Azərbaycan Premyer Liqasında XXVII tura yekun vurulub

Futbol üzrə Azərbaycan Premyer Liqasında XXVII tura yekun vurulub.Azərtac xəbər verir ki, eyni saatda start götürən son 3 matçın ikisində meydan sahibləri, birində qonaqlar qələbə qazanıblar.Lider "Qarabağ" klubu "Azərsun Arena"da "Keşlə"ni 2 cavabsız qolla məğlub edib. Qolları 47-ci dəqiqədə Mahir Emreli, 74-cü dəqiqədə Kvabena Ovusu vurublar. Emreli 80-ci dəqiqədə penaltidən yararlana bilməyib.İkinci pillədə qərarlaşan "Neftçi" Sumqayıtda eyniadlı komandaya minimal hesabla qalib gəlib. Yeganə qola ilk hissənin əsas vaxtına əlavə olunmuş 1-ci dəqiqədə Voyislav Stankoviç imza atıb."Zirə" isə evdə "Səbail" üzərində 2:0 hesablı qələbə qazanıb. 58-ci dəqiqədə Ağabala Ramazanov komandasını önə çıxarıb. 6 dəqiqə sonra isə Nemanya Ancelkoviç 2-ci topu rəqibin qapısından keçirib.Bu nəticələrdən sonra "Qarabağ" (57 xal) və "Neftçi" (56 xal) mövqelərində qalıb. "Zirə" 38 xalla 3-cü pilləyə yüksəlib. 36 xalı olan "Sumqayıt" isə 4-cü sıraya geriləyib. Beləliklə, çempion, vitse-çempion və bürünc medalçı son turda məlum olacaq. Axırıncı turda "Neftçi" - "Qarabağ", "Sabah" - "Zirə", "Səbail" - "Sumqayıt" və "Keşlə" - "Qəbələ" matçları keçiriləcək. Bütün oyunlar mayın 19-da olacaq.Qeyd edək ki, günün ilk oyununda "Qəbələ" evdə "Sabah"la məhsuldar heç-heçə edib - 2:2.xeber100.com

“Yuventus”un qapıçısı “Barselona” komandası ilə müqavilə bağlaya bilər

İtaliyanın "Yuventus" klubunun qapıçısı Canluici Buffon yayda İspaniyanın "Barselona" komandası ilə müqavilə bağlaya bilər.Azərtac xəbər verir ki, 43 yaşlı qolkiperlə qısamüddətli anlaşmanın əldə ediləcəyi gözlənilir. Rəhbərlik italiyalı oyunçuya əsas qapıçı Mark-Andre Ter Ştegenin əvəzedicisi kimi baxır.Qeyd edək ki, Canluici Buffon 2001-ci ildə "Parma"dan "Yuventus"a transfer olunub. 2018/2019-cu il mövsümünü Fransa PSJ-sində keçirmiş italiyalı qolkiper daha sonra Turin klubuna qayıdıb. Buffon "Yuventus"da 683 oyunundan 322-də qol buraxmayıb.xeber100.com

Futbol üzrə UEFA Çempionlar Liqası final oyunu ilə bağlı qərarını açıqlayıb

Mayın 13-də futbol üzrə UEFA Çempionlar Liqasının final oyunu ilə bağlı yekun qərarı açıqlanıb.Azərtac Avropa futbol qurumunun rəsmi saytına istinadən xəbər verir ki, həlledici matç koronavirus pandemiyası səbəbindən Türkiyənin İstanbul şəhərindən alınaraq Portuqaliyaya verilib.Final qarşılaşması mayın 29-da Portu şəhərindəki “Draqau” stadionunda olacaq. Hər klubun 6 min azarkeşi oyunu tribunadan izləyə biləcək. UEFA-nın azarkeş sayı ilə bağlı yekun qərarı daha sonra bəlli olacaq.Görüş Bakı vaxtı ilə saat 23:00-da başlanacaq. Finalda İngiltərənin “Mançester Siti” və “Çelsi” komandaları üz-üzə gələcək.Matçın daha əvvəl Atatürk Olimpiya Stadionunda keçirilməsi planlaşdırılıb. UEFA görüşün İngiltərədə təşkilinin də nəzərdə tutulduğunu, lakin karantin tədbirləri üzündən danışıqların nəticəsiz qaldığını bildirib.Avropa futbol qurumu anlayışa görə Türkiyə tərəfinə təşəkkür edib və İstanbul şəhəri üçün gələcək imkanların nəzərdən keçiriləcəyini vurğulayıb.Qeyd edək ki, Türkiyə hökuməti mayın 3-də 16 ölkədən, o cümlədən Böyük Britaniyadan gələnlər üçün mənfi nəticəli PCR testləri təqdim etmələrinə dair tələbi ləğv edib. Bu qərar mayın 15-dən qüvvəyə minəcək. Bununla yanaşı, Türkiyə koronavirus infeksiyası üzündən “qırmızı zona”ya düşüb. Bu ölkədən Böyük Britaniyaya gedənlər mehmanxanada 10 gün öz hesablarına qalmalıdırlar.xeber100.com

Futbol üzrə İspaniya La Liqasının XXXV turunda

Mayın 9-də futbol üzrə İspaniya La Liqasında XXXV turun daha bir mərkəzi görüşü "Real Madrid" və "Sevilya" komandaları arasında keçirilib.Azərtac xəbər verir ki, Madriddəki "Alfredo di Stefano" stadionunda təşkil olunmuş qarşılaşma heç-heçə ilə yekunlaşıb - 2:2.Hesabı 22-ci dəqiqədə qonaq komandadan Fernando açıb. Oyunun 67-ci dəqiqəsində Marko Asensio bərabərlik qolunu vurub. Qarşılaşmanın 78-ci dəqiqəsində İvan Rakitiç penaltidən "Sevilya"nı yenidən önə çıxarıb. Lakin 90+4-cü dəqiqədə Eden Azar "kral klubu"nu məğlubiyyətdən qurtarıb.Bu nəticədən sonra "Real Madrid" xalını 75-ə çatdıraraq, yenidən ikinci pilləyə qayıdıb. Üçüncü pillədəki "Barselona" da eyni xala malikdir. "Sevilya" 71 xalla dördüncüdür. Turnir cədvəlinə isə 77 xalla "Atletiko" başçılıq edir.Qeyd edək ki, bu tur daha bir mərkəzi görüş "Barselona" və "Atletiko" arasında olub. Qarşılaşma qolsuz tamamlanıb.xeber100.com

Formula 1 İspaniya Qran-Prisinin qalibi müəyyənləşib

Mayın 9-da də Formula 1 İspaniya Qran-Prisinin qalibi müəyyənləşib.Azərtac xəbər verir ki, yarışda “Mercedes”in pilotu Luis Hamilton birinci olub. Maks Ferstappen ("Red Bull Racing") yarışı ikinci, Valtteri Bottas (“Mercedes”) isə üçüncü pillədə başa vurublar.L.Hamilton cari mövsüm üçüncü, karyerasında 98-ci, Barselonada isə ardıcıl 5-ci qələbəsini qazanıb.Pilotların siyahısına 94 xalla L.Hamilton başçılıq edir. M.Ferstappen 80 xalla ikinci, V.Bottas isə 47 xalla üçüncü pillədə yer alıb.Konstruktorlar kubokunda "Mercedes" 141 xalla birincidir. İlk üçlüyü "Red Bull" (112 xal) və "McLaren" (65 xal) komandaları tamamlayır.Növbəti yarış iki həftə sonra Monakoda təşkil olunacaq.Qeyd edək ki, Formula 1 Azərbaycan Qran-Prisi iyunun 6-da Bakı şəhər halqasında keçiriləcək.xeber100.com

Azərbaycan Premyer Liqasının XXVI turunda

Azərbaycan Premyer Liqasının XXVI turunda “Səbail”ə 4:0 hesabı ilə qalib gələn “Neftçi” mövsümdə 5-ci böyükhesablı qələbəsini qazanıb.Azərtac Peşəkar Futbol Liqasının saytına (PFL) istinadla xəbər verir ki, bu, Bakı klubu üçün son 10 ildə rekord göstəricidir. Paytaxt təmsilçisi 2010-2011-ci il mövsümündən sonra bu qədər böyükhesablı qələbə qazanmamışdı. Həmin il “Ağ-qaralar” rəqiblərinə 6 dəfə üç və ya daha çox top fərqi ilə qalib gəlib.Bakılıların mütləq rekordu isə 1992-ci ildə qeydə alınıb. Həmin vaxt komanda 14 böyükhesablı qələbə qazanmışdı.Qeyd edək ki, “Neftçi” cari mövsümdə “Qəbələ” (4:1), “Zirə” (4:0) və “Keşlə”ni (3:0) bir, “Səbail”I isə iki (4:0, 4:0) dəfə böyük hesabla üstələyib.xeber100.com

Şahmatçılar arasında ikinci beynəlxalq “Təhsil” kuboku yarışı keçirilib

On yeddi yaşadək şahmatçılar arasında ikinci beynəlxalq “Təhsil” kuboku yarışı keçirilib.Azərtac xəbər verir ki, ümummilli lider Heydər Əliyevin anadan olmasının 98-ci ildönümünə həsr edilən turnirdə 24 ölkədən 190 şahmatçı iştirak edib. Onlayn keçirilən yarışın finalında Azərbaycanın 12 şahmatçısı mübarizə aparıb.Yekun nəticələrə görə, özbəkistanlı Javoxir Sindarov 8 xalla birinci yeri tutub. Azərbaycan təmsilçisi Xəzər Babazadə 7,5 xalla ikinci pillədə qərarlaşıb. Hindistanlı Raunak Sadhvani isə 7 xalla üçüncü yerə sahib olub.Turnir “Təhsil” Respublika İdman Mərkəzinin təşkilatçılığı, Təhsil Nazirliyinin və Azərbaycan Şahmat Federasiyasının dəstəyi ilə təşkil edilib.Yarışın təşkilində əsas məqsəd ümummilli lider Heydər Əliyevin xatirəsinin əbədiləşdirilməsi, karantin dövründə məktəblilərin asudə vaxtının səmərəli təşkili və müasir texnologiyalardan istifadə etməklə şahmatçıların təcrübələrinin artırılmasından ibarətdir.xeber100.com

Bədii gimnastika üzrə dünya kuboku yarışlarına yekun vurulub

Mayın 9-da Bakıda keçirilən bədii gimnastika üzrə dünya kuboku yarışlarına yekun vurulub. Azərbaycan millisi turniri 1 medalla başa vurub.Azərtac xəbər verir ki, "Tokio-2020" Yay Olimpiya Oyunlarına təsnifat xarakteri daşıyan yarışın sonuncu günündə gimnastlar fərdi proqramda ayrı-ayrı alətlər, qrup hərəkətləri komandaları isə 5 top, 3 halqa və 2 cüt gürzlə final mərhələlərində güclərini sınayıblar.Fərdi gimnastların halqa ilə yarışında İsrail təmsilçisi Linoy Aşram 27,150 xalla birinci olub. Rusiya idmançısı Lala Kramarenko 26,850 xalla yarışı ikinci, belaruslu Alina Harnasko (26,600 xal) isə üçüncü pillədə başa vurublar.İtaliya idmançısı Aleksandra Acurcukukuleze dünya kuboku yarışlarında fərqlənib. Belə ki, italiyalı idmançının top ilə çıxışı hakimlər tərəfindən 26,350 xalla qiymətləndirilib və bu da qızıl medal üçün yetərli olub. Eyni - 26,100 xala malik Rusiya təmsilçisi Daria Trubnikova və Boryana Kaleyn (Bolqarıstan) ilk üçlükdə yer alıblar.İsrail təmsilçisi Linoy Aşram turnirdə ikinci qızıl medalını qazanıb. Fərdi gimnastların gürzlər ilə yarışında İsrail təmsilçisi 27,800 xalla birinci olub. Bolqarıstan idmançısı Boryana Kaleyn 27,400 xalla yarışı ikinci, rusiyalı Lala Kramarenko (27,150 xal) isə üçüncü pillədə başa vurublar.Azərbaycan təmsilçisi Zöhrə Ağamirova dünya kuboku yarışlarında dördüncü olub. Fərdi gimnastların lent ilə yarışında təmsilçimiz hakimlərdən 21,400 xal alıb. Yarışın qalibi 24,300 xalla bolqarıstanlı Boryana Kaleyn olub. Onun komanda yoldaşı Katrin Taseva 21,500 xalla bürünc medal qazanıb. Belarus təmsilçisi Alina Harnasko 23,450 xalla gümüş medala sahib olub. Azərbaycanın qrup hərəkətləri komandası dünya kuboku yarışlarında bürünc medal qazanıb. Ləman Əlimuradova, Zeynəb Hümmətova, Yelizaveta Luzan, Məryəm Səfərova və Darya Sorokinadan ibarət qrup hərəkətləri komandamızın 5 topla çıxışı 44 xalla qiymətləndirilib. Yarışın qalibi Bolqarıstan komandası olub. Onların aktivində 45,600 xal var. İtaliya gimnastları 44,500 xalla yarışı ikinci pillədə başa vurublar.Bolqarıstanın qrup hərəkətləri komandası 3 halqa və 2 cüt gürzlə yarışda birinci olub. Bolqarıstanlı gimnastların çıxışı hakimlər tərəfindən 43,150 xalla qiymətləndirilib. İlk üçlüyü İtaliya (41,900 xal) və Belarus (39,850 xal) komandaları qapayıblar. Azərbaycanın qrup hərəkətləri komandası isə 37,600 xalla beşinci olub.Qeydiyyat siyahısına əsasən, kubok yarışlarında 35 ölkədən 61-i fərdi və 106-sı qrup komandasının (18 qrup) üzvü olmaqla 167 gimnast iştirak edib.xeber100.com  

Güləş üzrə dünya Olimpiya təsnifat turniri davam edir

Bolqarıstanın paytaxtı Sofiyada güləş üzrə dünya Olimpiya təsnifat turniri davam edir.Azərtac xəbər verir ki, turnirin üçüncü günündə - mayın 8-də yunan-Roma güləşçiləri mübarizəyə qoşulacaqlar.Yunan-Roma güləşi üzrə millimizin üzvlərindən Murad Məmmədov (60 kq) Stiq Andre Berqe (Norveç), Rəsul Çunayev (67 kq) moldovalı Donior İslamov, Rafiq Hüseynov (77 kq) Hyenvu Kim (Koreya Respublikası), Murad Lokyayev (97 kq) İtaliya idmançısı Nikolos Kakelaşvili, Beka Kandelaki (130 kq) isə Oskar Marvik (Norveç) ilə görüşdə xalça üzərinə çıxacaqlar.Görüşlər Bakı vaxtı ilə saat 11:00-da başlayacaq. Lisenziya sahiblərini müəyyənləşdirən yarımfinal qarşılaşmaları isə saat 20:00-da start götürəcək.Xatırladaq ki, güləşin bu növündə güləşçimiz İslam Abbasov (87 kq) martda Macarıstanda keçirilən Avropa Olimpiya təsnifat turnirində lisenziya qazanıb.xeber100.com

Bədii gimnastika üzrə dünya kuboku yarışları davam edir

Bakıda bədii gimnastika üzrə dünya kuboku yarışları davam edir.Azərtac xəbər verir ki, turnirin ikinci günündə - mayın 8-də fərdi gimnastlar gürzlər və lent, qrup komandalar isə 3 halqa və 2 cüt gürz ilə proqramlarını təqdim edəcəklər.Mayın 9-dək davam edəcək kubok yarışları "Tokio-2020" Yay Olimpiya Oyunlarına təsnifat xarakteri daşıyır.Qeydiyyat siyahısına əsasən, kubok yarışlarında 35 ölkədən 61-i fərdi və 106-sı qrup komandasının (18 qrup) üzvü olmaqla, 167 gimnast iştirak edir.Azərbaycanı yarışda Yay Universiadasının gümüş medalçısı, İslam Həmrəyliyi Oyunlarının qalibi, Olimpiya Oyunlarına lisenziya qazanmış Zöhrə Ağamirova, gənclər arasında dünya çempionatının ikiqat mükafatçısı Arzu Cəlilova, eləcə də son Avropa çempionatının üçqat medalçısı, Olimpiya Oyunlarına lisenziya əldə etmiş qrup hərəkətləri komandası təmsil edir.Ənənəyə uyğun olaraq, kubok yarışlarında ən çox icra xalını yığmış gimnast və qrup komandasına ənənəvi “AGF Trophy” kuboku təqdim olunacaq.xeber100.com