi hissə müdiri Nazim Əbidov( Əməkdar mədəniyyət işçisi), işıqçı rəssam Tərlan Ələsgərli, kostyum sexinin müdiri Leyla Əkbərova, dizayn işləri üzrə tərtibatçı Elnur Ehtiramoğlu. Səhnə əsərinin bədii rəhbəri Aynur Muxtarovadır. Tamaşada iştirak edirlər: Ülviyyə Rza(Vəfa), Elməddin Zakirli(Bahadır), Günel Həmidova(İntizar), Toğrul Rza(Bəxtiyar), Səmayə Sadıqova(Ülkər ana)-Əməkdar artist, Məmmədağa Əlilicanzadə(İlyas), Rəşad Kəsəmənli(Muğan), İsmayıl Atakişiyev(Minnətov), Zülfiyyə Qurbanova(Vəsviyyə), Namiq Cavadov(Əli), Elçin Muradov(Cəfərqulu), Asif Rəhimov(Mirzəpomoşnik), Aydın Əliyev(Alman mayoru-Əməkdar artist, Rəşid Soltanov(Alman zabiti), Arzu Ağayeva(Firuzə), Əhməd Salahov(Vəzir-Əməkdar artist, Gülsabah Quliyeva(Qumru-Əməkdar artist, Şaxzadə Babayeva(I qadın-Əməkdar artist, Təzəgül Məmmədova(II qadın), Əzizə Həşimova(III qadın). Qeyd edək ki, Bakı Bələdiyyə Teatrı 1992-ci ildə Ulu öndər Heydər Əliyevin təşəbbüsü ilə görkəmli teatr və kino xadimləri, Xalq artistləri Amaliya Pənahova və Yusif Muxtarov tərəfindən yaradılıb. Teatr bu illər ərzində saysız-hesabsız səhnə əsərləri ilə milli teatr mədəniyyətini Azərbaycanda, eyni zamanda dünya ölkələrində təbliğ edib. Teatrın repertuarında Cəlil Məmmədquluzadənin, Nəriman Nərimanovun, Mirzə Fətəli Axundovun, Nazim Hikmətin, Əziz Nesinin, Cəfər Cabbarlının, İlyas Əfəndiyevin, Anarın, Elçin Əfəndiyevin, eləcə də dünya klassiklərinin pyesləri uğurla səhnələşdirilmişdir.xeber100.com

Ulu Öndər Heydər Əliyevin xatirəsinə həsr olunmuş tədbir keçirilib

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasında Ulu Öndər Heydər Əliyevin anadan olmasının 102-ci ildönümünə həsr edilmiş tədbir keçirilib. Bu barədə Yasamal MKS-dən məlumat verilib. Tədbiri açan Yasamal rayon MKS-nin direktoru Lətifə Məmmədova Ümummilli Lider Heydər Əliyevin dövlət və siyasi fəaliyyətindən, Azərbaycanın inkişafı və milli dövlətçiliyin gücləndirilməsi istiqamətində tarixi xidmətlərindən danışıb. Görkəmli dövlət xadiminin respublikaya rəhbərliyi dövründə təhsil və mədəniyyət müəssisələrinin zəngin şəbəkəsinin yaradıldığını, respublikadan kənarda Azərbaycan üçün yüksəkixtisaslı mütəxəssislərin, xüsusən milli hərbi kadrların hazırlanması, Azərbaycanın milli təhsil sisteminin əsasının qoyulması üçün mühüm işlər görüldüyünü vurğulayıb. Tədbir iştirakçıları Ümummilli Liderlə bağlı xatirələrini bölüşüblər. Sonda kitabxana əməkdaşlarının hazırladığı “Heydər Əliyev və Azərbaycan dövlətçiliyi” adlı kitab sərgisi və Ulu Öndər haqqında videoçarx nümayiş olunub.xeber100.com

“Ötən günlər” tamaşasının premyerası keçirildi

Aprelin 29-da Bakı Bələdiyyə Teatrının Özbəkistan yazıçısı, dramaturq Abdulla Qədirinin “Ötən günlər” romanı əsasında səhnələşdirdiyi eyniadlı tamaşasının premyerası keçirildi. Özbəkistanın Azərbaycandakı Fövqəladə və Səlahiyyətli Səfiri cənab Bahrom Bahodiroviç  Aşrafxanovun təklifi əsasında hazırlanan “Ötən günlər” tamaşası Azərbaycan Respublikası və Özbəkistan Respublikası arasında diplomatik münasibətlərin qurulmasının 30 illiyinə həsr olunub. Azərbaycan Dövlət Akademik Milli Dram Teatrının səhnəsində baş tutan premyerada Mədəniyyət nazirinin müavini, Xalq artisti Murad Hüseynov, Azərbaycan Respublikası Milli Məclisinin Mədəniyyət Komitəsinin sədr müavini Günay Əfəndiyeva, Azərbaycan Dövlət Film Fondunun direktoru, Əməkdar incəsənət xadimi Cəmil Quliyev, Azərbaycan Teatr Xadimləri İttifaqının sədri, Xalq artisti Hacı İsmayılov, Xalq artisti, professor Firəngiz Qurbanova, Xalq artistləri-Rafiq Əzimov, Həmidə Ömərova, Özbəkistanın Xalq şairi, Yazıçılar İttifaqının Dram üzrə Yaradıcılıq Şurasının sədri Usmon Əzim, Özbəkistanın Xalq artisti, Əlişir Nəvai adına Dövlət Akademik Teatrının direktoru Ramiz Usmanov, Özbəkistan Respublikasının Azərbaycan Respublikasındakı Səfirinin Mədəni-humanitar məsələlər üzrə müşaviri Otabek Ramazanov, eləcə də tanınmış mədəniyyət xadim­ləri, ictimaiyyət nümayəndələri iştirak edirdilər. Tamaşa başlamadan öncə Vətən uğrunda həlak olan şəhidlərimizin əziz xatirəsi 1 dəqiqəlik sükutla yad edildi, daha sonra Azərbaycanın və Özbəkistanın dövlət himnləri səsləndirildi.Daha sonra söz Milli Məclisinin Mədəniyyət Komitəsinin sədr müavini Günay Əfəndiyeva verildi. G.Əfəndiyeva öz çıxışında  Azərbaycan və Özbəkistanın diplomatik əlaqələrindən, Bakı Bələdiyyə Teatrının yaradıcıları Xalq artistləri Amaliya Pənahova ilə Yusif Muxtarovun daima tarixi mövzulara müraciət etməsini və bu ənənənin hazırda da qorunmasını diqqətə çatdırdı. Özbəkistanın Xalq şairi, Yazıçılar İttifaqının Dram üzrə Yaradıcılıq Şurasının sədri Usmon Əzim, Özbəkistanın Xalq artisti, Əlişir Nəvai adına Dövlət Akademik Teatrının direktoru Ramiz Usmanov, Özbəkistan Respublikasının Azərbaycan Respublikasındakı Səfirinin Mədəni-humanitar məsələlər üzrə müşaviri Otabek Ramazanov öz çıxışlarında iki ölkə arasında olan münasibətlərdən, Bakı Bələdiyyə Teatrının müraciət etdiyi əsərin, əsərdə baş verən hadisələrin öz aktuallığını hələ də qoruyub saxlamasını xüsusilə vurğuladılar. Nəhayət tamaşaçıların alqış sədaları altında pərdə açılır və səhnəyə tamaşaçı auditoriyasını XIX əsrin ortalarında Özbəkistanda hökm sürən feodal cəmiyyətin, ədalətsiz ictimai quruluşun insanların həyatını cəhənnəmə çevirməsi təsvirini yaradan aktyorlar gəlir. Tamaşada bir əsr öncə baş verən hadisələrin öz aktuallığını qoruması  insanı düşünməyə vadar edir. Qeyd edək ki, Azərbaycan-Özbəkistan mədəni əlaqələri hər il yeni müstəvidə inkişaf etdirilir. Belə mədəni hadisələrdən biri də Özbəkistan yazıçısı, dramaturq Abdulla Qədirinin “Ötən günlər” romanı əsasında Bakı Bələdiyyə Teatrının hazırladığı eyni adlı tamaşadır. Abdulla Qədirinin bu əsəri ilk dəfə XX əsr Azərbaycan dilçiliyinin görkəmli simalarından olan Xalid Səid Xocayev tərəfindən 1928-ci ildə tərcümə olunub. Yazıçı həmin dövrü "tarixin ən çirkin və qara günləri" adlandırır, mənəvi ehkamları ifşa edir, feodalizmin iyrənc üzünü açıb göstərir. Eyni adlı romanın motivləri əsasında hazırlanan pyesin müəllifi yazıçı, tərcüməçi Kənan Hacı, tamaşanın quruluşçu rejissoru, Xalq artisti Mərahim Fərzəlibəyovdur. Tamaşanın yaradıcı heyəti: Musiqi hissə müdiri Əməkdar mədəniyyət işçisi Nazim Əbidov, işıqçı rəssam Tərlan Ələsgərli, rəqslərin quruluşu Əməkldar artist Bəhruz Vaqifoğlu, kostyum sexinin müdiri Leyla Əkbərova, dizayn işləri üzrə tərtibatçı Elnur Ehtiramoğlu, kamança və neydə ifa sənətşünaslıq doktoru Abbasqulu Nəcəfzadədir. Tamaşada iştirak edirlər: Tural Əhməd (Atabəy), Rəşad Kəsəmənli (Hacı Yusif bəy), Hüsniyyə Mürvətova (Əməkdar artist-Özbək xanım), Sabirə Rüstəmzadə (Gümüş), Əfqan Soltanov (Əməkdar artist- Mirzəkərim), Səmayə Sadıqova (Əməkdar artist- Aftab xanım), Toğrul Rza (Divanə), İsmayıl Atakişiyev (Həsənalı lələ), Mehman Abdulla (Xudayar xan), Elməddin Zakirli (Həmid), Zülfiyyə Məmmədova (Zeynəb), Firəngiz Babayeva (Cənnət), Aydın Əliyev (Əməkdar artist- Çar polkovniki, Çar məmuru), Rəşid Soltanov (Naməlum adam). HAŞİYƏ: Bakı Bələdiyyə Teatrının rəhbərliyi “Ötən günlər” səhnə əsərinin yaranmasında göstərdiyi dəstəyə görə Azərbaycan Respublikası Milli Məclisinin Mədəniyyət Komitəsinin sədr müavini Günay xanım Əfəndiyevaya, Özbəkistan Respublikasının Azərbaycan Respublikasındakı Fövqəladə və Səlahiyyətli Səfiri cənab Bahrom Bahodiroviç  Aşrafxanova, Özbəkistan Respublikasının Azərbaycan Respublikasındakı Səfirinin Mədəni-humanitar məsələlər üzrə müşaviri Otabek Sadullayeviç Ramazanova, Azərbaycan Maşın və Avadanlıq İstehsalçıları Assosiasiyasının İdarə Heyətinin sədri Emin Axundova və “Azermash” CP baş direktoru Otabek Uluqbekoviç Saliyevə dərin təşəkkürünü bildirir.xeber100.com  

Rəssam Ayfer Akbaşoğlunun “İnsan hekayələri” adlı sərgisi açılıb

Aprelin 18-də Qərbi Azərbaycan İcmasının təşkilatçılığı ilə “QGallery” qalereyasında türkiyəli rəssam Ayfer Akbaşoğlunun “İnsan hekayələri” adlı sərgisi açılıb. Tədbirdə çıxış edən rəssam Ayfer Akbaşoğlu sərginin onun yaradıcılığında maraqlı iz qoyacağını bildirib. Onun sözlərinə görə, rəsmlərin hər biri həyat hekayəsidir. Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli bildirib ki, bu sərgi Qərbi Azərbaycan həqiqətlərinin təbliği baxımından çox önəmlidir: “Sərgi, digər ölkələrdə yaşayan icma üzvlərinin və Türkiyə sənət adamları arasında əlaqələrin qurulması məqsədilə təşkil olunub. Sərginin “İnsan hekayələri” adlandırılması da təsadüfi deyil. Bu, Qərbi Azərbaycandan zorla çıxarılan həmvətənlərimizə həsr olunub. Burada əsas mesaj – hər birinin öz taleyi, öz yolu olan insanların ümumi arzusu olan qayıdış hüququdur. Sərgidəki əsərlər məhz onların məcburi köçkünlüyü və doğma torpaqlara qayıdış arzusuna həsr olunub"Xalq rəssamı Natiq Əliyev bu mövzunun çox vacib olduğunu söyləyib. “Mən çox şadam ki, Türkiyədən olan həmkarımız Qərbi Azərbaycan məsələsinə toxunub və bu həqiqətləri sənət dili ilə çatdırıb”.Sonra iştirakçılar sərgi ilə tanış olublar. Sərgi aprelin 24-dək davam edəcək.xeber100.com

Qırğızıstanda Azərbaycan Mədəniyyəti Günləri keçirilir

Azərbaycan Respublikası Mədəniyyət Nazirliyinin təşkilatçılığı ilə Qırğızıstanda Azərbaycan Mədəniyyəti Günləri keçirilir. Hazırda iki ölkə həm ikitərəfli, həm də beynəlxalq qurumlar, xüsusilə TÜRKSOY, Türk Mədəniyyəti və İrsi Fondu, Türk Dövlətləri Təşkilatı və Beynəlxalq Türk Akademiyası çərçivəsində uğurla əməkdaşlıq edir. Eyni zamanda ali səviyyəli qarşılıqlı səfərlər, beynəlxalq mədəniyyət layihələrində birgə iştirak xalqlarımızı daha da yaxınlaşdırır.Aprelin 20-dən 25-dək Qırğızıstanın paytaxtı Bişkek şəhərində təşkil olunacaq Azərbaycan Mədəniyyəti Günləri iki ölkənin mədəni əlaqələrində yeni səhifə açacaq. Tədbirlə bağlı ölkəmizdən incəsənət ustaları, ədəbiyyat və mədəniyyət xadimləri, bədii kollektivlər, yazarlar və media təmsilçiləri Bişkekə səfər edəcəklər.xeber100.com

Zəfər Muzeyi üçün eksponatların toplanılması İstiqlal Muzeyinə həvalə olunub

2021-ci ilin yanvar ayından Zəfər Muzeyi üçün eksponatların toplanılması İstiqlal Muzeyinə həvalə olunub. Hazırda Zəfər Muzeyi üçün 9255 eksponat toplanılıb. Bunu İstiqlal Muzeyinin direktoru Sədi Mirseyibli deyib. Onun sözlərinə görə, Birinci və İkinci Qarabağ müharibəsi, eləcə də 44 günlük Vətən müharibəsi şəhidlərinin ailələrindən, qazilərdən əşyaların toplanılması işi Zəfər Muzeyi fəaliyyətə başlayana qədər aparılacaq. O bildirib ki, Zəfər Muzeyi üçün həmçinin 44 günlük Vətən müharibəsi zamanı şəhid olmuş mülki şəxslərin də əşyaları toplanır. Qeyd edək ki, Azərbaycan Prezident İlham Əliyev 2020-ci il dekabrın 3-də Bakı şəhərində Vətən müharibəsi memorial kompleksinin və Zəfər muzeyinin yaradılması haqqında Sərəncam imzalayıb.xeber100.com

“Kitab sənayesi sahəsində statistik vəziyyətin öyrənilməsi”…

Mədəniyyət Nazirliyinin maliyyə dəstəyi ilə Dədə Ələsgər Ocağı İctimai Birliyinin həyata keçirdiyi “Kitab sənayesi sahəsində statistik vəziyyətin öyrənilməsi və təkliflər paketinin hazırlanması” adlı layihə çərçivəsində ilk dəyirmi masa təşkil olunub. İctimai Birlikdən bildirilib ki, əvvəlcə tədbirdə şəhidlərimizin əziz xatirəsi ehtiramla yad edilib. Tədbirdə çıxış edən Dədə Ələsgər Ocağı İctimai Birliyinin sədri və layihə rəhbəri Xətai Ələsgərli layihənin məqsəd və hədəflərindən danışıb. O bildirib ki, layihə çərçivəsində maarifləndirici buklet hazırlanıb və tədbir iştirakçılarına təqdim edilib. Həmçinin “ekitab.az” adlı yeni saytın yaradılması və üç istiqamət üzrə onlayn sorğuların keçirilməsi də nəzərdə tutulur. Onun sözlərinə görə, sayt üzərində iş davam edir və layihənin icra planına uyğun olaraq növbəti tədbirdə saytın təqdimatı keçiriləcək. Onlayn sorğunun sualları isə müzakirə üçün iştirakçılara təqdim olunub və yaxın günlərdə hər üç istiqamət üzrə sorğular hədəf auditoriyasına göndəriləcək. Tədbirdə digər çıxış edənlər ədəbi dilin qorunması, kitab nəşri, satış prosesi və oxucu kütləsinin maraqları ilə bağlı ətraflı fikir mübadiləsi aparıblar.xeber100.com

Əməkdaşlığa dair anlaşma memorandumu imzalanıb

Oktyabrın 25-də Bakı Dövlət Universitetində (BDU) bu təhsil ocağı ilə Azərbaycan Milli Kitabxanası arasında əməkdaşlıq haqqında anlaşma memorandumunun imzalanıb və BDU-nun İnformasiya və sənəd menecmenti fakültəsində Milli Kitabxananın xüsusi auditoriyasının açılışı keçirilib. Memorandumu BDU-nun rektoru Elçin Babayev, Milli Kitabxananın direktoru Kərim Tahirov imzalayıblar. Sənəddə BDU ilə Milli Kitabxana arasında müasir kitabxana texnologiyaları, rəqəmsal xidmətlər və süni intellekt texnologiyaları sahəsində birgə layihələrin hazırlanması, innovativ tədqiqat laboratoriyaları və tədris məkanlarının yaradılması, gənclərin və təhsilalanların elmi-mədəni inkişafını dəstəkləyən layihələrin həyata keçirilməsi, eləcə də rəqəmsal informasiya resurslarının inteqrasiyası, elektron resurs mübadiləsinin təşkili, rəqəmsal kitabxana xidmətlərinin birləşdirilməsi və genişləndirilməsi, Milli Kitabxananın elektron arxivlərinə BDU-nun təhsilalan və tədqiqatçılarının çıxışının təmin edilməsi nəzərdə tutulur. Mərasimdə çıxış edən mədəniyyət naziri Adil Kərimli BDU-da Milli Kitabxananın xüsusi auditoriyasının açılmasının elm, təhsil və mədəniyyət ictimaiyyəti üçün önəmli hadisə olduğunu deyib. Bildirilib ki, Ümummilli lider Heydər Əliyev Bakı Dövlət Universitetini Azərbaycan xalqının milli sərvəti kimi qiymətləndirib. Azərbaycan Milli Kitabxanası da ölkə mədəniyyətinin əsas mərkəzlərindən biridir: “BDU-da yüksəkixtisaslı kadrların yetişdirilməsi işinə daim dəstək göstərməyə hazırıq. Mədəniyyət sahəsində elm və təhsilin inkişafı prioritetlərimizdən biridir. Bu auditoriyadan universitetin professor-müəllim heyəti, tələbə və tədqiqatçıları faydalanacaq”. BDU-nun rektoru Elçin Babayev qeyd edib ki, universitetdə müasir dövrün çağırışlarına cavab verən yeni texnologiyaların tətbiqinə xüsusi önəm verilir, əmək bazarının tələblərinə uyğun yeni ixtisas və ixtisaslaşmalar açılır. Qeyd edək ki, açılış mərasimində Milli Məclisin Elm və Təhsil Komitəsinin sədri Anar İsgəndərov, Azərbaycanda Atatürk Mərkəzinin direktoru akademik Nizami Cəfərov, ziyalılar və alimlər iştirak ediblər.xeber100.com

Mədəniyyət naziri ADMİU-nun kollektivilə görüşüb

Mədəniyyət naziri Adil Kərimli oktyabrın 25-də Azərbaycan Dövlət Mədəniyyət və İncəsənət Universitetində (ADMİU) olub, kollektivlə görüşüb. Ali təhsil ocağı haqqında söz açan nazir universitetin zəngin ənənələrinin olduğunu, məzunlarının mədəniyyətimizin inkişafına mühüm töhfələr verdiklərini deyib. Bu barədə Mədəniyyət Nazirliyindən məlumat verilib. Bildirilib ki, Prezident İlham Əliyevin liderliyində ölkəmizdə bütün sahələr kimi, mədəniyyətin də inkişafına xüsusi diqqət yetirilir. Müvafiq sahə üzrə pedaqoji kollektivin əməyi qiymətləndirilir, müxtəlif təltif və mükafatlara layiq görülürlər. Mədəniyyət Nazirliyi tərəfindən kadr hazırlığına böyük əhəmiyyət verilir və bu sahədə Elm və Təhsil Nazirliyi ilə sıx əməkdaşlıq mövcuddur. Çünki mədəniyyət sahəsində keyfiyyətin yüksəldilməsi bilavasitə kadr hazırlığı ilə bağlıdır. Bu istiqamətdə inkişafa nail olmaq üçün gənclərin maraqları, seçdikləri ixtisaslar haqqında fikirlərinin nədən ibarət olduğunu öyrənmək vacibdir. Çağımızda sürətli innovativ yeniliklərə şahid olsaq da, süni intellekt inkişaf etsə də, mədəniyyət sahəsi sırf insan amilinə, istedadlı, bacarıqlı və ixtisaslı kadrlara bağlıdır. ADMİU-nun rektoru Ceyran Mahmudova kollektivlə görüşdüyü üçün nazirə təşəkkürünü bildirib. Rektor kadr hazırlığının çox vacib məsələ olduğunu söyləyib, təhsil ocağı ilə ARKA arasında əməkdaşlıqla bağlı müqavilənin imzalandığını deyib. Vurğulanıb ki, bu müqavilə nəticəsində 12 film layihəsi üzrə işlərə başlanılıb. Mədəniyyət Nazirliyi tərəfindən aktyorlara təyinatın verilməsi təklifinə münasibət bildirən nazir hər il ADMİU-nun Teatr sənəti fakültəsindən 60-a yaxın tələbənin məzun olduğunu deyib: "Həmin məzunların müvafiq teatrlarda yerləşdirilməsinə çalışmalıyıq. Bu prosesdə özəl teatrların da təşviq edilməsi vacibdir". Gənclərin kino sahəsinə marağının artırılması ilə bağlı danışan Adil Kərimli bildirib ki, ölkəmizdə kino istehsalının genişləndirilməsi istiqamətində addımlar atılır, tələbə filmlərinə də dəstək verilir.Görüş zamanı səsləndirilən təkliflərdən biri də ADMİU tələbələrinin teatrlara ödənişsiz girişi işi ilə bağlı olub. Nazir qeyd edib ki, bu istiqamətdə müəyyən işlər görülür.xeber100.com

Şuşa Dövlət Musiqili Dram Teatrı noyabr repertuarını təqdim edir

Şuşa Dövlət Musiqili Dram Teatrı noyabr repertuarını açıqlayıb. Sənət ocağının noyabr üçün nəzərdə tutulan repertuar planını təqdim edirik.xeber100.com

Nizami Kino Mərkəzində konsert proqramı təqdim olunub

Nizami Kino Mərkəzində “Şərqin əks sədaları” (“Echoes of the East”) adlı konsert proqramı təqdim olunub. Konsertdə gənc musiqiçi, bəstəkar Nigar Əsgərova (“Kengerléa”) tərəfindən yazılmış və ifa olunmuş əsərlər səsləndirilib. Elektron və akustik musiqi elementlərinin ənənəvi Azərbaycan musiqisinin motivləri ilə birləşdirildiyi konsert proqramında, həmçinin N.Əsgərovaya məxsus “Suvenirlər”, “Şərq məskəni” (“East dwell”), “Köhnə truba” (“Old trumpet”) və digər bəstələr ifa olunub. Qeyd edək ki, Bakı Musiqi Akademiyasının skripka ixtisası üzrə magistr məzunu olan “Kengerléa” hazırda təhsilini Almaniyada davam etdirir. O, həmçinin filmlər, oyunlar və media üçün musiqi yazmaq üzrə ixtisaslaşır. N.Əsgərova indiyədək “Second home” (İkinci ev), “Sınaq” kimi filmlərə musiqi bəstələyib.xeber100.com  

Beynəlxalq Muğam Mərkəzi ilə əməkdaşlıq memorandumu imzalanıb

Özbəkistanın Səmərqənd şəhərində təşkil edilən XIII “Şərq təranələri” Beynəlxalq Musiqi Festivalında münsiflər heyətinə sədrlik edən Beynəlxalq Muğam Mərkəzinin (BMM) direktoru, Əməkdar artist Sahib Paşazadə festival çərçivəsində keçirilən “Şərq xalqlarının musiqi mədəniyyəti: qloballaşma prosesində yaradıcı bağlılıq prinsipləri” mövzusunda beynəlxalq elmi-praktik konfransda da çıxış edib. 32 ölkədən 46 musiqişünas, folklorşünas, mədəniyyətşünas, ali təhsil müəssisələrinin rektorları və beynəlxalq elmi-tədqiqat institutları və elm mərkəzlərinin rəhbərləri iştirak etdiyi elmi konfransdan sonra Yunis Rəcəbi adına Özbək Milli Musiqi Sənəti İnstitutu və Şərəf Rəşidov adına Səmərqənd Dövlət Universiteti ilə Beynəlxalq Muğam Mərkəzi arasında birgə əməkdaşlıq memorandumu imzalanıb. Beynəlxalq Muğam Mərkəzindən bildirilib ki, BMM ilə hər iki ali təhsil müəssisəsi arasında imzalanan müqavilədə qarşılıqlı elmi və mədəni mübadilə imkanlarının inkişafı, elmi-tədqiqat işləri, qarşılıqlı konsert və mədəni layihələr, ustad dərsləri kimi əməkdaşlıq məsələləri nəzərdə tutulur.xeber100.com

“Baku Steel Art 2024” adlı beynəlxalq metal simpoziumu təşkil ediləcək

Sentyabrın 17-dən 30-dək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29 ərəfəsində “Baku Steel Company” QSC (BSC) və “QGallery” birlikdə “Baku Steel Art 2024” adlı beynəlxalq metal simpoziumunu təşkil edəcəklər. “QGallery”dən bildirilib ki, simpoziumun təşkilində məqsəd incəsənət və metallurgiyanın ekoloji dəyişikliklər və davamlı inkişafın katalizatoru kimi çıxış edə biləcəyini nümayiş etdirməkdir. Bu beynəlxalq layihə qlobal ekoloji çağırışlar kontekstində incəsənət və sənayenin qarşılıqlı əlaqəsinə yeni baxış təklif edir. Sözügedən unikal tədbir, dünyanın hər yerindən yaradıcılığında bu materialın lütfünü və gücünü təcəssüm etdirən sənətkarların və rəssamların əlamətdar toplantısı olacaqdır. Simpozium iştirakçıları öz heyrətamiz əsərlərini nümayiş etdirməklə yanaşı, təcrübələrini bölüşəcək, fikir mübadiləsi aparacaq, bir-birlərini yeni bədii axtarışlara ruhlandıracaqlar. Yaradıcılığın sehri tarixi ənənələrin müasir tendensiyalarla harmonik şəkildə qarışdığı şəhərin tam ürəyində canlanacaq. “Baku Steel Art 2024” mədəniyyətlər və üslublar arasında dialoq üçün platforma olacaq, metalla işləmə sənətində yaradıcılıq və müasir yanaşmalar üçün üfüqlər açacaq. Bu, hər bir metal elementinin və parıltısının insan təxəyyülünün sonsuz imkanlarından danışacağı ekspressiv incəsənətin parlaq dünyasına qərq olmaq şansıdır. Metallurgiya məhsullarının yaradılması prosesini müşahidə edərək, qaynaq zamanı yanıb-sönən hər bir qığılcımda gizlənən sirri hiss edirik. Metal ustaları kimyagərlər kimidir, onlar soyuq xammalı canlandırır, bununla da, təəccübləndirə və hətta ruha toxuna bilən obyektlərə çevirirlər. Məhz bu sənətkarlıq və texnologiyanın tandemi birlikdə sənət üçün yeni məkan yaradır, burada polad elementlər təkcə konstruktiv əsas deyil, həm də emosional mesajın daşıyıcısına çevrilir. “Baku Steel Art” rəssamları təkcə metaldan istifadə etməyəcəklər, ondan hekayələr düzəldəcəklər. Hər bir quraşdırma diqqətli işin nəticəsidir - poladın gücü ilə insan hisslərinin kövrəkliyi arasında analoqdur. Klassik əsərlərdə olduğu kimi, burada gözəllik anlayışının zamana tab gətirə bilən, insan qavrayış və heyranlığının dəyişkənliyi ilə yoğrulmuş daimiliyi üzə çıxacaq. “Baku Steel Art 2024” sərgisində 7 ölkədən (Azərbaycan, Gürcüstan, Türkiyə, Rumıniya, İsrail, Bolqarıstan, Hindistan) rəssamlar iştirak edəcək.xeber100.com

“XXI əsrin mədəniyyəti. Suverenlik və ya qloballaşma?”

Azərbaycan çoxmillətli dövlət kimi zəngin və rəngarəng mədəni irsə malikdir. Bunu Azərbaycanın mədəniyyət naziri Adil Kərimli Sankt-Peterburq Beynəlxalq Birləşmiş Mədəniyyətlər Forumunun nümayəndə heyətləri rəhbərlərinin görüşündə çıxışı zamanı deyib. Nazir qeyd edib: “Ölkə Prezidenti İlham Əliyevin həyata keçirdiyi dövlət siyasəti dini və etnik mənsubiyyətindən asılı olmayaraq bütün mədəni dəyərlərin qorunub saxlanmasına və təbliğinə yönəlib. Hər bir mədəni irs obyekti dövlət tərəfindən qorunur və beynəlxalq aləmdə fəal şəkildə təbliğ olunur”. A.Kərimli qlobal iqlim dəyişikliyi şəraitində sıx beynəlxalq əməkdaşlığa və mədəniyyət sahəsində innovativ həllərdən istifadəyə təcili ehtiyac olduğunu vurğulayıb. O, BMT-nin İqlim Dəyişmələri üzrə Çərçivə Konfransı Tərəfləri Konfransının Bakıda keçiriləcək 29-cu sessiyası (COP29) çərçivəsində təşkil ediləcək mədəniyyət nazirlərinin görüşündə iqlim dəyişikliyinin mədəni irsə təsiri mövzusunun diqqət mərkəzində olacağını da diqqətə çatdırıb. Mədəniyyət naziri tədbirdə iştirak edənləri bu konfransda iştirak etməyə dəvət edib. Rusiya Federasiyasının mədəniyyət naziri Olqa Lyubimova çıxışında xarici ölkələrlə mədəniyyət mübadiləsi festivallarının qorunub saxlanmasının və təbliğinin vacibliyini qeyd edib. O, həmçinin bildirib ki, ən yüksək səviyyədə dəstəklənən mübadilə - Mədəniyyət illərinin elan edilməsi yaxşı təcrübədir. Rusiya Federasiyasının şimal paytaxtında keçirilən Sankt-Peterburq Beynəlxalq Birləşmiş Mədəniyyətlər Forumunda 80 ölkədən nümayəndələr iştirak edirlər. Bu il Forumun əsas mövzusu “XXI əsrin mədəniyyəti. Suverenlik və ya qloballaşma?” olub.

Azərbaycan, BƏƏ və Braziliyanın mədəniyyət nazirləri Sankt-Peterburqda görüşüblər

Sentyabrın 12-də COP28 Birləşmiş Ərəb Əmirlikləri (BƏƏ), COP29 Azərbaycan və COP30 Braziliya sədrliklərinin mədəniyyət nazirləri Rusiyanın Sankt-Peterburq şəhərində üçtərəfli görüş keçiriblər. Mədəniyyət Nazirliyindən bildirilib ki, əsas məqsəd COP29 çərçivəsində keçiriləcək mədəniyyət nazirlərinin İkinci Yüksək Səviyyəli Görüşünün proqram və formatını müəyyən etmək olub. Görüşdə Azərbaycanın mədəniyyət naziri Adil Kərimli, BƏƏ-nin mədəniyyət naziri Səlim bin Xalid əl-Qassimi və Braziliyanın mədəniyyət naziri Marqaret Menezes iştirak ediblər. Şarm Əl-Şeyxdə keçirilmiş COP27 tədbirindən bəri beynəlxalq gündəlikdə mədəniyyətin iqlim fəaliyyətindəki rolu aktuallıq qazanmağa başlayıb. Qeyd edək ki, ötən il Dubayda keçirilən COP28 tədbiri zamanı BƏƏ və Braziliya sədrlikləri ilə "Mədəniyyətə Əsaslanan İqlim Fəaliyyəti üzrə Əmirliklər Bəyannaməsi" qəbul olunub. Bu çərçivədə 30-dan çox nazir və hökumət nümayəndəsini, həmçinin beynəlxalq təşkilatların rəhbər və nümayəndələrini bir araya gətirərək, mədəniyyətin transformativ iqlim fəaliyyətindəki rolunu əhatə edən mədəniyyət nazirlərinin Birinci Yüksək Səviyyəli görüşü keçirilib. Azərbaycan da öz növbəsində bu məsələni hər zaman xüsusi diqqətdə saxlayıb və qlobal səviyyədə müzakirə olunması istiqamətində davamlı işlər aparmaqdadır. Mayın 1-dən 3-dək keçirilən VI Ümumdünya Mədəniyyətlərarası Dialoq Forumu zamanı dünyanın aparıcı iqlim və irs üzrə ekspertlərinin iştirakı ilə baş tutmuş xüsusi plenar sessiyanı buna nümunə kimi göstərmək olar. Hər iki nazir Azərbaycan tərəfinə bu məsələləri daim diqqətdə saxladığına və beynəlxalq müstəvidə təbliğ etdiyinə görə təşəkkürlərini bildirib. COP29 tədbirinin hazırlıq işləri ilə də tanış olan Braziliya və BƏƏ-nın mədəniyyət nazirləri hazırlıq işlərini yüksək qiymətləndirib, Bakıda keçiriləcək COP29-un ən yaddaqalan tədbir olacağına əmin olduqlarını ifadə ediblər. Eyni zamanda, görüş zamanı nazirlər COP29 çərçivəsində keçirilməsi nəzərdə tutulan əlavə tədbir, təşəbbüs, o cümlədən konsert və şou poqramlar barədə də fikir mübadiləsi aparıblar.xeber100.com

Bəstəkar İmruzə Hüseynovanın yaradıcılıq axşamı keçiriləcək

Sentyabrın 18-də Yaşıl Teatrda bəstəkar İmruzə Hüseynovanın “Mübarəkdir Zəfərim” adlı yaradıcılıq axşamı keçiriləcək. Konsert, eyniadlı unikal mahnı ilə açılacaq və tamaşaçılara böyük Zəfərə həsr olunmuş ilhamverici kliplər təqdim olunacaq. Konsertdə Azərbaycan səhnəsinin tanınmış sənətçiləri çıxış edəcəklər. İlk olaraq Təranə Vəlizadə səhnəyə çıxacaq. Konsert daha sonra digər məşhur ifaçıların çıxışları ilə davam edəcək. O cümlədən, Flora Kərimova və Nadir Qafarzadə duet ifasında “Darıxmışam sənin üçün”, Lalə Məmmədova və Rəşad İlyasov duet ifasında “Romanıq ikimiz də” mahnılarını səsləndirəcəklər. Bundan başqa, Lalə Məmmədova solo ifasında “İstəmirəm vüsalını”, Rəşad İlyasov solo ifasında “Son dəfə”, Nisə Qasımova solo ifasında “Eynəklər”, Firəngiz Allahverdiyeva solo ifasında “Ata”, Samir Piriyev solo ifasında “Yuxu”, Nərmin Kərimbəyova solo ifasında “Başqasını sev”, Cavan Zeynallı solo ifasında “Bəxtimsən, taleyimsən”, Arif Nəbiyev solo ifasında “Qısqanmasan”, Şölə Səfərəliyeva solo ifasında “İgidlər diyarı”, Təranə Vəlizadə solo ifasında “Əbəsdi” və “Unuda bilmirəm”, Ceyhun Bakinskiy solo ifasında “Bakı”, Elxan Qaraxanoğlu solo ifasında “Eşq nəğməsi” və s. mahnılar ifa ediləcək.xeber100.com

Milli Musiqi Günü münasibətilə Musiqi Festivalı keçiriləcək

Heydər Əliyev Fondu və Mədəniyyət Nazirliyinin təşkilatçılığı ilə Milli Musiqi Günü münasibətilə sentyabrın 18-dən 28-dək Üzeyir Hacıbəyli XVI Beynəlxalq Musiqi Festivalı keçiriləcək. Nazirlikdən bildirilib ki, festivalda Azərbaycanla yanaşı, ABŞ, Rusiya, Almaniya, İspaniya, Avstriya, Koreya, Türkiyə, Braziliya, Hindistan və digər ölkələrdən tanınmış ifaçı və kollektivlər iştirak edəcəklər. Festival çərçivəsində Bakı ilə yanaşı, Şuşa, Gəncə və bir sıra şəhərlərdə açıq və qapalı məkanlarda konsertlər, tamaşalar, sərgilər, elmi konfrans və ustad dərsləri təqdim olunacaq. Festival günlərində M.Maqomayev adına Azərbaycan Dövlət Akademik Filarmoniyasında Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin təqdimatında “Mədəniyyətimiz naxışların izi ilə” adlı sərgi reallaşacaq. Sentyabrın 18-də Azərbaycan Dövlət Akademik Filarmoniyasında Üzeyir Hacıbəyli XVI Beynəlxalq Musiqi Festivalının təntənəli açılış mərasimi olacaq.xeber100.com