Formula 1 Qran-Prisinin təqvimində müəyyən dəyişikliklər gözlənilir

Formula 1 Rusiya Qran-Prisinin ləğvindən sonra təqvimdə müəyyən dəyişikliklər gözlənilir. Hazırda Soçidə keçirilməli olan yarışı əvəz edə biləcək Qran-prilər arasında seçim edilir.İspaniya mətbuatı xəbər verir ki, Formula 1 rəhbərliyi daha çox iki variant üzərində düşünür. Bunlar Portuqaliya və Türkiyə variantlarıdır. Xatırladaq ki, ötən mövsüm həm “Portimao”, həm də “İstanbul Park”da yarış təşkil edilmişdi.Formula 1-in rəhbəri Stefano Domenikali yaxın gələcəkdəki təqvimlə bağlı planlardan danışarkən hətta 30-dək Qran-Pri təşkil edə biləcəklərini deyib: “Fikrimcə, indiki zamanda 24 yarış təşkil etmək imkanımız var. Hətta siyahı 30 Qran-Priyədək artırıla bilər. Bütün dünyada Formula 1-ə olan marağı görürük. İndiki məqamda isə doğru balansı tapmalıyıq. Hazırda Formula 1 yarışı təşkil etmək istəyənlər arasında təkcə Las-Veqas ön sırada dayanmayıb. ABŞ və Çinlə yanaşı, Afrika qitəsində də Qran-prilərə ev sahibliyi etmək istəyən ölkələr var”.Xatırladaq ki, noyabrın 20-dək davam edəcək mövsümdə 23 yarışın keçirilməsi planlaşdırılır. Artıq Bəhreyn Qran-Prisi geridə qalıb və bu gün Formula 1 pilotları Səudiyyə Ərəbistanının Ciddə şəhərində mübarizə aparacaqlar.xeber100.com

Cüdoçuların iştirakı ilə beynəlxalq təlim-məşq toplanışı keçirilir

Göygöl şəhərində yeniyetmə cüdoçuların iştirakı ilə beynəlxalq təlim-məşq toplanışı keçirilir.Göygöl Olimpiya İdman Kompleksində keçirilən təlim-məşq toplanışına Türkiyə, Almaniya, Macarıstan, Özbəkistan, Niderland və Sloveniyadan 100-dən çox yeniyetmə idmançı qatılıb. Hazırlıqda, həmçinin ölkəmizin müxtəlif rayon və şəhərlərindən klub, cəmiyyət və idman təşkilatlarından 200-ə yaxın cüdoçu iştirak edir.Martın 27-dək davam edəcək təlim-məşq toplanışında əsas məqsəd idmançıların bacarıqlarını təkmilləşdirməklə yanaşı, yaxın gələcəkdə beynəlxalq yarışlarda yüksək nəticə əldə etməkdir.xeber100.com

Azərbaycan Cüdo Federasiyasının məlumatı əsasında…

Cüdoçularımız martın 26-27-də Yunanıstanın paytaxtı Afina şəhərində keçiriləcək gənclər arasında Avropa kuboku turnirində iştirak edəcəklər.Azərbaycan Cüdo Federasiyasından bildirilib ki, ölkəmizi turnirdə gənc oğlanlardan ibarət yığma komandanın baş məşqçisi Elxan Məmmədov və gənc qızlardan ibarət yığma komandanın məşqçisi Vüqar Hüseynovun rəhbərlik etdiyi heyət təmsil edəcək. Belə ki, qızlar arasında Könül Əliyeva, Gülşən Bəşirova (48 kq), Rita Əliyeva (58 kq), Səbinə Əliyeva (57 kq), Nərmin Əmirli (78 kq) mübarizə aparacaqlar.Gənc oğlanlardan ibarət yığma komandanın heyətində isə Nicat Məmmədli, Nurlan Kərimli, Samir Piriyev (60 kq), Qasım Vəlizadə, Elvin Bağırov, Aydın Rzayev (66 kq), Məmmədrza Hacızadə (73 kq), İsmayıl Zamanov, Maqerram İmamverdiyev (81 kq), Nihad Şıxəlizadə, Vüqar Talıbov (90 kq), Ruslan Nəsirli, Sabir İsayev (100 kq), Kənan Nəsibov, Hüseyn Məmmədov (+100 kq) yer alıblar.Yarışda dünyanın 28 ölkəsindən 314 idmançı iştirak edəcək.xeber100.com

Voleybolçular arasında növbəti turun keçirilmə vaxtı dəqiqləşib

Kişi voleybolçular arasında Azərbaycan Yüksək Liqasında növbəti turun keçirilmə yeri və vaxtı dəqiqləşib.Azərbaycan Voleybol Federasiyası xəbər verir ki, XIII turun oyunları martın 26-da təşkil olunacaq.Günün ilk qarşılaşmasında saat 15:00-da “Neftçi” və “Sərhədçi” üz-üzə gələcək. Bu matçdan 2 saat sonra “Ekspress” – MOİK oyununa start veriləcək.Hər iki görüş “Murov” voleybol klubunun idman zalında baş tutacaq.xeber100.com

Boksçular arasında Avropa çempionatı başa çatıb

Xorvatiyanın Poreç şəhərində keçirilən 22 yaşadək oğlan boksçular arasında Avropa çempionatı başa çatıb.11 gün davam edən yarışın yekununa əsasən, medal əldə edən ölkələrin siyahısı açıqlanıb.Avropa çempionatında 13 çəkidən 7-də təmsil olunan yığmamız 4 medala yiyələnib. Hesabına 1 qızıl, 1 gümüş və 2 bürünc mükafat yazdıran komandamız sıralamada qitə birinciliyini dördüncü pillədə başa vurub. Millimiz bu yerə Bolqarıstan və Gürcüstanla şərikdir.Ümumilikdə, 20 ölkə Xorvatiyada medal qazanmağı bacarıb. Onlardan cəmi 11-i çempionluq sevinci yaşayıb.Siyahıda birinci yeri İtaliya yığması tutub. İlk “üçlük”də Türkiyə və Ukrayna milliləri yer alıblar.Qeyd edək ki, yığmamızın heyətində Nicat Hüseynov (51 kq) qızıl, Ruslan Qədirov (54 kq) gümüş, Cəlal Qurbanov (63,5 kq) və Nəbi İsgəndərov (67 kq) bürünc medal qazanıblar.xeber100.com

Azərbaycan milli komandası ikinci yoxlama oyununu keçirib

Sloveniyada təlim-məşq toplanışını başa vuran 19 yaşadək futbolçulardan ibarət Azərbaycan milli komandası hazırlıq çərçivəsində ikinci yoxlama oyununu keçirib.Sloveniyalı yaşıdları ilə qarşılaşan komandamız 1:2 hesabı ilə məğlub olub.Millimizin heyətində Nəriman Axundzadə fərqlənib.Qeyd edək ki, komandalar arasında iki gün əvvəl keçirilmiş görüş 1:0 hesabı ilə rəqib komandanın xeyrinə nəticələnmişdi.xeber100.com

Fiqurlu konkisürmə üzrə dünya çempionatı davam edir

Fransanın Monpelye şəhərində fiqurlu konkisürmə üzrə dünya çempionatı davam edir.Bu gün kişi idmançılar mübarizəyə başlayıblar.Azərbaycan təmsilçisi Vladimir Litvintsev də qısa proqramda çıxışını təqdim edib. Onun çıxışı 85,83 xalla qiymətləndirilib və təmsilçimiz 13-cü olub. Bu, idmançımıza sərbəst proqramda çıxış etmək hüququ verib. Otuz iştirakçıdan yalnız 24-ü martın 26-da medallar uğrunda mübarizəni davam etdirəcək.Qeyd edək ki, martın 25-də təmsilçimiz Yekaterina Ryabova sərbəst proqramla mundialı başa vuracaq. Yekaterina Kuznetsova və Aleksandr Kolosovski dueti buz üzərində rəqslərdə yarışa start verəcək.xeber100.com

Milli Gimnastika Arenasında dünya kuboku yarışları keçiriləcək

Martın 31-dən aprelin 3-dək Milli Gimnastika Arenasında idman gimnastikası üzrə dünya kuboku yarışları keçiriləcək. Mötəbər yarışda 35 ölkədən 151 idmançının iştirakı gözlənilir.Azərbaycan Gimnastika Federasiyasının mətbuat xidməti  xəbər verir ki, dünya kuboku yarışında iştirak edəcək Xorvatiya yığma komandasının heyəti açıqlanıb. Yarışda Xorvatiyanı Aurel Benoviç, Filip Ude, Cakov Vlahek və Tin Srbiç təmsil edəcəklər.Dörd gün davam edəcək yarışların ilk iki günündə təsnifat, sonrakı iki günündə isə final mərhələləri baş tutacaq.Turnirdə, həmçinin ən yüksək icra xalını toplamış gimnastlara ənənəvi “AGF Trophy” kuboku da təqdim olunacaq.Dünya kuboku yarışlarında ölkəmizi Mənsum Səfərov (sərbəst hərəkətlər), Ağamurad Qəhrəmanov (sərbəst hərəkətlər, dayaqla tullanma, paralel qollar, turnik), İvan Tixonov (dəstəkli at, dayaqlı tullanma, paralel qollar, turnik), Cavidan Babayev (halqa), Nikita Simovov (halqa), Samirə Qəhrəmanova (dayaqlı tullanma, gimnastika tiri, sərbəst hərəkətlər), Milana Minakovskaya (müxtəlif hündürlüklü qollar, gimnastika tiri, sərbəst hərəkətlər) təmsil edəcəklər.xeber100.com  

Hava şəraitinin arabir yağıntılı olacağı gözlənilir

Azərbaycanda martın 19-na gözlənilən hava proqnozu açıqlanıb.Ekologiya və Təbii Sərvətlər Nazirliyinin Milli Hidrometeorologiya Xidmətinin məlumatına görə, Bakıda və Abşeron yarımadasında hava şəraitinin arabir yağıntılı olacağı, axşama doğru tədricən kəsiləcəyi gözlənilir. Arabir güclənən şimal-qərb küləyi əsəcək. Havanın temperaturu Abşeron yarımadasında gecə 1-3°, gündüz 5-8° isti olacaq, Bakıda gecə 1-3°, gündüz 5-7° isti olacaq. Atmosfer təzyiqi normadan yüksək - 773 millimetr civə sütunundan 770 millimetr civə sütununa enəcək. Nisbi rütubət 70-80 faiz təşkil edəcək.Azərbaycanın rayonlarında havanın arabir yağıntılı olacağı, bəzi yerlərdə qar yağacağı, ayrı-ayrı yerlərdə intensiv olacağı proqnozlaşdırılır. Arabir duman olacaq. Qərb küləyi əsəcək, bəzi yerlərdə arabir güclənəcək. Havanın temperaturunun gecə 0-5°, gündüz 6-11° isti, dağlarda gecə 5-10° şaxta, yüksək dağlıq ərazilərdə 16°-dək şaxta, gündüz 0-5° şaxta olacağı bildirilir.xeber100.com

Avropa çempionatında səkkizdəbir final döyüşləri yekunlaşıb

Xorvatiyanın Poreç şəhərində 22 yaşadək oğlan boksçular arasında Avropa çempionatında səkkizdəbir final döyüşləri yekunlaşıb.Bu mərhələnin yekununa əsasən, Azərbaycan millisinin üzvləri – Ruslan Qədirov (54 kq) və Maqsud Xasmetovun (57 kq) rəqibləri dəqiqləşib. Səkkizdəbir finalda Başkim Bayokunu (Kosovo) 5:0 hesabı ilə məğlub edən Marian Çinio (Rumıniya) mərhələ adladığından ilk döyüşdən azad olan R.Qədirovla qarşılaşacaq. M.Xasmetov isə dörddəbir finalda Taha Akkoyunla (Türkiyə) gücünü yoxlayacaq. Qardaş ölkə təmsilçisi Matteu Teylora (İrlandiya) 5:0 hesabı ilə qalib gəldiyindən boksçumuza rəqib olub.Hər iki görüş martın 19-da olacaq.Həmin gün yığmamızın digər üzvləri Nicat Hüseynov (51 kq), Cəlal Qurbanov (63,5) və Nəbi İsgəndərov (67 kq) da yarımfinal üçün mübarizə aparacaqlar. Boksçularımız müvafiq olaraq, Antonio Payva (İrlandiya), İqor Kovtun (Ukrayna) və Hüqo Qrau (Fransa) ilə üz-üzə gələcəklər.Qeyd edək ki, Avropa çempionatında qaliblərinin adları martın 23-də məlum olacaq.xeber100.com