Beynəlxalq Futbol Federasiyası simvolik komandaları açıqlayıb

Beynəlxalq Futbol Tarixi və Statistikaları Federasiyası (İFFHS) 2017-ci ilin simvolik komandalarını açıqlayıb. Apasport.az saytının məlumatına görə, ilk “11-lik”lərlə yanaşı, ehtiyat heyətlər də müəyyənləşib.Kişi futbolçuların simvolik komandasında ən çox oyunçu ilə təmsil olunan komanda “Real”dı. Madrid təmsilçisinin 5 üzvü ilk “11-lik”də göstərilib. Rəmzi komandanın baş məşqçiliyinə də “Real”ın çalışdırıcısı Zinəddin Zidan layiq görülüb.Sorğuda Azərbaycanı təmsil edən apasport.az saytının əməkdaşı, İFFHS-in üzvü Vüqar Xeyrullayev simvolik komandada 10 futbolçunu doğru müəyyənləşdirib. Yalnız əməkdaşımızın bu siyahıya layiq bildiyi Corcio Kyellinini sabiq komanda yoldaşı Leonardo Bonuççi əvəz edib.xeber100.com

AFFA-nın iclası keçiriləcək

AFFA-nın İcraiyyə Komitəsinin iclası keçiriləcək. Apasport.az saytının məlumatına görə, yığıncaq dekabrın 20-də baş tutacaq.Tədbir saat 10:30-da start götürəcək. Konfrans Bayıl stadionunda təşkil olunacaq.xeber100.com

Almaniya Futbol İttifaqının açıqlamasına əsasən…

Almaniya yığmasının DÇ-2018-də çempion olacağı təqdirdə, alacağı mükafatın məbləği açıqlanıb. Apasport.az saytı xəbər verir ki, Bundestim kuboka sahib çıxsa, millinin hər bir üzvü 350 min avro irəli düşəcək.Bunu Almaniya Futbol İttifaqı rəsmən açıqlayıb.Yoahim Lövün yetirmələri mundialın finalında məğlub olacaqları halda hərəyə 200 min, üçüncü yeri tutacaqları təqdirdə isə 150 min avro mükafat alacaqlar.Almaniya Futbol İttifaqı medalsız qalacağı halda da yığma üzvlərini mükafatsız qoymayacaq – 125 min avro. Komanda mübarizəni ¼ finalda dayandırsa, bu məbləğ 75 min avroya bərabər olacaq.Qeyd edək ki, Almaniya millisi DÇ-2018-in final mərhələsində Meksika, İsveç və Cənubi Koreya yığmaları ilə birlikdə F qrupunda mübarizə aparacaq.xeber100.com

“Böyük dəbilqə” yarışları Düsseldorfda keçiriləcək

Hər il Bakıda keçirilən cüdo üzrə “Böyük dəbilqə” yarışlarının lokasiyası dəyişdirilir. Gələn il Azərbaycan paytaxtı bu reytinq turnirinə ev sahibliyi etməyəcək. Milli Cüdo Federasiyası bütün qüvvələrini səfərbər edərək sentyabr ayında burada keçiriləcək dünya çempionatına hazırlaşacaq.Beynəlxalq Cüdo Federasiyası( İJF) tərəfindən yayılmış məlumatda göstərilir ki, 2018-ci ildə “Böyük dəbilqə” mundialı həm şəxsi, həm də komanda formatında keçiriləcək. Bununla əlaqədar həmin turnirə Bakı ev sahibliyi etməyəcək. Xatırladaq ki, İJF-nin ilkin təqvimində bu turnirin mayın 11-13-də Azərbaycan paytaxtında keçirilməsi nəzərdə tutulurdu. Lakin həmin cədvəl hələ qəti deyildi. İndi məlum olub ki, Bakı “Böyük dəbilqə” turnirinin təşkili məsələsini öz üzərinə götürməyəcək və bütün səylərini yalnız dünya çempionatına hazırlıq üzərində cəmləşdirəcək.İndi Düsseldorfda keçiriləcək yarışın statusu daha da artacaq, çünki gələn il Qran-Pri “Böyük dəbilqə”yə çevriləcək və həmin yarışlar fevralın 23-25-də keçiriləcək. Gələn il dörd belə turnir nəzərdə tutulur. Onlardan birincisi Parisdə, ikincisi Düsseldorfda, üçüncüsü Yekaterinburqda keçiriləcək, ilin sonunda isə artıq ənənəyə görə “Böyük dəbilqə” mərhələsini Tokio qəbul edəcək.İJF-dən verilən məlumata görə, olimpiya dövrəsi 2018-ci ilin mayında başlanacaq. Cüdoçular həm reytinq balları, həm də Olimpiadaya vəsiqə uğrunda mübarizə aparacaqlar. Bu baxımdan, Bakıda keçiriləcək dünya çempionatı mövsümün ən mühüm startı olacaq. Çempionat maksimum xal qazanmaq imkanı verəcək və bu mundialın mükafatçılarının Tokio mərhələsinə düşmək şansları xeyli artacaq.xeber100.com

“Region Liqası” turnirinin püşkü atılacaq

Dekabrın 13-də futbol üzrə “Region Liqası” turnirinin püşkü atılacaq.Azərtac xəbər verir ki, püşkatma mərasimi 3 şəhərdə - Sumqayıtda (“Kapital Bank Arena”), Sabirabadda (Gənclər Mərkəzi) və Oğuzda (Təhsil şöbəsi) keçiriləcək.Liqanın oyunlarına dekabrın 16-da və 17-də start veriləcək.Qeyd edək ki, “Region Liqası”nın oyunları 3 zona üzrə (paytaxt və Şimal; Cənub və Mərkəz, Şimal-Qərb və Qərb) keçiriləcək. Hər birində 4 və ya 5 iştirakçı olmaqla komandalar 2 qrupda mübarizə aparacaq. Bu mərhələ 4 dövrədən ibarət olacaq.Hər zona üzrə qalibi müəyyənləşdirmək üçün qrup mərhələsini birinci pillədə başa vuran komandalar arasında pley-off qarşılaşması təşkil ediləcək. Qalib komandalar yarımfinala vəsiqə qazanacaqlar.Yarımfinal mərhələsində 3 zonanın qalibi ilə yanaşı, Naxçıvan Muxtar Respublikası üzrə birinci yeri tutmuş komanda iştirak edəcək. Qarşılaşmalar neytral meydanda keçiriləcək və bir oyundan ibarət olacaq. Final və üçüncü yer uğrunda oyun da neytral meydanda keçiriləcək.xeber100.com

Bədii gimnastika üzrə Bakı çempionatı başa çatıb

Milli Gimnastika Arenasında bədii gimnastika üzrə Azərbaycan birinciliyi və bölgələrarası kubok, eyni zamanda, batut gimnastikası üzrə Azərbaycan birinciliyi və Bakı çempionatı başa çatıb.Azərtac xəbər verir ki, dörd gün davam edən yarışlarda “Ocaq Sport” Klubunun, Bakı Gimnastika Məktəbinin yetirmələri, Sumqayıtdan, Qusardan, həmçinin Gürcüstandan olan təmsilçilər mükafatçılar sırasında yer alıblar.Turnirin sonunda Arenada əsl gimnastika coşqusu yaşanıb. “Qızıl yaş” adlı şouda tamaşaçılar bu dəfə adət edildiyi kimi yarış meydançasında azyaşlı gimnastları deyil, məhz onların məşqçilərini izləyiblər. Yığma komanda ilə yanaşı, digər klublarda çalışan məşqçilər bir neçə gün ərzində böyük şouya ciddi hazırlaşıblar. Uzun fasilədən sonra meydançada öz yetirmələri qarşısında çıxış etmək həyəcanının öhdəsindən məşqçilər məharətlə gəliblər.Bununla da gimnastika üzrə dördgünlük birgə yarışlara yekun vurulub.xeber100.com

II Dünya İntellektual Oyunları start götürüb

Çinin Huayan şəhərində II Dünya İntellektual Oyunları start götürüb.Azəərtac xəbər verir ki, yarışlar çərçivəsində 5 növ - bric, dama, şahmat, qo, Çin şahmatı və ma-conq stolüstü oyunlar üzrə görüşlər keçiriləcək.Şahmat turnirində yarışların üç növdə təşkili nəzərdə tutulub. Şahmatçılar dekabrın 10-11-də rapid yarışında mübarizə aparıblar. Dekabrın 12-13-də blits, dekabrın 14-15-də isə bask şahmatı (eyni zamanda, iki şahmat taxtası üzərində müxtəlif rəngli fiqurlarla oyun) yarışlar keçiriləcək.Şahmat turnirində Asiya, Amerika, Afrika və Avropa ölkələrindən 12 qadın və 12 kişi şahmatçı iştirak edəcək. Azərbaycanı kişi şahmatçıların turnirində Şəhriyar Məmmədyarov və Rauf Məmmədov təmsil edirlər.Proqramın ilk növü rapid olub. Turnir iştirakçıları iki gün ərzində İsveçrə sistemi üzrə 7 turda yarışıblar.Turnirin yekununa görə, kişi şahmatçıların yarışında 4,5 bal toplayan rusiyalı Dmitri Andreykin qalib olub. Azərbaycanlı qrossmeyster Şəhriyar Məmmədyarov və vyetnamlı Le Kuanq Lyem eyni xal toplayıblar. Əlavə göstəricilər nəzərə alınaraq, Azərbaycan təmsilçisi gümüş medala layiq görülüb. Rauf Məmmədov isə 12-ci yerlə kifayətlənib.Bu Oyunlar Çində 2008-ci ildən keçirilir. Bütün bu illər ərzində beş növ üzrə yarışlarda qazanılan medalların sayına görə ufalı Aleksandr Georgiyev və Tamara Tansıkkujina rekordçudurlar. Onlar Dünya İntellektual Oyunlarında hərəyə 7 medal qazanıblar. Aleksandr Georgiyev 4 qızıl medala sahibdir.Proqramın digər iki növü blits və bask şahmatı olacaq. Bask şahmatında rəqiblər iki şahmat taxtası üzərində eyni zamanda mübarizə aparırlar.xeber100.com

“Australian Young Masters GM Norm” turnirində

Azərbaycanın beynəlxalq şahmat ustası Kənan İzzət Avstraliyanın Adelaida şəhərində keçirilən “Australian Young Masters GM Norm” turnirində 9 mümkün xaldan 6,5 xal toplayaraq yarışları birinci yerdə başa vurub.Azərtac xəbər verir ki, avstraliyalı Bobbi Çen də idmançımızla eyni xal toplayıb, rusiyalı qrossmeyster Vasili Papin liderlərdən yarım xal geridə qalıb.Beynəlxalq turnirdə Azərbaycan, Avstraliya, Rusiya, Hindistan, Fransa və İndoneziyadan ümumilikdə 10 şahmatçı iştirak edib. Turnir İsveçrə sistemi üzrə 9 turdan ibarət olub.xeber100.com

Kyokşin Karate Federasiyasının məlumatı

Azərbaycan idmançıları Rusiyanın Yekaterinburq şəhərində Ümumdünya Kyokşin İttifaqı (KWU) tərəfindən keçirilən üçüncü dünya çempionatında iki bürünc medal qazanıblar.Azərbaycan Kyokşin Karate Federasiyasından Azərtac-a bildirilib ki, 50 ölkədən 300 idmançının qatıldığı yarışda ölkəmizi federasiyanın prezidenti Allahverdi Rüstəmovun rəhbərliyi ilə yeddi idmançı təmsil edib.Karateçilərimizdən Emin İsmayıllı (65 kq) və Valeh Cəfərov (70 kq) çempionatın bürünc medallarına layiq görülüblər.xeber100.com

Azərbaycan kubokunun final mərhələsində

Futbol üzrə Azərbaycan kubokunun dörddəbir final mərhələsinin cavab oyunlarının vaxtı müəyyənləşib.Azərtac xəbər verir ki, cavab qarşılaşmalarına dekabrın 14-də start veriləcək. İlk oyun günündə “Kəpəz”–“Keşlə” və “Neftçi”–“Zirə” klubları üz-üzə gələcəklər.Dekabrın 15-də isə “Səbail”–“Qəbələ” və “Sumqayıt”–“Qarabağ” komandaları qarşılaşacaqlar.Xatırladaq ki, dörddəbir final mərhələsinin ilk oyunlarının nəticələri belə olub: “Keşlə”–“Kəpəz” - 2:0, “Zirə”–“Neftçi” - 1:0, “Qəbələ”–“Səbail” – 1:0, “Qarabağ”–“Sumqayıt” – 2:1.xeber100.com