Yeni kimyəvi element nihonium adlanacaq

Kyuşu Universitetindən olan tədqiqatçılar qrupuna rəhbərlik edən professor Kosuke Morita bildirib ki, yeni kimyəvi elementin adını və simvolunu elan etmək onun üçün şərəfdir. İyunun 8-də dərc edilən məlumatda K.Morita Asiyadan olan tədqiqatçılar qrupu tərəfindən ilk dəfə yeni kimyəvi elementin aşkar edildiyini və bu qrupun həmin elementi adlandırmaq şərəfinə nail olduğunu bildirib. Professor bəyan edib ki, qrup üzvləri həmin elementi böyük dəstək aldıqları yapon xalqının şərəfinə “nihonium” adlandırmaq qərarına gəliblər. K.Morita, həmçinin bildirib ki, yapon alimləri tərəfindən kəşf edilən yeni elementin kimyəvi elementlərin dövri sistemində yer alması onda böyük qürur hissi doğurur.xeber100.com

Pilotlar tətilə başlayır

“Skandinaviya Hava Yolları” (SAS) aviaşirkətinin rəhbərliyi həmkarlar ittifaqının pilotlar üçün tələb etdiyi yay məzuniyyətləri cədvəlindəki dəyişikliklərlə əlaqədar problemi məqbul şəkildə həll edə bilməyib. İsveç KİV-lərinin yaydığı xəbərə görə, buna cavab olaraq SAS-ın Norveç bölməsinin əməkdaşları iyunun 9-dan tətilə başlayacaqları barədə xəbərdarlıq ediblər. Tərəflər arasında razılıq əldə olunmasa, 435 norveçli pilot bu gündən etibarən işini dayandıracaq. Verilən məlumata görə, bu pilotlar əsas etibarilə yaxın və orta məsafəli aviareyslərdə çalışırlar. İsveçin də 400 aviasiya pilotu norveçli həmkarlarına qoşulmağa hazır olduqlarını bildiriblər. Artıq bir həftədir ki, onlar iş vaxtından çox çalışmaqdan imtina ediblər, iyunun 10-dan isə tətilə başlayacaqları ilə hədələyirlər. Yerli KİV-lərin yazdığına görə, pilotların tətili həm daxili, həm də beynəlxalq aviareyslərə təsir göstərə bilər. SAS-ın Norveç və İsveç bölmələri pilotlarının tətili Danimarka ilə aviareyslərə də müəyyən təsir göstərəcək. Amma SAS-ın bu ölkədəki bölməsinin pilotları qonşu ölkələrdəki həmkarlarının aksiyasını dəstəkləmək niyyətində deyillər. SAS şirkətinin nümayəndəsi Anna Vibeke Nilsen jurnalistlərə müsahibəsində bildirib ki, aviaşirkətin rəhbərliyi tətilin qarşısının alınacağına ümid bəsləyir. O deyib: “Hazırda Norveç pilotlarının iki həmkarlar ittifaqı ilə danışıqlar aparılır. Biz vasitəçilərin köməyi ilə razılaşma əldə etməyə ümid bəsləyirik”. Qeyd edək ki, SAS şirkəti Skandinaviyanın ən iri və aparıcı aviaşirkətidir. Onun səhmdarları həm özəl şirkətlər, həm də Danimarka, Norveç və İsveç hökumətləridir.xeber100.com

İran, Rusiya və Suriya müdafiə nazirlərinin görüşü keçiriləcək

Bu gün Tehranda İran, Rusiya və Suriya müdafiə nazirlərinin görüşü keçiriləcək. İran KİV-in məlumatına görə, bu ölkənin müdafiə naziri Hüseyn Dehqanın dəvəti ilə Rusiyanın müdafiə naziri Sergey Şoyqu və Suriyanın müdafiə naziri Fahid Al-Fərəc artıq Tehrandadırlar. Görüşdə beynəlxalq terrorçuluğa qarşı mübarizə, regiondakı münaqişələr və qarşılıqlı əməkdaşlıq məsələləri müzakirə ediləcək.xeber100.com

Referenduma qeydiyyat vaxtı uzadılıb

Britaniyada Avropa İttifaqında (Aİ) qalıb qalmamaqla bağlı keçiriləcək referendumda səsvermə üçün qeydiyyatın vaxtı uzadılıb. Qeydiyyat üçün vaxtın uzadılmasının texniki səbəblərə görə olduğu açıqlanıb. Britaniyalılar iyun ayının 23-də keçiriləcək referendumda iştirak etmək üçün bu ayın 9-u gecə yarısınadək qeydiyyatdan keçə biləcəklər. Qeyd edək ki, bundan əvvəl qeydiyyat üçün son tarix iyunun 7-nə təyin edilmişdi.xeber100.com

Yaponiya hökuməti Çinə etirazını bildirib

Yaponiya Rusiyadan Tokio ilə Pekin arasında ərazi mübahisəsinə səbəb olan Senkaku adaları rayonunda Rusiya və Çin hərbi gəmilərinin hərəkəti ilə bağlı vəziyyətə diqqət yetirməyi xahiş edib. Bu barədə Yaponiya Nazirlər Kabinetinin baş katibi Yoşihide Suqa iyunun 9-da keçirilən mətbuat konfransında bəyan edib. Y.Suqa deyib: “Biz diplomatik kanallar vasitəsilə Rusiyadan məsələyə diqqət ayırmasını xahiş etmişik. Hazırda Yaponiya Senkaku adaları ətrafında Çin və Rusiya gəmilərinin hərəkəti ilə bağlı vəziyyəti təhlil edir”. Baş katib, həmçinin bildirib ki, Tokio beynəlxalq ictimaiyyətlə, ilk növbədə ABŞ ilə birlikdə, Çindən vəziyyəti gərginləşdirən hərəkətlərdən çəkinməyi tələb etməkdə davam edəcək. Həmin ərəfədə Yaponiya hökuməti hərbi gəmilərin Senkaku adaları ətrafında hərəkəti ilə bağlı Çinə etirazını bildirib. Müdafiə Nazirliyinin məlumatına əsasən, Çinə məxsus freqat gəmisi Senkaku adaları yaxınlığında Yaponiyaya məxsus suların yaxınlığında iki saatdan çox qalıb. Məlumatda, həmçinin bildirilir ki, Çinə məxsus freqatla birlikdə Rusiyaya məxsus gəmilər də bir müddət neytral sularda olublar. Müdafiə naziri Qen Nakataninin dediyinə görə, Rusiya gəmilərinin Çin gəmilərinə cavab olaraq hərəkət etdiyi güman olunur.xeber100.com

Əmir Teymurun 700 il əvvəl tikdirdiyi körpü rekonstruksiya edilib

Özbəkistanda böyük sərkərdə və dövlət xadimi Əmir Teymurun 700 il əvvəl ölkənin cənubunda, Böyük İpək Yolunun keçdiyi Karşi şəhərindəki Kaşkadərya çayı üzərində tikdirdiyi körpü rekonstruksiya edilib, o vaxt salınan tarixi bağ bərpa olunub. Çayboyu sağ və sol ərazilərdə yaşıllıqlar salınıb, istirahət üçün digər infrastrukturlar yaradılıb. Orta əsrlərdə bu ərazidən Hindistanı və İranı Avropa ilə birləşdirən karvan yolu keçib. Macar alimi və səyahətçisi German Vamberinin yazdığına görə, 1860-cı illərdə Karşi şəhərində 10 karvansara, böyük bazar və dincəlmək üçün səfalı bağ olub. Körpünün açılış mərasimində Özbəkistan Baş nazirinin müavini Adxam İkramov və Kaşkadərya vilayətinin hakimi Zafar Ruziev iştirak ediblər. xeber100.com

Sorğuların nəticəsinə görə…

İqtisadi Əməkdaşlıq və İnkişaf təşkilatı dünyada həyat şəraitinin səviyyəsini yoxlamaq üçün sorğu aparıb. 100 min insan arasında 11 göstərici üzrə keçirilən sorğuda İspaniya 19-cu yeri tutub. Respondentlərin fikrincə, İspaniya səhiyyə, təhlükəsizlik və insanların cəmiyyətdəki rolu baxımından liderlər cərgəsindədir. Mənfi cəhətləri isə gəlirlərin az olması, vətəndaş məsuliyyətinin zəifliyi, ətraf mühitin keyfiyyəti, təhsil və rəqabətə davamlılıq dərəcəsidir. Hazırda ölkədə adambaşına düşən gəlir orta hesabla (vergiləri çıxdıqdan sonra) illik 19 min 467 avrodur. Sorğuların nəticəsinə görə, ilk beşlikdə Norveç, Avstraliya, Danimarka, İsveçrə və Kanadadır.xeber100.ccom

NATO təlimlərə başlayır

Bu gün Polşada bu respublikanın tarixində ən genişmiqyaslı hərbi təlimlər – NATO-nun “Anakonda” təlimləri başlanır. Manevrlərin rəsmi açılış mərasimi Polşa paytaxtındakı Milli Müdafiə Akademiyasında keçiriləcək. Polşa Müdafiə Nazirliyinin verdiyi məlumata görə, “Anakonda-16” təlimlərində rekord sayda dövlət və əsgər iştirak edəcək. Manevrlərə 24 ölkədən 31 min əsgər, o cümlədən Polşadan 12 min, ABŞ-dan 10 min, Böyük Britaniyadan minə yaxın hərbi qulluqçu cəlb ediləcək. Təlimlərdə 3 min vahid hərbi texnika, o cümlədən tanklar və zirehli transportyorlar, yüzdən artıq təyyarə və helikopter, 12 gəmi tətbiq olunacaq. Manevrlər Polşanın bütün poliqonlarında keçiriləcək. Polşa Müdafiə Nazirliyi bildirib: “Bu təlimlərin məqsədi qarışıq təhdidlər yaranması şəraitində birgə müdafiə əməliyyatı çərçivəsində milli komandanlıqla koalisiya komandanlıqlarının qarşılıqlı fəaliyyətini möhkəmlətməkdir”. “Anakonda” təlimləri çərçivəsində planlaşdırılan “Çevik cavab” (Swift Response) manevrləri zamanı ABŞ-dan Avropaya desant endiriləcək. Amerikanın Şimali Karolina ştatından olan hərbçilər Olştın və Torun yaxınlığındakı Polşa poliqonlarında yerə enəcək, sonra isə Polşada və qonşu ölkələrdə təlim vəzifələrini yerinə yetirməyə başlayacaqlar.xeber100.com

Norveç bütün növlərdən olan qazıntı yanacağını qadağan edəcək

Norveç gələn onillikdə bütün növlərdən olan qazıntı yanacağını qadağan edəcək və planetin ən mütərəqqi ölkəsinə çevriləcək. BBC  xəbər verir ki, siyasi spektrin hər iki tərəfində olan partiyalar 2025-ci ildək Norveçdəki maşınların 100 faizinin yaşıl enerjiyə keçəcəyi barədə razılığa gəliblər. Norveçin Dagens Naeringsliv qəzetinin ölkənin sağ təmayüllü populist Framstegspartiet partiyasına (Tərəqqi Partiyası) istinadən yazır ki, gələn onillikdə bütün benzin işlədən maşınlar yığışdırılacaq. Siyasətçilər deyirlər ki, bu qərar Norveç üçün xüsusi onəm daşıyır, beləki ölkənin əsas maliyyə fondları neft sənayesinə söykənir. Bu hesabatdan əvvəl verilmiş başqa bir bəyanatda isə deyilirdi ki, Norveç meşə qırılmasını sıfır həddinə endirəcək ilk ölkə olmağa hazırlaşır. Norveçdə 2025-ci ilədək benzinlə işləyən maşınların ləğv olunacağı barədə xəbəri sevinclə qarşılayanlardan biri də ABŞ elektrik avtomobilləri istehsalçısı Tesla Motorsun baş icraçı direktoru Elon Musk olub. “Elə indicə eşitdim ki, Norveç 2025-ci ilədək bütün benzin avtomobillərini qadağan edəcək. Necə də ecazkar bir ölkədir. Siz qiyamətsiniz, uşaqlar!” – yazır Musk. Bununla belə, Demokratik və Liberal partiyalar bildiriblər ki, qəbul olunmuş qərarın təfərrüatları hələ də Tərəqqi Partiyası ilə müzakirə olunur. Norveç 2025-dək qazıntı yanacağını qadağan edəcək Britaniya da bu istiqamətdədir. Əgər bu qərar tam qəbul olunsa, bu hətta Leyborist Partiyasının 2030-cu ildək dizel və benzinlə işləyən maşınların satışını dayandırmaq planından da daha ambisiyalı addım olacaq, yazır “The İndependent”. Norveçi bərabər təmsilçilikdə idarə edən dörd siyasi partiya habelə elektrik enerjisinə yeni “iqlim vergisinin” qoyulması barədə razılığa gəliblər. “The İndependent” yazır ki, Norveçdə hazırda avtomobillərin 24 faizi elektriklə işləyir. Bundan başqa Norveçdə elektrik enerjisinin 99 faizini su-elektrik stansiyaları istehsal edir. Üstəlik, Norveç 2020-ci ilədək külək enerjisinin həcmini 3 dəfə artırmağı planlaşdırır. Bu məqsədlə bu sahəyə 2013-cü ildə qəbul edilmiş sənədə əsasən 3 milyard dollar vəsait ayrılıb. Bu arada Britaniyada hakim Mühafizəkar Partiya yaşıl enerji növlərinə “sədaqət andı içsə də” ölkənin enerji problemini şist neftinin və nüvə stansiyalarının hesabına həll etməyə can atmasına görə tənqid olunur. Buna baxmayaraq Britaniyada bərpa olunan enerji istehsalına yatırımlar ötən il 25 faiz artırılıb (BBC).xeber100.com

Saakaşvili işgüzar görüşləri və qəbulları çadırda aparacaq

Odessa vilayətinin qubernatoru Mixail Saakaşvili ofisini çadıra köçürür.  Bu barədə qubernator sosial şəbəkədə məlumat yayıb. O qeyd edib ki, bu gündən etibarən iş otağını təmir işləri gedən Оdessa-Reni yolunun kənarındakı çadıra köçürəcək. “Yolun təmiri başa çatana qədər bütün işgüzar görüşləri və qəbulları mən yalnız bu çadırda aparacağam”, – Saakaşvili yazıb. O qeyd edib ki, hazırda təmir işləri aparılan Odessa-Reni yolu ilə tanış olub və nə işin intensivliyindən, nə də maliyyələşməsindən razı qalmayıb. Saakaşvili bildirib ki, bununla bağlı baş nazir Vladimir Qroismanla görüşüb müzakirələr aparacaq.xeber100.com