Onlayn şahmat seriyasının dördüncü mərhələsində

Aniş Giri “Champions Chess Tour” onlayn şahmat seriyasının dördüncü mərhələsinin qalibi olub.Azərtac xəbər verir ki, dünya çempionu Maqnus Karlsenin təşkil etdiyi nüfuzlu yarışın final mərhələsində Niderland təmsilçisi Aniş Giri Rusiya şahmatçısı Yan Nepomnyaşinin üzərində qələbə qazanaraq fəxri kürsünün ən yüksək zirvəsində qərarlaşıb. Turnirdə üçüncü yeri isə norveçli dünya çempionu Maqnus Karlsen tutub. O, həlledici qarşılaşmada ABŞ təmsilçisi Uesli So üzərində qələbə qazanıb. Şahmatçılarımız Şəhriyar Məmmədyarov və Teymur Rəcəbov təsnifat mərhələsində mübarizəni dayandırıblar. Qeyd edək ki, turnirin ümumi mükafat fondu 220 min ABŞ dollarıdır. Qalib şahmatçı 60 min, finalçı 40 min, 3-cü yerin sahibi isə 25 min ABŞ dolları qazanacaq. Xatırladaq ki, Teymur Rəcəbov “Champions Chess Tour” seriyası çərçivəsində keçirilən ikinci - “Airthings Masters” turnirinin finalında Ermənistan təmsilçisi Levon Aronyanı məğlub edərək yarışın qalibi olmaqla yanaşı, həm də seriyanın finalına vəsiqə qazanıb. Şahmatçımız seriyanın üçüncü mərhələsində - “Opera Euro Rapid” turnirində isə üçüncü yeri tutub.xeber100.com

İngiltərə Kubokunda 1/4 final mərhələsinin son iki oyunu keçirilib

Futbol üzrə İngiltərə Kubokunda 1/4 final mərhələsinin son iki oyunu keçirilib.Azərtac xəbər verir ki, günün ilk matçında "Çelsi" doğma meydanda "Şeffild Yunayted"i 2 cavabsız qolla məğlub edib.Qolları 24-cü dəqiqədə Oliver Norvud öz qapısına, 90-cı dəqiqədə isə Hakim Ziyeş vurub.Digər qarşılaşmada "Lester Siti" evdə "Mançester Yunayted"ini 3:1 hesabı ilə məğlub edib. Matçın 24-cü dəqiqəsində Keleçi İhenaço meydan sahiblərini hesabda önə çıxarsa da, 14 dəqiqə sonra Meyson Qrinvud tarazlığı bərpa edib. Qarşılaşmanın 52-ci dəqiqəsində Yuri Tilemans "qırmızı şeytanlar"ı ikinci dəfə məyus edib. Görüşdə son nöqtəni isə 78-ci dəqiqədə İhenaço qoyub.Beləliklə, qələbə sayəsində "Çelsi" və "Lester Siti" komandaları yarımfinala vəsiqə qazanıblar. Londonlular bu raundda "Mançester Siti" ilə, Lester təmsilçisi isə "Sautgempton"la qarşılaşacaq.Qeyd edək ki, yarımfinal oyunları aprelin 17-də baş tutacaq.xeber100.com

İtaliya A Seriyasının 28-ci turun növbəti oyunu keçirilib

Futbol üzrə İtaliya A Seriyasının 28-ci turun növbəti oyunu keçirilib.Azərtac xəbər verir ki, cari mövsüm iddialı oyunu ilə diqqət çəkən, turnir cədvəlində ikinci pillədə yer alan “Milan” səfərdə “Fiorentina” klubunun qonağı olub. Oyunda hesabı “Milan” matçın 9-cu dəqiqədə açıb. Milanlıların əsas qol silahı Zlatan İbrahimoviç qapıçı ilə təkbətək mübarizədən qalib ayrılıb. Qarşılaşmanın 17-ci dəqiqəsində meydan sahibləri hesaba tarazlıq gətirib. Erik Pulqar cərimə zərbəsindən sonra baxımlı qola imza atıb. Birinci hissə 1:1 hesablı heç-heçə ilə başa çatıb.Fasilədən dərhal sonra “Fiorentina” yenidən rəqibin qapısına yol tapa bilib. Frank Riberi Dusan Vlahoviçin ötürməsini dəqiq zərbə ilə tamamlayıb. Hücumların kəsərin artıran “Milan” altı dəqiqə sonra fərqlənməyə nail olub. Brahim Diaz adını tabloya yazdırıb. Bu da oyunda son qol olmayıb. Matçın 73-cü dəqiqəsində Türkiyə millisinin futbolçusu Hakan Çalxanoğlu komandasına qələbə qazandıran qola imza atıb. Qalan dəqiqələrdə hər iki komandanın fərqlənməyə şansı olsa da hesab dəyişməyib.Bu qələbə sayəsində xal ehtiyatını 59-a çatdıran “Milan” turnir cədvəlində ikinci yerini möhkəmləndirib. “Fiorentina” isə 29 xalla 14-cü yerdə qərarlaşıb.İtaliya A Seriyasının növbəti turunda "Milan” öz meydanında “Sampdoriya”nı qəbul edəcək. “Fiorentina” isə səfərdə “Genoa”nın qonağı olacaq.xeber100.com

Futbol üzrə Türkiyə çempionatının XXXI turu çərçivəsində

Martın 21-də futbol üzrə Türkiyə çempionatının XXXI turu çərçivəsində İstanbul derbisi keçirilib.Azərtac xəbər verir ki, “Beşiktaş” doğma meydanda “Fənərbağça”nı qəbul edib. Qarşılıqlı hücumlar şəraitində keçən görüşdə hesabı meydan sahiblərinin müdafiəçisi Damaqoy Vida açıb. Lakin oyunun 89-cu dəqiqəsində Ozan Tufan hesabı bərabərləşdirərək komandasını məğlubiyyətdən xilas edib.Beləliklə, "Beşiktaş" - "Fənərbağça" matçında qalib müəyyənləşməyib.Günün digər matçında “Antalyaspor” doğma meydanda “Ərzurumspor”u 3:1 hesabı ilə məğlub edib. "Konyaspor" öz meydanında "Alanyaspor" minimal hesabla üstələyib - 1:0. "Dənizlispor" - "Başakşəhər" qarşılaşmasında isə qapılara qol vurulmayıb.Hazırda Türkiyə Superliqasının turnir cədvəlinə 64 xalla “Beşiktaş” başçılıq edir. İkinci pillədə 61 xal toplayan “Qalatasaray”, üçüncü pillədə isə 59 xalla “Fənərbağça” qərarlaşıb.Qeyd edək ki, yeni mövsümdə Superliqada 21 komanda yarışır. XXXI turda “Hatayspor” istirahət edir.xeber100.com

Güləş üzrə Avropa Olimpiya təsnifat turniri davam edir

Macarıstanın paytaxtı Budapeştdə güləş üzrə Avropa Olimpiya təsnifat turniri davam edir.Azərtac xəbər verir ki, turnirin üçüncü yarış günündə - martın 20-də yunan-Roma güləşçiləri mübarizəyə qoşulacaqlar. Turnirdə 6 güləşçimiz iştirak edəcək. Onlardan biri təsnifat, beşi isə 1/8 finaldan turnirdən mübarizəyə qoşulacaq. Belə ki, Murad Məmmədov (60 kq) litvalı Justas Petraviçyus, İslambek Dadov (67 kq) Mihay Mihut (Rumıniya), Sənan Süleymanov (77 kq) Moldova idmançısı Aleksandrin Qutu, İslam Abbasov (87 kq) Şimon Şimonoviç (Polşa) - Daniel Aleksandrov (Bolqarıstan) cütünün qalibi ilə, Murad Lokyayev (97 kq) yunanıstanlı Laokratis Kesidis, Beka Kandelaki (130 kq) isə Aleksandros Papadatos (Yunanıstan) ilə qarşılaşacaq.Bu gün, həmçinin qadın güləşçilər arasında medal görüşləri keçiriləcək. Leyla Qurbanova (53 kq) və Elis Manolova (68 kq) bürünc medal uğrunda mübarizə aparacaqlar. Alyona Kolesnik (57 kq) və Tatyana Omelçenko (62 kq) isə təsəlliverici görüşlərdə iştirak edəcəklər.Azərbaycan millisi Avropa Olimpiya təsnifat turnirində 4 medal qazanıb. Sərbəst güləşçilərdən Hacı Əliyev (65 kq) və Hacımurad Hacıyev (74 kq) gümüş, İslam Bazarqanov (57 kq) və Camaləddin Məhəmmədov (125 kq) isə bürünc medala yiyələniblər. H.Əliyev və H.Hacıyev, eyni zamanda, "Tokio-2020" Yay Olimpiya Oyunlarına lisenziya əldə ediblər.xeber100.com

“Novruz-2021” şahmat turnirinin qalibləri müəyyənləşib

“Təhsil” Respublika İdman Mərkəzinin 3 nömrəli Respublika İxtisaslaşdırılmış Olimpiya Ehtiyatları Uşaq Gənclər İdman-Şahmat Məktəbinin təşkilatçılığı ilə “Novruz-2021” onlayn şahmat turniri keçirilib.Azərtac xəbər verir ki, İsveçrə sistemi üzrə təşkil edilən yarışda ümumi hesabda ən yüksək nəticəni Paşam Əlizadə tutub. Allahverdi Həmidov ikinci, İsmayıl Süleymanlı üçüncü yerlərə layiq görülüblər. Qızlar arasında isə Xanım İsmayılova, Aytac Kərimli, Ayan Allahverdi ilk üçlükdə qərarlaşıblar.Müxtəlif yaş kateqoriyalarında Səfa Hümbətov (8 yaş), Suat İbrahimli (10 yaş), Ömər Qədimli (12 yaş), Kamal İsfəndiyarlı (14 yaş), Emin Fətullayev (16 yaş) birinci yerləri tutublar.Turnirdə 2004-cü il təvəllüdlü və daha kiçik yaşlı şahmatçılar iştirak ediblər.xeber100.com

UEFA Avropa Liqasının final mərhələsinin iştirakçıları məlum olub

UEFA Avropa Liqasının dörddəbir final mərhələsinin daha beş iştirakçısı məlum olub.Azərtac xəbər verir ki, İngiltərənin “Tottenhem” klubu Xorvatiyada “Dinamo Zaqreb” komandasının qonağı olub. Bir həftə əvvəl Londondakı görüş “Tottenhem” klubunun 2:0 hesablı qələbəsi ilə başa çatmışdı. Xorvatiyadakı cavab görüşündə də matçın əsas vaxtı meydan sahiblərinin 2:0 hesablı qələbəsi ilə başa çatdığından əlavə vaxt oynanılıb. Əlavə vaxtda bir dəfə də fərqlənən meydan sahibləri matçdan qələbə ilə ayrılıblar. “Dinamo Zaqreb”in heyətində hər üç qolu Mislav Orşiç vurub.Bundan başqa, səfərdə “Milan”ı minimal hesabla məğlubiyyətə uğradan “Mançester Yunayted”, həmçinin “Qlazqo Reyncers”in qapısından iki cavabsız top keçirən “Slaviya Praqa”, müvafiq olaraq “Dinamo Kiyev” və “Yanq Boyz” klublarını mübarizədən kənarlaşdıran “Vilyareal” və “Ayaks” klubları da növbəti mərhələyə yüksəliblər.Səkkizdəbir final mərhələsinin erkən başlayan görüşlərindən qalib ayrılan “Arsenal”, “Qranada” və “Roma” klubları da adlarını dörddəbir finala yazdırıblar.xeber100.com

Güləş üzrə Avropa Olimpiya təsnifat turniri davam edir

Macarıstanın paytaxtı Budapeştdə güləş üzrə Avropa Olimpiya təsnifat turniri davam edir.Azərtac xəbər verir ki, yarışın ikinci günündə - martın 19-da qadın güləşçilər mübarizəyə qoşulacaqlar.Millimizin heyətində Leyla Qurbanova (53 kq), Alyona Kolesnik (57 kq), Elis Manolova (68 kq) və Gözəl Zutova (78 kq) səkkizdəbir, Tatyana Omelçenko (76 kq) isə dörddəbir finaldan yarışa başlayacaqlar. Belə ki, L.Qurbanova macarıstanlı Timea Şeker, A.Kolesnik Evelina Nikolova (Bolqarıstan), T.Omelçenko Anastasiya Qriqoryeva (Latviya) - Sara Da Kol (İtaliya) cütünün qalibi ilə, E.Manolova israilli İlana Kratiş, G.Zutova isə Böyük Britaniya təmsilçisi Corcina Neltorp ilə üz-üzə gələcək.Yarış Bakı vaxtı ilə saat 14:00-da start götürəcək. Yarımfinallar isə saat 21:00-da başlayacaq. Hər çəkidə finala vəsiqə qazananlar həm də "Tokio-2020" Yay Olimpiya Oyunlarına lisenziya əldə edəcəklər. Təsnifat turniri martın 21-də başa çatacaq.Qeyd edək ki, bu gün eyni zamanda kişi sərbəst güləşçilər arasında medal görüşləri baş tutacaq. Hacı Əliyev (65 kq) və Hacımurad Hacıyev (74 kq) qızıl, İslam Bazarqanov (57 kq) və Camaləddin Məhəmmədov (125 kq) bürünc medal uğrunda mübarizə aparacaq. Abubakr Abakarov (86 kq) isə təsəlliverici görüşə çıxacaq.xeber100.com

IFFHS Avropanın ən yaxşı 10 klubunun adını açıqlayıb

Beynəlxalq Futbol Tarixi və Statistikaları Federasiyası (IFFHS) Avropada son 10 ilin "TOP-10"unu açıqlayıb.Azərtac xəbər verir ki, "İnter", "Milan", "Liverpul", "Borussiya" kimi klubların yer almadığı siyahıda İspaniya təmsilçiləri hegemonluq edir. Belə ki, ilk 5 komandadan 3-ü bu ölkəni təmsil edir. İlk pillədə 2877 xalla "Barselona" qərarlaşıb. İkinci sırada 2782 xalla "Real Madrid", üçüncü pillədə isə 2594,5 xalla "Bavariya" yer alıblar.Növbəti sıralarda PSJ (2354), "Atletiko" (Madrid) (2302) və "Yuventus" (2272) qərarlaşıb.Son dördlüyü İngiltərə klubları qapayır. "Çelsi" 2113 xalla 7-ci, eyni xala malik "Mançester Siti" 8-ci, 2020 xalı olan "Mançester Yunayted" 9-cu, 2016 xala sahib "Arsenal" 10-cudur.xeber100.com

“Novruz-2021” şahmat turniri keçiriləcək

Martın 19-da “Təhsil” Respublika İdman Mərkəzinin 3 nömrəli Respublika İxtisaslaşdırılmış Olimpiya Ehtiyatları Uşaq Gənclər İdman-Şahmat Məktəbinin təşkilatçılığı ilə “Novruz-2021” onlayn şahmat turnirinə start verilib.Azərtac xəbər verir ki, İsveçrə sistemi üzrə təşkil edilən yarış 7 turdan ibarət olacaq. Turnirdə 2004-cü il təvəllüdlü və daha kiçik yaşlı şahmatçılar iştirak edirlər.Yarışda ümumi hesabda ilk üç yeri tutan, eləcə də müxtəlif yaş kateqoriyalarında fərqlənən şahmatçılar təltif olunacaqlar.xeber100.com