“RİA Novosti”nin verdiyi xəbərə görə…

Ukraynanın baş naziri Vladimir Qroysman və Türkiyənin milli müdafiə naziri İsmət Yılmaz hərbi-texniki, ticarət, müdafiə və energetika sahələrində ikitərəfli əməkdaşlığın genişləndirilməsini perspektivlərini müzakirə ediblər.  “RİA Novosti”nin verdiyi xəbərə görə, bu barədə Ukrayna hökumətinin saytında dərc olunmuş məlumatda bildirilir.  Vladimir Qroysmanın sözlərinə görə, hər iki ölkə, əsasən iqtisadiyyat və energetika sahələri daxil olmaqla, müxtəlif sahələrdə əməkdaşlığın dərinləşdirilməsi üçün böyük potensiala malikdirlər.  Müdafiə sahəsində də əməkdaşlığın perspektivli olduğunu bildirən baş nazir bunun Ukraynanın müdafiə qabiliyyətliyinin artırılmasına kömək edəcəyini qeyd edib. Türkiyənin milli müdafiə naziri İsmət Yılmaz ölkəsinin Ukraynaya dəstək göstərməkdə davam edəcəyini bildirərək, ötən il iki ölkə arasında ticarət həcminin 4 mlrd dollara çatdığını vurğulayıb.xeber100.com

İran və Türkiyə arasında saziş imzalanıb…

İran və Türkiyə arasında turizm sahəsində əməkdaşlığın inkişaf etdirilməsin dair saziş imzalanıb. APA-nın Tehran bürosunun məlumatına görə,  İranın Mədəni İrs, Əl İşləri Sənayesi və Turizm Təşkilatının sədri və prezidentin müavini Məsud Sultanifər və Türkiyənin  mədəniyyət və turizm naziri Mahir Onal ilə  görüşüb.Tərəflər turizm sahəsində əməkdaşlığın inkişaf etdirilməsində maraqlı olduqlarını bildiriblər. Görüşdən sonra M. Sultanifər deyib ki, İran Türkiyə ilə turizm sahəsində əməkdaşlığı inkişaf etdirməkdə maraqlıdır. “İki ölkə arasında turizm sahəsində sənədin imzalandığı gün iki ölkənin əlaqələrində  tarixi bir gün kimi yadda qalacaq. İki ölkə tərəfindən təşkil olunmuş müştərək komitələr  davamlı iclaslar keçirməli və imzalanan sənədin icrasına çalışmalıdırlar.  Biz Avropanın turizm sənayesində nüfuzlu  ölkələrlə müzakirələr aparmışıq, lakin istəyirik ki, dost və qonşu olan Türkiyə üçün turizmin inkişafına dair yaxşı imkanlar yaradaq”. M.Sultanifər deyib ki, hər iki ölkənin prezidentlərinin iradəsi turizm sahəsində sərmayə yatırılmasındadır: “İran Türkiyə investorlarına 10 hotelin tikintisi üçün lazımi icazəni verəcək. Hər iki ölkənin turistlərinin gediş-gəlişi üçün nəqliyyat məsələsi sahəsində yaxşı razılaşmalarımız olub”. Türkiyənin mədəniyyət və turizm naziri Mahir Onal, öz növbəsində, İranın turizm sahəsində geniş potensiala malik olduğunu vurğulayıb və turizm sənayesinin inkişafı sahəsində geniş  müzakirələr və razılıqların əldə olunduğunu deyib: “Ümid edirəm  iki ölkənin turizm sahəsi daha da inkişaf edəcək”.xeber100.com

İranla investisiyalar barədə razılaşma bəyənilib

Yaponiya parlamenti yerli şirkətlərə dünyanın ən böyük neft ixracatçısı olan İranla birgə fəaliyyətə dəstək barədə razılaşmanı bəyənib. Xəbər verdiyimiz kimi, Yaponiya cari ilin yanvarında bu ölkəyə qarşı tətbiq etdiyi iqtisadi sanksiyaları ləğv edib. Razılaşma parlamentin yuxarı palatasının mayın 11-də keçirilən iclasında bəyənilib. Sənədə əsasən, İran yapon şirkətlərinə yerli müəssisələrlə bərabər səviyyədə iş şəraiti yaratmalı, onların hüquqlarını və aktivlərini qorumalıdır. Razılaşma İran parlamenti tərəfindən bəyənildikdən sonra qüvvəyə minəcək. Yaponiya 1950-ci ildən başlayaraq İrandan neft alırdı. Lakin ixracın həcmi İranın milli nüvə proqramını inkişaf etdirmək barədə qərarına cavab olaraq Qərbin Tehrana qarşı tətbiq etdiyi iqtisadi sanksiyalardan sonra kəskin azalmışdı.xeber100.com

Tacikistanla Əfqanıstan arasında siyasi, iqtisadi əməkdaşlıq…

Əfqanıstan Prezidenti Muxammad Aşraf Qani Tacikistanda rəsmi səfərdədir. M.A.Qaninin Tacikistan Prezidenti Emoməli Rəhmonla görüşündə ölkələr arasında siyasi, ticarət-iqtisadi, sosial-mədəni sahələrdə, həmçinin Əfqanıstanda sülhün və sabitliyin bərpa olunması, bu ölkənin sosial-iqtisadi inkişafının dirçəldilməsi, milli birliyin əldə edilməsi və digər məsələlər müzakirə olunub. Dövlət başçıları energetika və nəqliyyat-tranzit infrastrukturlarının inkişaf məsələlərini də müzakirə edib. Qeyd olunub ki, CASA-100 regional layihəsinin başa çatdırılması Əfqanıstana verilən elektrik enerjisinin həcminin artırılmasına səbəb olacaq. Tərəflər Tacikistan-Əfqanıstan-Türkmənistan dəmir yolu xəttinin çəkilməsində maraqlı olduqlarını vurğulayıblar. Görüşdə terrorizm, ekstremizm, narkotik qaçaqmalçılığı, mütəşəkkil cinayətkarlıqla mübarizə məsələlərində ikitərəfli əməkdaşlığın dərinləşdirilməsi istiqamətində də geniş fikir mübadiləsi aparılıb. Danışıqların yekununda əlaqələrin inkişafı ilə bağlı sənədlər imzalanıb. M.A.Qani Tacikistanın Baş naziri Koxir Rasulzoda və parlamentin sədri Şukurjon Zuxurovla da görüşüb.xeber100.com

Liviyadakı vəziyyətə dair toplantı keçiriləcək

Mayın 17-də Vyanada Suriya böhranına həsr olunan növbəti toplantı keçiriləcək. Bu xəbəri həm Rusiya, həm də ABŞ-ın rəsmi dairələri təsdiqləyiblər. Bir gün öncə isə Liviyadakı vəziyyətə dair məsləhətləşmələr aparılacaq. Danışıqlara ümumilikdə 17 ölkənin təmsilçiləri qatılacaqlar. ABŞ və Rusiyanın birgə sədrliyi ilə aparılacaq danışıqlarda hər iki ölkənin xarici işlər nazirlərinin iştirakı gözlənilir. Növbəti günlərdə isə Suriya müxalifətinin də danışıqlar prosesinə qatılması nəzərdə tutulur.xeber100.com

Ağ Evin məlumatına görə…

ABŞ prezidenti Barak Obama Yaponiyanın  Xirosima şəhərinə tarixi səfər edəcək. Apa-nın “Reuters”ə istinadən verdiyi xəbərə görə, Ağ Evin məlumatına əsasən, səfər mayın sonuna planlaşdırılıb. Qeyd edək ki, ABŞ dövlət katibi Con Kerri aprelin sonunda Xirosimaya səfər edərək, 1945-ci ildə şəhərə atılan nüvə bombasının partlaması nəticəsində ölən minlərlə dinc sakinin xatirəsinə salınmış Sülh parkına baş çəkib.xeber100.com

Özbəkistanda “Müharibə illərinin mahnıları” adlı konsert proqramları keçirilib

Özbəkistanda 9 may Xatirə və Ehtiram Günü Daşkənddəki “Naməlum əsgər” memorial kompleksində İkinci Dünya Müharibəsi iştirakçılarının xatirəsi “Yenilməz polk” aksiyası çərçivəsində anılıb. Aksiya çərçivəsində Daşkənddə yaşayan müxtəlif millətlərin nümayəndələri kompleksə çiçək dəstələri qoyublar. Həmçinin aksiya çərçivəsində Özbəkistanda 300 avtomobil “Unutmamışıq və qürur duyuruq” avtoyürüşündə iştirak edib. Yürüş iştirakçıları müharibə və əmək veteranlarının evlərinə gedərək onları təbrik edib, qiymətli hədiyyələr veriblər. Mayın 9-u Özbəkistanın digər şəhərlərində də müxtəlif tədbirlər təşkil edilib. Axşam saatlarında isə “Müharibə illərinin mahnıları” adlı konsert proqramları keçirilib, daha sonra paytaxtda atəşfəşanlıq olub. “Yenilməz polk” aksiyası çərçivəsində Qırğızıstanın və Tacikistanın paytaxtlarında da müxtəlif tədbirlər keçirilib.xeber100.com

İran “Saras” neftayırma zavodu ilə müqavilə imzalayıb

İran İtaliyanın “Saras” neftayırma zavodu ilə müqavilə imzalayıb. Müqaviləyə əsasən İran bu zavoda neft satışının həcmini 65 min barrelədək artıracaq. İranın Milli Neft Şirkətinin baş direktoru Rüknəddin Cavadi bildirib ki, indiyədək İtaliya zavoduna ildə 30-35 min barrel neft göndərilirdi. Müqavilədən sonra bu göstərici 65 min barrelə çatacaq. Baş direktor əlavə edib ki, hazırda İtaliyanın “Eni” şirkəti ilə də danışıqlar aparılır. Razılıq əldə olunarsa, İran bu şirkətin zavodlarına ildə 100 min barrel neft verəcək.xeber100.com

Mübahisəli islahatlar paketi qəbul edildi

Yunanıstanda bəzi həmkarlar ittifaqlarının etiraz aksiyalarına baxmayaraq, parlament mübahisəli islahatlar paketini qəbul edib. Paketin lehinə 153, əleyhinə isə 143 səs verilib. Pensiyaların azaldılması, vergilərin artırılması və s. məsələləri nəzərdə tutan islahatlar nəticəsində hər il 3,6 milyard avroya qənaət olunacağı planlaşdırılır. Bu qərar Avropa İttifaqından maliyyə yardımı almaq üçün əsas tələblərdən biri idi.xeber100.com

Gürcüstanda 9 may Qələbə gününün 71-ci ildönümünə həsr olunan tədbirlər keçirilib

Bu gün Gürcüstan paytaxtında, həmçinin ölkədəki bütün bölgələrdə faşizm üzərində 9 may Qələbə gününün 71-ci ildönümünə həsr olunan tədbirlər keçirilib. APA-nın Gürcüstan bürosunun məlumatına görə, Gürcüstan prezidenti Giorgi Marqvelaşvili, baş nazir Giorgi Kvirikaşvili, parlament sədri David Usupaşvili və parlament üzvləri müxtəlif vaxtlarda Tiflisdəki Vake parkındakı naməlum əsgərin qəbrini ziyarət edib, əklil və gül dəstələri qoyublar. Bu gün azərbaycanlıların kompakt yaşadığı Marneuli rayonundakı Mədəniyyət Evində müharibə veteranları ilə də görüş keçirilib. Tədbirdə Kvemo Kartli bölgə qubernatoru Paata Xizanaşvili, rayon icra hakimiyyətinin başçısı Merab Topçişvili və rayon bələdiyyəsinin sədri Nəbi Abdullayev çıxış edərək faşizm üzərində qələbənin 71-ci ildönümü münasibəti ilə tədbirdə iştirak edən müharibə veteranlarını təbrik edib, onlara cansağlığı arzulayıblar. Tədbirdə qələbə şərəfinə tort kəsilib və veteranlara bayram sovqatları təqdim edilib. Görüşdə “Əsgər atası” filmi nümayiş etdirilib. Marneulidə qələbənin 71-ci ildönümünə həsr olunan tədbirdən sonra simvolik olaraq 1941-1945-ci illərdə II Dünya Müharibəsində istifadə olunan hərbi minik maşınlarının Marneulinin Rustaveli küçəsi boyu nümayişi keçirilib. Minik maşınlarını alman və rus zabitləri forması geyinmiş zabitlər idarə edib. Tədbirə azərbaycanlı müharibə veteranları, rayon rəhbərliyi də qatılıb. Kvemo Kartli bölgə qubernatoru Paata Xizanaşvili APA-ya açıqlamasında Gürcüstanda 2 mindən çox, Marneulidə isə cəmi 17 müharibə veteranı yaşadığını bildirib. Qubernator bu gün bütün veteranlara hökumətin qərarı ilə 600 lari və  ailə başçısını itirmiş ailələrə isə 300 lari məbləğində yardım ayrıldığını qeyd edib.xeber100.com