2017-2018-ci il mövsümünün qrup mərhələsində mübarizə başa çatacaq

Dekabrın 6-da “E”, “F”, “G” və “H” qruplarında yer alan komandalar arasında keçiriləcək qarşılaşmalarla UEFA Çempionlar Liqasının 2017-2018-ci il mövsümünün qrup mərhələsində mübarizə başa çatacaq.Azərtac xəbər verir ki, mötəbər turnirin “E” qrupunda “Liverpul” Moskvanın “Spartak” klubunu qəbul edəcək. “Sevilya” isə səfərdə Sloveniyanın “Maribor” komandası ilə üz-üzə gələcək. Bu qrupda “Liverpul”un 9, “Sevilya”nın 8, “Spartak”ın 6, “Maribor”un 2 xalı var.“F” qrupunda keçirdiyi bütün görüşlərdə qələbə qazanan “Mançester Siti” Ukraynada qrupun ikincisi “Şaxtyor” ilə qarşılaşacaq. Digər görüşdə isə bütün oyunlarda məğlubiyyətə uğrayan “Feyenord” qrupda üçüncü olan “Napoli”ni qəbul edəcək.“G” qrupunda birinci yeri əvvəlki turda təmin edən “Beşiktaş” Almaniya səfərində “Leypsiq”in qonağı olacaq. “Portu” komandası doğma divarlar arasında “Monako” ilə üz-üzə gələcək. “Leypsiq” və “Portu” komandalarının 7, “Monako”nun 2 xalı var.“H” qrupunda liderliyi əldən verməmək üçün “Tottenhem” komandasına Londonda Kiprin “APOEL” klubu ilə görüşdə heç-heçə də kifayət edir. Qrupda ikinci sırada yer alan “Real Madrid” isə Madriddə “Borussiya Dortmund” ilə üz-üzə gələcək. “Tottenhem”in aktivində 13, “Real Madrid”in 10 xalı var. “Borussiya Dortmund” və “APOEL” isə 2 xal toplayıblar.Bütün görüşlər Bakı vaxtı ilə saat 23:45-də başlayacaq.UEFA Çempionlar Liqasının səkkizdəbir final mərhələsinin püşkü dekabrın 11-də atılacaq.xeber100.com

Güləş Federasiyasının məlumatı

Qazaxıstanın paytaxtı Astanada Əməkdar Məşqçi Axmetcan Kazımbetovun xatirəsinə həsr olunan yeniyetmə güləşçilər arasında beynəlxalq turnir keçirilib.Azərbaycan Güləş Federasiyasından Azərtac-a bildiriblər ki, turnirdə sərbəst güləş üzrə yeniyetmələrdən ibarət yığma komandamızın üzvləri də iştirak ediblər.Azərbaycan komandası ilə yanaşı, Özbəkistan, Qırğızıstan, Rusiya və Qazaxıstan pəhləvanlarının iştirak etdikləri turnirdə güləşçilərimiz üç qızıl medal qazanıblar. Əlihəsən Əmirli (45 kq), Elvin Dünyamalıoğlu (65 kq) və Fuad Mayılov (80 kq) bütün rəqiblərinə qalib gələrək fəxri kürsünün ən yüksək pilləsində qərarlaşıblar.xeber100.com

Beynəlxalq Olimpiya Komitəsinin iclası keçirilib

Çərşənbə axşamı, dekabrın 5-də Lozannada (İsveçrə) Beynəlxalq Olimpiya Komitəsinin (BOK) İcraiyyə Komitəsinin iclası keçirilib. İclasın gündəliyinə 2018-ci il fevral ayında Cənubi Koreyanın Pxençxan şəhərində start veriləcək qış Olimpiya Oyunlarına rusiyalı idmançıların buraxılması barədə qərar məsələsi daxil edilib.İclasın yekunlarına əsasən Rusiya Olimpiya Komitəsi diskvalifikasiya edilib, RF yığması isə 2018-ci il Olimpiadasında iştirakdan kənarlaşdırılıb. Rusiyalı idmançılara neytral bayraq altında yarışmaq təklif olunub. “Təmiz” atletləri xüsusi komissiya seçəcək.BOK İcraiyyə Şurası qərara alıb ki, rusiyalılar “Rusiyada olan olimpiya idmançısı” statusu ilə fərdi və ya komanda idman növlərində yarışa bilərlər. Onlar Olimpiya bayrağı altında çıxış edəcək, bu idmançıların şərəfinə mərasimlərdə isə Olimpiya himni səslənəcək.Oyunların RF-dən olan iştirakçıları həm seçmə yarışlardan keçməli, həm də məxsusi onlar üçün müəyyən edilmiş “təmiz” atlet meyarlarına uyğun olmalıdırlar.Rusiya Olimpiya Komitəsinin prezidenti Aleksandr Jukovun BOK-da üzvlüyü dayandırılıb.Rusiyanın sabiq idman naziri, hazırda Baş nazirin müavini olan Vitali Mutko və onun keçmiş müavini Yuri Naqornıx olimpiadalarda iştirakdan ömürlük kənarlaşdırılıblar.“Soçi-2014” Olimpiadasının Təşkilat Komitəsinin keçmiş rəhbəri Dmitri Çernışenko Pekində keçiriləcək 2022-ci il Olimpiya Oyunlarının Əlaqələndirmə Komissiyasından çıxarılıb.Həmçinin bildirir ki, Rusiya Olimpiya Komitəsi BOK-un təhqiqatlar üçün çəkdiyi xərclərin əvəzinin ödənilməsi üçün 15 milyon dollar məbləğində cərimə edilib. Bu vəsait qlobal antidopinq sisteminin inkişafına yönəldiləcək.BOK belə bir halı istisna etmir ki, əgər Rusiya Olimpiya Komitəsi Pxençxanda Oyunların bağlanış mərasiminə qədər bütün tələbləri yerinə yetirərsə, onun kənarlaşdırılması qismən və ya tamamilə ləğv edilə bilər.Bu qərar Samuel Şmidin və Denis Osvaldın rəhbərlik etdiyi iki komissiyanın məruzəsi əsasında qəbul edilib. Həmin komissiyalar Riçard Maklarenin rəhbərliyi ilə Ümumdünya Antidopinq Agentliyinin (WADA) məruzəsində şərh edilən, RF-yə ünvanlanmış ittihamları araşdırıblar.xeber100.com  

Aerobika gimnastikası üzrə ölkə çempionatı keçirilir

Dekabrın 6-da Milli Gimmastika Arenasında akrobatika gimnastikası üzrə Bakı çempionatı və birinciliyi, aerobika gimnastikası üzrə Azərbaycan və Bakı birinciliyi, tamblinq üzrə Azərbaycan birinciliyi və Bakı çempionatı start götürüb.Azərtac xəbər verir ki, yarışların birinci günündə balacalar, uşaqlar, yeniyetmələr və böyüklər yaş kateqoriyalarına daxil olan akrobatlar, 7-8, 9-11 və 12-14 yaşlı aerobika gimnastları medallar uğrunda mübarizə aparırlar. Tamblinq cığırında isə balacalar və yeniyetmələr yaş kateqoriyalarına aid gimnastlar arasında ən yaxşılar müəyyənləşəcək.Gimnastlar qarışıq cütlüklər, kişi qrupu, kişi cütlükləri, qadın qrupları və cütlükləri halında bacarıqlarını nümayiş etdirirlər.xeber100.com

“Qəbələ” idman klubu əməkdaşlıq müqaviləsi imzalayıb

“Qəbələ” idman klubu ilə AVIS şirkəti arasında əməkdaşlıq müqaviləsi yenilənib.Azərtac xəbər verir ki, müqaviləyə əsasən, AVIS “Qəbələ”ni daha 1 il nəqliyyat vasitələri ilə təmin edəcək.AVIS reklamları “Qəbələ”nin ev oyunlarının keçirildiyi meydançanın ətrafındakı lövhələrdə, oyun sonrası mətbuat konfranslarında arxa fon lövhəsində və klubun rəsmi saytında yerləşdiriləcək.Bundan əlavə, hər iki qurum keçirəcəkləri sosial məsuliyyət və ya marketinq kampaniyalarında bir-birilərini dəstəkləyəcək və birgə fəaliyyət göstərəcəklər.xeber100.com

Futzal turniri təşkil olunacaq

Dekabrın 9-10-da AFFA-nın təşkilatçılığı ilə Balakən Olimpiya İdman Kompleksində 2006-2007-ci il təvəllüdlü uşaqlardan ibarət komandalar arasında futzal turniri təşkil olunacaq.Azərtac AFFA-ya istinadla xəbər verir ki, turnirdə oğlanlarla yanaşı, qızlardan da təşkil olunmuş komandalar iştirak edəcək.Turnirin keçirilməsində əsas məqsəd orta məktəb şagirdlərinin sağlam həyat tərzinə istiqamətləndirilməsi, futbolun kütləviliyinin təmin olunması, futbola marağın artırılmasıdır.xeber100.com

Stolüstü Tennis Federasiyasının məlumatı

Mayda ölkəmizin ev sahibliyi etdiyi IV İslam Həmrəyliyi Oyunları zamanı Türkiyə, İran və Azərbaycan Stolüstü Tennis federasiyaları arasında qarşılıqlı əməkdaşlıq barədə memorandum imzalanıb.Azərbaycan Stolüstü Tennis Federasiyasından Azərtac-a bildirilib ki, memorandumda müxtəlif tədbirlərlə yanaşı, liqa çempionatlarında qarşılıqlı iştirak da öz əksini tapıb.“Qarabağ NN” stolüstü tennis klubunun dörd idmançısı məşqçi Fərhad İsmayılovun rəhbərliyi altında dekabrın 6-da Liqa çempionatında iştirak etmək üçün İrana yollanacaq.xeber100.com

“Qarabağ” klubu sonuncu oyununu keçirəcək

Bu gün Azərbaycan çempionu “Qarabağ” UEFA Çempionlar Liqasının qrup mərhələsində sonuncu oyununu keçirəcək.Azərtac xəbər verir ki, İtaliyanın paytaxtındakı Olimpiya stadionunda “Roma” klubu ilə qarşılaşacaq “Qarabağ”ın oyununu almaniyalı hakimlər briqadası idarə edəcək. Görüşün baş hakimi Tobias Ştiler olacaq. Ona Mayk Pikel və Yan Sidel kömək edəcəklər. Əlavə köməkçi hakimlər Bastyan Dankert və Harm Osmers olacaq. Dördüncü hakim funksiyasını Kristian Qittelmann yerinə yetirəcək.“Roma”-“Qarabağ” oyunu Bakı vaxtı ilə saat 23:45-də başlayacaq.Matç Azərbaycan çempionu üçün formal xarakter daşısa da, “Roma” üçün həlledicidir. Çünki səkkizdəbir finala vəsiqə qazanmaq üçün “Roma” mütləq qələbə qazanmalıdır.Baş məşqçi Qurban Qurbanov cəzalı olduqları üçün Rəşad Sadıqov və Pedro Enrikenin xidmətlərindən yararlana bilməyəcək.Hesabında 10 xal olan “Çelsi” klubu “C” qrupunun vahid lideridir və növbəti mərhələyə vəsiqəni təmin edib. “Roma” 8 xalla ikinci, “Atletiko Madrid” 6 xalla üçüncü, “Qarabağ” isə 2 xalla qrupda sonuncu pillədədir.Xatırladaq ki, UEFA Çempionlar Liqasının “C” qrupunda yer alan “Qarabağ” əvvəlki oyunlarda səfərdə “Çelsi”yə 0:6, doğma meydanda isə “Roma”ya 1:2, “Çelsi”yə isə 0:4 hesabı ilə məğlub olub. Ağdam təmsilçisinin “Atletiko Madrid” ilə hər iki görüşü heç-heçə başa çatıb – (0:0, 1:1).xeber100.com

Futzal üzrə Azərbaycan millisi növbəti oyununu keçirib

İranın İsfahan şəhərində təşkil olunan “4 Top Nations” turnirində iştirak edən futzal üzrə Azərbaycan millisi növbəti oyununu keçirib.Azərtac xəbər verir ki, Rusiya yığması ilə qarşılaşan komandamız 3:4 hesabı ilə məğlub olub.Yığmamızın heyətində Kardosa Everton, Karvalho dos Santos və Villiams Oliveira do Nascimento fərqləniblər.Hesabında 1 xal olan millimiz növbəti oyununu dekabrın 6-da Qazaxıstan yığmasına qarşı keçirəcək.xeber100.com

2017-2018-ci il mövsümünün sonuncu turuna start veriləcək

Dekabrın 5-də UEFA Çempionlar Liqasının 2017-2018-ci il mövsümünün qrup mərhələsinin sonuncu turuna start veriləcək.Azərtac  xəbər verir ki, bu gün “A”, “B”, “C” və “D” qruplarında mübarizəyə yekun vurulacaq.“C” qrupunda yer alan Ağdamın “Qarabağ” komandası səfərdə İtaliyanın “Roma” klubunun qonağı olacaq. Bu oyunun nəticəsi ilk dəfə qatıldığı turnirin “C” qrupunda 2 xalla sonuncu sırada qərarlaşan “Qarabağ” komandasının mövqeyinə təsir göstərməyəcək. “Roma” klubu isə qrupdan çıxmaq üçün mütləq qələbə qazanmalıdır.Bu qrupun digər oyununda “Çelsi” komandası Londonda Madridin “Atletiko” klubunu qəbul edəcək. Londonlular səkkizdəbir finala vəsiqəni artıq təmin ediblər. İspaniya təmsilçisi isə qrupdan çıxmaq şansını saxlamaq üçün mütləq qələbə qazanmalıdır. Lakin onların qrupdan çıxması “Roma”nın “Qarabağ” ilə oyunda məğlub olması və ya heç-heçə etməsindən asılıdır. Buna isə ehtimal çox azdır.Bu tur “A” qrupunda hər birinin aktivində 9 xal olan “Bazel” (İsveçrə) və MOİK (Rusiya) komandaları üçün həlledici əhəmiyyət daşıyır. MOİK səkkizdəbir finala vəsiqəni təmin edən “Mançester Yunayted” klubunun qonağı olacaq. “Bazel” isə səfərdə qrupun autsayderi “Benfika” (Portuqaliya) ilə qarşılaşacaq.Günün ən maraqlı qarşılaşması “B” qrupunda yer alan “Bavariya” və “PSJ” komandaları arasında oynanılacaq. Parislilər 15 xalla qrupda birinci, münxenlilər 12 xalla ikinci sıradadırlar. Aktivində üç xalı olan “Seltik” (Şotlandiya) bütün görüşlərini məğlubiyyətlə başa vuran “Anderlext”i (Belçika) qəbul edəcək.“D” qrupunun lideri “Barselona” doğma arenada – “Nou Kamp”da Portuqaliyanın “Sportinq” klubu ilə üz-üzə gələcək. İtaliyanın “Yuventus” klubu isə səfərdə Yunanıstanın “Olimpiakos” komandasının qonağı olacaq. Bu qrupda “Barselona”nın 11, “Yuventus”un 8, “Sportinq”in 7, “Olimpiakos”un isə 1 xalı var.Bütün görüşlər Bakı vaxtı ilə saat 23:45-də başlayacaq.Qrup mərhələsinə dekabrın 6-da yekun vurulacaq.xeber100.com