Beynəlxalq Cüdo Federasiyasının məlumatına görə…

Fevralın 21-dən 23-dək Almaniyanın Düsseldorf şəhərində keçiriləcək cüdo üzrə “Böyük dəbilqə” turnirində Azərbaycan böyük heyətlə - 18 cüdoçu ilə təmsil olunacaq.Azərtac Beynəlxalq Cüdo Federasiyasının saytına istinadla xəbər verir ki, turnirdə Kəramət Hüseynov, Oruc Vəlizadə (60 kq), Nicat Şıxəlizadə, Orxan Səfərov (66 kq), Rüstəm Orucov, Telman Vəliyev (73 kq), Hidayət Heydərov, Murad Fətiyev (81 kq) mübarizə aparacaqlar. Ağır çəkili cüdoçularımızdan Məmmədəli Mehdiyev (90 kq), Zelim Kotsoyev, Elmar Qasımov (100 kq), Uşangi Kokauri (+100 kq) tatami üzərinə çıxacaqlar.Qadınların yarışında isə Aişə Qurbanlı, Leyla Əliyeva (hər ikisi 48 kq), Gültac Məmmədəliyeva (52 kq), İçinxorloo Münxtsedev, Aleksandra-Larisa Florian (hər ikisi 57 kq) və İrina Kindzerska (+78 kq) güclərini sınayacaqlar.Yarışda 122 ölkədən 900-dək cüdoçu mübarizə aparacaq.xeber100.com

Türkiyə Superliqasının XX turunun sonuncu qarşılaşmasında

Fevralın 3-də Türkiyə Superliqasının XX turunun sonuncu qarşılaşmasında “Dənizlispor” doğma meydanda “Göztəpə”ni qəbul edib.Azərtac xəbər verir ki, oyuna fəal başlayan qonaq komanda 9-cu dəqiqədə hesabı açıb. Sərdar Gürlər Sonər Aydoğdunun ötürməsini dəqiq tamamlayıb – 0:1. Lakin matçın 86-cı dəqiqəsində meydan sahiblərinin hücumçusu Oskar Estupinan komandasını məğlubiyyətdən xilas edib. Beləliklə, “Dənizlispor” - “Göztəpə” matçında qalib müəyyənləşməyib - 1:1.Türkiyə çempionatının XX turundan sonra turnir cədvəlinə 41 xalla “Sivasspor” klubu liderlik edir. Sonrakı yerlərdə “Başakşəhər” (39 xal), “Trabzonspor” (38 xal), “Alanyaspor” (38 xal), “Fənərbağça” (37 xal), “Qalatasaray” (36 xal), “Beşiktaş” (33 xal) və digər komandalar qərarlaşıblar.xeber100.com

Şahmat üzrə Azərbaycan çempionatı keçiriləcək

Martın 3-dən 14-dək qadınlar arasında şahmat üzrə Azərbaycan çempionatı keçiriləcək.Azərtac xəbər verir ki, yarışda 10 şahmatçı mübarizə aparacaq. Turnir dairəvi sistem üzrə təşkil ediləcək.xeber100.com

“Qalatasaray” futbol klubu “Kayserispor”u qəbul edib

Fevralın 2-də Türkiyə Superliqasının XX turu çərçivəsində keçirilən qarşılaşmada “Qalatasaray” doğma meydanda “Kayserispor”u qəbul edib.Azərtac xəbər verir ki, oyuna fəal başlayan İstanbul təmsilçiləri artıq beşinci dəqiqədə hesabı açıblar. Adəm Böyük Marianonun ötürməsini dəqiq tamamlayıb. Görüşün 21-ci dəqiqəsində “Qalatasaray”ın yarımmüdafiəçisi Rayan Donk hesab arasındakı fərqi artırıb. Sofian Fequli isə 64-cü dəqiqədə komandasının üçüncü qolunu vurub. Cəmi beş dəqiqə sonra Kayseri təmsilçisinin hücumçusu Muris Mesanoviç vurulan qollardan birinin əvəzini çıxıb. Matçın son dəqiqələrində Sofian Fequli dubl edərək “Qalatasaray”ın qələbəsini rəsmiləşdirib - 4:1.Günün digər qarşılaşmasında turnir cədvəlinin lideri “Sivasspor” səfərdə “Qaziantep” komandasına 1:5 hesabı ilə uduzub. “Ankaragücü” – “Kasımpaşa” oyununda qalib müəyyənləşməyib - 1:1. “Alanyaspor” isə doğma meydanda “Yeni Malatyaspor”u 2:1 hesabı ilə məğlub edib.Tura fevralın 3-də oynanılacaq “Denizlispor” – “Göztəpə” görüşü ilə yekun vurulacaq.Hazırda turnir cədvəlinə 41 xalla “Sivasspor” klubu liderlik edir. Sonrakı yerlərdə “Başakşəhər” (39 xal), “Trabzonspor” (38 xal), “Alanyaspor” (38 xal), “Fənərbağça” (37 xal), “Qalatasaray” (36 xal), “Beşiktaş” (33 xal) və digər komandalar qərarlaşıblar.xeber100.com

“Eurotalents U-13” layihəsi çərçivəsində təlim-məşqlər başlayıb

Avropa Stolüstü Tennis Birliyinin (ASTB) inkişaf proqramının bir hissəsi olan “Eurotalents U-13” layihəsi çərçivəsində təlim-məşq toplanışına start verilib. Toplanışa layihə çərçivəsində keçirilmiş seçim turlarında uğurla çıxış etmiş stolüstü tennisçilər qatılıblar.Azərbaycan Stolüstü Tennis Federasiyasından Azərtac-a bildiriblər ki, fevralın 3-dən 8-dək Çexiyanın Ostrava şəhərində keçirilən təlim-məşqlərdə təmsilçimiz Adil Əhmədzadə məşqçi Ramil Cəfərovun rəhbərliyi ilə hazırlığını artırır. Təlim-məşqlərin sonuncu günündə iştirakçılar beynəlxalq turnirdə qüvvələrini sınayacaqlar.Qeyd edək ki, ötən il ASTB-nin təşkilatçılığı ilə “ETTU Eurotalents” adlı istedadların axtarışı proqramının seçmə turunda gənc idmançımız A.Əhmədzadə uğurla mübarizə apararaq Avropanın 13 yaşadək istedadlı stolüstü tennisçiləri siyahısına salınıb.xeber100.com

Milli Karate Federasiyasının məlumatı əsasında…

Fevralın 7-dən 9-dək Macarıstanın paytaxtı Budapeştdə yeniyetmə və gənclərin 47-ci, 21 yaşadək karateçilərin isə 12-ci Avropa çempionatı keçiriləcək.Azərbaycan Milli Karate Federasiyasının mətbuat xidmətindən Azərtac-a verilən məlumata görə, hər iki çempionatda iştirak edəcək milli komandamızın heyətinə federasiyanın prezidenti Yaşar Bəşirov rəhbərlik edəcək. Kumite üzrə baş məşqçi Anar Allahverdiyev, böyük məşqçi Şahin Xudaverdiyev və qadınların baş məşqçisi Denis Morozov, həmçinin kata üzrə baş məşqçi Vahid Ayvazov mötəbər yarışda 30 idmançının mübarizə aparmasına üstünlük verib. Belə ki, 14-15 yaşlı yeniyetmələr arasında yarışlarda Məhəmməd Xamoyev (52 kq), Fərid Savadov (57 kq), Rumil Cəfərli (63 kq), Vahid Həsənov (70 kq), Elgün İmanquliyev (+70 kq), Aysu Əliyeva (47 kq), Suada Kərimova (54 kq), Arina Bezrebra (+54 kq), həmçinin Elcan Səmədzadə və Samirə Məmmədova (kata) çıxış edəcəklər.Sultan Hüseynov (55 kq), Əminağa Quliyev (61 kq), Tale Yaqubov (68 kq), Fərid Ağayev (76 kq), Osman Osmanlı (+76 kq), Xumar Əlibəyova (48 kq), Polina Qurenko (53 kq), Ayla Rzazadə (59 kq), eləcə də, Həsənəli Həsənov və Zəhra Qurbanzadə (kata) 16-17 yaşlı gənclər arasında mübarizə aparacaqlar.Müseyib Məmmədov (60 kq), Hümmət Baxşəliyev (67 kq), Qasım İsgəndərov (75 kq), Murad Balakişiyev (84 kq), Murad Hacızadə (+84 kq), Fidan Teymurova (50 kq), Mədinə Sadıqova (55 kq), Renata Ərəbli (61 kq), Zamirə Rzayeva (68 kq) və Ceyhun İsmayılov (kata) 18-20 yaşlı gənclərin yarışında güclərini sınayacaqlar.Beynəlxalq hakimlər Cahangir Babayev və Vüqar Kərimov də heyətlə birgə Macarıstana ezam olunublar. Yeniyetmə və gənclərin 47-ci, 21 yaşadək karateçilərin isə 12-ci Avropa çempionatında 52 ölkədən 1155 idmançı mübarizə aparacaq.xeber100.com

Azərbaycan Gimnastika Federasiyası turnir təşkil edəcək

Martın 7-8-də Azərbaycan Gimnastika Federasiyası (AGF) ilk dəfə olaraq kişi idman gimnastikası üzrə birinci “AGF Junior Trophy” adlı beynəlxalq turnir təşkil edəcək.Azərtac AGF-yə istinadla xəbər verir ki, Milli Gimnastika Arenasında təşkil olunacaq turnirdə gənclər yaş qrupuna daxil olan 2003-2006-cı il təvəllüdlü gimnastlar öz bacarıqlarını nümayiş etdirəcəklər.Yarışa ilkin qeydiyyat siyahısına əsasən turnirdə 13 ölkə iştirakını təsdiqləyib.Qeyd edək ki, bu yarış mayın 27-31-d ə Milli Gimnastika Arenasında təşkil ediləcək kişi idman gimnastikası üzrə Avropa çempionatından öncə gənc gimnastlar üçün bir növ sınaq turniri rolunu oynayacaq.xeber100.com

Lissabonda keçirilən açıq şahmat turniri başa çatıb

Portuqaliyanın paytaxtı Lissabonda keçirilən açıq şahmat turniri başa çatıb.Azərtac xəbər verir ki, turnirin klassik yarışlarında mübarizə aparan Azərbaycan şahmatçılarından Vüqar Əsədli 9 turdan 7 xal toplayıb. Bu nəticə ilə liderdən cəmi 0,5 xal geri qalan V.Əsədli 2-9-cu yerləri bölüşüb. Komandamızın digər üzvlərindən Zaur Bayramov 6 xalla 23-cü, Nail Bəşirli 5,5 xalla 40-cı yerləri tutublar.İsveçrə sistemi üzrə keçirilən yarışda 227 şahmatçı mübarizə aparıb.xeber100.com

Azərbaycan Premyer Liqasının 15-ci turunun növbəti görüşündə

Fevralın 2-də futbol üzrə Azərbaycan Premyer Liqasının 15-ci turunun növbəti görüşündə “Qəbələ” doğma meydanda "Keşlə”ni qəbul edib.Azərtac xəbər verir ki, Qəbələ şəhər stadionunda keçirilən oyuna qonaqlar fəal başlayıblar. Görüşün 35-ci dəqiqəsində hesabı Bakı təmsilçilərinin müdafiəçisi Miyusko Boyoviç açıb. Cəmi beş dəqiqə sonra "Keşlə"nin hücumçusu Sezar Meza Kolli hesab arasındakı fərqi artırıb. Lakin meydan sahiblərinin müdafiəçisi İvika Zuniç 60-cı dəqiqədə hesab arasındakı fərqi minimuma endirsə də, komandanın bundan artığına gücü çatmayıb. Beləliklə, matçda "Keşlə" komandası 2:1 hesabı ilə meydan sahibi "Qəbələ"ni məğlub edib.Premyer Liqanın XV turuna “Səbail” - “Qarabağ” matçı ilə yekun vurulacaq. Bu oyunda ədaləti İnqilab Məmmədov qoruyacaq.On dörd turdan sonra turnir cədvəlinə 31 xalla “Qarabağ” klubu başçılıq edir. Aktivində 26 xalı olan “Keşlə" və "Neftçi” isə müvafiq olaraq ikinci və üçüncü yerdə qərarlaşıb. Digər pillələrdə müvafiq olaraq “Zirə” (20), “Sumqayıt” (19), “Sabah” (13), “Qəbələ” (13) və “Səbail” (12) yer alıb.xeber100.com

İtaliya A Seriyasının 22-ci turunun oyunları keçirilib

Fevralin 2-də İtaliya A Seriyasının 22-ci turunun oyunları keçirilib.Azərtac xəbər verir ki, turnir cədvəlinin hazırkı lideri “Yuventus” öz meydanında “Fiorentina” klubunu qəbul edib.“Allianz” stadionunda baş tutan görüş 3:0 hesabı ilə meydan sahiblərinin xeyrinə başa çatıb.Turin təmsilçisinin heyətində Kriştiano Ronaldo (2) və Matias De Liqt fərqlənib.Bu qələbə sayəsində “Yuventus” aktivinə 54-cü xalı yazaraq ən yaxın izləyici, bir oyun az keçirdən “İnter”dən beş xal irəlidədir. “Fiorentina” isə 25 xalla 14-cü yerdə qərarlaşıb.Digər maraq doğuran oyun “San Siro” stadionunda qeydə alınıb. Son zamanlar yaxşı oyunu ilə diqqət çəkən “Milan” doğma azarkeşlər önündə “Hellas Verona” klubunu qəbul edib. Görüş 1:1 hesabı ilə heç-heçə başa çatıb.Turnir cədvəlində üçüncü yerdə qərarlaşan “Latsio” isə SPAL-ı böyük hesabla məğlub edib - 4:1.Xatırladaq ki, turun ilk oyun günündə “Bolonya” öz meydanında “Breşiya”nı məğlub edib (2:1), “Kalyari” - “Parma” oyununda isə qalib müəyyənləşməyib (2:2). “Roma” isə səfərdə gözlənilmədən “Sassuolo”ya məğlub olub (4:2).xeber100.com