Azərbaycan Taekvondo Federasiyasının məlumatına görə…

Noyabrın 1-də İtaliyanın Bari şəhərində G4 kateqoriyalı Avropa Oyunlarına start veriləcək.Azərbaycan Taekvondo Federasiyasından Azərtac-a bildiriblər ki, beynəlxalq yarışda böyüklərdən ibarət yığma komandamızın altı üzvü mübarizə aparacaq. Millinin heyətində Qaşım Maqomedov (58 kq), Cavad Ağayev (68 kq), Radik İsayev (+80 kq), Patimat Abakarova (53 kq), Fəridə Əzizova (67 kq) və Zahra Fazel Kalxoran (+67 kq) yer alıblar.Avropanın 45 ölkəsindən 213 idmançının (114 kişi, 99 qadın) reytinq xalları uğrunda yarışacağı turnirdə qalib taekvondoçu aktivinə 40 xal, ikinci yeri tutan 24,5 xal, bürünc medalçılar isə 17,5 xal yazdıracaqlar.Turnirə noyabrın 3-də yekun vurulacaq.Azərbaycan Taekvondo Federasiyasının vitse-prezidenti Niyaməddin Paşayev, baş məşqçilər Reza Mehmandoust və Elnur Amanovun rəhbərlik etdiyi komandamız noyabrın 4-də vətənə qayıdacaq.xeber100.com

İtaliya A Seriyasının 10-cu turunun növbəti oyunlarında

Oktyabrın 30-da futbol üzrə İtaliya A Seriyasının 10-cu turunun növbəti oyunları keçirilib.Azərtac xəbər verir ki, turun mərkəzi qarşılaşması “San Paolo” stadionunda oynanılıb. “Napoli” öz meydanında “Atalanta” komandasını qəbul edib. Gərgin keçən görüşdə qalib müəyyənləşməyib - 2:2.Cari mövsüm yaxşı oyunu ilə diqqət çəkən “İnter” səfərdə “Breşiya” komandanı 2:1 hesabı ilə məğlub edib. Son çempion “Yuventus” Turinin digər təmsilçisi “Torino” ilə üz-üzə gəlib. Üç qırmızı vərəqənin göstərildiyi oyunda “qoca sinyora” son dəqiqələrdə vurduğu qolla 2:1 hesabı ilə qələbə qazanıb.Çempionatın favoritlərindən sayılan “Roma” isə səfərdə “Udineze”ni böyük hesabla məğlub edib – 0:4.Turun digər oyunlarında aşağıdakı nəticələr qeydə alınıb: “Kalyari” - “Bolonya” - 3:2; “Latsio” - “Torino” - 4:0; “Sampdoriya” - “Leççe” - 1:1; “Sassuolo” - “Fiorentino” - 1:2; “Parma” - “Verona” - 0:1. Tura oktyabrın 31-də keçiriləcək “Milan” - SPAL oyunu ilə yekun vurulacaq.xeber100.com

Futzal üzrə Yüksək Liqada V turun oyunları keçiriləcək

Bu gün futzal üzrə Yüksək Liqada V turun oyunları keçiriləcək.Azərtac xəbər verir ki, tura “Xızı”-“Yasamal” oyunu ilə start veriləcək. Saat 12:00-da başlayacaq görüşün baş hakimi Ramiz Məhərrəmov olacaq.Saat 14:00-da start götürəcək “Neftçi”-“Baku Fire” qarşılaşması Anar Fərəcova tapşırılıb.“Premier”-“Araz” oyununda Hikmət Qafarlı ədaləti qoruyacaq. Görüş saat 16:00-da başlayacaq.EKOL-“Record” arasında keçiriləcək oyuna Əli Cəbrayılov təyinat alıb. Qarşılaşmanın start fiti saat 18:00-da səsləndiriləcək.Tura “Marafon”-“Bakı” matçı ilə yekun vurulacaq. Saat 20:00-da start götürəcək oyunun baş hakimi Azər Əsgərov olacaq.Turun oyunları “Olimpik Star”da təşkil olunacaq.Qeyd edək ki, 12 xala malik “Araz” və “Neftçi” turnir cədvəlində ilk iki pillədə yer alıblar. EKOL isə 9 xalla üçüncü pillədə qərarlaşıb.xeber100.com

Ümumdünya Şahmat Olimpiadasının ikinci turuna start veriləcək

Oktyabrın 30-da Türkiyənin Çorum şəhərində keçirilən 16 yaşlılar arasında Ümumdünya Şahmat Olimpiadasının ikinci turuna start veriləcək.Azərtac xəbər verir ki, ölkəmizi bu yarışda təmsil edən 16 yaşadək əsas yığmanın üzvləri – “Azərbaycan” komandası ABŞ, digər yığmamız – “Azərbaycan-Naxçıvan” şahmatçıları Tailand təmsilçiləri ilə mübarizə aparacaqlar.Əsas yığmanın heyətində mübarizə aparan Aydın Süleymanlı, Əhməd Əhmədzadə, Vüqar Manafov və Gövhər Beydullayeva birinci turda Monqolustan şahmatçılarını 3:1 hesabı ilə məğlub ediblər. Şahmatçılarımızdan A.Süleymanlı və G.Beydullayeva qarşılaşmaları qələbə ilə başa vurublar, Ə.Əhmədzadə və V.Manafov heç-heçə ediblər.Xəzər Babazadə, Sadiq Məmmədov, Sadiq Qarayev, Nəsrin Babayevanın çıxış etdiyi “Azərbaycan-Naxçıvan” komandası isə debütdə Qazaxıstan yığmasına uduzub - 1:3. X.Babazadə, S.Məmmədov rəqibləri ilə heç-heçə edib, S.Qarayev və N.Babayeva isə məğlub olublar.Ümumilikdə 48 komandanın mübarizə apardığı olimpiada noyabrın 6-dək davam edəcək.xeber100.com

Güləşçilər arasında dünya çempionatı davam edir

Macarıstanın paytaxtı Budapeştdə 23 yaşadək güləşçilər arasında dünya çempionatı davam edir. Çempionatın ikinci günündə - oktyabrın 29-da sərbəst güləşçilərimiz 4 medal qazanıblar.Azərtac xəbər verir ki, mübarizəyə səkkizdəbir finaldan qoşulan Turan Bayramov (65 kq) ilk görüşündə kanadalı həmkarını məğlub edib. Həmyerlimiz moldovalı rəqibinə də gücünü göstərərək yarımfinala yüksəlib. Fransa təmsilçisi ilə qarşılaşma gərgin idman mübarizəsi şəraitində keçib. Turan ilk hissəni 0:1 geridə başa vursa da, ikinci yarıda rəqibi əks-fəndə salaraq qələbə qazanıb və debüt etdiyi U-23 dünya çempionatının finalına vəsiqə qazanıb. Yapon güləşçi ilə finalda sona az qalmış rəqibi əks-fənddə yaxalayan T.Bayramov 23 yaşadək güləşçilər arasında dünya çempionu olub.Millimizin digər üzvü Abubakr Abakarov (79 kq) mundiala inamlı start verib. Titullu güləşçimiz ilk mərhələdə qırğız rəqibinə vaxtından əvvəl qalib gəlib. Təmsilçimiz daha sonra Rusiya güləşçisini tam üstünlüklə yenib. Yarımfinalda Moldova idmançısını çətinlik çəkmədən ilk hissədə məğlub edən A.Abakarov adını yarımfinala yazdırıb. Hindistan güləşçisinə də aman verməyən təmsilçimiz finalda güləşmək hüququ qazanıb. Həlledici qarşılaşmaya çox yaxşı başlayan A.Abakarov 4 xal qazansa da, çevirmə fəndi edərkən səhvə yol verərək gürcü həmkarına uduzub və gümüş medalla kifayətlənib.xeber100.com  

İspaniya La Liqasının XI turunun ikinci qarşılaşmasında

Oktyabrın 29-da futbol üzrə İspaniya La Liqasının XI turunun ikinci qarşılaşmasında “Barselona” doğma meydanda “Valyadolid”i qəbul edib.Azərtac xəbər verir ki, gözlənildiyi kimi, görüşə meydan sahibləri fəal başlayıblar. Artıq 2-ci dəqiqədə Kataloniya klubunun müdafiəçisi Lenqle hesabı açıb – 1:0. Lakin qonaqlar 15-ci dəqiqədə Kiko Olivasın vurduğu qol sayəsində hesaba tarazlıq gətiriblər – 1:1. Meydan sahibləri 29-cu dəqiqədə Vidalın qolu ilə yenidən hesabda önə keçiblər. Cəmi 5 dəqiqə sonra “Barselona”nın argentinalı hücumçusu Messi hesab arasındakı fərqi artırıb – 3:1. Birinci hissə elə bu hesabla başa çatıb.Matçın 75-ci dəqiqəsində Ernesto Valverdenin yetirmələri yenidən fərqləniblər. Rakitiçin ötürməsni Messi dəqiq yerinə yetirərək dubla imza atıb. Qoldan 2 dəqiqə sonra Messi bu dəfə assistlə diqqət mərkəzinə düşüb. Onun ötürməsini Luiz Suarez dəqiq tamamlayıb.Beləliklə, “Barselona” doğma meydanda “Valyadolid”i 5:1 hesabı ilə darmadağın edib.Bu qələbədən sonra Kataloniya klubu 22 xalla turnir cədvəlinin vahid liderinə çevrilib.xeber100.com

Azərbaycan Premyer Liqasında IX tura yekun vurulub

Oktyabrın 28-də Futbol üzrə Azərbaycan Premyer Liqasında IX tura yekun vurulub.Azərtac xəbər verir ki, turun son oyununda “Qarabağ” “Səbail”lə qarşılaşıb.Tofiq Bəhramov adına Respublika Stadionunda təşkil olunan qarşılaşma Ağdam təmsilçisinin 1:0 hesablı qələbəsi ilə bitib. Görüşdəki yeganə qol 86-cı dəqiqədə vurulub. Qara Qarayevin zərbəsi dəqiq alınıb.Bu nəticədən sonra “Qarabağ” 25-ci xalını qazanıb və liderliyini daha da möhkəmləndirib. “Səbail” isə 10 xalla 4-cü yerdədir.Qeyd edək ki, turun ilk 3 oyununda “Keşlə” evdə “Qəbələ”ni 2:1, “Neftçi” səfərdə “Sumqayıt”ı 4:2 hesabı ilə yenib, “Sabah” – “Zirə” matçında isə qalib müəyyənləşməyib - 2:2.xeber100.com

Güləşçilər arasında dünya çempionatı davam edir

Macarıstanın paytaxtı Budapeştdə 23 yaşadək güləşçilər arasında dünya çempionatı davam edir.Azərtac xəbər verir ki, ikinci yarış günündə 61, 74, 86, 92 və 125 kiloqram çəki dərəcələrində çıxış edən sərbəst güləşçilər mübarizəyə qoşulacaq.Birincilik uğrunda mübarizə aparacaq güləşçilərimizin ilk rəqibləri müəyyənləşib. Belə ki, Əsgər Məmmədəliyev (61 kq) ukraynalı Valentin Bliasetski, Murad Süleymanov (74 kq) Yaqor Akuliç (Belarus), Hacımurad Məhəmmədsəidov (86 kq) Almaniya təmsilçisi Yohannes Martin Deml, Şamil Zubairov (92 kq) isə bolqarıstanlı Bojidar Mateyev Todorov ilə qarşılaşacaq.Çempionatın birinci günündə sərbəst güləşçilərimizdən Turan Bayramov (65 kq) və Abubakr Abakarov (79 kq) uğurla çıxış edərək finala yüksəliblər. Bu gün keçiriləcək həlledici qarşılaşmalarda T.Bayramov Yaponiya təmsilçisi Takuma Taniyama, A.Abakarov isə gürcü Tariel Qaprindaşvili ilə üz-üzə gələcək.xeber100.com

“Sumqayıt” futbol klubu Premyer Liqanın 9-cu turu çərçivəsində

“Sumqayıt” futbol klubu Premyer Liqanın 9-cu turu çərçivəsində keçirilən “Neftçi” ilə qarşılaşmada tarixinə 250-ci qolu yazıb.Klubun mətbuat xidmətindən Azərtac-a bildirilib ki, 250-ci qolu Rəhim Sadıxov 90+2-ci dəqiqədə vurub. “Sumqayıt” FK Azərbaycan çempionatları tarixində ən azı 250 qol vuran 15-ci komandadır.xeber100.com

XIV Respublika spartakiadası çərçivəsində şahmat yarışları keçirilib

Orta ixtisas təhsil müəssisələri arasında XIV Respublika spartakiadası çərçivəsində şahmat yarışları keçirilib.Azərtac xəbər verir ki, Azərbaycan Dövlət Pedaqoji Kollecinin idman zalında oğlanlar və qızlar arasında keçirilən yarışda, ümumilikdə 12 komanda iştirak edib.Qızlar arasında birinci yeri Azərbaycan Dövlət Pedaqoji Kollecinin tələbələri tutublar. İkinci və üçüncü yerdə Bakı İdarəetmə və Texnologiya və Bakı 2 nömrəli Baza Tibb kolleclərinin idmançıları qərarlaşıblar.Oğlanların yarışında isə ilk üç yeri Bakı İdarəetmə və Texnologiya, Bakı 2 nömrəli Baza Tibb və Bakı Rabitə və Nəqliyyat kolleclərinin komandaları tutublar.xeber100.com