Güləş üzrə dünya çempionatının ikinci günündə

Qazaxıstanın paytaxtı Nur-Sultanda güləş üzrə dünya çempionatı davam edir.Azərtac Azərbaycan Güləş Federasiyasına istinadla xəbər verir ki, çempionatın ikinci günündə yunan-Roma güləşçiləri 67, 87 və 97 kiloqram çəki dərəcələrində mübarizə aparırlar.Püşkün nəticəsinə görə, ilk görüşdə güləşçilərimizdən Rəsul Çunayev (67 kq) macarıstanlı Mate Kraşnay, İslam Abbasov (87 kq) Gürcüstan təmsilçisi Qurami Xetsuriani, Orxan Nuriyev (97 kq) qazaxıstanlı Yerulan İskakov ilə qarşılaşacaq.Dünya çempionatında 100-dən çox ölkədən 900 güləşçi 30 dəst medal uğrunda mübarizə aparır. “Tokio 2020” Yay Olimpiya Oyunlarına lisenziya xarakteri daşıyan çempionatda güləşçilər 108 Olimpiya vəsiqəsi uğrunda yarışırlar.xeber100.com

Azərbaycan Qılıncoynatma Federasiyasının təşkilatçılığı ilə…

Azərbaycan Texniki Universitetinin İdman Sarayında yeniyetmə və gənclər arasında qılıncoynatma üzrə Bakı birinciliyi keçirilir.Azərtac xəbər verir ki, Azərbaycan Qılıncoynatma Federasiyası və Bakı Şəhər Gənclər və İdman Baş İdarəsinin birgə təşkilatçılığı ilə təşkil olunan yarışın birinci günündə yeniyetmə qılıncoynadanlar arasında sablya, şpaqa və rapira növləri üzrə qaliblər müəyyənləşib.Oğlanlar arasında sablyada Saleh Məmmədov, şpaqada Orxan Həsənli, rapirada isə Məhəmməd Nuriyev fəxri kürsünün ən yüksək pilləsinə qalxıblar. Qızların mübarizəsində isə sablyada Xədicə Şamilova, şpaqada Nazilə Rəhimova, rapirada isə Röya Ağayeva birinci olublar.Mükafatçılar diplom və medallarla təltif olunublar.Turnirə gənc qılıncoynadanların mübarizəsi ilə sentyabrın 14-də yekun vurulacaq.xeber100.com

Bədii gimnastika üzrə 37-ci dünya çempionatının təqvimi açıqlanıb

Bakıda keçiriləcək bədii gimnastika üzrə 37-ci dünya çempionatının təqvimi açıqlanıb.Azərtac xəbər verir ki, “Tokio 2020” Yay Olimpiya Oyunlarına lisenziya xarakteri daşıyan çempionata sentyabrın 16-da start veriləcək. Yarışın birinci günündə gimnastlar fərdi proqramda halqa və topla təsnifat mərhələsində güclərini sınayacaqlar. Ertəsi gün halqa və topla təsnifat, həmçinin final yarışları keçiriləcək. Sentyabrın 18-19-da gürzlər və lentlə təsnifat yarışları təşkil olunacaq. Eləcə də gürzlər, lentlə və komanda hesabında qaliblər müəyyənləşəcək. Çempionatın beşinci günündə - sentyabrın 20-də çoxnövçülük üzrə final yarışları baş tutacaq. Habelə “Prize of Elegance” mükafatının qalibi müəyyənləşəcək.Sentyabrın 21-də qrup hərəkətləri komandaları mübarizəyə qoşulacaqlar. Gimnastlar 5 top, 3 halqa və 2 cüt gürzlə yarışacaqlar. Günün sonunda çoxnövçülük üzrə qaliblər mükafatlandırılacaq.Ayın 22-də çempionata 5 top, 3 halqa və 2 cüt gürzlə final yarışları ilə yekun vurulacaq.Milli Gimnastika Arenasında keçiriləcək dünya çempionatında ölkəmizi 9 gimnast təmsil edəcək. Fərdi proqram üzrə yarışlarda Zöhrə Ağamirova, Veronika Qudis, Yelizaveta Luzan və Məryəm Səfərova güclərini sınayacaqlar. Qrup hərəkətlərində isə komandamızın heyətində Ayşən Bayramova, Diana Əhmədbəyli, Aliyə Paşayeva, Zeynəb Hümmətova və Darya Sorokina yer alıblar.Çempionatda fərdi proqramda çoxnövçülük üzrə ilk 16-lıqda yer alan gimnastlar (bir ölkədən maksimum 2 gimnast olmaqla) lisenziya əldə etmiş olacaqlar. Qrup hərəkətləri komandalarına gəldikdə isə, ötən ilin dünya çempionatının nəticələrinə əsasən, Bolqarıstan, Rusiya və İtaliya artıq lisenziyanı təmin ediblər. Çempionatda çoxnövçülük xalları üzrə daha 5 ən yaxşı komanda Olimpiadaya vəsiqə qazanacaq.Altmış bir ölkədən 300-dən artıq gimnast çempionatda 9 dəst medal uğrunda mübarizə aparacaq.xeber100.com

Güləş üzrə dünya çempionatına start verilib

Sentyabrın 14-də Qazaxıstanın paytaxtı Nur-Sultanda güləş üzrə dünya çempionatına start verilib.Azərtac xəbər verir ki, çempionatın birinci günündə yunan-Roma güləşi üzrə 55, 63, 72 və 82 kiloqram çəki dərəcələrində yarışlar keçirilib.Güləşçimiz Rafiq Hüseynov (82 kq) moldovalı Mixail Bradu, Ukrayna idmançısı Yuri Şkriuba, qazaxıstanlı Maxat Yerejepov və İran təmsilçisi Seyid Abdvalini məğlub edərək dünya çempionatının finalına yüksəlib. Sentyabrın 15-də keçiriləcək həlledici qarşılaşmada təmsilçimizin rəqibi Gürcüstan güləşçisi Laşa Qobadze olacaq.Dünya çempionu Eldəniz Əzizli (55 kq) də yarışa qələbə ilə başlayıb. Təmsilçimiz hindistanlı Manjet Manjeti məğlub edərək dörddəbir finala yüksəlib. İdmançımızın növbəti rəqibi Monqolustan güləşçisi Davaabandi Munh Erden olub. Rəqibini məğlub edən dünya çempionumuz yarımfinalda qazaxıstanlı Korlan Jokanşa ilə qarşılaşıb. Görüşdən məğlub ayrılan E.Əzizli sentyabrın 15-də keçiriləcək bürünc medal uğrunda qarşılaşmada Abdelkarim Ferqat (Əlcəzair)-Maks Emilyano Nouri (ABŞ) cütünün qalibi ilə üz-üzə gələcək.Dünya çempionatında 100-dən çox ölkədən 900 güləşçi 30 dəst medal uğrunda mübarizə aparır. “Tokio 2020” Yay Olimpiya Oyunlarına lisenziya xarakteri daşıyan çempionatda güləşçilər 108 Olimpiya vəsiqəsi uğrunda yarışırlar.xeber100.com

“EXPO Arena”da baş tutan yarışın təsnifat mərhələsində

Sentyabrın 14-də Rusiyanın Yekaterinburq şəhərində keçirilən dünya çempionatında iki boksçumuz onaltıdabir final mərhələsində çıxış edib.Azərtac xəbər verir ki, 52 kiloqram çəki dərəcəsində mübarizə aparan boksçumuz Məsud Yusifzadə mərakeşli Səid Mortaji ilə qarşılaşıb. Təmsilçimiz rəqibini 5:0 hesabı ilə məğlub edib. O, növbəti döyüşündə ermənistanlı Artur Hovannisyanı sınağa çəkəcək. Səkkizdəbir final mərhələsinin görüşü sentyabrın 17-də olacaq.Çempionatda 75 kiloqram çəki dərəcəsində çıxış edən Amin Kuşkov isə ikinci görüşündə rusiyalı boksçu Qleb Bakşi üz-üzə gəlib. Gərgin keçən döyüş rəqibin 4:1 hesablı qələbəsi ilə yekunlaşıb.Sentyabrın 9-da boksçumuz Amin Kuşkov otuzikidəbir finalda Türkmənistan idmançısı Nursahat Pazzievi 4:1, sentyabrın 11-də isə Tayfur Əliyev isveçrəli Tiaqo Puqnonu 5:0, ötən gün isə Lorenzo Sotomayor Avstriya təmsilçisi Yason Mallyanı 3:2 hesabı ilə məğlub ediblər. Sentyabrın 12-də Bəxtiyar Qazıbəyov Qazaxıstan təmsilçisi Zakir Safyullinə uduzaraq çempionatda mübarizəni dayandırıb.Dünya çempionatında yarışlar yeni qaydalara əsasən 8 çəki dərəcəsində təşkil olunur. Yekaterinburqdakı “EXPO Arena”da baş tutan yarışda təsnifat mərhələsinin qarşılaşmaları sentyabrın 17-dək davam edəcək. Ayın 18-də boksçular dörddəbir final mərhələsində yarışacaqlar. Ertəsi gün istirahət edəcək idmançılar sentyabrın 20-də yarımfinal görüşlərini keçirəcəklər. Qaliblər ayın 21-də müəyyənləşəcək.xeber100.com

“Sumqayıt” futbol klubu transfer çalışmalarını davam etdirir

2019-2020-ci illər mövsümü üçün transfer çalışmalarını davam etdirən “Sumqayıt” klubu heyətinə iki futbolçu cəlb edib.Azərtac klubun saytına istinadla xəbər verir ki, son mövsümü müvafiq olaraq “BATE Borisov” və “Torpedo Moskva”nın heyətində keçirmiş futbolçular – Cəmaləddin Xocaniyazov və Rəhim Sadıxovla ikiillik müqavilə imzalanıb. C.Xocaniyazov “Sumqayıt” klubunda “5”, Rəhim isə “90” nömrəli formada çıxış edəcək.Qeyd edək ki, Sankt-Peterburq “Zenit”inin yetirməsi olan C.Xocaniyazov 2012-2016-cı illərdə adıçəkilən komandanın əsas və əvəzedici heyətlərində çıxış edib (10 oyun). Sonuncu klubu “BATE Borisov” (2 oyun) olan Cəmaləddin Rusiyanın “Ural” (1 oyun), “Baltika” (2 oyun), “Soçi” (8 oyun), “Amkar Perm” (1 oyun) və Danimarkanın “AGF Aarhus” (35 oyun, 1 qol) klublarının şərəfini qoruyub.Moskva “Spartak”ının yetirməsi olan Rəhim Sadıxov isə peşəkar karyerası ərzində “Solyaris Moskva” (16 oyun) və “Torpedo Moskva”nın (71 oyun, 23 qol) uğurları üçün çalışıb. Rəhim Azərbaycanın U-17 və U-19 millilərində də çıxış edib.xeber100.com

Ümumdünya Badminton Federasiyasının məlumatına görə…

Ümumdünya Badminton Federasiyasının saytında 37-ci badminton turnirləri həftəsinin nəticələri əsasında yeni Olimpiya təsnifat reytinqi açıqlanıb.Azərtac xəbər verir ki, reytinq cədvəlinə əsasən badmintonçumuz Edi Reski Dviçayo “Tokio 2020” Olimpiya təsnifat reytinqində kişilərin şəxsi kateqoriyası üzrə 28-ci sırada qərarlaşıb. Badmintonçumuz bu pilləyə bir neçə gün əvvəl Ukraynada keçirilən “RSL Kharkiv International 2019” turnirində 3400 xal qazanaraq yüksəlib. O, “Tokio 2020” Yay Olimpiya Oyunlarına təsnifat xarakterli yarışda gümüş medal qazanaraq xallarını 13 min 990-a çatdırıb. Badmintonçumuz hazırki siyahıda amerikalı Timati Lam və rusiyalı Vladimir Malkov kimi tanınmış idmançıları geridə qoyub.Bir sıra Olimpiya idman növlərində olduğu kimi, badmintonda da lisenziya Olimpiya reytinq xallarına görə verilir. Həftəlik açıqlanan Olimpiya təsnifat reytinqi hər çərşənbə axşamı yenilənir.Olimpiadada bu idman növü üzrə kişilərin şəxsi yarışında eyni ölkədən ən çox 2 nəfər iştirak hüququ qazana bilər. Bu, yalnız həmin ölkənin badmintonçularının Ümumdünya Badminton Federasiyasının 2020-ci ilin aprelin 30-dək olan reytinqində 1-16-cı yerlərdə qərarlaşması sayəsində mümkündür. Əgər həmin reytinqdə müvafiq yerlər üzrə yalnız bir idmançı yer alıbsa, o zaman həmin ölkə üzrə Olimpiadada bir badmintonçu çıxış edəcək. Yekun Olimpiya təsnifat reytinqində xalların hesablanması badmintonçuların Olimpiya təsnifat dövründə iştirak etdiyi və daha yüksək xallar topladığı 10 beynəlxalq turnirin nəticələrinə görə toplanır və buna əsasən müəyyənləşdirilir. Cari ilin aprelində start verilən təsnifat mərhələsi 2020-ci il aprelin 26-da başa çatacaq və dörd gün sonra kişilərin şəxsi yarışı üzrə “Tokio 2020” Yay Olimpiya Oyunlarında iştirak edəcək 38 badmintonçudan lisenziya əldə etmiş 34 nəfər müəyyən ediləcək. Yerdə qalan 4 lisenziyadan biri ev sahibi Yaponiyaya, digər üç vəsiqə isə Beynəlxalq Olimpiya Komitəsi, Ümumdünya Badminton Federasiyası və müvafiq ölkənin yerli federasiyasının nümayəndələrinin daxil olduğu üçtərəfli komissiyanın qərarına əsasən müəyyənləşəcək idmançılara veriləcək. Bütün kateqoriyalarda hər qitədən minimum bir iştirakçı Olimpiya Oyunlarında təmsil olunmalıdır. Əgər aprelin 30-da açıqlanacaq siyahıda hər hansı qitədən təmsilçi yer almazsa, o zaman Ümumdünya Badminton Federasiyasının reytinq cədvəlində həmin qitənin ən yüksək reytinqli idmançısına olimpiadada iştirak hüququ yaradılacaq.Ümumdünya Badminton Federasiyasının 37-ci badminton turnirləri həftəsi üzrə cari reytinq siyahısına əsasən hazırda Edi Reski Dviçayo 21 min 530 xalla 84-cü sırada qərarlaşıb.Xatırladaq ki, indiyədək heç bir badmintonçumuzun Yay Olimpiya Oyunlarında ölkəmizi təmsil etmək şansı olmayıb.xeber100.com  

“Qarabağ” – “Sevilya” qarşılaşmasının biletləri satışa çıxarılıb

UEFA Avropa Liqasının 2019-2020-ci il mövsümünün qrup mərhələsinin birinci turu çərçivəsində sentyabrın 19-da Bakıda oynanılacaq “Qarabağ” - “Sevilya” qarşılaşmasının biletləri satışa çıxarılıb.Azərtac klubun “Facebook” səhifəsinə istinadla xəbər verir ki, biletləri Tofiq Bəhramov adına Respublika Stadionunun kassalarından, “Gənclik”, “28 Mall”, “Park Bulvar”dakı “iTicket” satış məntəqələrindən, 2 və 3 saylı “ASAN xidmət” mərkəzlərindən və https://iticket.az/ saytından əldə etmək olar.Tofiq Bəhramov adına Respublika Stadionunda keçiriləcək oyun saat 20:55-də başlayacaq.“A” qrupunda yer alan “Qarabağ”ın digər rəqibləri Kiprin APOEL və Lüksemburqun “Düdelanj” klublarıdır.Xatırladaq ki, cari mövsümdə avrokuboklarda mübarizəyə UEFA Çempionlar Liqasının təsnifat mərhələsindən başlayan “Qarabağ” komandası APOEL ilə qarşılaşıb. Səfərdə rəqibini məğlub edən (2:1) ağdamlılar doğma meydanda 0:2 hesabı ilə uduzublar. APOEL isə ilk görüşdə heç-heçə etdiyi “Ayaks” klubuna cavab qarşılaşmasında 0:2 hesabı ilə uduzduğundan mübarizəni UEFA Avropa Liqasında davam etdirməli olub.xeber100.com

Şahmat üzrə dünya kuboku turnirinin final mərhələsində

Sentyabrın 13-də Xantı-Mansiyskdə şahmat üzrə dünya kuboku turnirinin otuzikidəbir finalın mərhələsinin partiyaları oynanılacaq.Azərtac xəbər verir ki, otuzikidəbir finalda Azərbaycan şahmatçıları Şəhriyar Məmmədyarov özbəkistanlı Rüstəm Qasımcanov, Teymur Rəcəbov rusiyalı Sənan Syugirov, Eltac Səfərli hindistanlı Sarin Nihal və Nicat Abbasov isə ABŞ təmsilçisi Leyner Dominquez Perez ilə qarşılaşacaqlar.Xatırladaq ki, beş şahmatçımızın qatıldığı dünya çempionatında Arkadi Naydiç almaniyalı Niklas Huşenbetə məğlub olaraq mübarizəni dayandırıb.Dünya kubokunun finalına yüksələcək şahmatçılar 2020-ci ildə şahmat tacına iddiaçılar turnirində iştirak hüququ qazanacaqlar.FIDE prezidenti Arkadi Dvorkoviç bildirib ki, turnirin bürünc mükafatçısı da təşkilatçıların xüsusi dəvətnaməsi olacağı halda belə bir hüquqa yiyələnə bilər.Dünya kubokunun yarışları sentyabrın 10-dan oktyabrın 4-dək keçiriləcək. Sonuncu gün həlledici görüşlər üçün tay-breyk qarşılaşmaları nəzərdə tutulub. Turnirin mükafat fondu 1,6 milyon dollardır.xeber100.com

Avropa Voleybol Konfederasiyası reytinq cədvəlini açıqlayıb

Avropa Voleybol Konfederasiyası milli komandaların yeni reytinq cədvəlini açıqlayıb.Azərtac xəbər verir ki, Türkiyə, Polşa, Slovakiya və Macarıstanın birgə ev sahibliyi etdiyi Avropa çempionatını 10-cu pillədə başa vuran qadın voleybolçulardan ibarət Azərbaycan millisi reytinq cədvəlində 11-ci pillədə qərarlaşıb. Yığmamızın hesabında 212 xal var.Reytinq cədvəlinə 298 xalla Serbiya millisi başçılıq edir. İtaliya seçməsi (286 xal) ikinci, Hollandiya (282) isə üçüncü pillədə yer alıblar.xeber100.com