“Neftçi” futbol klubu iki futbolçu ilə yollarını ayırır

“Neftçi” klubu iki futbolçu ilə yollarını ayırır.Azərtac kluba istinadla xəbər verir ki, son 5 ayı icarə əsasında Venesuelanın "Mineros Quayana” klubunda keçirmiş yarımmüdafiəçi Edson Kastilyo ilə müqaviləyə qarşılıqlı razılaşma əsasında xitam verilib. Çexiyanın “Karvina” klubuna məxsus olan və dekabrın 31-də icarə müddəti başa çatacaq müdafiəçi Pavel Dreksa ilə müqavilə uzadılmayacaq.Klub rəhbərliyi hər iki futbolçuya gələcək karyerasında uğurlar arzulayıb.xeber100.com

“Zirə” klubu beynəlxalq turnirə dəvət alıb

“Zirə” klubunun 12 yaşadək futbolçulardan ibarət komandası yoxlama oyunu keçirib.Azərtac xəbər verir ki, Bakı təmsilçisi İranın Şiraz vilayətinin “Hafez” klubu ilə qarşılaşıb. Azərbaycan Milli Aviasiya Akademiyasının stadionunda keçirilən görüş komandamızın 2:1 hesablı qələbəsi ilə yekunlaşıb.Şiraz təmsilçisinin akademiyasının direktoru Ahmad Rezayi ilə “Zirə”nin akademiyasının əlaqələndiricisi Adil Şükürov arasında görüş olub. Əməkdaşlıq haqqında razılaşma əldə olunub. Rezayi “Zirə”ni apreldə Şiraz şəhərində keçiriləcək beynəlxalq turnirə dəvət edib.xeber100.com

“Kəpəz” futbol klubu üç futbolçu ilə yollarını ayırıb

Gəncənin “Kəpəz” klubu üç futbolçu ilə yollarını ayırıb.Azərtac kluba istinadla xəbər verir ki, Gəncə təmsilçisi yarımmüdafiəçilər Samba Diallo, Mansur Aladji və hücumçu Viktor Oseqeyllə yeni müqavilə imzalamayıb.Klub rəhbərliyi futbolçulara komandadakı xidmətlərinə görə, minnətdarlığını bildirib və gələcək karyeralarında uğurlar arzulayıb.xeber100.com

Beynəlxalq Olimpiya Komitəsinin layihəsi icra olunub

Beynəlxalq Olimpiya Komitəsinin (BOK) və Azərbaycan Milli Olimpiya Komitəsinin (MOK) birgə layihəsi olan idman idarəçiliyi kursu təşkil olunub.MOK-dan Azərtac-a bildiriblər ki, layihə gənc liderlərin yetişdirilməsi və idman idarəçiliyində mütəxəssislərin hazırlanması üçün reallaşdırılıb.Layihə iki hissədən ibarət olub. Birinci hissədə BOK-un mütəxəssisi Stavri Bello milli kurs direktorluğu üzrə təlim keçib. Sonra BOK-un mütəxəssisinin nəzarəti altında təlimçilər üçgünlük kurslara cəlb olunublar. Təlimlərə Azərbaycan Dövlət Bədən Tərbiyəsi və İdman Akademiyasında “İdman İdarəçiliyi” üzrə 20 iştirakçı qatılıb.Kursun əsas mövzusu Olimpiya hərəkatı, Olimpiya Oyunları və onun təşviqi olub. Həmçinin kommunikasiya, dövlət idman siyasəti, idman mütəxəssisləri və s. mövzulara da toxunulub.Təlimin sonunda MOK-un vitse–prezidenti Çingiz Hüseynzadə və BOK-un mütəxəssisi Stavri Bello iştirakçılara təbriklərini çatdırıb, onlara sertifikatlar təqdim ediblər.xeber100.com

Dünya Güləş Birliyinin yeni qaydalarına uyğun olaraq…

Bakı İdman Sarayında təşkil olunan sərbəst və yunan-Roma güləşi üzrə böyüklər arasında Azərbaycan çempionatının qalib və mükafatçıları ilə görüş keçirilib.Azərtac xəbər verir ki, Dünya Güləş Birliyinin yeni qaydalarına uyğun olaraq keçirilən çempionatda həm sərbəst, həm də yunan-Roma güləşi üzrə 10 çəki dərəcəsində qalib və mükafatçılar müəyyənləşib. Çəki dərəcələri üzrə ilk üç yeri tutmuş idmançılar millinin heyətinə cəlb ediləcək və 2018-ci il ərzində komandanın qatılacağı beynəlxalq yarışlarda ölkəmizi təmsil etmək imkanı qazanacaqlar.Yarışlar başa çatdıqdan sonra Azərbaycan Güləş Federasiyasının birinci vitse-prezidenti Sahib Ələkbərov qalib və mükafatçılarla görüşüb. İdmançıların çempionatda böyük əzmkarlıqla mübarizə apardıqlarını qeyd edən AGF rəsmisi eyni əzmkarlığı növbəti il ərzində keçiriləcək yarışlarda da gözlədiklərini bildirib:“Azərbaycan Güləş Federasiyası tərəfindən yığma komandaların seçiminə daim ədalətlə yanaşmağa çalışılıb və idmançıların beynəlxalq arenada ölkəmizi layiqincə təmsil etmələri üçün lazımi şərait yaradılıb. Ölkəmizdə idmana və idmançılara dövlət səviyyəsində göstərilən diqqətin nəticəsidir ki, bu gün Azərbaycan idmançıları, xüsusən güləşçilərimiz ən mötəbər beynəlxalq yarışlarda daim ilk üçlükdə qərarlaşır. Sizin öhdənizə isə bu ənənəni qoruyub saxlamaq və daha da inkişaf etdirmək vəzifəsi düşür”.Azərbaycan çempionatının qalib və mükafatçısı olmuş hər bir idmançıya uğur arzulayan Sahib Ələkbərov qələbəyə gedən yolun nizam-intizamdan və yüksək hazırlıqdan keçdiyini xüsusi vurğulayaraq deyib: “Artıq növbəti ilin ilk aylarından hazırlıq üzrə təlim-məşq toplanışları başlayacaq. Bu yarış artıq geridə qaldı. Sizin hər biriniz çalışmalısınız ki, keçirilən təlim-məşq toplanışlarında məşqçilərin tapşırıqlarına əməl edib, öz üzərinizdə çalışıb qələbəyə köklənəsiniz. Bunun üçün təbii ki, nizam-intizama da xüsusi diqqət yetirməlisiniz. 2020-ci ildə Tokioda keçiriləcək Yay Olimpiya Oyunlarının iştirakçıları sizin aranızdadır”.Sərbəst güləş üzrə yığma komandanın baş məşqçisi Firdovsi Umudov da idmançılar və Federasiya rəhbərliyi qarşısında çıxış edərək bildirib ki, bu günə qədər olduğu kimi bundan sonra da onlara göstərilən etimadı doğrultmaq üçün çalışacaqlar:“Biz hər zaman dövlətimizin və Federasiyamızın dəstəyini üzərimizdə hiss etmişik. Bu gün də hiss edirik. Çalışırıq ki, ölkəmizi, bayrağımızı layiqincə təmsil edək. Bunun üçün əlimizdən gələni edirik və edəcəyik. Azərbaycan çempionatının nəticələrinə görə, yığma komandamızın yeni heyəti formalaşdı. Qarşıdakı yarışlarda hər bir komanda üzvünü sınaqdan keçirəcək, qitə və dünya çempionatları üçün heyəti müəyyənləşdirəcəyik”.xeber100.com

“Şelkunçik” matç-turnirində birinci turun oyunları keçirilib

Moskvada Milad bayramına həsr olunan ənənəvi nəsillərin “Şelkunçik” matç-turnirində birinci turun oyunları keçirilib.Azərtac xəbər verir ki, “Krallar” komandasının heyətində azərbaycanlı Şəhriyar Məmmədyarov, israilli Boris Gelfand, latviyalı Aleksey Şirov və rusiyalı Sergey Rublyovski çıxış edir. “Şahzadələr” komandasının şərəfini rusiyalılar Qriqori Oparin, Vladislav Artemyev, Andrey Yesipenko, Daniil Yuffa qoruyur.“Kraliçalar” komandasına Yekaterina Kovalevskaya, Qalina Strutinskaya, Tatyana Qrabuzova (hər üçü Moskvadan) və Belarusdan Yelena Zayats daxildir. “Şahzadə xanımlar” komandası Aleksandra Maltsevskaya, Yelizaveta Solojenkina, Yekaterina Qoltseva və Aleksandra Dimitrovadan ibarət heyətlə təmsil olunur.Birinci turda “krallar” “şahzadələr”ə 2,5:1,5 hesabı ilə qalib gəliblər, “kraliçalar” “şahzadə xanımlar”la sülhlə ayrılıblar (hamı heç-heçə, 2:2). Birinci turun 8 oyunundan yalnız biri “məhsuldar” olub: qara fiqurlarla oynayan Şəhriyar Məmmədyarov Qriqori Oparini məğlub edib.Aleksey Şirov-Andrey Yesipenko, Boris Gelfand-Vladislav Artemyev və Daniil Yuffa-Sergey Rublyovski heç-heçə oynayıblar.Qadınların turnirində bütün oyunlar heç-heçə başa çatıb: Tatyana Qrabuzova-Aleksandra Maltsevskaya, Qalina Strutinskaya-Aleksandra Dimitrova, Yekaterina Qoltseva-Yelena Zayats, Yelizaveta Solojenkina-Yekaterina Kovalevskaya.Bu gün, matç-turnirin klassik hissəsinin ikinci turunda aşağıdakı cütlüklər mübarizə aparacaqlar: Şirov-Oparin, Gelfand-Yuffa, Yesipenko-Məmmədyarov, Artemyev-Rublyovski; Qrabuzova-Qoltseva, Strutinskaya-Solojenkina, Maltsevskaya-Zayats, Dimitrova-Kovalevskaya.Şeveningen sistemi üzrə keçirilən turnir iki dövrədən ibarət olacaq. Dekabrın 19-22-də klassik şahmat üzrə, dekabrın 23-24-də isə sürətli şahmat üzrə oyunlar nəzərdə tutulub. Komandaların tutduğu yerlər hər komandanın bütün oyunçularının iki növdə - klassik və sürətli şahmat üzrə topladıqları xalların ümumi sayına əsasən müəyyən ediləcək.Klassik şahmatda qalib gəlmiş oyunçuya iki xal, heç-heçə halında hərəyə bir xal, məğlub olan oyunçuya sıfır xal hesablanır. Sürətli şahmatda qalib gəlmiş oyunçuya bir xal, heç-heçəyə görə 0,5 xal, məğlub olan oyunçuya sıfır xal hesablanır. Komandanın bütün oyunçuları tərəfindən iki növ üzrə toplanmış xalların ümumi sayı bərabər olduqda, yerlər komandanın bütün oyunçuları tərəfindən klassik şahmatda toplanmış xalların daha böyük sayına müəyyən edilir.Qalib komandalar kubok və pul mükafatı alır. Mütləq yaxşı nəticələr göstərmiş (klassik şahmat + sürətli şahmat) idmançılara xüsusi mükafatlar təqdim ediləcək. Bundan əlavə, təşkilatçılar yarışda yaradıcı nailiyyətlərə görə mükafatlar təyin ediblər.xeber100.com

“Böyük qayıdış” filminin təqdimatı olub

Dekabrın 20-də Bakıda peşəkar boks üzrə ilk dünya çempionu olan həmyerlimiz Fariz Məmmədova həsr olunmuş “Böyük qayıdış” filminin təqdimatı olub.Azərtac xəbər verir ki, mərasimdə Milli Məclisin deputatları, idman ictimaiyyətinin nümayəndələri iştirak ediblər.Beynəlxalq Avrasiya Mətbuat Fondunun prezidenti Umud Mirzəyev Fariz Məmmədovun qazandığı nailiyyətləri yüksək qiymətləndirib və peşəkar rinqdə əldə etdiyi uğurların gənc nəslə nümunə olacağını diqqətə çatdırıb. F.Məmmədovun uşaq yaşlarından Vətənin yağı düşməndən qorunmasında böyük rəşadət göstərdiyini vurğulayan U.Mirzəyev boksçunun nailiyyətlərinin təbliğinin vacibliyini bildirib.Filmin rejissoru Nicat Cəlilov ekran əsərinin bir ilə ərsəyə gəldiyini diqqətə çatdırıb. O, filmin tamaşaçılar tərəfindən maraqla qarşılanacağına əminliyini bildirərək Fariz Məmmədovla bağlı film çəkməsindən məmnunluğunu ifadə edib.Digər çıxış edənlər boksçunun yüksək insani keyfiyyətlərindən, gənc idmançıların yetişməsində xidmətlərindən və ölkə idmanının inkişafına verdiyi töhfələrdən danışıblar.Sonra film nümayiş olunub.Ekran əsəri iştirakçılar tərəfindən böyük maraqla qarşılanıb.xeber100.com

Formula-1 Azərbaycan Qran-Prisinə hazırlıq çərçivəsində

Bakı Şəhər Halqası Əməliyyat Şirkəti (BŞH) gələn il aprelin 27-29-da keçiriləcək növbəti Formula-1 Azərbaycan Qran-Prisinə hazırlıq çərçivəsində trekin ətrafına təhlükəsizlik baryerlərini quraşdırmağa başlayır.BŞH-dən Azərtac-a bildirilib ki, bu həftədən başlayaraq Xəqani küçəsinin Puşkin küçəsi ilə Bülbül prospekti arasında olan hissəsinə baryerlər quraşdırılacaq. Sürücülərdən xahiş olunur ki, gecə saatlarında (22:00–06:00) Xəqani küçəsinin bu hissəsində avtomobilləri saxlamasınlar, əvəzində yaxın ərazilərdə yerləşən parklanma yerlərindən istifadə etsinlər.BŞH-nin Yarış Obyektinin Tikintisi üzrə rəhbəri Tom Butçer ötən yarışla müqayisədə növbəti yarışa hazırlıq işlərinin daha az vaxt aparacağını bildirib: “Biz növbəti dəfə Formula-1 yarışına yüksək səviyyədə ev sahibliyi etmək üçün artıq tikinti-quraşdırma işlərinin aparılması məqsədilə hazırlıqlara start veririk. Əldə etdiyimiz təcrübələr sayəsində hazırlıq işlərinə hər ötən il daha az vaxt sərf edirik.Bu il tikinti-quraşdırma işləri ötən illə müqayisədə xeyli az olacaq. Belə ki, Paddok binası hazır vəziyyətdədir və həmçinin bu il qənbər daşlı hissə başda olmaqla bütövlükdə trek boyunca yeni asfalt qatının salınmasına ehtiyac olmayacaq. Bundan başqa, yarış həftəsonu üçün nəzərdə tutulan bəzi yerüstü keçidlər də ötən yarışdan etibarən şəhər sakinlərinin istifadəsindədir.Digər tərəfdən, çalışırıq ki, yarışa hazırlıq çərçivəsində gördüyümüz bütün işlərdə şəhər sakinlərinin rahat və fasiləsiz hərəkəti təmin olunsun. Fürsətdən istifadə edərək bütün paytaxt sakinlərini yenidən möhtəşəm Formula-1 yarışına ev sahibliyi etmək üçün birgə səy göstərməyə və çətinlikləri anlayışla qarşılamağa dəvət edirəm”.Yarışla əlaqədar aparılan tikinti-quraşdırma işlərinin əsasən iki mərhələdə həyata keçirilməsi nəzərdə tutulur. İlkin mərhələ martın sonunadək davam edəcək və bu mərhələdə trekin bəzi hissələrində asfalt qatında bərpa işləri aparılmaqla yanaşı, trek boyunca təhlükəsizlik baryerlərinin əksəriyyəti də quraşdırılacaq. Həmçinin martın əvvəllərində trek ətrafında tribunalar və digər müvəqqəti tikililərin inşasına başlanacaq.İkinci mərhələ martın sonundan yarış həftəsinədək davam edəcək və bu mərhələdə avtomobil yolları açıq saxlanılmaqla trekin qalan hissələrinə təhlükəsizlik baryerləri quraşdırılacaq, trek ətrafında digər müvəqqəti obyektlərin quraşdırılması davam etdiriləcək və trek yarışa tam hazır vəziyyətə gətiriləcək.xeber100.com

“Sumqayıt” futbol klubu ilk transferini həyata keçirib

“Sumqayıt” futbol klubu dövrələrarası fasilədə ilk transferini həyata keçirib.Azərtac kluba istinadla xəbər verir ki, komanda son olaraq “Keşlə”də çıxış etmiş Elnur Abdullayevi heyətinə qatıb. Otuz bir yaşlı futbolçu “Sumqayıt” ilə 1,5 illik müqavilə imzalayıb.Qeyd edək ki, E.Abdullayev karyerası ərzində “Keşlə”dən (32 oyun, 2 qol) başqa, “Simurq” (13 oyun, 1 qol), “Xəzər-Lənkəran” (114 oyun, 10 qol), “Muğan” (42 oyun, 2 qol), “Bakı” (69 oyun, 3 qol), “Olimpik” (12 oyun), “Neftçi” və “Turan”ın şərəfini qoruyub. O, həmçinin 2006-2007-ci illər ərzində 3 dəfə Azərbaycan millisinin formasını geyinib.xeber100.com

XIX açıq respublika çempionatı keçiriləcək

Dekabrın 23-də Gənclər və İdman Nazirliyi, Döyüş Növlər Şurası və Azərbaycan Kyokşin Karate Federasiyasının (AKKF) birgə təşkilatçılığı ilə XIX açıq respublika çempionatı keçiriləcək.AKKF-dən Azərtac-a bildirilib ki, çempionatda bütün yaş kateqoriyalarında kişilər və qadınlar arasında qalib adı uğrunda mübarizə gedəcək.Yarışda Azərbaycanın bir çox bölgəsindən 250-ə yaxın idmançı iştirak edəcək.Qeyd edək ki, çempionat Bakı İdman Sarayında keçiriləcək. Yarışın keçirilməsində əsas məqsəd 2018-ci il üçün yığma komandanın heyətini formalaşdırmaqdır.xeber100.com