Azərbaycan Premyer Liqasında 2021/2022-ci il mövsümü start götürəcək

Bu həftə Azərbaycan Premyer Liqasında 2021/2022-ci il mövsümü start götürəcək. Sayca 30-cu olacaq ölkə çempionatı yubiley xarakteri daşıyır. 1992-ci ildən keçirilən yarışda indiyədək 60 klub mübarizə aparıb. Onlardan yalnız ikisi – “Neftçi” və “Qarabağ” bütün mövsümlərdə mükafatlar uğrunda mübarizə aparıb.Azərtac Peşəkar Futbol Liqasına istinadla xəbər verir ki, əvvəlki 29 çempionatın ümumi cədvəlinə “Neftçi” və “Qarabağ” başçılıq edir. Qələbəyə görə üç xalın hesablandığı cədvəldə “Neftçi” 1-ci, “Qarabağ” 2-cidir. Bakı klubunu Ağdam təmsilçisindən cəmi üç xal ayırır. 3-cü sırada qarşıdakı mövsümün daha bir iştirakçısı “Keşlə” qərarlaşıb. Liderlər cari mövsümdə 1-ci yer uğrunda öz aralarında mübarizə aparacaqsa, 3-cü pillənin dəyişəcəyi gözlənilmir.İlk onluqda mövsümün daha bir iştirakçısı “Qəbələ” də var. “Keşlə” kimi “qırmızı-qaralar”ın da mövqeyi dəyişməz qalacaq.14-cü olan “Sumqayıt” iki pillə irəliləmək şansına malikdir. Digər klubların irəliləmək imkanları daha çoxdur. 19-cu olan “Zirə” də, 30-cu olan “Səbail” də, 37-ci olan “Sabah” da 2021/2022-ci il mövsümünün nəticələrinə əsasən ümumi sıralamada xeyli irəliləyə bilər.Qeyd edək ki, texniki nəticələr cədvəldəki top fərqinə daxil edilməyib.xeber100.com

Azərbaycan Həndbol Federasiyasının məlumatına görə…

Beynəlxalq dərəcəli həndbol hakimləri Ernest və Emil Ağakişi ölkəmizi daha bir nüfuzlu yarışda təmsil edəcəklər.Azərbaycan Həndbol Federasiyasından Azərtac-a bildiriblər ki, hakimlərimiz avqustun 12-də start götürəcək 19 yaşadək həndbolçular arasında Avropa çempionatına təyinat alıblar. Xorvatiyada keçiriləcək qitə miqyaslı yarışda ədaləti təmsil edənlər arasında azərbaycanlı referilər də olacaqlar.Xatırladaq ki, bu, Ernest və Emil Ağakişinin mötəbər yarışlara ilk təyinatı deyil. Hər iki hakimin kifayət qədər beynəlxalq təcrübəsi var. Avropa çempionatına dəvət də ali həndbol qurumlarının onlara etimadının növbəti göstəricisidir.Qitə birinciliyinə avqustun 22-də yekun vurulacaq.xeber100.com

“Beşiktaş” futbol klubu heyətini yeni futbolçu ilə gücləndirib

“Beşiktaş” klubu heyətini yeni futbolçu ilə gücləndirib.Azərtac xəbər verir ki, İstanbul təmsilçisi braziliyalı hücumçu Aleks Teyşeyranı transfer edib. Bu barədə klubun mətbuat xidməti məlumat yayıb.Artıq Türkiyədə olan 31 yaşlı futbolçu yeni klubu ilə üçillik müqavilə bağlayıb.Qeyd edək ki, “Vasko da Qama”, “Şaxtyor” (Donetsk) kimi klublarda çıxış edən Teyşeyra son olaraq Çinin “Tszyansu” komandasında oynayıb. O, son mövsümdə 20 oyuna 10 qol vurub, 4 məhsuldar ötürmə edib.xeber100.com

Olimpiadalar tarixində qazanılan medalların sayına görə ölkələrin siyahısı açıqlanıb

“Tokio-2020” XXXII Yay Olimpiya Oyunlarından sonra olimpiadalar tarixində qazanılan medalların ümumi sayına görə ölkələrin siyahısı açıqlanıb.Azərtac xəbər verir ki, siyahıda 1896-cı ildən keçirilən Yay Olimpiya Oyunlarında medal qazanan komandalar yer alıblar.Cədvəldə komandalar turnirdə iştirak etdiyi vaxtda adlandırıldığı kimi göstərilib. Yəni, heç bir komanda fərqli adlanan yığmanın varisi hesab olunmayıb.İlk dəfə 1996-cı ildə keçirilən “Atlanta-1996”da iştirak edən və həmin vaxtdan 7 Olimpiadaya qatılan Azərbaycan qazanılan medalların sayına görə siyahıda 63-cü yerdədir. İdmançılarımız ümumilikdə 49 medal - 7 qızıl, 14 gümüş və 28 bürünc qazanıblar.İndiyədək 154 komanda aktivinə medal yazdırıb. ABŞ 2636 medalla birinci pillədə qərarlaşıb. SSRİ 1010 medalla ikinci, Böyük Britaniya isə 916 medalla üçüncüdür.xeber100.com  

UEFA Avropa Konfrans Liqasının oyununa təyinat alıb

FIFA referisi Əliyar Ağayev UEFA Avropa Konfrans Liqasının oyununa təyinat alıb.Azərtac AFFA-ya istinadla xəbər verir ki, UEFA Avropa Konfrans Liqasının üçüncü təsnifat mərhələsinin cavab oyunları çərçivəsində keçiriləcək “Fola” (Lüksemburq) – “Linfild” (Şimali İrlandiya) qarşılaşmasının baş hakimi Əliyar Ağayev olacaq. Ona Zeynal Zeynalov və Akif Əmirəli kömək edəcəklər. Dördüncü hakim funksiyasını Elçin Məsiyev yerinə yetirəcək.Matç avqustun 12-də Lüksemburq şəhərindəki “Josiy Barthel” stadionunda keçiriləcək.xeber100.com

Şahmat üzrə Avropa çempionatı start götürür

Bu gün Rumıniyanın Yassa şəhərində şahmat üzrə qadınlar arasında Avropa çempionatı start götürür.Azərtac xəbər verir ki, qitə birinciliyində 29 ölkədən 117 şahmatçı iştirak edəcək.Ölkəmizi Avropa çempionatında 10 şahmatçı - Günay Məmmədzadə, Gülnar Məmmədova, Xanım Balacayeva, Zeynəb və Türkan Məmmədyarova bacıları, Gövhər Beydullayeva, Ülviyyə Fətəliyeva, Xəyalə Abdulla, Ayan Allahverdiyeva və Nəsrin Babayeva təmsil edəcək.Bu gün çempionatın ilk turunun oyunları keçiriləcək. Şahmatçılarımız Günay Məmmədzadə Mariya Qevorgyan (Ermənistan), Gülnar Məmmədova Stella Sankova (Slovakiya), Xanım Balacayeva Ayan Allahverdiyeva, Türkan Məmmədyarova Ronit Levitan (İsrail), Gövhər Beydullayeva Petronella Parasçiv (Rumıniya), Zeynəb Məmmədyarova Diana Mirza (İtaliya), Nəsrin Babayeva Miruna Lehaçi (Rumıniya), Xəyalə Abdulla Aureliana Pancu (Rumıniya), Ülviyyə Fətəliyeva Stefani Matasaru (Rumıniya) ilə oynayacaq.Qitə birinciliyi avqustun 21-dək davam edəcək. Yarışın ümumi mükafat fondu isə 60 min avro təşkil edir.xeber100.com  

Tokio XXXII Yay Olimpiya Oyunları başa çatır

Avqustun 8-də Tokio XXXII Yay Olimpiya Oyunları başa çatır.Azərtac xəbər verir ki, yarışların son günündə kişilər arasında marafon qaçışında keniyalı Eliud Kipçoqe Olimpiya çempionu adını saxlamağa nail olub. “Rio-2016”nın qalibi olmuş 36 yaşlı idmançı marafonu inamla qaçaraq, yarışı 2 saat 8 dəqiqə 38 saniyə nəticə ilə birinci başa vurub.E.Kipçoqe Olimpiya mərhələsində dalbadal iki qızıl medal qazanan üçüncü qaçışçı olub. Kişilər arasında marafon qaçışının dünya rekordu da ona məxsusdur – 2 saat 1 dəqiqə 39 saniyə.Olimpiya Oyunlarında bu idman növü üzrə ikinci yeri niderlandlı Abdi Naqiay, üçüncü yeri isə Belçika idmançısı Bəşir Abdi tutub.Tokioda isti hava şəraitinə görə yarış Yaponiyanın Hokkaydo adasında yerləşən Sapporo şəhərində keçirilib. Buna baxmayaraq, marafon qaçışına qatılan 100-dən artıq idmançıdan yalnız 30-u finişə çata bilib.xeber100.com

“Sabah” futbol klubu heyətini yeni futbolçu ilə gücləndirib

Bakının “Sabah” klubu heyətini yeni futbolçu ilə gücləndirib.Azərtac kluba istinadla xəbər verir ki, Bakı təmsilçisi ispaniyalı yarımmüdafiəçi Kristian Sebalyosla üçillik müqavilə bağlayıb.İyirmi səkkiz yaşlı oyunçu “Sabah”da 11 nömrəli formada çıxış edəcək.Qeyd edək ki, “Barselona” Futbol Akademiyasının yetirməsi olan Sebalyos karyerası ərzində İngiltərənin “Tottenhem”, “Çarlton", Portuqaliyanın “Aroka”, Belçikanın “Sent-Trüden”, Qətərin “Al-Vakra” və “Qətər” klublarında çıxış edib.xeber100.com

Cüdo üzrə Avropa kuboku yarışı keçirilib

Orenburqda (Rusiya) cüdo üzrə Avropa kuboku yarışı keçirilib.Azərtac xəbər verir ki, avqustun 7-də start götürən turnirin ikinci günü komandamız aktivinə daha bir medal yazdırıb. Belə ki, təmsilçilərimizdən İmran Yusifov (100 kiloqramdan yuxarı) üçüncü yeri tutub.Qeyd edək ki, yarışın birinci günündə Nurlan Osmanov (73 kq) gümüş medal qazanıb. Beləliklə, cüdo komandamız yarışı iki medalla başa vurub.İki gün davam edən turnirdə on dörd ölkədən 200-ə yaxın cüdoçu iştirak edib.xeber100.com

Azərbaycan millisi “Savaria” turnirində sonuncu oyununu keçirib

Qadın voleybolçulardan ibarət Azərbaycan millisi Macarıstanın Samboteli şəhərindəki beynəlxalq “Savaria” turnirində sonuncu oyununu keçirib.Azərtac Azərbaycan Voleybol Federasiyasına istinadla xəbər verir ki, millimiz Çexiya yığması ilə qarşılaşıb. Görüş çexiyalı voleybolçuların 3:0 hesablı qələbəsi ilə başa çatıb.Voleybolçularımız ilk oyunda Macarıstan seçməsinə 2:3 hesabı ilə məğlub olublar. Növbəti oyunda Niderlanda qarşılaşan yığmamız 0:3 hesabı ilə uduzub.Beləliklə, seçməmiz turnirdə sonuncu olub.xeber100.com