Oktyabrın 26-na gözlənilən hava proqnozu açıqlanıb

Ölkə ərazisində oktyabrın 26-na gözlənilən hava proqnozu açıqlanıb.Ekologiya və Təbii Sərvətlər Nazirliyinin Milli Hidrometeorologiya Departamentindən Azərtac-a verilən məlumata görə, Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Səhər bəzi yerlərdə zəif duman olacaq. Şimal-şərq küləyi əsəcək. Havanın temperaturu Abşeron yarımadasında gecə 12-15°, gündüz 19-22° isti, Bakıda gecə 12-14°, gündüz 19-21° isti olacaq. Atmosfer təzyiqi 765 millimetr civə sütunundan 760 millimetr civə sütununa enəcək, nisbi rütubət gecə 70-80, gündüz 50-55 faiz təşkil edəcək.Azərbaycanın rayonlarında hava əsasən yağmursuz keçəcək, lakin gecə və axşam bəzi şimal və şərq rayonlarında şimşək çaxacağı, yağış yağacağı ehtimalı var. Ayrı-ayrı yerlərdə duman olacaq. Şərq küləyi əsəcək. Havanın temperaturunun gecə 10-15°, gündüz 20-24° isti, dağlarda gecə 4-9°, gündüz 12-16° isti olacağı ehtimal edilir.Sinoptiklərin tibbi-meteoroloji proqnozuna görə, oktyabrın 26-27-də Abşeron yarımadasında iqlim normasına yaxın temperatur rejimi və meteoroloji amillərin zəif tərəddüdü gözlənilir ki, bu da meteohəssas insanlar üçün əlverişlidir.Naxçıvan Muxtar Respublikasında hava əsasən yağmursuz keçəcək. Lakin axşam saatlarında bəzi yerlərdə şimşək çaxacağı, qısamüddətli yağış yağacağı ehtimalı var. Şərq küləyi əsəcək. Havanın temperaturu gecə 5-10°, gündüz 19-24° isti olacaq.Yuxarı Qarabağ: Xankəndi, Şuşa, Xocalı, Xocavənd, Qubadlı, Zəngilan, Laçın, Kəlbəcər, Daşkəsən, Gədəbəy rayonlarında hava əsasən yağmursuz keçəcək. Lakin axşama doğru bəzi yerlərdə şimşək çaxacağı, yağış yağacağı gözlənilir. Səhər ayrı-ayrı yerlərdə duman olacaq. Şərq küləyi əsəcək. Havanın temperaturunun gecə 4-9°, gündüz 12-16° isti olacağı ehtimal edilir.Gəncə şəhərində, Qazax, Goranboy, Tərtər, Ağdam, Füzuli, Cəbrayıl rayonlarında hava əsasən yağmursuz keçəcək. Səhər bəzi yerlərdə duman olacaq. Şərq küləyi əsəcək. Havanın temperaturunun gecə 8-13°, gündüz 19-24° isti olacağı proqnozlaşdırılır.Balakən, Zaqatala, Qax, Şəki, Oğuz, Qəbələ, İsmayıllı, Ağsu, Şamaxı, Siyəzən, Şabran, Xızı, Quba, Xaçmaz, Qusar rayonlarının bəzi yerlərində gün ərzində şimşək çaxacağı, arabir yağış yağacağı gözlənilir. Ayrı-ayrı yerlərdə duman olacaq. Şərq küləyi əsəcək. Havanın temperaturunun gecə 6-11°, gündüz 16-21° isti, dağlarda gecə 0-4°, gündüz 8-13° isti olacağı bildirilir.Mərkəzi Aran: Mingəçevir və Şirvan şəhərlərində, Yevlax, Göyçay, Ağdaş, Kürdəmir, İmişli, Ağcabədi, Beyləqan, Sabirabad, Biləsuvar, Saatlı, Hacıqabul, Salyan, Neftçala rayonlarında hava əsasən yağmursuz keçəcək. Səhər bəzi yerlərdə duman olacaq. Şərq küləyi əsəcək. Havanın temperaturunun gecə 10-15°, gündüz 20-24° isti olacağı gözlənilir.Masallı, Yardımlı, Lerik, Lənkəran, Astara rayonlarının bəzi yerlərində gün ərzində şimşək çaxacağı, arabir yağış yağacağı ehtimalı var. Səhər dağlarda duman olacaq. Şərq küləyi əsəcək. Havanın temperaturunun gecə 12-15°, gündüz 18-23° isti, dağlarda gecə 6-9°, gündüz 10-15° isti olacağı ehtimalı var.xeber100.com

“Vətən” klubunun açıq birinciliyi keçiriləcək

Noyabrın 10-da Şağan Olimpiya Kompleksində kikboksinqin kik-layt versiyası üzrə “Vətən” klubunun açıq birinciliyi keçiriləcək.Azərtac xəbər verir ki, 9 Noyabr - Dövlət Bayrağı Günü münasibətilə təşkil ediləcək yarışda 8-10 yaşlı idmançılar 20, 22, 24, 26, 28 və 32 kiloqram çəki dərəcəsində yarışacaqlar.On yaşdan on üç yaşadək idmançılar isə 26, 28, 32, 37, 42, 47 kiloqram və 47 kiloqramdan yuxarı çəki dərəcələrində mübarizə aparacaqlar.xeber100.com

Karate üzrə XI dünya çempionatı davam edir

Çilinin paytaxtı Santyaqo şəhərində karate üzrə XI dünya çempionatı davam edir.Azərtac xəbər verir ki, yarışın ilk günündə mübarizəyə qatılan Roman Heydərov (21 yaşadək, kata) yarımfinalda çıxışını başa vurub. Bürünc medal uğrunda görüşə qatılmaq üçün 0.20 xalı çatmayan R.Heydərov nəticədə 6-7-ci yerləri bölüşüb.Turnirin ikinci günündə 14-15 yaşlı yeniyetmə karateçilərimiz çempionatı mükafatsız başa vurublar.Oktyabrın 25-də 16-18 yaşlı gənclər mübarizəyə qatılacaqlar. Oğlanlar arasında Sultan Hüseynov (55 kq), Hüseyn Məmmədli (61 kq), Tale Yaqubov (68 kq), Hüseyn Hüseynzadə (76 kq) və Namiq Quliyev (76 kq-dan yuxarı), qızların yarışında Fidan Dadaşova (48 kq), Polina Qurenko (53 kq) və Ayla Rzazadə (59 kq) tatamiyə çıxacaqlar.Yeniyetmə və gənclərin dünya çempionatı oktyabrın 27-də başa çatacaq.xeber100.com

Həndbol Federasiyasınn məlumatı əsasında…

Qadın həndbolçuların Azərbaycan çempionatında üçüncü turun oyunları arxada qalıb.Azərbaycan Həndbol Federasiyasından Azərtac-a bildiriblər ki, mövsümə inamla start verən “Qarabağ” uğurlu seriyanı davam etdirir. İlk turda “İdman Akademiyası” komandasına, ardınca çempion “Azəryol”a qalib gələn “Qarabağ” “Azərsu” ilə görüşdə də azarkeşlərini sevindirib.Gərgin idman mübarizəsi ilə yadda qalan oyun 29:27 hesabı ilə başa çatıb. Ardıcıl üçüncü qələbəsini qazanan “Qarabağ” turnir cədvəlində liderliyini davam etdirir.Günün digər qarşılaşmasından isə “Azəryol” qalib ayrılıb. “İdman Akademiyası” komandası çox çalışsa da, ölkə çempionunun böyük hesablı qələbəsinə mane ola bilməyib – 42:25.Dördüncü turun oyunları noyabrın 6-da keçiriləcək. Həmin gün “Azəryol” komandası “Azərsu”, “Qarabağ” isə “İdman Akademiyası” ilə üz-üzə gələcək.Oktyabrın 26-da kişi həndbolçuların çempionatında 3-cü turun görüşləri olacaq. “ABU Arena”da keçiriləcək oyunlarda “Məhsul” komandası U-18 kollektivini sınağa çəkəcək. “Təhsil” isə “Bakı” ilə qarşılaşacaq.xeber100.com

Beynəlxalq Futbol Federasiyaları Assosiasiyasının iclası keçiriləcək

Beynəlxalq Futbol Federasiyaları Assosiasiyasının (FIFA) növbəti iclası bu gün Şanxayda keçiriləcək. İclasda 2021-ci ildə çimərlik futbolu üzrə dünya çempionatının harada keçiriləcəyi müəyyən edilməlidir. Turnirə Çili, Rusiya və Salvador ev sahibliyi etmək iddiasındadır.Azərtac xəbər verir ki, iclasın Şanxayda keçirilməsi səbəbsiz deyil: 2021-ci ildən etibarən yeni formatda keçiriləcək klublararası dünya çempionatını ilk dəfə məhz Çində keçirmək planlaşdırılır. Əsas dəyişiklik ondan ibarətdir ki, iştirakçı komandaların sayı artırılaraq, 7-dən 24-ə çatdırılıb.FIFA Şanxayda həm də 17 yaşa qədər və 17-20 yaşlı oyunçular arasında dünya çempionatlarının keçiriləcəyi yerləri də müəyyən edəcək. Çimərlik futbolu üzrə dünya çempionatının harada keçirilməsi məsələsinə gəldikdə, Rusiya Futbol İttifaqı (RFİ) bu turnirə ev sahibliyi etmək üçün öz sifarişini hələ iyun ayında təsdiq edib. RFİ-nin baş katibi Aleksandr Alayev deyib: “RFİ İcraiyyə Komitəsi bu idman növü üzrə ən prestijli və yüksəkstatuslu turnir olan 2021-ci il dünya çempionatının keçirilməsi üçün Moskvanın sifarişini bəyənib. Biz əminik ki, iddiaçı kimi gəlmək üçün hər cür şansımız var”.Çimərlik futbolu üzrə ilk dünya çempionatı 1995-ci ildə keçirilib. 2005-ci ilə qədər hər il keçirilən çempionat sonradan iki ildə bir dəfə keçirilməyə başlandı. İndiyə qədər Braziliya bu turnirə 13 dəfə, Fransa, BƏƏ, İtaliya, Taiti, Portuqaliya və Baham adaları hərəsi bir dəfə ev sahibliyi edib. 2019-cu ilin dünya çempionatı noyabrın 21-dən dekabrın 1-dək Paraqvayda keçiriləcək. Rusiya yığması bu çempionatların tarixində iki dəfə (2011, 2013-cü illərdə) qalib gəlib.FIFA-nın iclasında 2022-ci ildə Qətərdə keçiriləcək futbol üzrə dünya çempionatı matçlarının təqvimi də təsdiq ediləcək. Yay vaxtı Qətərdə havanın temperaturunun çox yüksək olması nəzərə alınaraq, turnirin keçirilmə müddəti ilin son aylarına dəyişdirilib. Beləliklə, 2022-ci ildə dünyanın ən yaxşı yığmaları bu turnirdə mükafatlar uğrunda noyabrın 21-dən dekabrın 18-dək mübarizə aparacaqlar.Bugünkü iclasda 2030-cu il dünya çempionatının sifariş kampaniyasının müddəti də müəyyən ediləcək. Bir qədər əvvəl Argentina, Çili, Paraqvay və Uruqvay həmin çempionatın keçirilməsi üçün birgə sifariş vermək arzusunda olduqlarını bildiriblər.

Şahmat üzrə beynəlxalq turnir start götürəcək

Oktyabrın 25-də Kiprin Larnaka şəhərində şahmat üzrə beynəlxalq turnir start götürəcək.Azərtac xəbər verir ki, ölkəmizi turnirdə qrossmeyster Azər Mirzəyev təmsil edəcək.Yarışa 140 şahmatçı qatılacaq ki, onların da 12-si qrossmeysterdir.Turnir İsveçrə sistemi üzrə keçiriləcək və 9 turdan ibarət olacaq.xeber100.com

UEFA Gənclər Liqası turnirinin birinci mərhələsində

UEFA Gənclər Liqası turnirinin birinci mərhələsində “Qəbələ” futbol klubu oktyabrın 24-də cavab oyununu keçirib.Azərtac xəbər verir ki, təmsilçimiz Qəbələ şəhər stadionunda Kiprin APOEL komandası ilə qarşılaşmada 0:1 hesabı ilə məğlub olaraq mübarizəni dayandırıb.Xatırladaq ki, bu komandaların ilk oyun 1:1 hesabı ilə başa çatmışdı.xeber100.com

UEFA Çempionlar Liqasının qrup mərhələsinin üçüncü turuna start verilib

Oktyabrın 22-də UEFA Çempionlar Liqasının 2019-2020-ci illər mövsümünün qrup mərhələsinin üçüncü turuna start verilib.Azərtac xəbər verir ki, turun ilk oyun günündə A, B, C və D qruplarında, ümumilikdə, 8 qarşılaşma oynanılıb.Qitənin ən nüfuzlu klub turnirində Türkiyənin yeganə təmsilçisi “Qalatasaray” doğma azarkeşlər önündə İspaniyanın “Real Madrid” klubunu qəbul edib.Görüş madridlilərin minimal hesablı qələbəsi ilə başa çatıb. Oyunda yeganə qolun müəllifi 18-ci dəqiqədə Toni Kros olub.A qrupunda mübarizə aparan “Cim-bom” bu nəticədən sonra 1 xalla sonuncu yerdə qərarlaşıb. “Real Madrid” isə 4 xalla ikinci yerdədir.Bu qrupun digər matçı Belçikada oynanılıb. Fransanın PSJ klubu səfərdə “Brügge”nin qonağı olub. Görüş fransızların böyük hesablı qələbəsi ilə yekunlaşıb - 0:5.Üç oyunun hamısında meydanı qələbə ilə tərk edək PSJ qrupda liderliyini davam etdirir. İki xalı olan “Brügge” üçüncü yerdədir.Günün digər oyunlarında aşağıdakı hesablar qeydə alınıb: “A” qrupu: “Qalatasaray” (Türkiyə) – “Real Madrid” (İspaniya) - 0:1; “Brügge” (Belçika) – PSJ (Fransa) - 0:5. “B” qrupu: “Olimpiakos” (Yunanıstan) – “Bavariya” (Almaniya) - 2:3; “Tottenhem” (İngiltərə) – “Srvena Zvezda” (Serbiya) - 5:0. “C” qrupu: “Şaxtyor” (Donetsk, Ukrayna) – “Dinamo” (Zaqreb, Xorvatiya) - 2:2; “Mançester Siti” (İngiltərə) – “Atalanta” (İtaliya) - 5:1. “D” qrupu: “Atletiko” (Madrid, İspaniya) – “Bayer” (Leverkuzen, Almaniya) - 1:0; “Yuventus” (İtaliya) – “Lokomotiv” (Moskva, Rusiya) - 2:1.xeber100.com

Dünya çempionatının əsas mərhələsi çərçivəsində

2020-ci ildə keçiriləcək dünya çempionatının əsas mərhələsi çərçivəsində futzal üzrə Azərbaycan milli komandası bu gün ilk oyununu keçirəcək.Azərtac xəbər verir ki, komandamız saat 20:00-da Bakı İdman Sarayında Moldova futzalçıları ilə qarşılaşacaq. "İdman TV"dən canlı yayımlanacaq oyunu çexiyalı baş hakim Ondrey Çerny idarə edəcək. Ona latviyalı İngus Puriņş və almaniyalı İngo Heemsoth kömək edəcəklər.Turun digər oyununda isə Monteneqro və Slovakiya komandaları üz-üzə gələcəklər.xeber100.com

Azərbaycan badmintonçularının rəqibləri müəyyənləşib

Oktyabrın 24-dən 27-dək Əlcazairdə keçiriləcək “Algeria International 2019” turnirində iştirak edəcək Azərbaycan badmintonçularının rəqibləri müəyyənləşib.Azərtac xəbər verir ki, turnirdə ölkəmizi kişilərin şəxsi yarışında Edi Reski Dviçayo və Ezmi Qovımuramadhoni təmsil edəcəklər.Mübarizəyə onaltıdabir final mərhələsindən başlayacaq badmintonçumuz E.Dviçayo ilk görüşünü belçikalı Elias Brackeyə qarşı keçirəcək. Digər idmançımız E.Qovımuramadhoni isə xorvatiyalı Zvonimir Durkinjakla üz-üzə gələcək.Qeyd edək ki, turnirdə 36 kişi və 24 qadın badmintonçu iştirak edəcək.xeber100.com