Basketbol üzrə Azərbaycan kuboku yarışları keçiriləcək

Martın 21-26-da “Sərhədçi” İdman Mərkəzində basketbol üzrə Azərbaycan kuboku yarışları keçiriləcək. Azərbaycan Basketbol Federasiyası xəbər verir ki, iki qrupda ümumilikdə 8 komandanın iştirakı ilə keçiriləcək yarış dairəvi sistemi üzrə oynanılacaq. Qruplarda ilk iki yeri tutmuş komandalar yarımfinala vəsiqə qazanacaqlar. Martın 26-da isə yarışın final oyunu keçiriləcək. Qeyd edək ki, yarışın püşkatma mərasimi fevralın 21-də baş tutacaq və federasiyanın rəsmi yutub səhifəsindən canlı yayımlanacaq.xeber100.com

Futbol üzrə Azərbaycan Premyer Liqasında XXIII tura yekun vurulub

Fevralın 19-da futbol üzrə Azərbaycan Premyer Liqasında XXIII tura yekun vurulub. Oyun günündə iki matç keçirilib. “Bank Respublika Arena”da “Sabah” klubu “Turan Tovuz” komandasını qəbul edib. Matçda rəqibini 2:0 hesabı ilə məğlub edən Tovuz təmsilçisi sensasiyaya imza atıb. Oyunda Natan Oduva və Ayxan Quseynov fərqləniblər. Hesabında 53 xal olan “Sabah” turnir cədvəlində ikinci, “Turan Tovuz” isə 26 xalla altıncı pillədə qərarlaşıblar. Turun sonuncu oyununda “Zirə” və “Qarabağ” komandaları üz-üzə gəliblər. Qarşılıqlı hücumlar şəraitində keçən oyunda “Qarabağ” qələbə qazanıb. Matçın taleyini son dəqiqələrdə vurulan avtoqol həll edib. Qismət Alıyevin 87-ci dəqiqədə topu öz qapısından keçirməsi sayəsində Ağdam təmsilçisi 1:0 hesablı qələbəyə sevinib. Bu qələbədən sonra xallarının sayının 61-ə çatdıran “Qarabağ” turnir cədvəlində liderliyini möhkəmləndirib. “Zirə” isə 32 xalla dördüncüdür. Qeyd edək ki, turun əvvəlki oyunlarında "Kəpəz" Gəncədə "Şamaxı"nı 3:2, "Qəbələ" evdə "Sumqayıt"ı 2:1, "Neftçi" isə "Səbail"i 3:0 hesabı ilə məğlub edib.xeber100.com

Azərbaycan Premyer Liqasında XXIII turun daha bir oyunu keçirilib

Azərbaycan Premyer Liqasında XXIII turun daha bir oyunu keçirilib. "Neftçi" komandası "Bakcell Arena"da "Səbail"lə qarşılaşıb. Görüşdə Azərbaycan futbolunun flaqmanı rəqibini 3:0 hesabı ilə məğlub edib. Matçda hesabı 8-ci dəqiqədə penaltidən Kenni Sayef açıb. Qırx səkkizinci dəqiqədə Emin Mahmudov 11 metrlik cərimə zərbəsini dəqiq yerinə yetirib. Oyunda sonuncu qolu isə 74-cü dəqiqədə yeni transfer Mateus Saldanya vurub. Bu qələbədən sonra xallarının sayını 48-ə çatdıran "Neftçi" üçüncü pillədəki mövqeyini möhkəmləndirib. 16 xalı olan "Səbail" isə sonuncu 10-cu pillədədir. Qeyd edək ki, tura fevralın 19-da keçiriləcək "Sabah" - "Turan Tovuz" və "Zirə" - "Qarabağ" matçları ilə yekun vurulacaq.xeber100.com

Azərbaycan Basketbol Liqasında 18-ci turun iki oyunu keçirilib

Fevralın 18-də Azərbaycan Basketbol Liqasında 18-ci turun iki oyunu keçirilib. “Sərhədçi” İdman Mərkəzində keçirilən ilk oyun “Sabah BK” və “Gəncə BK” basketbolçuları arasında olub. Oyunun birinci hissəsində “Sabah BK” qalib olsa da, gəncəlilər yekunda 81-76 hesabı ilə qələbə qazanıblar. Ən məhsuldar basketbolçular: “Sabah BK” (Entoni Patti - 17 xal, 10 ribaund), “Gəncə BK” (Cordan Endryus - 19 xal, 10 ribaund). Günün ikinci oyununda paytaxt klubu “Neftçi İK”, region komandası “Olimpik Şəki BK” basketbolçularını qəbul edib. İlk perioddan üstünlüyü ələ alan paytaxt klubu yekunda 88-69 hesabı ilə qələbəyə sevinib. Ən məhsuldar basketbolçular: “Neftçi İK” (Yuri Kondrakov - 29 xal, 10 ribaund), “Olimpik Şəki BK” (Davante Kuper - 13 xal, 5 ribaund). Qeyd edək ki, turun son oyunu fevralın 19-da Astara Olimpiya İdman Kompleksində “Zirvə Astara BK”- “Sərhədçi PİK” arasında keçiriləcək.xeber100.com

Formula 1 üzrə dünya çempionatına hazırlıq mərhələsi davam edir

Formula 1 üzrə dünya çempionatına hazırlıq mərhələsi davam edir. Komandalar yeni bolidlərini ictimaiyyətə təqdim edirlər. “Maklaren”, “Ferrari” və “Mercedes” komandalarından sonra “Alpin” də ənənəyə sadiq qalıb. Fransa təmsilçisi sürət həvəskarlarını yeni yarış avtomobili ilə tanış edib. Martın 5-də Bəhreyndə start götürəcək ilk Qran-Pridən etibarən “Alpin” “A523” indeksli bolidi ilə mübarizəyə qoşulacaq. Komanda ilk 3 yarışda titul sponsoru BWT şirkətinə dəstək məqsədilə çəhrayı rəngli boliddə mübarizə aparacaq. Ötən mövsüm komanda 173 xalla Mühəndislər kubokunda dördüncü yeri tutub. İkiqat dünya çempionu Fernando Alonsonun “Aston Martin”ə keçidindən sonra bu ildən Fransa komandasının uğurları üçün iki yerli pilot Pyer Qasli ilə Esteban Okon mübarizə aparacaq.xeber100.com

Azərbaycan Futzal Federasiyası: Yüksək Liqada XIV turun oyun cədvəli açıqlanıb.

Futzal üzrə Yüksək Liqada XIV turun oyun cədvəli açıqlanıb. Azərbaycan Futzal Federasiyası xəbər verir ki, matçlar fevralın 23-də “Olimpik Star”da keçiriləcək. Oyun günündə “Record club” – “Baku Fire”, “Alyans” – U-19 və “Araz-Naxçıvan” – “Neftçi” matçları keçiriləcək.xeber100.com

UEFA Konfrans Liqasının pley-off mərhələsinin ilk oyununda

UEFA Konfrans Liqasının pley-off mərhələsinin ilk oyununda ötən gün “Qarabağ”ın qonağı olan “Gent” Ağdam klubuna təşəkkür edib. Belçika təmsilçisi bununla bağlı klubun feysbuk səhifəsində paylaşım edib. Paylaşımda qeyd olunub: “Bizi qəbul etdiyiniz üçün təşəkkürlər, “Qarabağ”. Gözəl şəhər, sevimli insanlar, möhtəşəm oyun. Gələn həftə görüşənədək”. Qeyd edək ki, “Qarabağ” klubu “Gent”ə 1:0 hesabı ilə qalib gəlib. Komandalar arasında cavab qarşılaşması fevralın 23-də Belçikada olacaq.xeber100.com

Futbol üzrə Azərbaycan Premyer Liqasında XIII tura start verilib

Futbol üzrə Azərbaycan Premyer Liqasında XIII tura start verilib. Turun açılış oyununda “Kəpəz” klubu “Şamaxı”nı qəbul edib. Gəncə şəhər stadionunda oynanılan qarşılaşma “Kəpəz”in 3:2 hesablı qələbəsi ilə başa çatıb. Meydan sahiblərinin heyətində Abdullahi Şauybu və Mate Kvirkviya (2 top) fərqləniblər. “Şamaxı”nın qollarını isə Fuad Bayramov və Rəhman Daşdəmirov vurublar. Qeyd edək ki, turun "Qəbələ" - "Sumqayıt" və "Neftçi" - "Səbail" matçları fevralın 18-də, "Zirə" - "Qarabağ" və "Sabah" - "Turan Tovuz" görüşləri fevralın 19-da keçiriləcək.xeber100.com

Batut gimnastikası üzrə dünya kuboku yarışları üçün heyəti açıqlanıb

Kanada milli komandasının fevralın 18-19-da Bakıda Milli Gimnastika Arenasında keçiriləcək batut gimnastikası üzrə dünya kuboku yarışları üçün heyəti açıqlanıb. Böyüklər arasında təşkil olunacaq yarışda iki kanadalı batutçu – Qabriella Flinn və Bonham Maya medallar uğrunda mübarizə aparacaq. Turnirdə Azərbaycanla yanaşı, 16 ölkədən 63 gimnastın fərdi və sinxron proqramda çıxışı gözlənilir.xeber100.com  

Futbol üzrə Braziliya milli komandasının yeni baş məşqçisi dəqiqləşib

Futbol üzrə Braziliya milli komandasının yeni baş məşqçisi dəqiqləşib. Bu vəzifəyə Ramon Menezes təyin edilib. Bu barədə Braziliya Futbol Federasiyasının rəsmi saytı məlumat yayıb. Menezes baş məşqçinin səlahiyyətlərini müvəqqəti yerinə yetirəcək. Əlli bir yaşlı mütəxəssis bundan əvvəl ölkəsinin 20 yaşadək futbolçulardan ibarət yığmasına başçılıq edib. Komanda onun rəhbərliyi ilə öz yaş qrupu üzrə son dünya çempionatının qalibi olub. Qeyd edək ki, Ramon Menezes bu postda son dünya çempionatından sonra istefa verən Titeni əvəzləyib.xeber100.com