BMT-nin Baş katibi sankiyaları aradan qaldırmağa çağırıb

BMT-nin Baş katibi Antoniu Quterriş ABŞ-ı İrana qarşı tətbiq etdiyi sankiyaları aradan qaldırmağa çağırıb.Bu barədə İranın İRNA agentliyi xəbər verib. Baş katib İranın dünya bazarına neft çıxarmasına icazənin verilməsini də istəyib. O ABŞ və İrana müraciət edərək danışıqları bərpa etməyə çağırıb və bu prosesdə razılaşmanın faydalı olacağını bildirib.Nəzərə çatdıraq ki, iyunun 30-da BMT Təhlükəsizlik Şurasının növbəti iclası keçiriləcək. Bu iclasda İranın “Nüvə proqramı” məsələsinə baxılacaq.Xatırladaq ki, 2015-ci ildə İranla ABŞ arasında imzalanan razılaşma BMT tərəfindən təsdiq edilmişdi. Lakin buna baxmayaraq, ABŞ həmin dövrdə birtərəfli qaydada müqavilədən çıxaraq, sanksiyaları nəinki qüvvədə saxladı, həmçinin sanksiyalar siyahısına daxil olan İrana aid şirkət, fiziki və hüquqi şəxslərin adlarını artırdı. Müqaviləyə əsasən, İran nüvə proqramını məhdulaşdıracaq, ABŞ isə bunun müqabilində saksiyaları aradan qaldıracaqdı.İran mətbuatı BMT Baş katibinin ABŞ-a müraciətini və məsələnin BMT Təhlükəsizlik Şurasına çıxarılmasını rəsmi Tehranın diplomatik qələbəsi kimi təqdim edir. Lakin bu qələbənin nədən ibarət olduğunu açıqlanmır. Məsələnin mahiyyəti ondan ibarətdir ki, İranın “Nüvə proqramı” məsələsi dəfələrlə BMT Təhlükəsizlik Şurasında müzakirə olunsa da, heç nə dəyişməyib. ABŞ sanksiyaların tətbiqini, İran isə uranı zənginləşdirməkdə davam edib.Onu da qeyd etmək lazımdır ki, bu gün İranın xarici işlər nazirinin müavini, ABŞ-la danışıqlarda İran nümayəndə heyətinə rəhbərlik edən Əli Bageri Qətərin paytaxtı Doha şəhərinə gedib. Hazırda o, Dohada ABŞ nümayəndələri ilə danışıqların bərpa olunmasını müzakirə edir. Qətərə yola düşərkən Ə.Bageri jurnalistlərə bildirib ki, danışıqlar bərpa olunacaq.xeber100.com

Parlamentlərarası dostluq qrupu təsis edilib

Əlcəzair Milli Xalq Məclisində Əlcəzair-Azərbaycan parlamentlərarası dostluq qrupu təsis edilib.Qrupun ilk iclasında Əlcəzair Milli Xalq Məclisinin sədr müavini Munzer Boden, Əlcəzair-Azərbaycan Dostluq qrupunun sədri Ğarbi Abdelbaset, millət vəkilləri və Əlcəzair Xarici İşlər Nazirliyinin Asiya və Okeaniya idarəsinin rəis müavini Lounas Taazibet, ölkəmizin Əlcəzairdəki müvəqqəti işlər vəkili Rəfail Bağırov iştirak ediblər.İclasda çıxış edənlər Əlcəzair və Azərbaycan arasında əlaqələrin inkişafında parlamentarilərin rolu, iki dost ölkənin qanunverici orqanları arasında əməkdaşlığın perspektivlərindən bəhs ediblər. Əlcəzairin millət vəkilləri azərbaycanlı həmkarları ilə birgə tədbirlərin, qarşılıqlı səfərlərin təşkil edilməsinin zəruriliyini də qeyd ediblər.Parlamentlərarası dostluq qrupunun ilk iclasında iştirakından məmnunluğunu ifadə edən R.Bağırov ölkəmizin inkişafı, işğaldan azad olunmuş Azərbaycan ərazilərində aparılan bərpa-quruculuq işləri barədə millət vəkillərinə ətraflı məlumat verib. Azərbaycanın diplomatik nümayəndəliyinin iki dost ölkənin parlamentləri arasında əməkdaşlığın inkişafı istiqamətində hər cür dəstək göstərəcəyini qeyd edən diplomat, parlamentlərarası dostluq qrupunun üzvlərinə uğurlar arzulayıb.xeber100.com  

Gürcüstan Milli Seysmoloji Monitorinq Mərkəzinin məlumatı

Gürcüstan ərazisində yenidən zəlzələ olub.Bu barədə Gürcüstan Milli Seysmoloji Monitorinq Mərkəzi məlumat yayıb.Bildirilir ki, yeraltı təkanlar bu gün səhər saatlarında Dmanisi rayonunun Sameba kəndi yaxınlığında qeydə alınıb.Yeraltı təkanlar Tbilisi vaxtı ilə saat 07:49-da 4,1 bal gücündə olub.Dmanisi bələdiyyəsində son bir neçə aydır ki, müntəzəm olaraq zəlzələ qeydə alınır. İyunun 26-da da zəif zəlzələ olmuşdu.xeber100.com

Yeddilər qrupu ölkələri Rusiyaya qarşı sanksiyalar tətbiq edəcək

Yeddilər qrupu (G7) ölkələri Rusiyaya qarşı əlavə sanksiyalar tətbiq edəcək.Bu barədə DPA agentliyi Ağ evin nümayəndəsinə istinadla məlumat yayıb. Məlumatda qeyd olunur ki, sanksiyalar xüsusən Rusiyanın hərbi sənayesinə qarşı yönələcək. Məhdudiyyət tədbirləri, o cümlədən hərbi istehsalı və tədarük zəncirini əhatə edəcək.G7 qrupu Böyük Britaniya, Almaniya, İtaliya, Kanada, ABŞ, Fransa və Yaponiyanın daxil olduğu iqtisadi cəhətdən inkişaf etmiş ölkələrin birliyidir. Qrupun əsas məqsədi qlobal siyasi və sosial problemlərin həlli yollarını tapmaqdır.1976-cı ildə G7 formatında qurulan təşkilat 1997-ci ildə Rusiyanın ona qoşulması ilə G8 kimi tanınıb. 2014-cü ildə Ukraynadakı vəziyyət səbəbindən Rusiya-Qərb münasibətlərində yaranan böhranla əlaqədar yenidən G7 formatına qayıtmaq qərara alınıb.xeber100.com

Tunisin Beynəlxalq Hava Limanında bütün beynəlxalq uçuşlar dayandırılıb

Tunisin Beynəlxalq Hava Limanında bütün beynəlxalq uçuşlar dayandırılıb.Bu ölkənin aeroport işçilərinin həmkarlar ittifaqı hökumətin maaşların “dondurulması” addımına cavab olaraq ümumi tətil elan ediblər.Ağır iqtisadi, o cümlədən maliyyə böhranı ilə üzləşən Tunis hökuməti Beynəlxalq Valyuta Fondundan aldığı dörd milyard dollar həcmində kreditin şərtlərini yerinə yetirmək üçün bir çox sahələrdə çalışanların, o cümlədən aeroport işçilərinin maaşlarını “dondurub”. Buna cavab olaraq, ölkənin xidmət və təmizlik sahələrində də tətillər başlayıb. “Al Arabia” telekanalının məlumatına görə, Tunisin 159 dövlət idarəsi, həmçinin ictimai sektorda çalışan 2 milyona yaxın insan ümumi tətilə qoşulub. Ölkənin paytaxtında və regionlarda ictimai nəqliyyatın fəaliyyəti də iflic olub.xeber100.com

İtaliya ərazisinə bu vaxtadək 120 mindən çox ukraynalı qaçqın daxil olub

İtaliya ərazisinə bu vaxtadək 120 mindən çox ukraynalı qaçqın daxil olub.İtaliya Daxili İşlər Nazirliyinin məlumatına görə, ölkəyə ümumilikdə 120 min 859 Ukrayna vətəndaşı gəlib. Onlardan 63 min 57-si qadın, 17 min 544-ü kişi və 40 min 258-i isə yetkinlik yaşına çatmayanlardır.Ukrayna vətəndaşlarının 114 min 643-ü birbaşa sərhəddən, 6216-sı isə dəmir yolu polis idarəsinin nəzarətində İtaliyaya gəlib.Qaçqınlar əsasən Milan, Roma, Neapol və Bolonya şəhərlərində qaçqın şəhərciklərinə və təbii fəlakətlər zamanı insanların sığınması üçün nəzərdə tutulan evlərə yerləşdirilir.xeber100.com

Ukraynada hərbi vəziyyət və səfərbərlik avqustun 23-dək uzadılıb

Ukrayna Ali Radasının bu gün keçirilən iclasında “Ukraynada hərbi vəziyyətin uzadılması haqqında” və “Ümumi səfərbərlik müddətinin uzadılması haqqında” Prezident fərmanları təsdiqlənib.Sənədlərə əsasən Ukraynada hərbi vəziyyət və səfərbərlik daha 90 gün müddətinə avqustun 23-dək uzadılıb.Ukrayna Ali Radasının deputatları 320 səslə fərmanları təsdiqləyib.xeber100.com

“NATO-suz həyat – sülh üçün ideyalar” mövzusunda simpozium keçirilib

Berlin Humboldt Universitetində “NATO-suz həyat – sülh üçün ideyalar” mövzusunda simpozium keçirilib.Universitetin akademik kanalları ilə yayılan simpoziumun anonsunda “NATO-nun öz təhlükəsizlik maraqlarının başqalarının hesabına həyata keçirildiyi və qlobal miqyasda rəqiblərə qarşı mövqe tutan hərbi ittifaqa çevrildiyi” qeyd olunub.Tədbir hibrid formatda təşkil olunub: spikerlərin bir hissəsi videoəlaqə vasitəsilə çıxış ediblər. İştirakçılar arasında Almaniya Sol Partiyasının və sosialistlərin nümayəndələri üstünlük təşkil edib. Tədbir iştirakçıları NATO-nun genişləndirilməsi məsələlərini və onun dünya təhlükəsizliyinə təsirini müzakirə ediblər. Çıxış edənlərin çoxu Şimali Atlantika blokunu beynəlxalq təhlükəsizlik üçün əsas təhdid hesab ediblər.Onlar Ukraynada hərbi əməliyyatların dayandırılması, hər iki ölkə - həm Rusiya, həm də Ukraynanın təhlükəsizlik maraqlarının qorunmasının tərəfdarıdırlar. Onlar yalnız atəşkəsdən sonra mümkün olan sülhə çağırıblar.xeber100.com

Rusiyada yeni “Böyük tənəffüs” uşaq və gənclər təşkilatı yaradılır

Rusiyada yeni “Böyük tənəffüs” (“Bolşaya peremena”) uşaq və gənclər təşkilatı yaradılır.Dövlət Dumasının bütün siyasi partiyalarının nümayəndələri bu barədə qanun layihəsini imzalayıblar. Layihənin müəllifləri hərəkatın uşaq və gənclərlə bağlı dövlət siyasətinə dəstək vermək məqsədi daşıdığını bildirirlər.Hərəkata 6 yaşından yuxarı uşaqlar, eləcə də ictimai təşkilatlar və qeyri-hökumət təşkilatları üzv ola biləcəklər. Rusiyanın bütün orta təhsil məktəblərində təşkilatın bölmələri fəaliyyət göstərəcək.Qeyd edək ki, qanun layihəsi mayın 19-da - keçmiş SSRİ-də fəaliyyət göstərmiş pioner təşkilatının 100 illiyi günü parlamentə təqdim olunub.xeber100.com

Filippində yeni prezidentin seçilməsi ilə əlaqədar səsvermə başlayıb

Mayın 9-da yerli vaxtla saat 7:00-da Filippində dövlət başçısı Rodriqo Duterteni əvəz edəcək yeni prezidentin seçilməsi ilə əlaqədar səsvermə başlayıb.Həmin gün təqribən 37 min seçki məntəqəsində seçicilərin səsverməsi hazırda davam edir. Bu məntəqələrin yerli vaxtla axşam saat 19:00-da bağlanacağı və səslərin dərhal hesablanmasına başlanacağı gözlənilir.Qeyd edək ki, R.Duterteni əvəz etmək üçün 10 namizəd mübarizə aparır. İctimai rəy sorğularının nəticələrinə əsasən, namizədlər arasında keçmiş diktator Ferdinand Markosun böyük oğlu kiçik Ferdinand Markos liderlik edir.F.Markos R.Dutertenin narkotik maddələrin qeyri-qanuni dövriyyəsinə qarşı apardığı mübarizə də daxil olmaqla onun siyasətini davam etdirəcəyini vəd edib. Onun namizədliyinin atasının diktaturasından sonra anadan olmuş gənclər tərəfindən dəstəkləndiyi qeyd edilir. F.Markos sosial şəbəkələrdə atasının infrastrukturu inkişaf etdirmək yolu ilə iqtisadi dirçəlişə nail olduğunu vurğulayır.Keçmiş diktatorun əsas rəqibi rolunda hazırda vitse-prezident vəzifəsini tutan xanım Leni Robredo çıxış edir. R.Dutertenin rəhbərliyi altında çalışmasına baxmayaraq, bu xanımın onun ən kəskin tənqidçilərindən biri olduğu qeyd edilir.L.Robredo seçiciləri məhz R.Dutertenin siyasətinə qarşı çıxması ilə öz tərəfinə cəlb edə bilib.Əlavə olaraq bildirək ki, 65,7 milyondan çox filippinlinin qatılacağı ümumi seçkilərdə respublikanın yeni prezidenti ilə yanaşı, vitse-prezident, 12 senator, yüzlərlə konqresmen, habelə qubernatorlar, merlər, əyalət və şəhər müşavirləri də seçiləcək.xeber100.com