Argentina çempionatının 26-cı turunda…

Argentinanın “Boka Xuniors” futbol klubu çempionatın başa çatmasına bir tur qalmış 33-cü dəfə ölkə çempionu olub.Azərtac xəbər verir ki, klub ölkə çempionatının 26-cı turunda “Buenos Ayres” - “Ximnasiya” matçının heç-heçə (2:2) yekunlaşmasından sonra rəqibləri üçün əlçatmaz olub və çempionluğunu bayram edib. Bu, “Boka Xuniors”un ardıcıl ikinci, ümumilikdə isə 33-cü çempionluğudur.Qeyd edək ki, Argentina klubları arasında çempion adını ən çox “River Pleyt” komandası (36 dəfə) qazanıb.xeber100.com

Stend atıcılığı üzrə Beynəlxalq Qran-pri yarışları davam edir

Qəbələ rayonunun Bum qəsəbəsindəki Stend və Ox Atıcılığı Kompleksində stend atıcılığı üzrə Beynəlxalq Qran-pri yarışları davam edir.Apa-nın yerli bürosunun xəbərinə görə, mayın 9-da qadın və kişilər arasında səngər stend yarışlarının ilk təsnifat mərhələsi keçirilib.Bu yarışda 8 ölkədən 33 idmançı 125 hədəfdən 75-nə atəş açıb. Dünyanın tanınmış atıcısı olan rusiyalı olimpiya çempionu Aleksey Alipov 75 hədəfin hamısını uğurla vuraraq turnir cədvəlində birinci olub. Hazırda xal hesabına görə öndə olan 6 idmançıdan 3-ü Rusiya, biri İran, ikisi Azərbaycanı təmsil edir. Tamerlan Məmmədov 71 xalla 2-ci, Əli Hüseynli 70 xalla 4-cü sıradadır.Qadınların yarışında isə Ukrayna atıcısı Alyona Axotska 75 hədəfdən 68-ni vuraraq turnir cədvəlində birinci yerdə qərarlaşıb. Bu yarışda Azərbaycan atıcısı Aydan Camalova və rusiyalı Nataliya Zvyaqintseva 67 xalla 2-ci sıradadır.Mayın 10-da bu yarışların ikinci mərhələsi üzrə daha 50 hədəfə atəş açılacaq və finalçılar məlum olacaq. Həmin gün eyni zamanda dairəvi stend atıcılığı üzrə idmançıların məşq prosesi olacaq.Qeyd edək ki, “Qəbələ” Atıcılıq Klubunun təşkilatçılığı, Azərbaycan Atıcılıq Federasiyasının, Gənclər və İdman Nazirliyinin dəstəyi ilə keçirilən yarışlarda Azərbaycan, Türkiyə, Gürcüstan, Ukrayna, Özbəkistan, Rusiya, İran, BƏƏ və Bəhreyndən 70 idmançı iştirak edir. Azərbaycanı bu mötəbər yarışda 26 idmançı təmsil edir. Səngər stend yarışlarında 3, dairəvi stend yarışlarında isə 4 gənc idmançımız iştirak edir. Beynəlxalq Qran-pri yarışlarında dünyanın tanınmış idmançıları ilə birgə bizim gənc atıcıların da yarışması onların yaxşı təcrübə toplamasına imkan yaradır.Mayın 12-dək davam edəcək mötəbər yarışda idmançılar 6 dəst medal uğrunda mübarizə aparacaqlar. Atıcılığın səngər və dairəvi stend növləri üzrə keçirilən bu yarışda gənclər, kişilər və qadınlar mükafatlar uğrunda mübarizə aparır. Yarışın rəsmi açılış mərasimi mayın 10-da olacaq.xeber100.com

2018-ci ilin ən yaxşı bombardirlərinin siyahısı açıqlanıb

Beynəlxalq Futbol Tarixi və Statistikaları Federasiyası (İFFHS) 2018-ci ilin ən yaxşı bombardirlərinin siyahısını açıqlayıb.Apasport.az saytının məlumatına görə, siyahıda ilin arxada qalan 4 ayı ərzində keçirilən beynəlxalq qarşılaşmalarda ən çox qol vuranlar yer alıblar.Milli komandalarda, həmçinin qitə miqyaslı klub turnirlərində 5 və daha çox qol vuranların cədvəlinə 27 futbolçu düşə bilib. Planetin ən məhsuldar oyunçusu Mərakeş millisində 10, “Berkan”da 2 qol vuran Əyyub Əl Kaabidi. Onun hesabında ümumilikdə 12 top var.2-ci yerdə Baqdad Bunedja qərarlaşıb. Qətər yığmasında 2, “Əl-Sədd”də 7 qola sevinən hücumçu 9 dəfə rəqib qapısına yol tapıb. Portuqaliyalı Kriştianu Ronaldo 3-cü sırada qərarlaşıb. O, ümumilikdə 8 - yığmada 2, İspaniya “Real”ında 6 dəfə fərqlənib.Qeyd edək ki, Azərbaycan millisi və klubları bu il keçirilən beynəlxalq matçlarda cəmi 1 qol vurub. Yeganə topun müəllifi Riçard Almeydadı.xeber100.com

Futbolçular arasında ikinci turun oyunları keçirilib

Mayın 8-də Slovakiyada 2000-ci il təvəllüdlü futbolçular arasında təşkil edilən beynəlxalq turnirdə ikinci turun oyunları keçirilib.Azərtac xəbər verir ki, uelsli həmyaşıdları ilə qarşılaşan yığmamız 3:0 hesablı qələbə qazanıb. Komandamızın qollarını Tural Bayramov, Emil Qasımov və Elnur İbrahimov vurublar.Qeyd edək ki, Azərbaycan yığma komandası qrupda sonuncu oyununu mayın 10-da Slovakiyaya qarşı keçirəcək.xeber100.com

“Williams” komandasının müraciətinə görə…

“Williams” komandası Formula 1 Azərbaycan Qran-Prisinin stüardlarına ötən yürüş vaxtı qəbul etdikləri üç qərara yenidən baxmaq xahişi ilə müraciət edib. Formula 1 qaydalarına əsasən, yeni mühüm səbəblər aşkar olunanda bu cür protestlər verilə bilər.Azərtac xəbər verir ki, söhbət üç bolidin iştirakı ilə (Alonso, Sirotkin və Hülkenberq) baş verən insidentdən, birinci dövrənin ikinci döngəsində Sergey Sirotkinin Serxio Pereslə toqquşmasından və bu səbəbdən rusiyalının Barselona Qran-Prisinin start meydançasında 3 yer itirməklə cərimələnməsindən, Fernando Alonsonun isə bolidi faktiki olaraq, iki təkər üzərində boksa çatdırmasından və daha sonra mübarizəni davam etdirməsindən gedir.Bundan başqa, “Williams” stüardlardan xahiş edir ki, birinci dövrədə Esteban Okon ilə Kimi Raykkonenin maşınlarının toqquşmasını və Kevin Maqnussen ilə Pyer Qasli arasında baş verən insidenti yenidən nəzərdən keçirsin.Bakıda bu qərarı verən həmin 3 stüardı (Harri Konelli, Dennis Din və Tom Kristensen) bir yerə toplamaqdan ötrü Beynəlxalq Avtomobil Federasiyasında (FIA) onlarla videoəlaqə yaradılacaq və “Williams”ın qarşıya qoyduğu məsələ telekonfrans rejimində müzakirə olunacaq.xeber100.com

Portuqaliya yığmasının ilkin heyəti açıqlanıb

Qadın voleybolçulardan ibarət Azərbaycan millisi ilə Qızıl Avropa Liqasının “A” qrupunda mübarizə aparacaq Portuqaliya yığmasının ilkin heyəti açıqlanıb.Azərtac xəbər verir ki, Portuqaliya millisinin baş məşqçisi Manuel Almeyda ilkin heyətdə Beatriş Baştu, Ana Foneşka, Daniela Lureyru, Joana Resende, Ana Koutu, Eliana Durau, Mariana Lopeş, Vanessa Rodriqeş, Eduarda Duarte, Nuria Lopeş da Silva, Karina Moura, Neuşa Netu, Alin Rodriqeş, Juliana Antuneş, Barbara Qomeş, Fabiola Qomeş, Ana Quveya, Marta Hurst, Yuliya Kovalenko, Patrisiya Leal, Maria Lopeş, Maria Mayyu və Ana Valeyə yer verib.Turnirin “A” qrupunda Azərbaycan və Ukrayna yığmalarından başqa, Portuqaliya və Bolqarıstan milliləri də mübarizə aparacaq.Qeyd edək ki, qrup qalibləri, həmçinin ən yaxşı ikinci yerin sahibi iyunun 14-15-də “Dördlər finalı”nda mübarizəni davam etdirəcək. “B” qrupunda Xorvatiya, Finlandiya, Macarıstan, Fransa, “C” qrupunda isə Slovakiya, Belarus, İspaniya və Çexiya milliləri yarışacaqlar.xeber100.com

Atletika dördnövçülüyü üzrə yarış keçirilib

Azərbaycan Dövlət Bədən Tərbiyəsi və İdman Akademiyasının stadionunda paytaxt məktəbliləri (qızlar) arasında atletika dördnövçülüyü üzrə yarış keçirilib.BŞGİBİ-dən Azərtac-a bildiriblər ki, yarışın proqramına 60 metr məsafəyə qaçış, uzunluğa tullanma, top atma və 500 metr məsafəyə kross qaçışı növləri daxildir.Paytaxt məktəblərinin VII–VIII sinif (2004–2005-ci il təvəllüdlü) şagirdlərinin iştirakı ilə komanda xarakteri daşıyan yarışda Xətai rayonu 245 nömrəli tam orta məktəbin kollektivi birinci olub. Qaradağ rayonu 106 nömrəli tam orta məktəbin komandası yarışı ikinci, Binəqədi rayonu 244 nömrəli tam orta məktəbin şagirdləri üçüncü pillədə başa vurublar.xeber100.com

İdman kapoeyrası üzrə dünya çempionatı keçiriləcək

Mayın 11-12-də Bakı İdman Sarayında idman kapoeyrası üzrə dünya çempionatı keçiriləcək.Azərtac xəbər verir ki, Ümumdünya Kapoeyra Federasiyası (WCF), Gənclər və İdman Nazirliyi və Azərbaycan Kapoeyra Federasiyasının təşkilatçılığı ilə təşkil olunacaq yarış Azərbaycanın Braziliyadakı səfirliyi və Braziliyanın Azərbaycandakı səfirliyi tərəfindən dəstəklənir.Çempionata 40-dan çox ölkədən yüzlərlə idmançı və komanda üzvünün qatılacağı gözlənilir. Yarışda, həmçinin dünyanın 12 ən iri kapoeyra qrupu və onların qrand masterlərinin, fəxri qonaq kimi rəsmi şəxslərin iştirakı gözlənilir.Dünya çempionatında ölkəmiz müxtəlif çəki və yaş kateqoriyaları üzrə 25 idmançı ilə təmsil olunacaq. Yığma komandamız mundiala hazırlığı Azərbaycan Kapoeyra Federasiyasının baş məşqçisi Elgiz Əlizadənin rəhbərliyi ilə davam etdirir.Yarış bir çox beynəlxalq televiziya və internet kanalları, o cümlədən Braziliyanın televiziya məkanında işıqlandırılacaq.xeber100.com

“Roma” klubunun rəhbərliyi yeni müqavilə hazırlayır

“Roma” futbol klubu qapıçısı Alisson Bekkeri heyətində saxlamaq istəyir.Azərtac xəbər verir ki, klub rəhbərliyi futbolçuya yeni müqavilə təklif etməyə hazırlaşır. Müqavilə 2023-cü ilin yayınadək nəzərdə tutulub.Yeni müqaviləyə əsasən, futbolçunun məvacibi artacaq. Belə ki, Bekker ilinə 3 milyon avro əldə edəcək.xeber100.com

İngiltərə Premyer Liqasının 37-ci turunda

İngiltərə Premyer Liqasının 37-ci turunun mərkəzi görüşü Londonda keçirilib.Azərtac xəbər verir ki, “Çelsi” doğma meydanda “Liverpul” klubunu məğlub edib - 1:0. Oyunda yeganə qolu 32-ci dəqiqədə Olivye Giru vurub.Günün digər oyununda isə “Arsenal” öz meydanında “Börnli” klubunu qəbul edib. Matç meydan sahiblərinin 5:0 hesablı qələbəsi ilə başa çatıb. Oyunda hesabı 14-cü dəqiqədə Pyer-Emerik Obameyanq açıb - 1:0. Birinci hissənin son dəqiqəsində meydan sahibləri Aleksandr Lakazetin qolu ilə hesab arasındakı fərqi artırıb – 2:0. Birinci hissə bu hesabla başa çatıb. Fasilədən sonra künc zərbəsindən sonra Kolasinac fərqlənib – 3:0. Qoldan on dəqiqə sonra Alex hesabı artırıb – 4:0. Matçın 75-ci dəqiqəsində Obameyanq oyunda son nöqtəni qoyub – 5:0.Bu qələbəsən sonra Arsen Vengerin yetirmələri xalların sayını 60 çatdıraraq altıncı yerdəki mövqeyini qoruyub və UEFA Avropa Liqasında iştirakını rəsmiləşdirib.Bu görüş “Arsenal” klubun baş məşqçisi Arsen Venger üçün sonuncu ev oyunu olub. 1996-cı ildən “Arsenal”ı çalışdıran fransalı mütəxəssisin rəhbərliyi ilə klub üç dəfə İngiltərə çempionluğu, yeddi dəfə ölkə kuboku və bir dəfə isə liqa kubokunu qazanıb.Turnir cədvəlinə vaxtından əvvəl çempionluğu bayram edən “Mançester Siti” 94 xalla başçılıq edir. “Mançester Yunayted” 77 xalla ikinci, “Liverpul” 72 xalla üçüncü, bir oyun az keçirən “Tottenhem” isə dördüncü sıradadır.Turun digər oyunlarında aşağıdakı nəticələr qeydə alınıb: “Brayton” – “Mançester Yunayted” – 1:0. “Stok Siti” – “Kristal Pelas” – 1:2. “Bornmut” – “Suonsi Siti” – 1:0. “Lester Siti” – “Vest Hem” – 0:2. “Uotford” – “Nyukasl” – 2:1. “Vest Bromviç” – “Tottenhem” – 1:0. “Everton” – “Sauthemton” – 1:1. “Mançester Siti” – “Haddersfild” – 0:0.xeber100.com