Almaniya XİN: Almaniya sülh uğrunda mübarizədə daha fəal iştirak etməlidir

Almaniya sülh uğrunda mübarizədə daha fəal iştirak etməlidir.Bu barədə AFR XİN-in başçısı Annalena Berbok bəyan edib. Nazir bu fikrini ölkənin yeni milli təhlükəsizlik strategiyasının işlənib hazırlanması ilə əlaqədar keçirilən brifinqdə bildirib. Berbok deyib: “Ədalət və haqsızlıq məsələlərində heç bir ölkə neytral ola bilməz. Bu sözlər Almaniyaya da aiddir, Almaniya həyatı, azadlığı və hüquqları təhlükə altında olanların tərəfində durmağa borcludur”.Nazir vurğulayıb ki, Berlin xarici siyasət və təhlükəsizlik siyasəti sahəsində dəqiq mövqeyə və imkanlara malik olmalıdır. Ukraynada şiddətlənən münaqişə fonunda bu sahədə boşluq xüsusən aşkara çıxıb və onu tamamlamaq lazımdır.xeber100.com

Meksika-Azərbaycan dostluq qrupunun inauqurasiyası mərasimi keçirilib

Meksika Deputatlar Palatasında Konqresin 65-ci çağırış üzvlərindən ibarət Meksika - Azərbaycan parlamentlərarası dostluq qrupunun inauqurasiyası mərasimi keçirilib.Ölkəmizin Meksikadakı səfirliyindən Azərtac-a bildiriblər ki, mərasimdə Meksika Deputatlar Palatasının üzvü, hakim “Morena” partiyasının təmsilçisi və Azərbaycan - Meksika dostluq qrupunun sədri deputat Migel Anxel Peres Navarrete, parlamentin Beynəlxalq əlaqələr komissiyasının sədri deputat Alfredo Femat Banyuelos, Azərbaycanın Meksikadakı səfiri Məmməd Talıbov, digər deputatlar, Meksika Xarici İşlər Nazirliyinin, QHT və KİV nümayəndələri iştirak ediblər.Tədbirdə çıxış edən deputat M.A.Peres Navarrete Meksika ilə Azərbaycan arasında daim dostluq münasibətlərinin mövcud olduğunu, müxtəlif sahələrdə səmərəli əməkdaşlığın həyata keçirildiyini deyib. O, Azərbaycanı müasir və bərabər hüquqları təşviq edən böyük iqtisadi baxışa malik, bir çox ölkələr üçün nümunə ola biləcək bir ölkə adlandırıb. Tədbir iştirakçılarına ölkəmiz haqqında məlumat verən deputat bu il iki ölkə arasında diplomatik əlaqələrin qurulmasının 30 illik yubileyinin qeyd olunduğunu bildirib. O, dostluq qrupunun bu münasibətlərin daha da möhkəmləndirilməsinə öz töhfəsini verəcəyinə ümidvar olduğunu deyib. Deputat, həmçinin Ermənistanın Azərbaycana qarşı 30 ilə yaxın davam edən təcavüzkar siyasətinə son qoyulduğunu və nəticədə Azərbaycanın öz ərazi bütövlüyünü bərpa etdiyini xüsusi vurğulayıb, hazırda Prezident İlham Əliyev tərəfindən aparılan uğurlu siyasət sayəsində işğaldan azad edilmiş ərazilərdə intensiv minatəmizləmə və quruculuq işlərinin həyata keçirildiyini bildirib.Ölkəmizin Meksikadakı səfiri M.Talıbov çıxış edərək parlamentlərarası qrupun yaradılmasının iki ölkə arasındakı əməkdaşlığın genişləndirilməsi üçün yeni imkanlar yaratdığını qeyd edib. Diplomatik münasibətlərin 30 illik müddəti ərzində ikitərəfli əməkdaşlığın qarşılıqlı hörmət prinsipləri əsasında həyata keçirildiyini, parlamentlərarası əlaqələrin hər zaman nümunəvi olduğunu, hər iki qanunverici orqandakı parlamentlərarası dostluq qrupları arasında ənənəvi görüşlərin keçirildiyini qeyd edib. Meksika Konqresinin Azərbaycan üçün həssas məsələlərdə həmişə ədalətli mövqe nümayiş etdirdiyini qeyd edən səfir münaqişə zamanı Meksika Konqresinin daim beynəlxalq hüquq mövqeyindən çıxış etdiyini söyləyib. Konqres tərəfindən Azərbaycana qarşı erməni təcavüzünü pisləyən və Xocalı soyqırımını tanıyan sənədlərin qəbul edilməsini xüsusilə vurğulayıb.xeber100.com  

Rusiya Federasiyasının Xarici İşlər Nazirliyinin məlumatı

Moskva Bakı və Yerevanın sülh müqaviləsi üzərində işə başlamağa hazır olmasını alqışlayır.Bu barədə Rusiya Federasiyasının Xarici İşlər Nazirliyinin rəsmi nümayəndəsi Mariya Zaxarova Moskvada keçirilən brifinqdə bildirib.O deyib: “Biz Bakı və Yerevanın Azərbaycan ilə Ermənistan arasında sülh müqaviləsi üzərində işə başlamağa hazır olmasını alqışlayır və danışıqlar prosesinə hərtərəfli kömək göstərmək əzmində olduğumuzu təsdiqləyirik. Sülh müqaviləsinin imzalanmasının mümkün müddətinə gəlincə, hesab edirəm ki, bu mövzuda danışmaq hələ tezdir”.xeber100.com

Prezident seçkilərinin nəticələri martın 14-də rəsmən açıqlanacaq

Türkmənistanda martın 12–də keçirilmiş növbədənkənar prezident seçkilərinin nəticələri martın 14-də rəsmən açıqlanacaq.Bu barədə Türkmənistanın Seçkilər və Referendumlar üzrə Mərkəzi Komissiyasının (MSK) sədri Gülmırat Muradov bildirib.Hazırda səslərin hesablanmasının davam etdiyini bildirən MSK sədri seçkilərdə 97,12 faiz seçici fəallığı olduğunu deyib.Xatırladaq ki, Türkmənistanda keçirilmiş növbədənkənar prezident seçkilərində səsverməni 2726 milli müşahidəçi, eləcə də MDB, Türk Dövlətləri Təşkilatı, Şanxay Əməkdaşlıq Təşkilatı, İslam Əməkdaşlıq Təşkilatı və bir sıra qonşu ölkələrdən olan xarici müşahidəçilər izləyib.xeber100.com

Növbədənkənar prezident seçkilərində səsvermə başa çatıb

Türkmənistanda növbədənkənar prezident seçkilərində səsvermə başa çatıb.Bu barədə ölkənin Mərkəzi Seçki Komissiyasının mətbuat xidməti məlumat yayıb.Türkmənistanda yerli vaxtla 19:00-da ölkədəki seçki məntəqələri bağlanıb.Mərkəzi Seçki Komissiyasının məlumatına görə, Türkmənistanda prezident seçkilərində seçki məntəqələrinin bağlanmasına iki saat qalmış seçicilərin 93,19 faizi səs verib.Qeyd edək ki, Türkmənistan prezidenti 7 il müddətinə seçilir. Ölkənin yeni prezidentinin andiçmə mərasimi martın 19-da olacaq.Xatırladaq ki, Türkmənistanda prezident vəzifəsinə 9 nəfər - üçü siyasi partiyalardan, altısı isə vətəndaşların təşəbbüs qruplarından namizədliyini irəli sürülüb.xeber100.com

Ukrayna və Rusiya nümayəndələri arasında danışıqlar keçirilir

Ukrayna və Rusiya nümayəndələri arasında onlayn formatda danışıqlar keçirilir.Bu barədə Ukrayna Prezident Ofisinin rəhbərinin məsləhətçisi Mixail Podolyak tviter sosial şəbəkəsində bildirib.“Rusiya nümayəndə heyəti ilə videoformatda danışıqlar davam edir. Xüsusi işçi alt qrupları yaradılıb. Ukraynanın mövqeyi əvvəlki tələblərinə əsaslanır", - deyə Podolyak bildirib.xeber100.com

İtaliyanın şirkətləri yeni mayeləşdirilmiş təbii qaz terminalı inşa edəcəklər

İtaliyanın “Sorgenia” və “Iren” şirkətləri yeni mayeləşdirilmiş təbii qaz (LNG) terminalı inşa edəcəklər.Ölkənin cənubundakı Gioia Tauro limanında inşası nəzərdə tutulan terminalın illik emal gücü 12 milyard kubmetr olacaq.“Sorgenia”nın baş icraçı direktoru Gianfilippo Marcini deyib ki, LNG terminalının tikintisi 4 il ərzində tamamlanacaq.İtaliyanın ekoloji transformasiya naziri Roberto Cinqolani ölkəsinin qarşıdakı 24-30 ay ərzində Rusiya təbii qazının idxalından asılılığa son verməyi hədəflədiyini bildirib.Qeyd edək ki, hazırda İtaliyanın təbii qaz idxalının təxminən 40 faizi Rusiyanın payına düşür. Yeni terminal sayəsində Rusiya qazının idxalının yarıya qədər azalacağı gözlənilir.xeber100.com

Avropa İttifaqına üzv ölkələrin Zirvə görüşü davam edir

Avropa İttifaqı (Aİ) ölkələrinin dövlət və hökumət başçılarının Fransa paytaxtındakı Versal sarayında keçirilən Zirvə görüşü davam edir.Sammit İttifaqın uzunmüddətli büdcə siyasətinin müzakirə edilməsi üçün bir neçə müddət əvvəl təyin olunub. Ancaq Ukrayna münaqişəsi Aİ-yə üzv ölkələrin dövlət və hökumət başçılarını tələsdirdi. Münaqişənin baha başa gələcəyi söylənilir. Buna görə də Fransa ikinci Avropa bərpa planı fərziyyəsini irəli sürür. Ukraynada münaqişə fonunda İttifaqın enerji asılılığından çıxması yolları və 27 ölkənin ordusunun modernləşdirilməsi sammitin əsas müzakirə obyekti olub.Sammitin ilk günündə Ukraynanın Avropa İttifaqına üzv olması ilə bağlı “sürətli prosedur”un olmadığı bildirilib. Niderlandın Baş naziri Mark Rutte xatırladıb ki, Ukraynanın Aİ-yə daxil olması üçün “sürətli prosedur” yoxdur. Rəsmi Kiyev isə vaxt məhdudiyyəti olmadan İttifaqa üzv olmaq üçün müraciət edib.“Biz bir daha təsdiqləyəcəyik ki, Ukrayna ilə intensiv işləmək istəyirik. Müharibədə olan bir ölkə ilə üzvlük prosedurunu aça bilərikmi? Mən belə düşünmürəm. Qapını bağlayıb “heç vaxt” deməliyikmi? Bu da ədalətsizlik olardı” deyən Fransa Prezidenti Emmanuel Makron bildirib ki, indiki böhranlı vəziyyət daha suveren Avropaya ehtiyac olduğunu göstərir.Enerji sahəsində qərarların vacibliyini diqqətə çatdıran Fransa Prezidenti martın sonunda keçirilməsi planlaşdırılan növbəti sammitdə bu istiqamətdə təkliflərin veriləcəyinə ümid etdiyini bildirib. E.Makron tərəfləri, həmçinin may ayında müdafiə sahəsində də xüsusi təkliflər verməyə çağırıb. Soyuq müharibə dövrünün sonundan Avropa İttifaqının 27 ölkəsinin müdafiə büdcəsini son dərəcə azaltdığı qeyd edilib.Versal sarayında Zirvə görüşü bu gün sona çatacaq.xeber100.com

“Domodedovo”, “Şeremetyevo” və “Vnukovo” aeroportlarında 180-dən çox reys ləğv edilib

Moskva aeroportlarında 180-dən çox reys təxirə salınıb və ya ləğv edilib.Moskvanın “Domodedovo”, “Şeremetyevo” və “Vnukovo” aeroportlarında 180-dən çox reys ləğv edilib, yaxud təxirə salınıb.Avropa İttifaqı fevralın 28-dən Rusiya aviaşirkətləri üçün səmasını bağlayıb. Bu barədə qərar Avropa İttifaqının 27 ölkəsinin xarici işlər nazirləri tərəfindən təsdiqlənib. Bundan əlavə, Albaniya, Kanada, Böyük Britaniya, Norveç, Şimali Makedoniya və Ukrayna da öz səmasını Rusiyadan uçuşlar üçün bağlayıb.Ukraynada döyüş əməliyyatları ilə əlaqədar Rusiyanın cənubunda Rostov, Krasnodar, Anapa, Gəlincik, Elista, Stavropol, Belqorod, Bryansk, Kursk, Voronej və Simferopol hava limanları fəaliyyətini müvəqqəti dayandırıb.xeber100.com

Avstraliya hökuməti Ukraynadakı səfirliyinin fəaliyyətini müvəqqəti dayandırıb

Avstraliya hökuməti Ukraynadakı səfirliyinin fəaliyyətini müvəqqəti dayandırıb.Avstraliya Xarici İşlər Nazirliyinin yaydığı məlumata görə, regionda yaranan gərginliyə görə fevralın 22-dən bir müddət öncə Kiyevdən Lvova təxliyə edilən səfirlik fəaliyyətini dayandırıb.Avstraliyanın diplomatları Ukraynadan qonşu ölkələrə Polşa və Rumıniyaya göndərilib. Onlar Ukraynadan çıxmaq istəyən Avstraliyalıların təxliyəsi işində iştirak edəcək.xeber100.com