Azərbaycan incəsənət ustalarının iştirakı ilə Muğam Günləri keçirilib

Ankara Musiqi və Təsviri Sənət Universitetində (MGÜ) ustad dərsləri və Azərbaycan incəsənət ustalarının iştirakı ilə konsertin təşkil olunduğu Muğam Günləri keçirilib. Əməkdar artist Təyyar Bayramov, Beynəlxalq Muğam Mərkəzinin solisti tarzən Rəşad İbrahimov, kamança ustası Təbriz Yusubov və nağara ifaçısı Vüsal Bayramov muğam sənətində təcrübə və biliklərini paytaxt universitetinin tələbələri ilə bölüşüblər. T. Bayramov qeyd edib ki, Ankaraya səfər Azərbaycan Milli Konservatoriyası ilə MGÜ arasında imzalanmış Əməkdaşlıq Memorandumu çərçivəsində təşkil olunub. “Hər birimiz MGÜ tələbələri üçün fərdi ustad dərsləri keçirdik. Tələbələr arasında çoxlu istedadlı vokalçı var. Ümid edirəm ki, bu tələbələrin hamısı gələcəkdə yaxşı nəticələr göstərəcək”, - deyə Azərbaycanın Əməkdar artisti qeyd edib. O, universitetdə muğamı öyrənmək üçün ayrıca qrupun yaradılması ideyasını dəstəklədiyinə görə MGÜ rəhbərliyinə minnətdarlığını bildirib.xeber100.com    

“Ümummilli Lider Heydər Əliyev və Azərbaycanın mədəniyyət dəyərləri”…

Mayın 6-da Mədəniyyət Nazirliyinin təşkilatçılığı və Mədəniyyət işçiləri YAP ərazi ilk təşkilatının təşəbbüsü ilə Beynəlxalq Muğam Mərkəzində Ümummilli Lider Heydər Əliyevin anadan olmasının 103-cü ildönümünə həsr olunmuş “Ümummilli Lider Heydər Əliyev və Azərbaycanın mədəniyyət dəyərləri” mövzusunda konfrans keçirilib. Konfrans Ulu Öndər Heydər Əliyevin anadan olmasının 103-cü ildönümünə həsr olunub. Əvvəlcə Dövlət Himni səsləndirilib, Ulu Öndər Heydər Əliyevin və Vətən uğrunda canından keçən şəhidlərimizin əziz xatirəsi bir dəqiqəlik sükutla yad edilib. Daha sonra Ümummilli Liderin mədəniyyət sahəsindəki fəaliyyətindən bəhs edən videoçarx nümayiş olunub. Tədbirdə çıxış edən mədəniyyət nazirinin müavini Səadət Yusifova bildirib ki, Ümummilli Lider Heydər Əliyev üçün milli-mənəvi dəyərlər sadəcə qorunmalı irs deyil, xalqın varlığını təsdiq edən, onu zamanın sınaqlarından keçirən və gələcəyə aparan əsas güc mənbəyi idi. Konfransda “Simurq” Azərbaycan Mədəniyyət Assosiasiyasının sədri Fuad Məmmədov, Azərbaycan Memarlar İttifaqının İdarə Heyətinin sədri Elbay Qasımzadə, Yeni Azərbaycan Partiyasının (YAP) Səbail rayon təşkilatının sədri Muxtar Nağıyev və b. çıxış edərək Ümummilli Lider Heydər Əliyevin Azərbaycan mədəniyyətinin inkişafındakı müstəsna rolundan, milli-mənəvi dəyərlərin qorunması və təbliği istiqamətində həyata keçirdiyi məqsədyönlü siyasətdən ətraflı bəhs ediblər. Natiqlər vurğulayıblar ki, Ulu Öndərin müəyyən etdiyi strateji xətt bu gün də uğurla davam etdirilir, milli irsin qorunması, mədəniyyətin inkişafı və dünya miqyasında tanıdılması istiqamətində ardıcıl işlər görülür. Daha sonra Ümummilli Lider Heydər Əliyevin sevdiyi musiqilərdən ibarət bədii proqram təqdim olunub.xeber100.com

Bakı Bələdiyyə Teatrının səhnələşdirdiyi “Şekspir” tamaşasının nümayişi olub

Mayın 5-də Bakı Bələdiyyə Teatrının Xalq yazıçısı Elçinin “Şekspir” pyesi əsasında səhnələşdirdiyi eyniadlı tamaşanın nümayişi olub. Elçinin xatirəsinə həsr olunmuş tamaşanın nümayişi Şəhriyar adına Mədəniyyət Mərkəzində keçirilib. Gecədə Milli Məclisin Mədəniyyət komitəsinin sədr müavini Günay Əfəndiyeva, Milli Məclisin Aqrar siyasət komitəsinin sədri Tahir Rzayev, Milli Məclisin Aqrar siyasət komitəsinin sədr müavini Razi Nurullayev, Milli Məclisin Sosial qanunvericilik şöbəsinin müdiri Adil Vəliyev, Milli Kitabxananın direktoru Kərim Tahirov, Bakı Şəhər İcra Hakimiyyətinin şöbə müdürü və müavini, Pirallahı Rayon İcra Hakimiyyəti başçısının müavini Zülfiyyə Məmmədhüseynova, Xalq yazıçısı, ictimai-siyasi xadim Elmira Axundova, eləcə də tanınmış  mədəniyyət xadimləri və ictimaiyyət nümayəndələri iştirak ediblər. Tamaşadan əvvəl çıxış edən Xalq artisti Mərahim Fərzəlibəyov Elçinin yaradıcılığından, Bakı Bələdiyyə Teatrı ilə olan əməkdaşlığından bəhs edib. Daha sonra tamaşanın nümayişi başlayıb. Qeyd edək ki, Elçinin “Şekspir” pyesi dünyanın bir çox ölkələrində, o cümlədən ABŞ, Türkiyə, Rusiya, İtaliya, Ukrayna, Gürcüstan və digər xarici ölkələrdə səhnəyə qoyulub. Geniş tamaşaçı auditoriyasının marağına səbəb olan əsər, eyni zamanda dünya ictimaiyyətinin Azərbaycanın zəngin ədəbi irsi ilə yaxından tanış olmasına da şərait yaradıb. Tamaşanın süjetinə əsasən ruhi-əsəb klinikasındakı pasiyentlərin hər biri özünün xəyalən qurduğu dünyada yaşayır, bir personaj hətta başqa planetdən gəldiyini deyir və buna inanır. Onlar təfəkküründə yaratdığı gözəl bir məskəndə yaşayırlar. Tamaşada Rəşad Kəsəmənlinin oynadığı obrazın özünü Sovet dövlətinin lideri İ.V.Stalin hesab etməsi, bütün günü törətdiyi əməllərin peşmançılığını çəkərək, xatirələr aləmində yaşaması, Əməkdar artist Hüsniyyə Mürvətovanın oynadığı obrazın özünü məhşur fransız aktrisası Sara Bernar bilməsi və hər dəqiqə özünü səhnədə təsəvvür edərək, həyatını obrazlar aləmində yaşaması, onun Tural Əhmədin oynadığı Drob13 ilə yaşadığı hisslər, bir yerdə özlərini Romeo və Cülyetta kimi hiss etmələri, Ülviyyə Rzanın oynadığı həkimin şəxsi həyatından qaynaqlanan əsəbi durumunun iş həyatına da mənfi təsir etməsi, Toğrul Rzanın Veneralı rolunda saatlarla göyləri seyr edərək, onun arxasınca nə vaxt gələcəklərini gözləməsi, Elçin Muradovun ifa etdiyi baş sanitarın xəstələrə olan münasibəti, onlar üçün ayrılan  qidalardan bəhrələnməsi və sonda səhvini başa  düşməsi, aktrisa Zülfiyyə Qurbanovanın oynadığı rol vasitəsilə daim öz ikili təbiətinin problemləri ilə yaşaması, İlqar Musayevin oynadığı  baş həkimin xəstələrin xəyali dünyasını dərk etməyə çalışması və  sonda xəstə kimi müalicə olunan insanların əslində öz dünyalarında rahat yaşamasını qəbul etməsi, eləcə də Namiq Cavadovun və Rəşid Soltanovun oynadığı sanitar rollarının öz sakitliyini qoruyaraq xəstələrə olan münasibəti tamaşaçıya mesaj verməklə yanaşı onu düşünməyə vadar edirdi. Tamaşanın quruluşçu rejissoru Mərahim Fərzəlibəyov “Şekspir” əsərinə tam fərqli prizmadan yanaşıb. O, tamaşaçıları “Şekspir” vasitəsilə Elçinin böyük, yeni fikirləri ilə tanış edib. “Şekspir” tamaşası tamaşaçı auditoriyasının böyük maraqla qarşıladığı və baxaraq düşündüyü səhnə əsərlərindən biridir. Tamaşa bitincə salondan qopan alqış sədaları bunu bir daha təsdiq etdi. Tamaşanın quruluşçu rəssamı, Əməkdar mədəniyyət işçisi İlham Əsgərov, musiqi hissə müdiri,Əməkdar mədəniyyət işçisi Nazim Əbidov, işıqçı rəssam Tərlan Ələsgərli, kostyum sexinin müdiri Leyla Əkbərova, dizayn işləri üzrə tərtibatçı Elnur Ehtiramoğludur. Rollarda iştirak edirlər: İlqar Musayev(baş həkim), Ülviyyə Rza(həkim), Hüsniyyə Mürvətova(Əməkdar artist)-Sara Bernar, Rəşad Kəsəmənli(İosif Stalin), Zülfiyyə Qurbanova(Ər-arvad), Tural Əhməd(Drob 13), Toğrul Rza(veneralı), Elçin Muradov(sanitar), Rəşid Soltanov(I sanitar), Namiq Cavadov(II sanitar).xeber100.com  

TÜRKSOY-un Opera Günləri çərçivəsində XVII qala konserti təşkil olunub

Aşqabadın “Mukamlar” sarayında TÜRKSOY-un Opera Günləri çərçivəsində XVII qala konserti təşkil olunub. Tədbir türk dövlətləri arasında mədəniyyət sahəsində əməkdaşlığın möhkəmləndirilməsinə və ortaq musiqi irsinin təbliğinə həsr olunub. Konsert proqramı Türkmənistanın Dövlət Simfonik Orkestrinin müşayiəti ilə təqdim olunub. Tədbirdə Türkiyə, Qazaxıstan, Özbəkistan, Qırğızıstan və Türkmənistanın musiqi nümayəndələri ilə yanaşı, Azərbaycanı tanınmış opera ifaçıları Əməkdar artist Fəridə Məmmədova və Taleh Yəhyayev təmsil ediblər. Azərbaycan ifaçılarının təqdimatları tədbir iştirakçıları tərəfindən böyük rəğbətlə qarşılanıb. Onların ifasında təqdim olunan klassik musiqi əsərləri Azərbaycanın zəngin mədəni irsini və dərin musiqi ənənələrini əks etdirərək, ölkəmizin incəsənət sahəsində malik olduğu yüksək yaradıcı potensialı bir daha nümayiş etdirib. Konsertdə Türkmənistanın və TÜRKSOY-un rəsmi şəxsləri, xarici ölkələrin Türkmənistandakı səfirləri, diplomatik nümayəndəliklərin əməkdaşları, mədəniyyət və incəsənət xadimləri, ictimaiyyət və media təmsilçiləri iştirak ediblər. Konserti izləyən Azərbaycanın Türkmənistandakı səfirliyinin kollektivi tədbirin sonunda ifaçılarımızla görüşərək onlara gül dəstələri təqdim ediblər.xeber100.com

Rusiya Azərbaycanlı Gənclər Birliyi: Musiqi müsabiqəsinə start verilib

Rusiya Azərbaycanlı Gənclər Birliyi (RAGB) nəzdində fəaliyyət göstərən “Şuşa” Azərbaycan Musiqi Mərkəzi Azərbaycan Respublikasının Müstəqillik Gününə həsr olunmuş gənc azərbaycanlı musiqi ifaçılarının müsabiqəsinə ərizələrin qəbulunun başlandığını elan edib. Müsabiqə vokal, instrumental ifaçılıq və Azərbaycan rəqsi də daxil olmaqla bir neçə kateqoriya üzrə gənc ifaçılar üçün açıqdır. İştirakçılar xalq mahnılarını, Azərbaycan bəstəkarlarının əsərlərini, instrumental kompozisiyaları və rəqs proqramlarını təxminən bir dəqiqəlik video formatında təqdim etməyə dəvət olunurlar.

“Saz, söz ustadı Aşıq Ələsgər” adlı virtual kitab sərgisi hazırlanıb

Respublika Gənclər Kitabxanasında Aşıq Ələsgərin 205 illiyi münasibətilə “Saz, söz ustadı Aşıq Ələsgər” adlı virtual kitab sərgisi hazırlanıb. Bu barədə kitabxanadan məlumat verilib. Bildirilib ki, virtual sərgidə Azərbaycan ədəbi-mədəni irsinin görkəmli nümayəndəsi Aşıq Ələsgərin zəngin yaradıcılığı, onun poeziyasının dərin fəlsəfi mahiyyəti və milli-mənəvi dəyərlərimizin formalaşmasındakı rolu geniş şəkildə təqdim olunub. Sərgidə “Aşıq Ələsgərin 200 illik yubileyinin qeyd edilməsi haqqında” Azərbaycan Respublikası Prezidentinin Sərəncamının tam mətni yer alır. Bu sənəd Aşıq Ələsgər irsinin dövlət səviyyəsində yüksək qiymətləndirilməsinin bariz nümunəsidir. Virtual kitab sərgisində görkəmli ədiblərin – Xalq şairləri Səməd Vurğun, Məmməd Araz, Xalq yazıçıları Mirzə İbrahimov, Mehdi Hüseyn, həmçinin akademiklər Həmid Araslı və Məmməd Arif tərəfindən Aşıq Ələsgər haqqında söylənilən dəyərli fikirlər yer alıb. Həmçinin Aşıq Ələsgərin yaradıcılığını əhatə edən bir çox kitabların tam mətni oxuculara təqdim edilir. Eyni zamanda “Aşıq şeiri”, “Sazlı-sözlü Göyçə”, “Aşıq Ələsgər”, “Ustad nəfəsli saz-söz ərməğanı”, “Aşıq Ələsgər yaradıcılığında sufizm”, “Xalq aşığı Ələsgər” kimi nəşrlər də sərgilənib.xeber100.com  

Türk xalqlarının ortaq dil, ədəbiyyat və mədəni irsi müzakirə ediləcək

Özbəkistandakı Heydər Əliyev adına Azərbaycan Mədəniyyət Mərkəzi və Daşkənd Dövlət Şərqşünaslıq Universitetinin birgə təşkilatçılığı ilə Daşkənddə “Birinci Türkoloji Qurultay – uzaq keçmişimizdən uzaq gələcəyə” adlı elmi-praktik seminar keçiriləcək. Bu barədə mərkəzdən məlumat verilib. Bildirilib ki, seminarda hər iki ölkədən dövlət və ictimai xadimlər, parlament üzvləri, akademiklər və nüfuzlu alimlərlə yanaşı, elm və təhsil müəssisələrinin nümayəndələri, tədqiqatçılar və tələbələr də iştirak edəcəklər. Tədbirdəki çıxışçılar Birinci Türkoloji Qurultayın tarixi əhəmiyyəti, türk xalqlarının elmi düşüncə tarixində rolu və bu irsin müasir dövrdə davam etdirilməsi məsələlərinə toxunacaqlar. Seminar çərçivəsində türkologiyanın müxtəlif istiqamətləri üzrə məruzələr təqdim olunacaq, türk xalqlarının ortaq dil, ədəbiyyat və mədəni irsi, eləcə də bu sahədə aparılan müasir tədqiqatlar müzakirə ediləcək. Tədbir özbək əsilli Azərbaycan alimi, dilçi, ictimai xadim və Birinci Türkoloji Qurultayın təşkilatçılarından biri Xalid Səid Xocayevin xatirəsinə həsr olunacaq.xeber100.com

Əbədiyyətə qovuşan ömür…

-Həyat çox gözəldi, Rasim müəllim... -Nəyi gözəldi, hara baxırsan müharibələr, haqsız axıdılan qanlar, tökülən göz yaşları, təbiət belə insanla artıq oyun oynayır...hanı tanıdığım, bərabər çalışdığım insanlar, hanı o Azərbaycan kinosunun qaynar iş sistemi, bir-birinin ardınca çəkilən filmlər, rəqabət hanı?! Demək istərdim ki, bütün bunlara baxmayaraq həyat yenə də gözəldi, ancaq o Rasim Balayev idi, dediyin sözün kəsəri var idi, ağılla düşünən, məntiqli cavablar verməyi bacaran, daima hazırcavablığı ilə, uzaqgörənliyi ilə seçilən qəhrəmanımız idi... Bu dünyadan bir Rasim Balayev keçdi... Ölkəmiz müstəqillik əldə etdiyi üçün, ağır bir sistemdən çıxaraq azadlığa qovuşduğumuz üçün çox xoşbəxt idi, ancaq yenə də nə isə çatmırdı, hər zaman nigaran idi...Uşaq səmimiyyətilə olan gülüşünün arxasında sanki narahat duyğular özünə yer eləmişdi... Bütün şöhrətə qovuşmuş, “Azərbaycanfilm”lə yanaşı, eyni zamanda dünyanın bir çox kinostudiyalarının istehsal etdiyi önəmli sənət nümunələrində yer almış, yüksək əxlaqi keyfiyyətləri ilə ətrafında üstünlük nümayiş etdirməyi, Allahın bəxş etdiyi gözəl siması ilə yaratdığı portret obrazları özününküləşdirməyi bacarmış və ən önəmlisi isə xoşbəxt ailə səadəti yaşayan bir insanın nigarançılığı nə ola bilərdi?! Əlbəttə ki, kinomuzun yaşadığı böhran, çəkiliş meydançalarının boş qalması, filmə çəkilməyi gözləyə-gözləyə qocalan gənc aktyorların, film çəkmək üçün sıra gözləyən və gözləmə zamanı artıq sağlam rəqabətdən betər eybəcərliklərin ağuşunda qalan rejissorların taleyi, kinoda olan operator, səsləndirmə, musiqi işlərinin hamısının sıradan çıxması və daha nələr... Bütün bunları sadəcə aktyor kimi deyil, illərdir Azərbaycan Kinematoqrafçılar İttifaqının rəhbəri kimi çalışdığı illərdən düşünürdü, çıxış yolları axtarırdı... Kütləvi informasiyalar vasitəsilə verdiyi müsahibələrin hər birində kinonun yaşadığı böhranla bağlı həyəcan təbili çalırdı...Axı bünövrə var, əgər bu bünövrənin üzərində dayanmasaq, o zaman hər şey məhv olacaq... Azərbaycan kinosunda yaratdığı qəhrəman obrazlar silsiləsi ilə, vətən, torpaq, millət sevgisini təbliğ etməklə gənc nəslə vətənpərvərlik ruhu aşılayan Rasim Balayev üçün kino sənəti daim zirvə hesab olunub. Eləcə də, sənət və sənətkarlıqda bir çox keyfiyyətlərin – təcrübənin, düşüncənin müdrikliyin, təqlid etmədən öz yolunu tapmanın, ən önəmlisi isə yüksək əxlaqi keyfiyyətin birləşməsini vacib amillərdən biri hesab edib. Türkiyə, Almaniya, Cənubi Azərbaycan, Tacikistan, Özbəkistan, Moskva, Gürcüstan və başqa kinostudiyaların istehsal etdiyi bir çox filmlərdə maraqlı rollar yaradan Rasim Balayev, yalnız müsbət qəhrəmanları deyil, həm də cəmiyyətdəki mənfi tipləri yaratmaqla tamaşaçı auditoriyasını düşündürməyi bacarıb. O, sadəcə sənət haqqında düşünmür, dünyada baş verən hadisələri izləyir, haqsızlıqlara qarşı münasibət bildirərək deyirdi ki, planetimizin bəlalardan uzaq olmasını, insanların bir-birinə hörmətlə yanaşmasını istəyirəm.Bu dünyada əbədi heç nə yoxdur. Heç birimiz əbədi yaşamayacağıq. Düşünürəm ki, dünyada haqsızlıq olmasa dünyamız çiçəklənər, həyatımız gözəlləşər. Kinematoqrafiya və digər sənət növləri insanları xoşbəxt etməyə borcludurlar... Kino üçün nə bacarırdı etdi, hətta bacarmadıqlarını da etdi, yəqin ki, özü ilə bərabər nigarançılığını, çarəsizliyini də apardı... O, özünü qəhrəman hesab etmirdi, deyirdi ki, mən Babək, Nəsimi, Beyrək, Cavid deyiləm. Bunların hər biri obrazdır və mən bacardığım qədər bu obrazları dolğun yaratmağa çalışmışam. Xalq isə sevimli aktyorunu artıq çoxdan qəhrəman elan etmişdi. O, Nəsimi kimi poeziyanın vurğunu idi, Babək kimi qəhrəmanlıq ruhunda idi, Beyrək kimi döyüşmək gücündə idi, Cavid kimi sözü birbaşa deməyi bacarırdı. Qəhrəmanlarından onda, ondan da qəhrəmanlarında nəsə var idi, sanki bir-birinə bağlayan bir bağ kimi... Rasim Balayev elə sənətkarlardan idi ki, uşaqdan-böyüyə hamının sevgisini qazanmışdı. Orta məktəblərdə, ali təhsil ocaqlarından onunla keçirilən görüşlərdən bu sevgini hiss etməmək mümkün deyildi. Uşaqla uşaq, böyüklə böyük dilində danışmağı yaxşı bacarırdı. Hələ xanımlara olan münasibətində necə ata, qardaş nəvazişi göstərirdi, bunu sözlə ifadə etmək çox çətindir...Belə yüksək keyfiyyətləri hər adam daşıya bilməzdi...Deməli Uca Yaradan tərəfindən seçilmişdiniz...Siz Allahı da sevirdiniz, dini də sevirdiniz, milləti, ölkəni də sevirdiniz, ürəyiniz sevgi dolu idi Rasim müəllim. Məhz bu səbəbdən dünyanın belə böhran vəziyyətə düşməsini, bütün sahələrdə olan mövcud durumu, ən böyük təbliğat vasitəsi olan kinomuza laqeyd münasibəti qəbul etmək istəmirdi... Getmək üçün çox tələsdiniz, bəlkə də çıxış yolunu getməkdə gördünüz...Ölümü sizə heç yaraşdırmadıq Rasim müəllim... Həmişə bizimlə olacaqsınız, ruhunuz şad olsun!xeber100.com  

Azərbaycanlıların Soyqırımı Gününə həsr olunan sərgi açılıb

Prezident Kitabxanasında 31 Mart – Azərbaycanlıların Soyqırımı Günü ilə əlaqədar virtual və ənənəvi kitab sərgiləri təşkil edilib. Bu barədə kitabxanadan məlumat verilib. Bildirilib ki, sərgilərdə Azərbaycan xalqına qarşı XX əsrdə həyata keçirilmiş soyqırımı, deportasiya və etnik təmizləmə siyasətini əks etdirən elmi, tarixi və sənədli nəşrlər yer alıb. Ənənəvi sərgidə nümayiş olunan materiallar geniş tarixi-coğrafi arealı əhatə edir. Bu nəşrlərdə Göyçə mahalı, Quba, Şamaxı, İrəvan və Naxçıvan bölgələrində baş vermiş kütləvi qırğınlar təsvir olunur. Eyni zamanda, Cənubi Azərbaycan və Şərqi Anadoluda türk-müsəlman əhaliyə qarşı törədilmiş zorakılıqlar tarixi mənbələr əsasında işıqlandırılıb. 1918-ci il mart soyqırımı, Türk Qafqaz İslam Ordusunun fəaliyyəti, erməni terrorizminin genişlənməsi və mədəni-dini irsə qarşı yönəlmiş vandalizm aktları da nəşrlərdə ətraflı şəkildə əks etdirilib. Prezident Kitabxanasında “Azərbaycanlıların Soyqırımı” adlı virtual kitab sərgisi də yenilənərək istifadəyə verilib. Virtual sərgi mövzu üzrə materialları sistemli şəkildə bir araya gətirir və tarixi sənədlər, elmi araşdırmalar və canlı xatirələr əsasında hadisələrin mahiyyətini ətraflı nümayiş etdirib. 31 Mart – Azərbaycanlıların Soyqırımı Günü münasibətilə təqdim olunan bu sərgilər Azərbaycan tarixinin faciəli səhifələrinin anılması, tarixi yaddaşın qorunması və elmi biliklərin geniş ictimaiyyətə çatdırılması baxımından mühüm əhəmiyyət kəsb edir.xeber100.com

Milli Xalça Muzeyində milli geyimlərə həsr olunmuş sərgi açılıb

Fevralın 17-də Azərbaycan Milli Xalça Muzeyində Avropanın milli geyim və ornamentlərinə həsr olunmuş “Bağçada güllər” sərgisi açılıb. Sərgi altıncı “FantazEU” Mədəni İrs Festivalı çərçivəsində Avropa İttifaqının Azərbaycandakı nümayəndəliyinin, “Arts Council Azerbaijan” təşkilatının, Azərbaycan Milli Xalça Muzeyinin və Aİ-yə üzv dövlətlərin səfirliklərinin dəstəyi ilə təşkil edilib. Tədbirdə muzeyin direktoru Əminə Məlikova ziyarətçilərə unikal eksponatları təqdim etmək imkanına görə Avropa İttifaqının Azərbaycandakı nümayəndəliyinin rəhbəri Mariyana Kuyunciçə minnətdarlığını bildirib. Layihənin konsepsiyası barədə danışan direktor qeyd edib ki, sərgidə muzeyin “qızıl kolleksiyası”ndan olan bir neçə xalça – əsasən XVIII əsrin sonu və XIX əsrin əvvəllərinə aid Qarabağ xalçaları nümayiş olunur. Sərginin əsas mövzusu çiçəklənmə və rifahın rəmzi kimi gül motividir. Bu motiv səkkiz Avropa ölkəsinin və Azərbaycanın milli geyimlərini bir ideya ətrafında birləşdirib.Sərgidə Bolqarıstan, Çexiya, Almaniya, Latviya, Litva, Polşa, Rumıniya və Slovakiya səfirlikləri tərəfindən təqdim olunan 16 dəst milli geyim nümayiş etdirilir. Bu nümunələr Avropa ölkələrinin zəngin mədəni müxtəlifliyini, müxtəlif tarixi dövrlərdən gələn adət-ənənələrini, fərqli kimliklərini və geyimlərin bəzək xüsusiyyətlərini əks etdirir. Sərgi fevralın 21-dək davam edəcək.xeber100.com

Xalq Çalğı Alətləri Orkestrinin yubileyinə həsr olunmuş konsert təqdim olunacaq

Fevralın 20-də Beynəlxalq Muğam Mərkəzində Əməkdar kollektiv, Səid Rüstəmov adına Xalq Çalğı Alətləri Orkestrinin 95 illik yubileyinə həsr olunmuş tədbirlər planı çərçivəsində konsert proqramı təqdim olunacaq. Konsertdə orkestrin bədii rəhbəri və baş dirijoru, Prezident mükafatçısı Mustafa Aşurovun idarəçiliyi ilə Azərbaycan musiqi mədəniyyətinin görkəmli nümayəndələrinin əsərləri səsləndiriləcək. Proqramda Azərbaycan muğam sənətinin nadir incilərindən sayılan “Zabul Segah” və “Bayatı Kürd” dəstgahları səsləndiriləcək. Qeyd edək ki, bu il Səid Rüstəmov adına Xalq Çalğı Alətləri Orkestrinin 95 ili tamam olur. İl ərzində yubiley ilə bağlı müxtəlif tədbirlərin keçirilməsi nəzərdə tutulur.xeber100.com

Gənclər Gününə həsr olunmuş “Zaman sənindir!” adlı tədbir keçirilib

Cəfər Cabbarlı adına Azərbaycan Dövlət Teatr Muzeyində 2 Fevral - Gənclər Gününə həsr olunmuş “Zaman sənindir!” adlı tədbir keçirilib. Muzeydən bildirilib ki, tədbir çərçivəsində geyim dizaynerləri olan gənclər Selcan Qasımzadə, Aydan Novruzova öz kolleksiyalarından nümunələr təqdim edərək, həm təsviri sənət və dizayn sahəsində hazırladıqları kreativ işlər barədə, həm də məşğul olduqları sənət sahəsi haqqında məlumat veriblər. Tədbirdə, həmçinin Aydan Novruzovanın geyim dizaynı ilə yanaşı, incəsənətin çox qədim və nadir növlərindən biri olan qobelen toxuculuğuna məxsus əl işləri də nümayiş olunub. Tədbir bədii hissə ilə davam edib. Qeyd edək ki, tədbir gənclərin yaradıcılıq potensialının tanıdılması və sənət sahəsində özünüifadə imkanlarının genişləndirilməsi baxımından mühüm əhəmiyyət daşıyır.xeber100.com

Azərbaycan Şəhərsalma Kampaniyası çərçivəsində

Ümumdünya Şəhərsalma Forumunun 13-cü sessiyasına gedən yolda BMT-nin Məskunlaşma Proqramı (UN-Habitat) və Dövlət Şəhərsalma və Arxitektura Komitəsinin birgə təşəbbüsü ilə həyata keçirilən Azərbaycan Şəhərsalma Kampaniyası (#AUC2026) çərçivəsində Azərbaycan Fotoqrafiya Federasiyası və “Gilavar Foto Klubu” İctimai Birliyi tərəfindən “Mənim şəhər dünyam” (My Urban World) adlı beynəlxalq fotomüsabiqə təşkil edilir. İctimai Birlikdən bildirilib ki, Beynəlxalq Foto Sənəti Federasiyası (FIAP) və Beynəlxalq Bədii Fotoqraflar Assosiasiyasının (IAAP) akkreditasiyasından keçmiş fotomüsabiqənin mövzusu və məqsədi dünyada baş verən şəhərsalma prosesini fotolar vasitəsilə göstərməkdir. Müsabiqəyə insanyönümlü şəhər, mədəni irs, tarixi binalar, yeni ilə köhnənin yanaşı mövcudluğu, əsrlərin və üslubların harmoniyası, yaşıl şəhər, ekoloji şəhər, “ağıllı şəhər”, təhlükəsiz şəhər, tikinti, yenidənqurma və bərpa işləri, sökülmüş, dağıdılmış tikililər, tərk edilmiş ərazilər, təhlükə altında olan şəhər zonaları, zamanın şəhər üzərində qoyduğu izlər, gündüz və gecə şəhəri, insanlar və şəhərlər və s. kimi mövzularda şəhərsalma prosesini əks etdirən şəkillər qəbul edilir. Müsabiqədə iştirak üçün son müraciət tarixi 2026-cı il aprelin 30-dur. Təqdim olunan fotolar Azərbaycan, Türkiyə, Sinqapur, Yunanıstan və Şimali Makedoniyadan olan 5 nəfər peşəkar fotoqrafdan ibarət münsiflər heyəti tərəfindən qiymətləndiriləcək. Müsabiqənin ən yaxşılarına qızıl, gümüş və bürünc medallar, xüsusi lentlər və diplomlar təqdim olunacaq, qaliblərin fotolarından ibarət elektron kataloq hazırlanacaq. Həmçinin WUF13-ün təşkil olunduğu mayın 17-22-də fotosərginin keçirilməsi nəzərdə tutulur.xeber100.com

Milli Xalça Muzeyində “Aether” adlı qrup sərgisi açılıb

Milli Xalça Muzeyində Azərbaycan Rəssamlar İttifaqının üzvü Ramilə Şamilovanın rəhbərliyi ilə fəaliyyət göstərən “LèRami” art studiyasının tələbələrinin iştirakı ilə “Aether” adlı qrup sərgisi açılıb. Sərgidə 35 rəssamın 85 əsəri yer alıb. Böyüklərlə yanaşı uşaqlar da bu sərgidə iştirak edərək öz istedadlarını nümayiş etdiriblər. Sərgidə Təranə Quliyeva, Fidan Vəlizadə, Asiman Şükürova, Vüsalə Nuruzadə, Günel Amanova, Zümrüd Məmmədova və başqaları rəsm əsərləri ilə iştirak ediblər. Bu sərgi Ramilə Şamilovanın pedaqoji uğurlarını və onun tələbələrinin bədii inkişafını qeyd etmək üçün mükəmməl bir fürsətdir. Sərgi, həmçinin tələbələrin yaradıcılıq çeşidini və sənətə olan yanaşmalarını nümayiş etdirib.xeber100.com

Romada keçirilən “Muzeylərdə Musiqi 2025” təşəbbüsü çərçivəsində

İtaliyanın paytaxtı Romada keçirilən “Muzeylərdə Musiqi 2025” (Musei in Musica 2025) təşəbbüsü çərçivəsində Azərbaycan milli musiqisi şəhər ictimaiyyətinə təqdim olunub. Azərbaycanın İtaliyadakı səfirliyinin nəzdində fəaliyyət göstərən Mədəniyyət Mərkəzi bu il İtaliyanın “Zetema Mədəniyyət Layihəsi” tərəfindən tədbirə xüsusi qonaq qismində dəvət olunub və “Sehrli gecə: Azərbaycan balabanının nəfəsi” adlı xüsusi konsert proqramı Romanın Trastevere rayonunda yerləşən Roma Muzeyində təşkil edilib. Tədbirin açılışını Mədəniyyət Mərkəzinin direktor müavini Gülnar Tağızadə edib, qədim nəfəsli musiqi aləti olan balabanın tarixi, səsi və mədəni əhəmiyyəti barədə auditoriyaya məlumat verib, ifaçılar təqdim olunub. Daha sonra Azərbaycanın İtaliyadakı səfiri Rəşad Aslanov konsert iştirakçılarını salamlayaraq, tədbirin təşkilatçılarına, o cümlədən Roma Bələdiyyəsi, Roma Muzeylər Şəbəkəsi və Zetema Mədəniyyət Layihəsinə təşəkkürünü bildirib. Səfir qədim “Balaban sənətkarlığı və ifaçılıq sənəti”nin 2023-cü ildə UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edildiyini xatırladıb. Azərbaycan musiqisinin zəngin kökləri, onun beynəlxalq mədəni dialoqda oynadığı rol və İtaliya ictimaiyyətinin bu musiqiyə göstərdiyi böyük marağın mədəni əməkdaşlıq baxımından xüsusi əhəmiyyət daşıdığını vurğulanıb.xeber100.com

Azərbaycanın zəngin irsini özündə əks etdirən fotolar və videoçarxlar nümayiş olunub

Azərbaycanın Pakistandakı səfirliyi “Discover Pakistan” və Pakistanda Turizmin İnkişafı Kooperasiyasının birgə təşkil etdiyi “Global Destinations Expo” adlı beynəlxalq tədbirdə iştirak edib. Səfirlikdən bildiriblər ki, mədəni mübadilə və qlobal turizmin təşviqi məqsədilə keçirilən sərgidəki Azərbaycan stendində ziyarətçilərə ölkəmizin mədəni, işgüzar, sağlamlıq, təbiət, haykinq və qış turizmi imkanları, dağ-xizək istirahət mərkəzləri barədə ətraflı məlumatlar verilib, milli yeməklərimiz və şirniyyatlarımızdan ibarət müxtəlif təamlar təqdim olunub, tariximizə və mədəniyyətimizə dair suvenirlər nümayiş etdirilib. Tədbirdə, həmçinin Azərbaycanın zəngin milli-mədəni irsini özündə əks etdirən fotolar və videoçarxlar nümayiş olunub.xeber100.com

Muğam Mərkəzi Dünya Mədəniyyət Festivalında ölkəmizi təmsil edib

Beynəlxalq Muğam Mərkəzinin (BMM) direktoru Sahib Paşazadə və BMM-in solisti, Əməkdar artist Kamran Kərimov Dünya Mədəniyyət Festivalında “Ulduzların iştirakı ilə təntənəli konsert” də iştirak ediblər. Sənətkarların ifasında “Heyratı” zərb muğamı və kompozisiyası, “Bayatı Şiraz” üzərində muğamlar və rəqslərdən ibarət kompozisiya, Pakistan milli musiqisindən ibarət proqram təqdim olunub. Bunu açıqlamasında Muğam Mərkəzinin mətbuat xidmətinin rəhbəri Lalə Azəri deyib. Onun sözlərinə görə, məşhur sənətçilərinin də qatıldığı konsert proqramı Pakistanın Kəraçi şəhərində ikinci dəfə təşkil olunur. “Yüksək səviyyədə keçirilən festivalda Sahib Paşazadə və Kamran Kərimovun ifaları, Azərbaycan muğamı, musiqi alətlərimiz böyük sevgi ilə qarşılanıb. Konsertdə tamaşaçı izdihamı müşahidə olunub. Proqramda, həmçinin Pakistanın tanınmış ifaçıları Faris Şəfi, Miişa Şəfi, Gizri, Darabu da çıxış ediblər”,- deyə L.Azəri əlavə edib.xeber100.com

Mədəniyyət naziri Adil Kərimli Ucarda vətəndaşların müraciətini dinləyəcək

Mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən mədəniyyət naziri Adil Kərimli dekabrın 19-da, saat 10:00-da Ucar rayon Heydər Əliyev Mərkəzində (ünvan: Ucar şəhəri, Heydər Əliyev prospekti, 153) Ucar, Zərdab, Yevlax, Mingəçevir, Ağdaş, Göyçay və Kürdəmir rayonlarından olan vətəndaşların müraciətini dinləyəcək. Bu barədə Mədəniyyət Nazirliyindən məlumat verilib. Bildirilib ki, vətəndaşlar dekabrın 15-dək nazirliyin [email protected] elektron poçt ünvanı, (012) 493-43-98 telefon nömrəsi vasitəsilə müraciət etməklə qəbula yazıla bilərlər.    

Dənizkənarı Bulvarda Yeni il yarmarkası açılıb

Dekabrın 1-də Dənizkənarı Bulvarda Yeni il yarmarkası açılıb. Yarmarkanın ən diqqətçəkən yeniliklərindən biri şəhərin ilk açıq havada yaradılan buz meydançasıdır. ÜNNA Studio tərəfindən qurulan və “Nargis” Fondu tərəfindən təşkil olunan meydança “Dinamo” zonasında yerləşir. Buz örtüyü sərbəst hərəkət üçün kifayət qədər genişdir. Həmçinin yarmarkada quraşdırılan dekorativ işıqlandırmalar və müxtəlif əyləncə zonaları ziyarətçilər üçün əlçatan və maraqlı təcrübə təqdim edir. Yarmarkanın digər hissələrində müxtəlif satıcılar üçün pavilyonlar quraşdırılıb. Burada isti içkilər, suvenirlər, dekorativ məhsullar və mövsümi aksesuarlar təqdim olunur. Builki yarmarkanın məqsədi həm mövsüm ab-havasını yaratmaq, həm də bulvar ərazisində yeni formatda ictimai məkan təqdim etməkdir. Ziyarətçi axınının artıq ilk gündən yüksək olduğu qeyd edilir. Yarmarka dekabrın 1-dən yanvarın 5-dək fəaliyyət göstərəcək.xeber100.com

“Mən dünyaya aktrisa olmaq üçün gəldim…” yubiley gecəsi keçiriləcək

Dekabrın 28-də Heydər Əliyev sarayında milli teatr və kino tarixinin əfsanəsi, Xalq artisti, Dövlət mükafatı laureatı, “Şərəf”, “Şöhrət” ordenli, Bakı Bələdiyyə Teatrının yaradıcısı Amaliya Pənahovanın 80 illiyinə həsr olunmuş “Mən dünyaya aktrisa olmaq üçün gəldim…” yubiley gecəsi keçiriləcək. Gecədə mədəniyyət xadimləri, ictimaiyyət nümayəndələri, tanınmış sənət adamları iştirak edəcəklər. Biletləri sarayın kassasından əldə edə bilərsiniz.xeber100.com