Cüdo üzrə milli komandamızın üzvləri təlim-məşq toplanışı keçirlər

Qarşıdakı beynəlxalq yarışlara hazırlıqlarını davam etdirən cüdo üzrə qadınlardan ibarət milli komandamızın üzvləri Albaniyada təlim-məşq toplanışı keçirlər.Azərtac xəbər verir ki, Golem şəhərində təşkil olunan təlim-məşq toplanışında baş məşqçi Rəşad Məmmədovun rəhbərliyi ilə beş cüdoçu iştirak edir. Cüdoçularımızdan İrina Kindzerska (+78 kq) və Gültac Məmmədəliyeva (52 kq) zədə ilə əlaqədar müalicə aldıqları üçün toplanışa qatılmayıblar.Golemdə Beynəlxalq Cüdo Federasiyasının təşkilatçılığı ilə baş tutan məşqlərə Azərbaycan cüdoçuları ilə yanaşı, Fransa, İtaliya, Almaniya, İspaniya, Braziliya, Albaniya, Kosovo, Macarıstan, Polşa, Hollandiya, Türkiyə, Sloveniya, İsveçrə və digər ölkələrin yığmaları da qatılıblar.Qeyd edək ki, cüdoçularımız mart-aprel aylarında Tbilisidə və Antalyada “Böyük dəbilqə” yarışlarında, eləcə də Portuqaliyada keçiriləcək Avropa çempionatında mübarizə aparacaqlar.xeber100.com

Formula 1-də keçirilən ənənəvi test yarışları başa çatıb

Formula 1-də yeni mövsüm öncəsi keçirilən ənənəvi test yarışları başa çatıb.Azərtac xəbər verir ki, ilk gündə finiş xəttini birinci keçən Maks Ferstappen ("Red Bull") Bəhreyndəki son sınaq xarakterli yürüşdə də rəqiblərini qabaqlayıb. Niderlandlı pilot Bəhreynin “Sahir” trassında keçirilən yarışda 64 dövrəni 1 saat 28 dəqiqəyə tamamlayıb. İkinci pilləni isə bu mövsüm Formula 1-də debüt edəcək “Alfa Tauri”nin yaponiyalı piloti Yuki Tsunoda tutub. Test yarışlarının ilk iki günündə uğursuz nəticə ilə yadda qalan “Ferrari” bu dəfə avtoidman həvəskarlarını təəccübləndirə bilib. Bu komandanın heyətində debüt mövsümünü keçirəcək Karlos Sayns yarışı üçüncü sırada başa vurub. Cümə və şənbə günləri yüskək nəticələr əldə edə bilməyən son dünya çempionu Luis Hqmilton bu dəfə heç də pis təsir bağışlamayıb. “Mersedes”in britaniyalı pilotu liderdən 1 dəqiqə geri qalaraq finiş xəttini beşinci sırada başa vurub. “Ferrari”də keçirdiyi illərdə uğursuzluqla yadda qalan Sebastyan Fettel isə deyəsən “Aston Martin”də də eyni aqibətlə üzləşəcək. Hər halda, Bəhreyndəki test yarışları belə düşünməyə əsas verir. İlk iki gündə bolidində problemlər yaşayan dördqat dünya çempionu bazar günü yarışı 17-ci pillədə başa vurub.Xatırladaq ki, Formula 1-də yeni mövsüm martın 27-də elə Bəhreyndə start götürəcək. Həmin gün komandalar təsnifat mərhələsində qüvvəsini sınayacaq. Növbəti gün isə final mərhələsi keçiriləcək.xeber100.com

“Real Madrid” futbol klubu yarımmüdafiə xəttini gücləndirməyi planlaşdırır

"Real Madrid" klubu bu yay yarımmüdafiə xəttini gücləndirməyi planlaşdırır.Azərtac xəbər verir ki, Madrid klubu “Latsio”nun futbolçusu Sergey Milinkoviçi transfer etməyi qərara alıb.“Kral klubu”nun serbiyalı yarımmüdafiəçi üçün 70 milyon avro ödəməyə hazır olduğu bildirilib. “Real Madrid” rəhbərliyi Milinkoviçi Luka Modriçin əvəzləyicisi kimi görür.Qeyd edək ki, Serbiya millisinin üzvü bu mövsüm A seriyasında 23 oyuna 6 qol vurub, 8 məhsuldar ötürmə edib.xeber100.com

UEFA Çempionlar Liqasının səkkizdəbir final mərhələsində

Martın 16-da UEFA Çempionlar Liqasının səkkizdəbir final mərhələsində daha iki cavab oyunu keçiriləcək.Azərtac xəbər verir ki, qarşılaşmalardan biri Macarıstanda, digəri isə İspaniyada baş tutacaq.“Mançester Siti” klubu pandemiya səbəbindən “Borussiya Mönhenqladbax” komandasını Budapeştdəki “Puşkaş Arena”da qəbul edəcək. Bu stadiondakı ilk görüşdə 2:0 hesablı qələbə qazanan nominal meydan sahibləri növbəti mərhələyə adlamaq üçün böyük üstünlüyə malikdirlər. Oyun öncəsi “şəhərlilər”in heyətində itki yoxdur. Sadəcə müdafiəçi Natan Akenin meydana çıxıb-çıxmayacağı sual altındadır. Mönhenqladbax təmsilçisinin heyətində isə Rami Bensebaini, Kristof Kramer və Markus Tyuramın meydana çıxacağı məyyənləşməyib.Günün digər matçında “Real Madrid” İspaniyada “Atalanta” komandasını sınağa çəkəcək. “Kral klubu” səfərdəki ilk qarşılaşmada rəqibini 1:0 hesabı ilə məğlub edib. Madrid təmsilçisinin heyətində Dani Karvahal və Mariano Dias zədə, Kasemiro isə cəza səbəbindən oyunu buraxmalı olacaq. Digər zədəli futbolçu Alvaro Odriosolanın oynayıb-oynamayacağı isə bəlli deyil.Qonaqların heyətində isə əsas itki zədəli Hans Hatebur və cəzalı Remo Froylerin olmamasıdır. Həmçinin zədədən yenicə sağalan Berat Cimşiti də meydana çıxmaya bilər.Hər iki qarşılaşma Bakı vaxtı ilə gecə saat 12-də başlayacaq.xeber100.com

“Yuventus” klubunun hücumçusu futbol tarixinin ən məhsuldar oyunçusu olub

İtaliyanın “Yuventus" klubunun hücumçusu Kriştiano Ronaldo futbol tarixinin ən məhsuldar oyunçusu olub.Azərtac xəbər verir ki, o, bu nailiyyətə bu gün keçirilən İtaliya A Seriyasının 27-ci turu çərçivəsində "Kalyari" ilə oyunda nail olub.Həmin görüşdə "Yuventus" klubu 3:1 hesablı qələbə qazanıb.Portuqaliyalı het-triklə yadda qalaraq karyerasında rəsmi oyunlarda 770-ci qolun vurub. O, bu nəticəyə görə əfsanəvi braziliyalı oyunçusu Peleni qabaqlayıb.xeber100.com    

Türkiyə çempionatının XXX turu çərçivəsində keçirilən qarşılaşmada

Martın 14-də futbol üzrə Türkiyə çempionatının XXX turu çərçivəsində keçirilən qarşılaşmada “Gənclərbirliyi” səfərdə “Fənərbağça”nın qonağı olub.Azərtac xəbər verir ki, qarşılıqlı hücumlar şəraitində keçən görüşdə hesabı 35-ci dəqiqədə meydan sahiblərinin müdafiəçisi Filip Novak açıb. Lakin cəmi beş dəqiqə sonra Sərdar Əziz topu səhvən öz qapısına göndərərək hesabı bərabərləşdirib. Matçın 63-cü dəqiqəsində isə qonaqların hücumçusu Floyd Ayite "Gənclərbirliyi"nin qələbə topunu vurub.Günün digər matçlarında “Qaziantep” doğma meydanda “Dənizlispor”u 2:0 hesabı ilə udub. "Ankaragücü"də doğma divarlar arasında "Göztəpə"nin qapısından üç cavabsız top keçirib. "Ərzurumspor" - "Trabzonspor" görüşündə isə qapılar toxunulmaz qalıb - 0:0.Tura “Kasımpaşa” - “Konyaspor” qarşılaşması ilə yekun vurulacaq.Hazırda Türkiyə Superliqasının turnir cədvəlinə 63 xalla “Beşiktaş” başçılıq edir. İkinci pillədə 61 xal toplayan “Qalatasaray”, üçüncü pillədə isə 58 xala malik “Fənərbağça” qərarlaşıb.Qeyd edək ki, yeni mövsümdə Superliqada 21 komanda yarışır. XXX turda “Yeni Malatyaspor” istirahət edib.xeber100.com

“Meltvater” turnirinin ikinci yarış günündə beş turun oyunları keçirilib

Dünya çempionu Maqnus Karlsenin təşkil etdiyi nüfuzlu “Champions Chess Tour” onlayn şahmat seriyasının dördüncü - “Meltvater” turnirinin ikinci yarış günündə beş turun oyunları keçirilib.Azərtac xəbər verir ki, yarışda mübarizə aparan Azərbaycan şahmatçısı Şəhriyar Məmmədyarov ardıcıl üç qarşılaşmada — FİDE təmsilçisi Alireza Firuzca, Maqnus Karlsen və ispaniyalı David Anton Quixarroya qarşı keçirdiyi oyunlarda məğlub olub. Şahmatçımız yeganə qələbəsini 9-cu turda isveçli Nils Qrandelius üzərində qazanıb. Ş.Məmmədyarov son turda niderlandlı Aniş Giri ilə mübarizədə də məğlub olub.Turnirin altıncı turundan mübarizəyə başlayan digər təmsilçimiz T.Rəcəbov əvvəlki iki turda amerikalı Hikaru Nakamura, niderlandlı Yorden Van Forestlə heç-heçə edib, növbəti oyunlarda fransalı Maksim Vaşye-Laqrav və FIDE təmsilçisi Alireza Firuzcaya məğlub olub. Şahmatçımız günün son oyununda Maqnus Karlsenlə üz-üzə gəlib və bu qarşılaşma heç-heçə ilə nəticələnib.On turdan 4,5 xal toplayan Teymur Rəcəbov turnir cədvəlində 11-cidir. Aktivində 4 xal olan Şəhriyar Məmmədyarov isə 12-ci sırada qərarlaşıb. Ötən turların nəticəsinə görə Aniş Giri (8 xal) liderdir.xeber100.com

İspaniya La Liqasının 27-ci turunun növbəti oyunu keçirilib

Martın 13-də futbol üzrə İspaniya La Liqasının 27-ci turunun növbəti oyunu keçirilib.Azərtac xəbər verir ki, “Real Madrid” öz meydanında autsayder “Elçe” komandasını qəbul edib. Görüş madridlilərin 2:1 hesablı qələbəsi ilə başa çatıb.Oyunda hər üç qol ikinci hissədə vurulub. Matçın 61-ci dəqiqəsində “Elçe”nin futbolçusu Dani Kalvo komandasını hesabda önə çıxarsa da, “Real Madrid” ardıcıl iki qol vuraraq qələbə qazanmağa nail olub. “Elçe”nin qapısından hər iki qolu Kərim Benzema keçirib. Bununla da fransız hücumçunun cari mövsüm La Liqada vurduğu qolların sayını 15-ə çatdırıb.Bu qələbə sayəsində xal ehtiyatını 57-yə çatdıran “Real Madrid” turnir cədvəlində ikinci pilləyə yüksəlib. “Elçe” isə 24 xalla 17-ci yerdə qərarlaşıb.Qeyd edək ki, “Real Madrid”in əzəli rəqibi “Barselona” növbəti oyununu martın 15-də öz meydanda “Ueska”ya qarşı keçirəcək.xeber100.com

Şahmat seriyasının dördüncü yarış günündə 5 turun oyunları keçiriləcək

Azərbaycan şahmatçıları Şəhriyar Məmmədyarov və Teymur Rəcəbovun da iştirak etdikləri nüfuzlu “Champions Chess Tour” onlayn şahmat seriyasının dördüncü - “Meltvater” turnirinin ikinci yarış günündə növbəti 5 turun oyunları keçiriləcək.Azərtac xəbər verir ki, Şəhriyar Məmmədyarov altıncı turda FİDE təmsilçisi Alireza Firuzca ilə qarşılaşacaq. Sonrakı oyunda şahmatçımız hazırkı dünya çempionu Maqnus Karlseni qara fiqurlarla sınağa çəkəcək. Ş.Məmmədyarov növbəti 3 qarşılaşmada isə ispaniyalı David Anton Quixarro, isveçli Nils Qrandelius və niderlandlı Aniş Giri ilə üz-üzə gələcək.Teymur Rəcəbov isə ilk qarşılaşmada amerikalı Hikaru Nakamura, daha sonra niderlandlı Yorden Van Forest, fransalı Maksim Vaşye-Laqrav və Alireza Firuzca ilə mübarizə aparacaq. Şahmatçımızın son qarşılaşması Maqnus Karlsen ilə baş tutacaq. T.Rəcəbov dünya çempionuna qarşı ağ fiqurlarla mübarizə aparacaq.Qeyd edək ki, bir gün əvvəl keçirilmiş qarşılaşmalar hər iki şahmatçımız üçün uğurlu olub. Belə ki, startda Ermənistan şahmatçısı Levon Aronyanı məğlub edən Şəhriyar Məmmədyarov növbəti iki oyunları iki heç-heçə, bir qələbə və bir məğlubiyyətlə başa vurub.Digər təmsilçimiz Teymur Rəcəbov isə ilk dörd turu heç-heçə ilə başa vurub, sonuncu turda qələbə qazanıb.Yekun nəticələrə görə, 5 turdan 3 xal toplayan şahmatçılarımız 4-8-ci yerləri bölüşürlər. Turnir cədvəlinə 4 xalla Aniş Giri rəhbərlik edir.xeber100.com

Futbol üzrə Türkiyə çempionatının XXX turu çərçivəsində

Martın 13-də futbol üzrə Türkiyə çempionatının XXX turu çərçivəsində “Qalatasaray” səfərdə “Kayserispor”un qonağı olub.Azərtac xəbər verir ki, qarşılıqlı hücumlar şəraitində keçən görüşdə İstanbul təmsilçiləri meydan sahiblərinin qapısından üç cavabsız top keçiriblər. “Qalatasaray”ın qollarını Radamel Falkao (44) və Anri Onyekuru (81, 89) vurublar.Günün digər matçlarında isə “Sivasspor” doğma meydanda “Fatih Karagümrük”ü minimal hesabla məğlub edib. “Alanyaspor” isə öz meydanında “Antalyaspor”u darmadağın edib -4:0. “Hatayspor” səfərdə “Rizəspor”a 0:1 hesabı ilə məğlub olub.Hazırda Türkiyə Superliqasında turnir cədvəlinə 63 xalla “Beşiktaş” başçılıq edir. İkinci pillədə 61 xal toplayan “Qalatasaray”, üçüncü pillədə isə 58 xala malik “Fənərbağça” qərarlaşıb.Qeyd edək ki, yeni mövsümdə Superliqada 21 komanda yarışır. XXX turda “Yeni Malatyaspor” istirahət edir.xeber100.com