Güləşçilərin Avropa çempionatı davam edir

Bolqarıstanın Plovdiv şəhərində 23 yaşadək güləşçilərin Avropa çempionatı davam edir.Azərbaycan Güləş Federasiyasının mətbuat xidmətinin məlumatına görə, yarışın dördüncü günündə - martın 10-da 3 qadın güləşçimiz mübarizəyə qoşulub.Gültəkin Şirinova (53 kq) dörddəbir finalda fransalı Çadya Ayaçiyə qalib gəlib - 12:7. Həmyerlimiz yarımfinalda almaniyalı Anastasiya Blayvasla qarşılaşacaq.Milli komandamızın üzvü Jalə Əliyeva (62 kq) dörddəbir finalda Fransanın digər təmsilçisi Amelin Duarreni "tuşe" ilə məğlub edib. Güləşçimiz yarımfinalda polşalı Paulina Malqorzata Danişlə üz-üzə gələcək.Birgül Soltanova (65 kq) dörddəbir finalda estoniyalı Viktoriya Vessoyla gərgin idman mübarizəsi şəraitində keçən görüşdə uduzub - 7:8.Qeyd edək ki, yarımfinal qarşılaşmaları Bakı vaxtı ilə saat 18:45-də başlayacaq.xeber100.com

Formula 1 Azərbaycan Qran-Prisinə akkreditasiya prosesinə start verilib

Martın 9-da Formula 1 Azərbaycan Qran-Prisinə yerli media nümayəndələrinin akkreditasiyası prosesinə start verilib. Qeydiyyat prosesi aprelin 14-dək davam edəcək.Bakı Şəhər Halqası Əməliyyat Şirkətinin (BŞH) mətbuat xidmətinin məlumatına görə, iyunun 10-12-də keçiriləcək Formula 1 Azərbaycan Qran-Prisi də daxil olmaqla 2022-ci il üzrə dünya çempionatında yer alan hər bir yarış üçün media nümayəndələrinin akkreditasiyası Beynəlxalq Avtomobil Federasiyası (FIA) və “Formula One Management” (FOM) şirkəti tərəfindən həyata keçirilir. Yerli media nümayəndələrinin yarışa qeydiyyatı prosesi BŞH tərəfindən icra olunur.Qeydiyyatdan keçmək istəyən jurnalistlər BŞH-nin rəsmi akkreditasiya səhifəsinə daxil olaraq, müvafiq formanı doldurmalı və tələb olunan sənədləri sistemə yüklədikdən sonra onlayn qaydada müraciət etməlidirlər. Natamam və ya vaxtından gec göndərilmiş müraciət formaları nəzərə alınmayacaq.Yerli jurnalistlərdən ölkə daxilindəki COVID-19 qaydalarına riayət olunması tələb ediləcək. 2022-ci ildəki yarışlara COVID-19 virusuna qarşı iki doza vaksin vurdurmuş və peyvənd sertifikatının etibarlılıq müddəti bitməmiş yerli jurnalistlər akkreditasiyadan keçə biləcəklər. Peyvəndin ikinci dozasının üzərindən altı aydan çox keçmiş media nümayəndələrindən “buster” doza vurdurmaları xahiş edilir. Vaksinasiya ilə bağlı şəxsi məlumatlar artıq akkreditasiya üçün ərizə formasında tələb olunacaq.xeber100.com  

Azərbaycan Həndbol Federasiyasının növbəti seminarında

Azərbaycan Həndbol Federasiyasının nümayəndələri Mingəçevirdə seminar keçiblər.Federasiyanın məlumatına görə, beynəlxalq dərəcəli deleqat İsgəndər Əsgərov, beynəlxalq dərəcəli hakim Ernest Ağakişi, Pro kateqoriyalı məşqçi Fuad Yangildin tərəfindən Mingəçevirdə keçirilən seminarda Göygöl, Qazax, Ağstafa rayonları, Gəncə və Mingəçevir şəhərlərindən olan məşqçilər iştirak ediblər.Əvvəlcə regionlarda həndbolun durumu, bu sahədəki problemlər və yeni qaydalarla bağlı məlumat verilib.Həndbol məşqçiləri ilə ətraflı müzakirələrdən sonra onlara sertifikatlar təqdim edilib.Seminarın sonunda Pro kateqoriyalı məşqçi Fuad Yangildin tərəfindən yeniyetmə həndbolçular üçün nümunəvi məşq keçirilib.xeber100.com

Azərbaycan Cüdo Federasiyasının məlumatına görə…

Martın 7-də Göygöl Olimpiya Kompleksində böyüklərdən və gənclərdən ibarət milli yığmaların birgə təlim-məşq toplantısına start verilib.Azərbaycan Cüdo Federasiyasının mətbuat xidmətindən bildiriblər ki, 85 cüdoçunun cəlb edildiyi təlim-məşq toplantısının əsas məqsədi idmançıların bacarıqlarını təkmilləşdirməsi ilə yanaşı, aprelin 1-3-də Antalyadakı “Böyük dəbilqə” turnirinə, eyni zamanda, Bolqarıstanda aprelin 29-u mayın 1-də keçiriləcək Avropa çempionatına hazırlıq məqsədi daşıyır.Qeyd edək ki, bu hazırlıq gənclər arasında Azərbaycan birinciliyi başa çatdıqdan sonra yenidən formalaşdırılmış millinin ilk təlim-məşq toplanışıdır.Təlim-məşq toplanışı mart ayının 19-na kimi davam edəcək.xeber100.com

Azərbaycan Boks Federasiyası təşkilatçılığı ilə ölkə birinciliyinə start veriləcək

Martın 8-də Gənclər və İdman Nazirliyinin və Azərbaycan Boks Federasiyası (ABF) təşkilatçılığı ilə yeniyetmələr arasında boks üzrə ölkə birinciliyinə start veriləcək.ABF-nin mətbuat xidmətinin məlumatına görə, Bakı Boks Mərkəzində təşkil olunacaq yarışda 14 çəki dərəcəsi üzrə mükafatçılar müəyyənləşəcək.Çempionata respublikanın müxtəlif şəhər və rayonlarının klublarını, həmçinin idman cəmiyyətlərini təmsil edən 63 komandanın 327 boksçusu qatılacaq. Qaliblərin adına martın 14-də aydınlıq gələcək.Mükafatçılar yığmanın heyətinə cəlb olunacaq və beynəlxalq yarışlarda ölkəmizi təmsil edəcəklər.Qeyd edək ki, birinciliyin baş hakimi Emil Qurbanəliyev olacaq.xeber100.com

FIDE Qran-Pri seriyasının ikinci mərhələsinin oyunları keçiriləcək

Bu gün Belqradda Azərbaycan şahmatçısı Şəhriyar Məmmədyarovun iştirak etdiyi FIDE Qran-Pri seriyasının ikinci mərhələsinin 6-cı turunun oyunları keçiriləcək.Təmsilçimiz D qrupunda sonuncu görüşündə fransalı Maksim Vaşye-Laqravla qarşılaşacaq.Qeyd edək ki, Ş.Məmmədyarovun bundan əvvəlki bütün turlarda görüşlərində heç-heçə qeydə alınıb. Hazırda M.Vaşye-Laqrav 2,5 xalla qrupda liderdir. Hərəyə 2 xalı olan Ş.Məmmədyarov və Y.Yangyu (Çin) 2-3-cü yerləri bölüşdürürlər, rusiyalı Aleksandr Predke isə 1,5 xalla sonuncu pillədə qərarlaşıb.Əsasnaməyə görə, hər qrupda dairəvi sistemlə ikidövrəlik mübarizənin nəticəsinə görə, qrup qalibləri yarımfinala vəsiqə qazanacaqlar.Xatırladaq ki, seriyada ümumilikdə 24 şahmatçı iştirak edir. Hər turnirdə isə 16 oyunçu mübarizə aparır. Şahmatçıların hər biri seriyanın maksimum iki turnirində oynaya bilər. Şəhriyar Məmmədyarov, həmçinin seriyanın üçüncü mərhələsində də iştirak edəcək. Oyunçular hər turnirin nəticəsinə görə Qran-Pri xalları qazanacaqlar. Ümumi hesabda ən çox xal toplayacaq iki şahmatçı 2022-ci il namizədlər turnirinə vəsiqə əldə edəcək.xeber100.com

“BWF Membership Grants” layihəsi çərçivəsində

Azərbaycan Badminton Federasiyası ilə Dünya Badminton Federasiyasının birgə əməkdaşlığının nəticəsi olaraq "BWF Membership Grants" layihəsi çərçivəsində ölkəmizdə həyata keçirilən "Shuttle Time" proqramı bu dəfə Lənkəranda təşkil olunub.Azərbaycan Badminton Federasiyasının mətbuat xidmətindən bildiriblər ki, layihənin əsas məqsədi ölkəmizdə badmintonun kütləviliyinə nail olmaq, məktəblilər arasında bu idman növünə maraq oyatmaq və gənc badminton məşqçiləri yetişdirməkdir.Lənkəran Şəhər Olimpiya İdman Kompleksində baş tutan məşqlərə 8-10 yaş qrupları üzrə 90 məktəbli qatılıb. Məktəblilərə ilk olaraq badminton idman növünün qaydaları izah olunub, sonra məşqlərə start verilib.İlk mərhələdə ölkə üzrə 5 şəhəri əhatə edəcək "Shuttle Time" proqramında ümumilikdə 400 məktəblinin iştirakı gözlənilir. Son olaraq proqram Bakı və Sumqayıtda reallaşacaq.“Shuttle Time” proqramı Dünya Badminton Federasiyasının, Avropa Badminton Konfederasiyasının, Azərbaycan Milli Olimpiya Komitəsinin, Gənclər və İdman Nazirliyinin və Təhsil Nazirliyinin birgə dəstəyi ilə həyata keçirilir.

Azərbaycan Milli Karate Federasiyası yeni layihəyə start verib

Azərbaycan Milli Karate Federasiyası 14-15 yaşlı yeniyetmələrdən ibarət milli komandanın heyətinə daha yüksək səviyyəli idmançılar cəlb etmək məqsədilə yeni layihəyə start verib.Azərbaycan Milli Karate Federasiyasının mətbuat xidmətindən Azərtac-a bildiriblər ki, “Olimpiya ümidləri” adlı layihədə 12-13 yaşlı uşaqlar arasında keçirilmiş respublika çempionatının mükafatçıları iştirak edirlər. Belə ki, layihə çərçivəsində həmyaşıdları arasında fərqlənən perspektivli karateçilərə həftədə bir dəfə xüsusi məşqlər keçiriləcək. Məşqlər tanınmış karateçilər və milli komandaların məşqçilərinin iştirakı ilə baş tutacaq.“Olimpiya ümidləri” layihəsinin ilk məşqi rəmzi olaraq Bədən Tərbiyəsi və İdman Günü ərəfəsində başlayıb. Dünyaşöhrətli karateçilərimizdən biri olan, 14-15 yaşlı yeniyetmələrin böyük məşqçisi Şahin Atamov 12-13 yaşlı karateçilərə fərdi təcrübəsindən təlim keçib.Perspektivli azyaşlı karateçilərə növbəti həftələrdə Niyazi Əliyev, Rafael Ağayev, İrina Zaretska, Şahin Xudaverdiyev, Anar Allahverdiyev, Qurban Tağıyev və Denis Morozov kimi karate mütəxəssisləri dərs keçəcəklər. Beynəlxalq dərəcəli hakim Cahangir Babayev isə onlara yarış qaydaları və yeniliklərlə bağlı məlumatlar verəcək.“Olimpiya ümidləri” layihəsinə Cahangir Babayev və Novruz Əliyev nəzarət edirlər. İlk məşqi izləyən federasiya prezidenti Yaşar Bəşirov tanınmış karate mütəxəssislərimizin rəhbərliyi ilə icra edilən bu layihənin perspektivli karateçilərin idman karyerasında müsbət rol oynayacağından əmin olduğunu söyləyib, onlara uğurlar arzulayıb. O, Azərbaycan karatesinin dünyada yüksək nüfuzunun qorunması üçün federasiyanın bütün imkanlardan istifadə etdiyini və yeni inkişaf planları üzərində işləndiyini bildirib.xeber100.com

Azərbaycan Qılıncoynatma Federasiyasının məlumatı əsasında…

Serbiyanın Novi Sad şəhərində keçirilən qılıncoynatma üzrə yeniyetmə və gənclərin Avropa birinciliyində yeniyetmə sablyaçımız Zərifə Hüseynova uğurlu çıxış edib.Azərbaycan Qılıncoynatma Federasiyasından bildiriblər ki, qrup mərhələsini 4 qələbə ilə bitirən Zərifə Hüseynova uğurlu çıxışın davamını pley-offda da gətirib.İlk pley-off görüşündə Yunanıstan təmsilçisi Konstantina Kefalanı 15:10 hesabı ilə məğlub edən Zərifə ən güclü 8 idmançı sırasına yüksəlmək uğrunda keçirilən qarşılaşmada macar Emese Domonkosa 4:15 hesabı ilə uduzub.Zərifə Hüseynova yekun sıralamada 12-ci olub.xeber100.com

Azərbaycan Premyer Liqasında XVIII turun son oyunu keçirilib

Martın 6-da futbol üzrə Azərbaycan Premyer Liqasında XVIII turun son oyunu keçirilib."Azersun Arena"da "Qarabağ" və "Qəbələ" komandaları üz-üzə gəlib. FIFA referisi Elçin Məsiyevin idarə etdiyi görüş meydan sahiblərinin qələbəsi ilə yekunlaşıb - 5:1.Matçın əvvəlində qonaqlar ciddi itki ilə üzləşib. Omar Hani epizodların birində ayağından aldığı zərbə səbəbindən 10-cu dəqiqədə yerini Ülvi İsgəndərova verməli olub. Bundan 8 dəqiqə sonra isə "Qarabağ" hesabı açıb. Braziliyalı yarımmüdafiəçi Kadi Borges cərimə zərbəsindən topu birbaşa rəqib qapısına göndərib."Qəbələ" bərabərlik qolunu 40-cı dəqiqədə vurub. Kevin Medina İsnik Alimini yerə yıxdığı üçün Elçin Məsiyev "Qarabağ"ın qapısına penalti təyin edib. İsnik Alimi bu fürsətdən lazımınca yararlanmağı bacarıb - 1:1. İlk hissə bu hesabla başa çatıb.Meydan sahibləri ikinci hissədə aşkar üstünlük əldə ediblər. Matçın 50-ci dəqiqəsində əks-hücum nəticəsində qonaq komandanın müdafiəçisi Murad Musayev və qapıçı Nicat Mehbalıyevin kobud səhvindən yararlanan İbrahima Vadji Premyer Liqada 5-ci qolunu vurub.Oyunun 65-ci dəqiqəsində isə künc zərbəsindən sonra Medina fərqi artırıb. Bundan 3 dəqiqə sonra Filip Ozobiç komandasının 4-cü, özünün isə çempionatda 8-ci qolunu vurub. Matçda son nöqtəni 89-cu dəqiqədə Abdullah Zubir qoyub. O, Premyer Liqada 7-ci qolunu vurub.Beləliklə, xallarını 40-a çatdıran "Qarabağ" ilk pillədə möhkəmlənib. Qurban Qurbanovun baş məşqçi olduğu komandanın ehtiyatda "Sumqayıt"la təxirə salınmış oyunu da var. "Qəbələ" isə 32 xalla 3-cü yerdə gedir.xeber100.com