“Sumqayıt” futbol klubu ilk transferini həyata keçirib

“Sumqayıt” futbol klubu dövrələrarası fasilədə ilk transferini həyata keçirib.Azərtac kluba istinadla xəbər verir ki, komanda son olaraq “Keşlə”də çıxış etmiş Elnur Abdullayevi heyətinə qatıb. Otuz bir yaşlı futbolçu “Sumqayıt” ilə 1,5 illik müqavilə imzalayıb.Qeyd edək ki, E.Abdullayev karyerası ərzində “Keşlə”dən (32 oyun, 2 qol) başqa, “Simurq” (13 oyun, 1 qol), “Xəzər-Lənkəran” (114 oyun, 10 qol), “Muğan” (42 oyun, 2 qol), “Bakı” (69 oyun, 3 qol), “Olimpik” (12 oyun), “Neftçi” və “Turan”ın şərəfini qoruyub. O, həmçinin 2006-2007-ci illər ərzində 3 dəfə Azərbaycan millisinin formasını geyinib.xeber100.com

XIX açıq respublika çempionatı keçiriləcək

Dekabrın 23-də Gənclər və İdman Nazirliyi, Döyüş Növlər Şurası və Azərbaycan Kyokşin Karate Federasiyasının (AKKF) birgə təşkilatçılığı ilə XIX açıq respublika çempionatı keçiriləcək.AKKF-dən Azərtac-a bildirilib ki, çempionatda bütün yaş kateqoriyalarında kişilər və qadınlar arasında qalib adı uğrunda mübarizə gedəcək.Yarışda Azərbaycanın bir çox bölgəsindən 250-ə yaxın idmançı iştirak edəcək.Qeyd edək ki, çempionat Bakı İdman Sarayında keçiriləcək. Yarışın keçirilməsində əsas məqsəd 2018-ci il üçün yığma komandanın heyətini formalaşdırmaqdır.xeber100.com

Ağır atletika üzrə açıq turnir keçiriləcək

Dekabrın 23-də Şüvəlan qəsəbəsindəki Ağır Atletika Akademiyasının yarış zalında Azərbaycanın Milli Qəhrəmanı Fəxrəddin Şahbazovun xatirəsinə həsr olunmuş ağır atletika üzrə açıq turnir keçiriləcək.Azərtac xəbər verir ki, Bakı Şəhər Gənclər və İdman Baş İdarəsi və Azərbaycan Ağır Atletika Federasiyasının təşkilatçılığı ilə keçiriləcək yarışda paytaxt və regionlarda fəaliyyət göstərən idman təşkilatlarından 1997-ci il və daha kiçik təvəllüdlü ağır atletlər iştirak edəcəklər.Turnirin keçirilməsində məqsəd Fəxrəddin Şahbazovun timsalında Vətən uğrunda şəhid olmuş soydaşlarımızın xatirəsinin əziz tutulması, onun həyat yolunun və idman fəaliyyətinin böyüməkdə olan yeni nəsil idmançılar və gənclər arasında təbliğ olunması, yerlərdə ağır atletika idman növünün təbliği və inkişaf etdirilməsi, ən güclü idmançıların aşkar olunması, idmançıların ustalıq səviyyəsinin artırılmasıdır.xeber100.com

Güləş Federasiyasının məlumatına görə…

Bakı İdman Sarayında sərbəst və yunan-Roma güləşi üzrə böyüklər arasında Azərbaycan çempionatı başa çatıb.Azərbaycan Güləş Federasiyasından Azərtac-a bildiriblər ki, çəki dərəcələri üzrə ilk üç yeri tutan idmançılar federasiya tərəfindən diplom, medal və pul mükafatları ilə təltif edilib. Yığma komandanın heyətinə cəlb olunan qaliblər il ərzində millinin mübarizə aparacağı beynəlxalq yarışlarda ölkəmizi təmsil edəcəklər.Yarışın sonuncu iki günündə 57, 61, 65, 70, 74, 79, 86, 92, 97 və 125 kq-dək çəki dərəcələrində sərbəst güləşçilər mübarizə aparıb. Ümumilikdə 212 sərbəst güləşçinin çıxış etdiyi çempionat gərgin və maraqlı idman mübarizəsi şəraitində keçirilib.Çempionatın sərbəst güləş yarışlarında Əfqan Xaşalov (57 kq), Mircəlal Həsənzadə (61 kq), Ağahüseyn Mustafayev (65 kq), Murtuz Müslümov (70 kq), Hacımurad Ömərov (74 kq), Cəbrayıl Həsənov (79 kq), Aleksandr Qostiyev (86 kq), Şərif Şərifov (92 kq), Nurməhəmməd Hacıyev (97 kq) və Cəmaləddin Məhəmmədov (125 kq) bütün rəqiblərini üstələyərək Azərbaycan çempionu adını qazanıblar.xeber100.com

Stolüstü tennis üzrə növbəti turnir keçirilib

Stolüstü tennis üzrə veteranlar arasında növbəti turnir keçirilib.Azərtac Azərbaycan Stolüstü Tennis Federasiyasının saytına istinadla xəbər verir ki, turnirin məqsədi veteranların sağlamlığının möhkəmləndirilməsi, onların fəal idman hərəkatına cəlb edilməsi, stolüstü tennisin təbliği məqsədilə təşkil olunub.Yarışlarda müxtəlif şəhər və rayonlardan 40-dək veteran qatılıb.Turnirdə 40-49, 50-59, 60 və yuxarı yaş qrupu üzrə təşkil olunan yarışların qalibləri federasiyanın diplom və medalları ilə mükafatlandırılıb.Birinciliyin qaliblərindən olan İlham Ağayevin gələn il keçiriləcək veteranlar arasında Avropa çempionatında iştirakı Azərbaycan Stolüstü Tennis Federasiyası tərəfindən təmin ediləcək.xeber100.com

XI Respublika Oyunlarının final mərhələsinə start verilib

Dekabrın 19-da Balakən Olimpiya İdman Kompleksində yeniyetmə yunan-Roma güləşçiləri arasında XI Respublika Oyunlarının final mərhələsinə start verilib.Azərtac xəbər verir ki, ölkənin şəhər, rayon, idman klub və cəmiyyətlərindən 160-dan artıq güləşçi 15 çəki dərəcəsində birincilik uğrunda mübarizə aparır.Dünya Güləş Birliyinin qaydalarına əsasən, təşkil olunan yarışın baş hakimi Natiq Hacıyev, baş katibi isə Kamran Baxışovdur.Qeyd edək ki, sərbəst güləşçilər arasında XI Respublika Oyunlarının final mərhələsi dekabrın 22-də Balakən Olimpiya İdman Kompleksində təşkil olunacaq.xeber100.com

“Keşlə” klubuna yeni məşqçi təyin edilib

“Keşlə” futbol klubuna yeni baş məşqçi təyin edilib.Klubdan Azərtac-a bildirilib ki, mövsümün ilk yarısının son dörd turunda müvəqqəti olaraq baş məşqçi postuna gətirilən Ramiz Məmmədov əvvəlki vəzifəsinə qayıdıb. O, yenidən aşağı yaş qrupları üzrə əlaqələndirici kimi fəaliyyət göstərəcək. Baş məşqçi vəzifəsinə isə ukraynalı mütəxəssis Yuri Maksimov gətirilib. Y.Maksimov həftəsonu Bakıya gələcək və gələn həftə müqavilə rəsmən imzalanacaq. Hələlik anlaşmanın müddəti mövsümün sonuna qədər olacaq.Futbolçu kimi Ukrayna millisinin formasını geymiş Yuri Maksimov məşqçiliyə 2005-ci ildə Minskin “Dinamo” klubunda başlayıb. O, daha sonra MOİK (Kiyev), “Obolon”, “Krivbass”, “Metallurq” (Donetsk), “Mordoviya” və “Taraz” klublarında çalışıb.xeber100.com

Futtennis üzrə ikinci turun oyunları keçirilib

Futtennis üzrə Azərbaycan Super Liqasında ikinci turun oyunları keçirilib.Azərbaycan Futnet Assosiasiyasından (AFNA) Azərtac-a bildirilib ki, “Marafon” idman klubunda əvvəlcə ilk turdan təxirə salınan qarşılaşmalar keçirilib.“A” qrupunda yer alan və liqanın favoriti sayılan “Marafon” komandası Bakının “Atletiko” kollektivini 2:0 hesabı ilə məğlub edib. Tur çərçivəsində ikinci matçına çıxan “Marafon” klubu “Yasamal” ilə üz-üzə gəlib. İlk setdə “Marafon” qalib gəlib. İkinci setdə “Yasamal” idmançıları hesabda irəli (10:4) olsalar da sonda qələbəni əldən veriblər. İlk dəfə bu turda tamaşaçılar önünə çıxan “A” qrupunun digər komandası “Xilə” klubu “Atletiko” ilə görüşdə məğlubiyyətlə üzləşib – 0:2.Çempionatın digər iddialı komandası, “B” qrupunda çıxış edən “Şuşa-2017” növbəti qələbəsini rəsmiləşdirib. Şuşalılar bu dəfə Gəncəni təmsil edən “Xəmsəfan”nı hər iki setdə məğlub ediblər. Futtennis üzrə Azərbaycan Kubokunun qalibi olan “Neftçi İK” isə “Meqa” komandasına qalib gələrək turu üç xalla başa vurub. Gün ərzində ikinci görüşünə çıxan “Meqa” bu dəfə də “Şuşa-2017” ilə oyunda məğlubiyyətdən yaxa qurtara bilməyib.xeber100.com

“Qarabağ” futbol klubunun məlumatı

Futbol üzrə “Qarabağ” klubunun və Azərbaycan milli komandasının baş məşqçisi Qurban Qurbanov İngiltərə “Çelsi” klubunun bazasında olub.Azərtac “Qarabağ” futbol klubunun saytına istinadla xəbər verir ki, Qurban Qurbanov səfər zamanı “Çelsi” ilə “Southampton” klubunun oyununu izləyib. Sonra klubun akademiyasında olan Q.Qurbanov “Çelsi”nin müxtəlif yaş qrupları üzrə komandalarının oyunlarını izləyib və klubun strukturu ilə tanış olub.Səfər çərçivəsində “Çelsi”nin baş məşqçisi Antonio Konte ilə görüşən “Qarabağ”ın çalışdırıcısı həmkarı ilə fikir mübadiləsi aparıb və komandanın məşqinə baxıb.xeber100.com

Həndbol Federasiyasının məlumatı

Dekabrın 17-də həndbol üzrə Azərbaycan kuboku uğrunda ilk mərhələnin oyunlarına yekun vurulub.Azərbaycan Həndbol Federasiyasından Azərtac-a bildiriblər ki, qadın həndbolçuların yarışında “Qarabağ” komandası “Gənclər Birliyi"ni 39:26, “Nur” həndbolçuları isə “Azəryol”u 26:24 hesabı ilə məğlub edib.Kişilərin mübarizəsində "Bakı" kollektivi Respublika İxtisaslaşdırılmış Olimpiya Ehtiyatları Uşaq Gənclər İdman Məktəbinin (RİOEUGİM) yetirmələrinə asanlıqla qalib gəlib - 35:22. Çempionatın lideri "Məhsul" komandası isə “Təhsil” həndbolçularını üç xal fərqlə üstələyib - 32:29.Ölkə kuboku uğrunda yarışların ikinci mərhələsinə gələn ilin mart-aprel aylarında start veriləcək.xeber100.com