Velosiped İdmanı Federasiyası yeni yarış mövsümünə start verib

Azərbaycan Velosiped İdmanı Federasiyası (AzVİF) yeni yarış mövsümünə start verib.İştirakçılar şose velosipedi üzrə Azərbaycan kuboku yarışının birinci mərhələsində mübarizə aparırlar.Yarışda müxtəlif klub və cəmiyyətlərin üç yaş kateqoriyası üzrə 50 idmançısı iştirak edir.Azərbaycan Velosiped İdmanı Federasiyasının prezidenti Mədət Quliyev mətbuat nümayəndələrinə müsahibəsində bildirib ki, təməli xalqımızın ümummilli lideri Heydər Əliyev tərəfindən qoyulan gənclərə qayğı siyasəti Prezident İlham Əliyev tərəfindən uğurla davam etdirilir. “Mən dünyada elə bir ölkə tanımıram ki, orada gənclərə bizdə olduğu kimi diqqət və qayğı göstərilsin. Bugünkü tədbirimiz sadəcə yarış deyil. Bizim gənclərimiz yeni qələbələrə imza atmağa hazırlaşırlar”, – deyən federasiya prezidenti gənclərimizin sağlam olması və idmanda böyük nailiyyətlər qazanması üçün çalışdıqlarını vurğulayıb.Yarışın birinci günündə velosipedçilər 14 kilometr məsafəyə fərdi ötüşmə növündə mübarizə aparıblar. 17 yaşadək idmançılar arasında keçirilən yarışda Respublika Olimpiya Velosiped Məktəbinin üzvləri Radha Şabanova və Tamerlan Vitovski ən yaxşı göstərici ilə bütün rəqiblərini qabaqlayıblar. Bu məktəbin digər təmsilçiləri Diana Sidorenko və Kamran Mirzəxanov gənclər arasında birinci yerə layiq görülüb. U23 və elit yaş kateqoriyasında isə 7 saylı Olimpiya Velosiped Məktəbinin üzvü Lalə Əbdürrəhmanova və Müdafiə Sənayesi Nazirliyinin velosiped idman klubunun nümayəndəsi Musa Mikayılzadə hamıdan yaxşı nəticə göstərib.Azərbaycan kubokunun birinci mərhələsinin ikinci yarış günündə velosipedçilər qrup ötüşməsində mübarizə aparacaqlar.xeber100.com  

Azərbaycan kubokunda dörddəbir final mərhələsinin oyunu keçirilib

Futbol üzrə Azərbaycan kubokunda dörddəbir final mərhələsinin daha bir cavab oyunu keçirilib.“Neftçi” komandası “Sabah”ı qəbul edib.“Bank Respublika Arena”da keçirilən görüş “ağ-qaralar”ın 3:1 hesablı qələbəsi ilə yekunlaşıb.Qarşılaşmada hesabı meydan sahibləri açıblar. Matçın 41-ci dəqiqəsində Xuan Kamara fərqlənib. İlk hissə bu hesabla başa çatıb.İkinci hissədə “Neftçi” rəqibinin səhvlərindən istifadə edərək ardıcıl iki qol vurub. Oyunun 61-ci dəqiqəsində kapitan Emin Mahmudov, bir dəqiqə sonra isə Roman Maçado “Sabah”ın qapısından topu keçirib. Otuz bir yaşlı braziliyalı hücumçu 68-ci dəqiqədə özünün ikinci, komandasının isə üçüncü qolunu vurub.Görüşdə baş hakim Rəvan Həmzəzadə “Sabah”ın futbolçuları Aleksey İsayevi və Səlahət Ağayevi qırmızı vərəqə ilə cəzalandırıb. Hakimə etirazlardan sonra referi “Sabah”ın baş məşqçisi Murad Musayevi də texniki zonadan uzaqlaşdırıb. “Neftçi”nin futbolçusu Eddi İsrafilova və baş məşqçisi Samir Abasova isə sarı vərəqə göstərilib.İlk matç 1:1 hesabı ilə yekunlaşdığı üçün "Neftçi" yarımfinala yüksəlib.Qeyd edək ki, dörddəbir finalın digər iki cavab oyunu fevralın 13-də olacaq. "Qəbələ" evdə "Sumqayıt"ı, "Səbail" isə "Zirə"ni qəbul edəcək. "Neftçi" yarımfinalda "Səbail" - "Zirə" görüşünün güclüsü ilə qarşılaşacaq.Ölkə kubokunda ilk yarımfinalçı ötən gün səfərdə "Keşlə"ni 6:0 hesabı ilə məğlub edən "Qarabağ" olub. Ağdam komandası növbəti mərhələdə "Qəbələ" - "Sumqayıt" cütünün ən yaxşısı ilə görüşəcək.xeber100.com

Cüdo üzrə açıq Avropa turniri davam edir

Bosniya və Herseqovinanın Sarayevo şəhərində cüdo üzrə açıq Avropa turniri davam edir.Turnirdə 60 kiloqram çəki dərəcəsində çıxış edən cüdoçularımız Samir Piriyev və komanda yoldaşı Turan Bayramov bütün rəqiblərini məğlub edərək finala yüksəliblər. Həlledici mərhələdə cüdoçularımız üz-üzə gəliblər. Qarşılaşmanı qızıl xal bölümündə ipponla başa vuran Turan Bayramov turnirin qalibi olub. Samir Piriyev isə gümüş medalla kifayətlənib.Fevralın 13-dək davam edəcək yarışa 26 ölkədən 321 idmançı qatılıb.xeber100.com

Formula 1 Azərbaycan Qran-Prisinin başlanma saatı müəyyənləşib

2022-ci il Formula 1 Azərbaycan Qran-Prisinin başlanma saatı müəyyənləşib.Yarış iyunun 12-də saat 15:00-da başlayacaq.Bu barədə Beynəlxalq Avtomobil Federasiyasının (FIA) yayımladığı yarış proqramında qeyd olunub.İyunun 10-da saat 15:00-da və 18:00-da iki sərbəst yürüş təşkil olunacaq.Növbəti gün, iyunun 11-də saat 15:00-da üçüncü sərbəst yürüş, saat 18:00-da təsnifat mərhələsi olacaq.Xatırladaq ki, Formula 1-in builki mövsümü rekord sayda - 23 mərhələdən ibarət olacaq. Mövsüm martın 20-də Bəhreyndə başlayacaq, noyabrın 20-də Əbu-Dabi Qran-Prisi ilə yekunlaşacaq.xeber100.com

Azərbaycan Super Liqasında ikinci dövrəyə yekun vurulub

Qadın voleybolçular arasında Azərbaycan Super Liqasında ikinci dövrəyə yekun vurulub.Altıncı turun ilk oyunu "Abşeron" və "Murov" komandaları arasında olub. Azərbaycan Voleybol Federasiyasının idman zalında keçirilən görüş "Abşeron"un 3:1 (25:21, 16:25, 25:20, 25:21) hesablı qələbəsi ilə başa çatıb.Dövrənin və turun sonuncu matçında isə "Azerreyl" UNEC-i qəbul edib. Görüş "Azərreyl"in 2:3 (27:29, 25:14, 23:25, 25:16, 12:15) hesablı məğlubiyyəti ilə yekunlaşıb.Qeyd edək ki, hazırda turnir cədvəlinə 18 xalla "Abşeron" başçılıq edir. Səkkiz xalı olan "Azerreyl" ikinci, ondan 2 xal az toplamış "Murov" üçüncüdür. UNEC isə 4 xalla sonuncudur.xeber100.com

Azərbaycan Güləş Federasiyasının məlumatına görə…

Azərbaycan güləşi daha bir uğura imza atıb.Belə ki, 2 hakimimiz ən yüksək beynəlxalq dərəcə sayılan I-S kateqoriyasına sahib çıxıb.Azərbaycan Güləş Federasiyası xəbər verir ki, bu barədə Dünya Güləş Birliyi (UWW) qərar verib.Ali qurum ötən il imtahanlardan uğurla keçən və yarışlarda dəqiq idarəçiliklə seçilən İntiqam Alıyev və Sədi Quliyevi 1-ci kateqoriyadan I-S kateqoriyasına yüksəldib. Bununla da ən yüksək dərəcəyə sahib referilərimizin sayı 3-ə çatıb. Xatırladaq ki, "Tokio-2020"də ədaləti qoruyan Asif Şirəliyev də məhz bu kateqoriyaya sahibdir.Qeyd edək ki, Olimpiadalarda görüşləri yalnız I-S dərəcəsinə sahib olan hakimlər idarə edir.xeber100.com

Beynəlxalq “Xəzər kuboku” şahmat turniri start götürəcək

Sabah İranın Gilan əyalətinin Rəşt şəhərində beynəlxalq “Xəzər kuboku” şahmat turniri start götürəcək. İran, Azərbaycan, Rusiya, Gürcüstan və Ermənistandan 27 şahmatçının iştirak edəcəyi güclü “Master-A” turnirində təmsilçimiz Azər Mirzəyev iştirak edəcək. Yarışın B, C, E, D turnirlərində isə Azərbaycanı müxtəlif yaş qruplarında 47 şahmatçı təmsil edəcək.Yarış İsveçrə sistemi üzrə keçiriləcək və 9 turdan ibarət olacaq.xeber100.com

Azərbaycan Kubokunda final mərhələsinin cavab qarşılaşmalarına start verilib

Futbol üzrə Azərbaycan Kubokunda dörddəbir final mərhələsinin cavab qarşılaşmalarına start verilib.İlk oyun günündə cəmi bir görüş baş tutub. Günün yeganə matçında “Qarabağ” “Keşlə”nin qonağı olub. İlk oyunda 1:0 hesablı qələbə qazanan Ağdam klubu cavab qarşılaşmasında rəqibini darmadağın edib - 6:0.Matçda hesabı 9-cu dəqiqədə Patrik Andrade açıb. Kabo-verdeli yarımmüdafiəçi qüvvətli zərbə ilə baxımlı qola imza atıb. Cəmi 8 dəqiqə sonra İbrahima Vadji paytaxt təmsilçisini növbəti dəfə meydanın mərkəzinə dəvət edib. Ramil Şeydayev 43-cü dəqiqədə hesab arasındakı fərqi 3 topa çatdırıb. İki dəqiqə sonra isə Vadji dublunu rəsmiləşdirib. Oyunda növbəti qol 78-ci dəqiqədə vurulub. Matçda son nöqtəni isə Şeydayev qoyub. Matçın 84-cü dəqiqəsində fərqlənən hücumçu yekun hesabı müəyyənləşdirib.Beləliklə, iki oyunun nəticəsinə əsasən, "Qarabağ" adını yarımfinala yazdırıb. Qurban Qurbanovun baş məşqçisi olduğu kollektiv bu mərhələdə "Sumqayıt" - "Qəbələ" cütünün qalibi ilə qarşılaşacaq. Ölkə kubokunun son qalibi "Keşlə" isə mübarizəni dayandırıb.Qeyd edək ki, digər cavab oyunları növbəti 2 gündə keçiriləcək. Fevralın 12-də "Sabah" "Neftçi"ni, fevralın 13-də isə "Qəbələ" klubu "Sumqayıt"ı, "Səbail" komandası isə "Zirə"ni qəbul edəcək.xeber100.com

UEFA Konfrans Liqasının pley-off mərhələsinin ilk oyununda anşlaq olacaq

“Qarabağ”ın Fransada “Marsel”ə qarşı keçirəcəyi UEFA Konfrans Liqasının pley-off mərhələsinin ilk oyununda anşlaq olacaq.Qarşılaşma üçün nəzərdə tutulan biletlərin əksəriyyəti satılıb.On beş avroya satışa çıxarılmış 5-ci kateqoriya üzrə biletlər tükənib. Satışda yalnız 20, 25, 29 və 39 avroya olan biletlər qalıb.Qeyd edək ki, fevralın 17-də oynanılacaq “Marsel” – “Qarabağ” qarşılaşması Bakı vaxtı ilə saat 00:00-da başlayacaq. Cavab matçı bir həftə sonra Bakıda olacaq.xeber100.com

Şahmat üzrə beynəlxalq turnir davam edir

Serbiyanın Novi Sad şəhərində şahmat üzrə beynəlxalq turnir davam edir.Azərbaycan təmsilçisi Abdulla Qədimbəyli turnirdə liderliyə yüksəlib. Belə ki, şahmatçımız 4 turun nəticəsinə görə, 3 xalla birinci pillədə qərarlaşıb.İsveçrə sistemi üzrə keçirilən turnir 9 turdan ibarət olacaq. Yarışda 16 şahmatçı iştirak edir ki, onlardan da 7-si qrosmeysterdir.Turnir fevralın 13-dək davam edəcək.xeber100.com