Türkiyə çempionatının XII turu çərçivəsində keçirilən qarşılaşmada

Noyabrın 7-də futbol üzrə Türkiyə çempionatının XII turu çərçivəsində keçirilən qarşılaşmada “Fənərbağça" doğma meydanda “Kayserispor”u qəbul edib.Qarşılıqlı hücumlar şəraitində keçən görüşdə qalib müəyyənləşməyib - 2:2. Günün digər matçlarında isə "Qalatasaray" səfərdə "Fatih Karagümük"lə 1:1 hesablı heç-heçə edib. "Konyaspor" isə səfərdə "Göztəpə"nin qapısından iki cavabsız top keçirib. "Adana Dəmirspor" isə öz meydanında "Hatayspor"u minimal hesabla məğlub edib - 1:0.Hazırda Türkiyə Superliqasının turnir cədvəlinə 30 xalla "Trabzonspor" başçılıq edir. Ondan yeddi xal geri qalan "Hatayspor" ikinci, onunla eyni xala malik olan "Konyaspor" isə üçüncü pillələrdə qərarlaşıblar.

Bədii Gimnastika üzrə XII ənənəvi Beynəlxalq yarışlar keçirilib

Macarıstanın paytaxtı Budapeşt şəhərində Bədii Gimnastika üzrə XII ənənəvi Beynəlxalq “Yeni il” kuboku uğrunda yarışlar keçirilib.Turnirdə Macarıstanla yanaşı, İtaliya, Kipr, İsrail, Ukrayna, Slovakiya, Çexiya, Latviya, Rusiya, Gürcüstan, Misir, Avstriya, Xorvatiya, İrlandiya və Türkiyənin 25 idman klubundan 400-ə yaxın gimnast iştirak edib. Həmyerlimiz – artıq yalnız qələbələrinə adət etdiyimiz on bir yaşlı Mina Abbasova bu dəfə də üçrəngli bayrağımızı zirvəyə qaldıraraq halqa və alətsiz çıxışları ilə ən yüksək bal toplayıb. O, 2010-cu il təvəllüdlü gimnastlar arasında ümumi hesabda birincilik əldə edib və yarışın ən yüksək kürsüsündə qərarlaşıb. Mina Abbasova Bakıda fəaliyyət göstərən, beynəlxalq dərəcəli hakim və məşqçi Sevil Fərəcovanın rəhbərlik etdiyi “Gymkids” klubunun üzvüdür.İndiyə kimi müxtəlif ölkələrdə keçirilən saysız-hesabsız yarışlarda 30-dan çox kubok, 40-dan çox medal qazanıb. Xatırladaq ki, Mina Abbasova beş yaşından etibarən Macarıstanda fəaliyyət göstərən beynəlxalq dərəcəli hakim Lyubov Bernat və İnqa Maçkusun rəhbərlik etdiyi "Rus Rg Sport” klubunda bədii gimnastika ilə məşğul olmağa başlayıb.Hazırda Bakıdakı 6 nömrəli orta məktəbdə təhsil alan Mina Abbasova: “Sevincim hədsizdir. Zəfər Günündə, Qələbə günündə mən də Vətəndən uzaqlarda qələbə qazandım. “Mina Abbasova – AZƏRBAYCAN” kəlmələri elan olunanda sevincimin həddi-hüdudu yox idi. Çünki bu yarışa Qalib Bakıdan gəlmişdim və burada da qalibiyyəti itirmədim. Qələbə ölkəmizə və xalqımıza doğrudan da çox yaraşır”.xeber100.com

“Grand Swiss-2021” turnirində son turun oyunları keçiriləcək

Bu gün – noyabrın 7-də Riqada şahmat üzrə “Grand Swiss-2021” turnirində son turun oyunları keçiriləcək. 11-ci turda təmsilçimiz Vasif Aydın Süleymanlı almaniyalı Dmitri Kollars, Rauf Məmmədov ermənistanlı Sergey Movsesyan, Vasif Durarbəyli polşalı Mateus Bartel, Nicat Abasov ukraynalı Martin Kravtsiv ilə qarşılaşacaqlar.Ötən turların nəticəsinə görə, A.Süleymanlı, V.Durarbəyli 4 xal toplayıblar. R.Məmmədov, N.Abasov 3,5 xala malikdirlər.İsveçrə sistemi üzrə keçirilən və 11 turdan ibarət olan turnirə noyabrın 7-də yekun vurulacaq.xeber100.com

Cüdo üzrə “Böyük dəbilqə” turnirində

Bakıda keçirilən cüdo üzrə "Böyük dəbilqə" turnirində Azərbaycan idmançısı Məmmədəli Mehdiyev gümüş medal qazanıb. 90 kiloqram çəki dərəcəsində çıxış edən idmançımız ardıcıl olaraq Con Jayne (ABŞ), Goki Tajima (Yaponiya) və Luka Maysuradzeyə (Gürcüstan) qalib gəlsə də, qızıl medal uğrunda görüşdə Kosuke Maşiyamaya uduzaraq ikinci yerlə kifayətlənib.Xatırladaq ki, turnirin birinci və ikinci günlərində təmsilçilərimiz Orxan Səfərov (66 kq) qızıl, İçinxorloo Muntsxedev (57 kq) gümüş, Rövşən Əliyev (60 kq), Hidayət Heydərov (73 kq) və Elcan Hacıyev (81 kq) isə bürünc medala sahib olublar.Heydər Əliyev adına İdman Kompleksində təşkil olunan turnirdə iyirmi doqquz ölkədən 200-ə yaxın cüdoçu iştirak edir. Azərbaycan yarışda 33 cüdoçu ilə təmsil olunur.xeber100.com

Azərbaycan Premyer Liqasında 10-cu turun daha bir oyunu keçirilib

Noyabrın 7-də futbol üzrə Azərbaycan Premyer Liqasında 10-cu turun daha bir oyunu keçirilib. "Zəfər turu"nda günün ilk qarşılaşması "Səbail" və "Qəbələ" komandaları arasında olub. Matç əyalət təmsilçisinin 2:0 hesablı qələbəsi ilə başa çatıb. İlk qolu 88-ci dəqiqədə Emil Səfərov vurub. Matçın 90+5-ci dəqiqəsində Məqsəd İsayev fərqi iki topa çatdırıb. Oyunun 56-cı dəqiqəsində paytaxt klubunda Yurgen Qoca ikinci sarı vərəqəni alaraq meydandan qovulub.Bu nəticədən sonra xallarının sayını 18-ə çatdıran "qırmızı-qaralar" ikinci pilləyə yüksəlib. Doqquz xala malik "dənizçilər" isə yeddinci sıradadır.Xatırladaq ki, bu gün oynanılacaq "Sumqayıt" - "Qarabağ" matçı ilə tura yekun vurulacaq. "Zəfər turu"nun digər qarşılaşmalarında "Keşlə" evdə "Neftçi"ni 3:2 hesabı ilə məğlub edib. "Sabah" - "Zirə" görüşündə isə heç-heçə qeydə alınıb - 3:3.Qeyd edək ki, Peşəkar Futbol Liqası (PFL) bu turu Zəfər turu elan edib. 2020-ci il sentyabrın 27-də başlayan və 44 gün davam edən Vətən müharibəsində rəşadətli Azərbaycan Ordusu Prezident, Müzəffər Ali Baş Komandan İlham Əliyevin rəhbərliyi ilə düşməni darmadağın edərək əzəli torpaqlarımızı işğaldan azad edib. Prezident İlham Əliyevin ötən il dekabrın 3-də imzaladığı Sərəncama əsasən noyabrın 8-i Azərbaycanda Zəfər Günü elan olunub.xeber100.com

Cüdo üzrə “Böyük dəbilqə” turnirinin açılış mərasimi keçirilib

Noyabrın 5-də Heydər Əliyev adına İdman Sarayında cüdo üzrə “Böyük dəbilqə” turnirinin açılış mərasimi keçirilib.Tədbirdə Azərbaycan Milli Olimpiya Komitəsinin vitse-prezidenti Çingiz Hüseynzadə, Azərbaycan Cüdo Federasiyasının prezidenti Rəşad Nəbiyev, Beynəlxalq Cüdo Federasiyasının prezidenti (IJF) Marius Vizer, idman ictimaiyyətinin nümayəndələri iştirak ediblər.Mərasimdə əvvəlcə Azərbaycan Cüdo Federasiyasının baş katibinin müavini, jurnalist Elnur Əşrəfoğlunun xatirəsi anılıb.Sonra Azərbaycanda idman sahəsində, eləcə də cüdo üzrə qazanılmış nailiyyətləri əks etdirən videoçarx nümayiş olunub.Çingiz Hüseynzadə açılış mərasimində çıxış edərək Bakının artıq yeddinci dəfə bu nüfuzlu yarışa ev sahibliyi etdiyini bildirib: “Bakıdakı budəfəki yarış fərqli şəraitdə keçirilir. Builki turnir Zəfər Günü ərəfəsində təşkil edildiyi üçün bunun idmançıların çıxışına müsbət təsiri olacaq. Eyni zamanda, bir sıra məhdudiyyətlərin hökm sürdüyü pandemiya şəraitinin də nəticələrə təsiri olacaq. Tokio Olimpiadası sübut etdi ki, tamaşaçısız da maraqlı yarış təşkil etmək olar. Olimpiadanın ən maraqlı yarışlarından biri də cüdo idi”.Azərbaycan Cüdo Federasiyasının prezidenti Rəşad Nəbiyev çıxışında Vətən müharibəsində Qələbənin birinci ildönümü ərəfəsində belə bir nüfuzlu yarışın paytaxt Bakıda keçirilməsinin əhəmiyyətini qeyd edib. Azərbaycanda idmanın sürətlə inkişaf etdiyini bildirən R.Nəbiyev döyüş meydanında qazanılan tarixi Qələbə sayəsində torpaqlarımızın otuz ildən sonra işğaldan azad olunduğunu deyib.Beynəlxalq Cüdo Federasiyası ilə Azərbaycan Cüdo Federasiyası arasında qarşılıqlı etimada söykənən möhkəm əlaqələrin olduğunu vurğulayan R.Nəbiyev bildirib: “Ən nüfuzlu cüdo yarışlarının Azərbaycanda təşkili ölkəmizə göstərilən yüksək etimadın nəticəsidir. Azərbaycanda ən mötəbər turnirlər yüksək səviyyədə keçirilir. Azərbaycan Prezidenti İlham Əliyevin ali diqqət və qayğısı nəticəsində ölkəmizdə idman, o cümlədən cüdo sahəsində böyük nailiyyətlər əldə edilib”.IJF-in prezidenti Marius Vizer COVID-19 pandemiyası ilə əlaqədar azarkeşlərin arenaya buraxılmamasının təəssüf doğurduğunu vurğulasa da, cüdonun təbliği baxımından bu yarışın əhəmiyyətini yüksək qiymətləndirib. O, turnirin yüksək səviyyədə təşkilinə görə Azərbaycana minnətdarlığını bildirib.Açılış çıxışlarından sonra Azərbaycan Respublikasının Dövlət Himni və Beynəlxalq Cüdo Federasiyasının himni səsləndirilib.Sonra “Böyük Dəbilqə” turnirində mübarizə davam etdirilib.Mötəbər turnirdə 29 ölkədən 300-ə yaxın cüdoçu iştirak edir. Azərbaycan turnirdə geniş heyətlə - 33 cüdoçu ilə təmsil olunur.xeber100.com    

Belqradda güləşçilərin dünya çempionatı davam edir

Serbiyanın paytaxtı Belqradda 23 yaşadək güləşçilərin dünya çempionatı davam edir.Beşinci yarış günündə - noyabrın 5-də sərbəst güləşçilərin mübarizəsinə start verilib.Təmsilçilərimizdən Əliabbas Rzazadə (57 kq) debütdə Almaniya təmsilçisinə qalib gəlib. Güləşçimiz daha sonra Tacikistan idmançısına aman verməyib. Dörddəbir finalda Ermənistan güləşçisini üstələyən həmyerlimiz yarımfinala yüksəlib. Hindistan idmançısı ilə olduqca gərgin idman mübarizəsi şəraitində keçən görüşdə isə xalların keyfiyyəti Ə.Rzazadəni finala daşıyıb. Qızıl medal uğrunda görüşdə idmançımızın rəqibi Bekbolot Mirzənəzər Uulu (Qırğızıstan) olacaq.Zirəddin Bayramov (65 kq) rəqibi xalçaya çıxmadığı üçün güləşmədən ikinci mərhələyə yüksəlib. Z.Bayramov ikinci görüşdə ABŞ təmsilçisinə gücünü göstərib. Ancaq dörddəbir finalda rusiyalı rəqibinə uduzub. Təmsilçimiz noyabrın 6-da təsəlliverici görüşə çıxacaq.Güləşçimiz Murad Yevloyev startda ukraynalı həmkarını üstələyib. Gürcüstan pəhləvanını "tuşe" ilə mübarizədən kənarlaşdıran M.Yevloyev dörddəbir finalda Tacikistan güləşçisinə qalib gəlib. Ancaq yarımfinalda bir ay əvvəl Osloda böyüklər arasında dünya çempionatında gümüş medal qazanmış Qırğızıstan idmançısına məğlub olub. İdmançımız bürünc medal uğrunda görüşə çıxacaq.Çempionatda 79 kiloqram çəki dərəcəsində mübarizə aparan Əşrəf Aşırov təsnifat mərhələsində Monqolustan idmançısından güclü olub. Ə.Aşırov səkkizdəbir finalda Ukraynadan olan rəqibini məyus edib. Təmsilçimiz növbəti görüşündə İsveçrədən olan həmkarına heç bir şans tanımayıb. Ancaq yarımfinalda Rusiya təmsilçisi keçilməz olub. Ə.Aşırov da bürünc medal uğrunda güləşəcək.İslam İlyasov (97 kq) debütdə rusiyalı rəqibinə məğlub olub.xeber100.com

UEFA Konfrans Liqasının qrup mərhələsində növbəti oyununda

Ağdamın “Qarabağ” klubu noyabrın 4-də UEFA Konfrans Liqasının qrup mərhələsində növbəti oyununu keçirəcək.Azərtac xəbər verir ki, H qrupunda yer alan ağdamlılar səfərdə Qazaxıstanın “Kayrat” klubunun qonağı olacaqlar. Almatıdakı “Ortalık” stadionunda oynanılacaq qarşılaşma Bakı vaxtı ilə saat 19:30-da başlayacaq. Görüşü moldovalı FIFA referisi Dumitri Muntian idarə edəcək.“Kayrat” ilə oyundan əvvəl Qurban Qurbanovun yetirmələrinin heyətində üç itki var. Bədavi Hüseynov və Xayme Romero zədəli olduqları, Qaspar Panadero zədəsi yeni sağaldığı üçün Qazaxıstana aparılmayıb. Bundan başqa, “Neftçi” ilə Premyer Liqanın IX tur matçından (4:0) sonra ayaq əzələsində problem aşkarlanan Abdullah Zubirin meydana çıxması sual altındadır. Almatı təmsilçisinin heyətində isə müdafiəçi Qafurjan Suyumbayev zədə səbəbindən matçı buraxacaq.Hazırda qrup lideri ilə eyni – 7 xal toplayaraq, ikinci pillədə qərarlaşan “Qarabağ” bu turda pley-offa vəsiqəni vaxtından əvvəl təmin edə bilər. Bunun üçün “köhlən atlar” həm rəqibinə uduzmamalı, həm də qrupun digər görüşünün nəticəsini gözləməlidir.Qeyd edək ki, UEFA Konfrans Liqasında qrupların liderləri birbaşa səkkizdəbir finala yüksələcəklər. İkinci yeri tutan komandalar isə UEFA Avropa Liqasında qrupları üçüncü sırada başa vuran kollektivlərlə pley-off matçları keçirəcəklər.xeber100.com  

“Grand Swiss-2021” turnirində səkkizinci turun oyunları keçiriləcək

Riqada şahmat üzrə “Grand Swiss-2021” turnirində səkkizinci turun oyunları keçiriləcək.Azərtac xəbər verir ki, təmsilçimiz Rauf Məmmədov Alan Piçot (Argentina), Nicat Abasov Mixail Antipov (Rusiya), Vasif Durarbəyli Tay Dan Van Nquyen (Çexiya), Aydın Süleymanlı Boris Gelgandla (İsrail) qarşılaşacaqlar.Yeddi turun nəticəsinə görə, şahmatçılarımız hərəyə 3 xal qazanıblar.İsveçrə sistemi üzrə keçirilən və 11 turdan ibarət olan turnirə noyabrın 7-də yekun vurulacaq.xeber100.com

Boks üzrə dünya çempionatında yarımfinal mərhələsinin qarşılaşmalarında

Serbiyanın paytaxtı Belqradda boks üzrə dünya çempionatında yarımfinal mərhələsinin qarşılaşmalarına start veriləcək.Azərtac xəbər verir ki, bu gün 3 boksçumuz rinqə çıxacaq. Belə ki, AIBA bayrağı altında çıxış edən Tavfiqulla Suleymanini, ardınca rumıniyalı Pol Aradoaeni mübarizədən kənarlaşdıran Alfonso Dominqes (86 kq) dörddəbir finalda rusiyalı Şarabutdin Atayevi məğlub edib. Yarımfinala yüksəlməklə özü üçün ən azı bürünc medalı təmin edən "Asif Axundov" klubunun üzvü bu gün kubalı Ruis Kordoba ilə üz-üzə gələcək.Digər boksçumuz Məhəmməd Abdullayev (+92 kq) ilk qarşılaşmalarında Yonas Yazeviçius (Litva) və Vladan Babiç (Serbiya), dörddəbir finalda isə Narender (Hindistan) üzərində qələbə qazanıb. “Baku Fight Lab”ın boksçusu yarımfinalda Davit Çaloyanla (Ermənistan) qarşılaşacaq.İlk iki mərhələdə Stefen Nevns (Şotlandiya) və Yuta Akiyamanı (Yaponiya) məğlub edən Sərxan Əliyev (71 kq) dörddəbir finalda Obed Bartini (ABŞ) mübarizədən kənarlaşdırıb. Naxçıvan boks məktəbinin yetirməsi olan və hazırda MOİK-i təmsil edən həmyerlimiz final uğrunda ukraynalı Yuri Zaxariyevlə üz-üzə gələcək.Qeyd edək ki, ölkəmiz dünya çempionatında doqquz boksçu ilə təmsil olunur.xeber100.com