Cüdo Federasiyasının məlumatı əsasında…

Noyabrın 20-də Bakı İdman Sarayında cüdo üzrə Azərbaycan çempionatının açılış mərasimi olub.Azərtac xəbər verir ki, mərasimdə gənclər və idman nazirinin müavini İsmayıl İsmayılov, Azərbaycan Cüdo Federasiyasının vitse-prezidenti Sadıq Sadıqov, Beynəlxalq Cüdo Federasiyasının, eyni zamanda, idman ictimaiyyətinin nümayəndələri iştirak ediblər.İki gün davam edəcək yarışda Azərbaycan yığma komandasının üzvləri və 56 cüdo klubundan 500-ə yaxın idmançı qüvvəsini sınayır. Çempionatın birinci günündə kişilər arasında 60, 73, 90, qadınların yarışında isə 48, 57, 70 kiloqram çəki dərəcələrində qaliblər müəyyənləşəcək.Yarışın ikinci günündə kişi cüdoçular 66, 81, 100 və +100 kiloqram çəki dərəcələrində mübarizə aparacaqlar. Qadınların yarışında isə 52, 63, 78 və +78 kiloqram çəki dərəcələrində ən güclülər müəyyənləşəcək.xeber100.com

UEFA Millətlər Liqasında sonuncu oyun keçirilib

Noyabrın 20-də futbol üzrə Azərbaycan yığması UEFA Millətlər Liqasının qrup mərhələsi çərçivəsində sonuncu oyununu keçirib.Azərtac xəbər verir ki, D liqasında 3-cü qrupunda yer alan millimiz səfərdə Kosovo yığması ilə qarşılaşıb və 0:4 hesabı ilə məğlub olub. Yığma komandamızın qapısından qolları Zeneli (het-trik) və Rrahmani keçiriblər.Azərbaycan millisinin heyətində meydana Səlahət Ağayev, Pavel Paşayev, Bədavi Hüseynov, Maksim Medvedev, Qara Qarayev,Araz Abdullayev, Dmitri Nazarov, Rüfət Dadaşov, Mahir Mədətov, Riçard Almeyda və Təmkin Xəlilzadə çıxıblar.Kosovo yığmasının start heyətində isə Samir Aykani, Fidan Aliti, Xerolind Şala, Xekuran Kriyeziu, Bersant Celina, Arber Zeneli, Amir Raxmani, Merqrim Voyvoda, Vedat Murici, Leart Pacarada və Edon Jeqrova yer alıblar.Oyunu fransalı hakimlər briqadası idarə ediblər.Bu məğlubiyyətdən sonra Azərbaycan millisi 8 xalla qrupda ikinci pilləni tutub. Kosovo yığması isə 14 xal toplayaraq qrupu birinci pillədə tamamlayıb və pley-offa vəsiqə qazanıb.xeber100.com

Universal döyüş üzrə dünya çempionatı keçirilib

Azərbaycan idmançıları Rusiyanın Medin şəhərində universal döyüş üzrə dünya çempionatında uğurla çıxış ediblər.Azərbaycan Universal Döyüş Federasiyasından Azərtac-a bildirib ki, idmançılarımız klassik və layt versiyaları üzrə mübarizə aparıblar.Əlli səkkiz ölkədən 350-dək idmançının qatıldığı dünya çempionatında klassik versiyada 80 kiloqram çəki dərəcəsində mübarizə aparan Nicat Əliyev bütün rəqiblərinə qalib gələrək fəxri kürsünün ən yüksək pilləsinə qalxıb. Millimizin digər üzvləri Asif Səmədli (90 kq) gümüş, Fərid Hüseynov (65 kq), Orxan Qurbanov (75 kq) və Mehman Hüseynov (85 kq) bürünc medala sahib olublar.Layt versiyada isə Orxan Şükürov (75 kq) çempionatı ikinci, Əli Həsənli (80 kq) və Namiq Əlizadə (90 kq) üçüncü pillədə başa vurublar.Millimiz turnirdə Əməkdar məşqçi Elşən İsmayılovun rəhbərliyi altında mübarizə aparıb.xeber100.com

Formula 1 yarışlarının Braziliya Qran-Prisi mərhələsində

Formula 1-in icraçı direktoru Çeyz Keri Braziliyanın Rio-de-Janeyro şəhərinə səfər edib.Azərtac “GPBlog” saytına istinadla xəbər verir ki, səfərdə məqsəd Formula 1 yarışlarının Braziliya Qran-Prisi mərhələsinin bu şəhərdə keçirilməsi imkanlarını qiymətləndirmək olub.Bundan əvvəl Formula 1 rəhbərliyinin Braziliya Qran-Prisi təşkilatçılarından iki il müddətinə üzvlük haqqı almayacağı barədə xəbərlər yayılıb. Formula 1 rəhbərliyinin İnterlaqos trası üzrə hazırkı kontraktı 2020-ci ildə başa çatır.Qeyd edək ki, Braziliya Qran-Prisi əvvəllər Rio-de-Janeyrodakı trasda keçirilib. Lakin 2016-cı il Olimpiya Oyunları ərəfəsində burada yerləşən avtodrom fəaliyyətini dayandırıb. San-Paulu şəhərinin meri Joao Doria isə vurğulayıb ki, Braziliya Qran-Prisinin başqa şəhərdə keçirilməsi barədə xəbərlər KİV-lər tərəfindən uydurulub.xeber100.com

İspaniyanın “Barselona” futbol klubu ultimatum verib

İspaniyanın “Barselona” klubunun rəhbərliyi komandanın fransalı futbolçusu Osman Dembeleyə ultimatum verib.Azərtac “Sport” idman nəşrinə istinadla xəbər verir ki, buna futbolçunun intizamsız davranışları səbəb olub. O.Dembele intizamsız davranmağa davam edəcəyi halda komandadan kənarlaşdırılacaq.Bununla yanaşı, Kataloniya təmsilçisi Dembelenin yay transfer pəncərəsində satış imkanlarını nəzərdən keçirməyə hazırlaşır. İspaniya klubu bu keçid üçün ən azı 100 milyon avro qazanmağı planlaşdırır.O.Dembele komandanın bütün məşqlərinə və toplanışlarına gecikir. Bu isə klub rəhbərliyini, futbolçuları və məşqçi heyətini narahat edir.Qeyd edək ki, Usman Dembele 2017-ci ilin yayında Almaniyanın “Borussiya Dortmunt” klubundan “Barselona”ya keçib.xeber100.com

Taekvondo üzrə beynəlxalq turnir keçirilib

Gürcüstanda taekvondo üzrə “Tbilisi Open 2018” beynəlxalq turnirində Azərbaycan idmançıları altı medal qazanıblar.Azərtac xəbər verir ki, turnirə Azərbaycan idmançıları ilə yanaşı, Ukrayna, İran, Gürcüstan və Ermənistandan olan atletlər də qatılıblar.Turnirdə Şəmkir rayon gənclər və idman idarəsinin Uşaq Gənclər İdman Məktəbinin komandasının üzvlərindən Nihad Vəliyev (61 kq), Sabirə Hüseynli (68 kq), Fatimə Həsənova (33 kq) birinci yerə, Əsli İsayeva (30 kq) ikinci yerə Pərvin Hüseynova və Nərmin Bayramova (hər ikisi 36 kq) üçüncü yerə layiq görülüblər.Azərbaycan komandası medal sayına görə turnirdə birinci yeri tutub.xeber100.com

UEFA Millətlər Liqasının qrup mərhələsində

Bu gün Azərbaycan milli komandası UEFA Millətlər Liqasının qrup mərhələsinin altıncı turunda səfərdə Kosovo yığması ilə qarşılaşacaq.Azərtac xəbər verir ki, Priştinadakı “Fadil Vokrri” stadionunda baş tutacaq görüş Bakı vaxtı ilə saat 23:45-də start götürəcək.Qrup mərhələsində mübarizəyə Bakıda Kosovo ilə qolsuz heç-heçə etməklə başlayan yığma, Malta ilə hər iki dueldən 1:1 hesablı bərabərliklə ayrılıb. Əvəzində komanda Farer adalarını səfərdə 3, evdə isə 2 cavabsız qolla məğlub edib. Kosovo isə iki oyunda Maltanın qapısından ümumilikdə 8 top keçirməklə yanaşı (3:1, 5:0), Farer adaları ilə duellərdən 4 xal toplayıb (2:0, 1:1).Beləliklə, Kosovo yığması hazırda 11 xalla 1-ci pillədədir. Hesabında 9 xalı olan Azərbaycan millisi qrup qalibi kimi C liqasına və pley-offa yüksəlmək üçün səfərdə mütləq qalib gəlməlidir. Əks halda, komanda yeni təsis edilən qaydalara görə AVRO-2020-yə vəsiqə qazanmaq şansını itirəcək.Oyunu fransalı hakimlər briqadası idarə edəcək. Görüşün baş hakimi Benua Miyo olacaq. Medi Ramuni və Bertran Juannu yan xətt hakimi funksiyasını yerinə yetirəcəklər. Frank Şnayderlə Kərim Abed əlavə köməkçi, Benjamen Pajes isə dördüncü hakim olacaq. Qarşılaşmaya hakim-inspektor qismində rusiyalı Aleksandr Qvardis təyinat alıb. İtaliyalı Antonio Talariko isə UEFA nümayəndəsi vəzifəsini icra edəcək.Görüş "CBC Sport" kanalında canlı yayımlanacaq.xeber100.com

XII turun oyunlarına hakim təyinatları açıqlanıb

Topaz Premyer Liqasında XII turunun oyunlarına hakim təyinatları açıqlanıb.Azərtac Peşəkar Futbol Liqasının saytına istinadla xəbər verir ki, turun noyabrın 24-də saat 16:30-da start götürəcək açılış oyununu - “Keşlə” - “Qəbələ” matçını Rəvan Həmzəzadə idarə edəcək. Bu görüş “ASK Arena”da oynanılacaq.Həmin gün Tofiq Bəhramov adına Respublika stadionunda keçiriləcək “Qarabağ”- “Sabah” oyununda baş hakim funksiyasını İnqilab Məmmədov yerinə yetirəcək. Matç saat 19:00-da başlayacaq.Noyabrın 25-də “Bayıl Arena”da oynanılacaq “Səbail”–“Neftçi” qarşılaşmasını hakim Rauf Cabbarov idarə edəcək. Bu görüş saat 17:00-da start götürəcək.Həmin gün saat 19:00-da “Dalğa Arena” stadionunda başlayacaq “Zirə” - “Sumqayıt” qarşılaşmasında ədaləti təmin etmək Səbuhi Bayramova həvalə olunub.Turun bütün görüşləri “CBC Sport” kanalı vasitəsilə canlı yayımlanacaq.Xatırladaq ki, 11 turdan sonra turnir cədvəlinə 26 xalla “Neftçi” klubu başçılıq edir. Ağdamın “Qarabağ” klubu 23 xalla ikinci, 20 xalı olan “Səbail” üçüncü, debütant “Sabah” isə 16 xalla dördüncü yerdə qərarlaşıblar. Digər pillələrdə müvafiq olaraq “Qəbələ” (12), “Sumqayıt” (11), “Keşlə” (9) və “Zirə” (6) yer alıblar.xeber100.com

Bakı İdman Sarayında karate üzrə çempionat keçiriləcək

Noyabrın 23-dən 25-dək Bakı İdman Sarayında karate üzrə yeniyetmə və gənclər arasında XIX, böyüklər arasında XXVI Azərbaycan çempionatı keçiriləcək.Azərtac xəbər verir ki, Gənclər və İdman Nazirliyi, Karate-Do Federasiyaları Assosiasiyası və Milli Karate Federasiyasının birgə təşkil etdiyi respublika çempionatının açılış mərasimi noyabrın 23-də olacaq. Yarışlarda respublikanın müxtəlif bölgələrindən 12-13 yaşlı uşaqlar, 14-15 yaşlı yeniyetmələr, 16-17 yaşlı və 21 yaşadək gənclər, həmçinin böyüklər iştirak edəcəklər.Son imtahandan uğurla keçən məşqçilər və Əməkdar məşqçilər (yalnız bu il istisna olmaqla və qeydiyyat zamanı vəsiqəsini təqdim etmək şərti ilə) yarışda məşqçi kimi iştirak edə bilərlər.xeber100.com

Güləş Federasiyasının məlumatına görə…

Azərbaycan idmançısı Şamil Zubairov Buxarestdə keçirilən 23 yaşadək güləşçilər arasında dünya çempionu olub.Azərbaycan Güləş Federasiyasından Azərtac-a bildiriblər ki, Ş.Zubairov debütdə erməni güləşçisi Sarqis Hovsepyana heç bir şans verməyib (11:4). Yığmamızın üzvü növbəti mərhələdə Qazaxıstan təmsilçisi qarşısında da çətinlik çəkməyib. Şamil Hindistan idmançısını da məğlub edərək adını yarımfinala yazdırıb. Yarımfinalda Ukraynalı güləşçi qarşılaşmada gərgin idman mübarizəsi yaşanıb. Matçın başa çatmasına 6 saniyə qalmış həlledici xalı qazanan Ş.Zubairov minimal fərqlə qalib gəlib. Həlledici görüşdə də gözəl oyun nümayiş etdirən təmsilçimiz dünya çempionu olub.Şamil Zubairov U-23 dünya çempionatları tarixində Azərbaycanın ilk qızıl medalını qazanıb.Yarışın altıncı günündə sərbəst güləş üzrə yığmamızın sonuncu dörd üzvü xalça üzərinə çıxıb.Ruslan Qasımov təsnifat mərhələsində özbəkistanlı həmkarına çətinliklə qalib gəlsə də, səkkizdəbir finalda Çin idmançısı ilə bacarmayıb.İsmayıl Abdullayev əvvəlcə qırğızıstanlı rəqibini məğlub edib. Ancaq yerli güləşçi ilə görüşdə hesab 2:2 olarkən zədələnən İ.Abdullayev yarışdan çəkilmək məcburiyyətində qalıb. Rəqib finala yüksəldiyindən idmançımız üçün bürünc medal qazanmaq fürsəti yaranıb. Amma təmsilçimizin zədəsi ona təsəlliverici görüşə çıxmağa imkan verməyib.Murad Süleymanov mundiala Ermənistan idmançısı üzərində qələbə ilə başlayıb. Növbəti görüşdə belaruslu pəhləvana qalib gələn M.Süleymanov yarımfinalda Rusiya nümayəndəsinə uduzub. Həmyerlimiz bürünc medal uğrunda görüşdə kanadalı rəqibini məğlub edərək üçüncü yeri tutub.Qeyd edək ki, bu, ikinci dəfə keçirilən U-23 güləşçilər arasında dünya çempionatında millimizin tarixində ilk qızıl medal olub. Ötən il Polşada keçirilmiş dünya çempionatında komandamız yalnız beş bürünc medal qazanmışdı.xeber100.com