Azərbaycan Boks Federasiyası: Azərbaycan çempionatı davam edir

Gənc oğlan boksçular arasında Azərbaycan çempionatı davam edir. Azərbaycan Boks Federasiyasından bildiriblər ki, 58 komandanın 175 boksçusunun iştirakı ilə təşkil edilən yarışın altıncı günündə yarımfinal görüşləri baş tutub. Bununla da, 13 çəki dərəcəsində 26 döyüşün nəticəsinə əsasən, finala çıxan boksçuların adlarına aydınlıq gəlib. Yığmanın əsas heyət üzvləri inamlı qələbə sayəsində həlledici döyüşə vəsiqə qazanıblar. Məğlub olan idmançılar isə bürünc medalla kifayətləniblər. Həmçinin yeniyetmə və gənc, eləcə də qadınlar arasında Azərbaycan çempionatında final qarşılaşmaları baş tutub. Döyüşlərin yekununa əsasən ölkənin ən güclülərinin adlarına aydınlıq gəlib. Yeniyetmə qızlar arasında İnci Məcidli (50 kq), Mələk Abbasova (54 kq), Qızbəs İsgəndər (57 kq), qadınların yarışında Anaxanım İsmayılova (50 kq, “Neftçi” İK), Məhsəti Həmzəyeva (57 kq, “Qəbələ” İK) birinciliyin qalibi adına layiq görülüblər. Qeyd edək ki, yarışda oğlanlar arasında final görüşləri bu gün keçiriləcək. Boks Mərkəzində təşkil olunan birinciliyin həlledici görüşlərinə saat 13:00-da start veriləcək.xeber100.com

Qazaxıstanda keçirilən boks üzrə beynəlxalq turnirə yekun vurulub

Qazaxıstanın Karaqanda şəhərində keçirilən boks üzrə beynəlxalq turnirə yekun vurulub. Azərbaycan millisi Qazaxıstan, Kuba, Gürcüstan, Tacikistan, Qırğızıstan və Kambocadan 150-dək idmançının qatıldığı yarışı 5 qızıl, 2 gümüş və 5 bürünc medalla başa vurub. Komandamızın heyətində 48 kiloqram çəki dərəcəsində mübarizə aparan Həsən Məlikov finalda Jenşi Ulpatovu (Qırğızıstan) məğlub edərək yarışın qalibi olub. Məsud Yusifzadə (54 kq) də fəxri kürsünün ən yüksək pilləsinə qalxıb. O, həlledici görüşdə qazaxıstanlı Jandaulet Sersenbayevə qalib gəlib. Digər idmançımız - 75 kiloqram çəki dərəcəsində rinqə çıxan Mirşərif Kazımzadə finalda Timur Esxojinlə (Qazaxıstan) üz-üzə gəlib. Dueldən qalib ayrılan boksçu turniri birinci pillədə başa vurub. Komanda yoldaşlarının uğurunu Murad Allahverdiyev (80 kq) də təkrarlayıb. Milli üzvü həlledici qarşılaşmada kambocalı Anver Nasredinovdan üstün olub. Yığmanın ən ağır çəkili boksçusu Məhəmməd Abdullayev (+92 kq) isə finalda kubalı Lopes Fernando Aleiandroya gücünü göstərib. Təmsilçimiz ikinci raundda tam üstünlüklə qalib gələrək, Karaqandada Azərbaycan himnini səsləndirib. Onlardan fərqli, Nəbi İsgəndərov (67 kq) finalda Ruslan Madiyevə (Qazaxıstan), Rəşid Həsənov (71 kq) Bekzat Boranbayevə (Qazaxıstan) məğlub olaraq gümüş medalla kifayətləniblər. Tural Sarıyev (48 kq), Nicat Hüseynov (51 kq), Tayfur Əliyev (60 kq), Malik Həsənov (63,5 kq) və Sərxan Əliyev (71 kq) bürünc medala layiq görülüblər. Yığmamız 12 medalla yarışda komanda hesabında birinci yeri tutub. Qazaxıstan ikinci, Kuba üçüncü olub. Azərbaycanlı referi Rövşən Qədirov isə döyüşləri ən yaxşı idarə edən hakimlərdən biri kimi xüsusi mükafata layiq görülüb.xeber100.com

Azərbaycan millisi FIFA-nın reytinq cədvəlində 2 pillə irəliləyib

Futbol üzrə Azərbaycan millisi FIFA-nın reytinq cədvəlində 2 pillə irəliləyib. AFFA xəbər verir ki, baş məşqçi Canni De Byazinin komandası hazırda 1151 xalla 121-ci sırada qərarlaşıb. Buna yığmanın yoldaşlıq görüşlərində Moldovanı 2:1, Şimali Makedoniyanı isə 3:1 hesabı ilə məğlub etməsi səbəb olub. Cari ilin sonuncu reytinq cədvəlinə 1840 xalla Braziliya başçılıq edir. Aktivində 1838 xal olan sonuncu dünya çempionu Argentina yığması ikinci pilləyə yüksəlib. Mundialın gümüş mükafatçısı Fransa isə 1823 xalla üçüncüdür.xeber100.com

Dünya çempionatında komandalara verilən pul mükafatlarının məbləği açıqlanıb

Futbol üzrə dünya çempionatında komandalara verilən pul mükafatlarının məbləği açıqlanıb. Argentina millisi Qətərdə keçirilən mundialın final oyununda qələbəyə görə Beynəlxalq Futbol Federasiyasından (FİFA) 41 milyon avro alıb. Çempionatın finalında oynadığı üçün Fransa komandası 29 milyon avro qazanıb. Yarışın ümumi mükafat fondu 429 milyon avro təşkil edib.

Taekvondo üzrə Azərbaycan birincilikləri və çempionatına start verilib

Bu gün taekvondo üzrə Azərbaycan birincilikləri və çempionatına start verilib. Yarışın birinci günündə yeniyetmə taekvondoçular dayanq üzərinə çıxıblar. Onların mübarizəsi iki gün davam edəcək. Dekabrın 22-23-də gənc taekvondoçular arasında döyüşlər keçiriləcək. Böyüklər və parataekvonduçular arasında qarşılaşmalar isə dekabrın 24-nə təsadüf edəcək.xeber100.com

Şahmat turnirinin üçüncü günündə 10 şahmatçı gücünü sınayır

Bakıda görkəmli şahmatçı, Avropa çempionu, beynəlxalq qrosmeyster Vüqar Həşimovun xatirəsinə həsr olunan VIII beynəlxalq superturnir davam edir. Turnirin üçüncü günündə 10 şahmatçı rapid turnirində gücünü sınayır. Yeddinci turda ilk gedişi Azərbaycan Şahmat Federasiyasının prezidenti, Avropa Şahmat Federasiyasının vitse-prezidenti Mahir Məmmədov edib. Ötən altı turun nəticəsinə görə, hesabında 10 xal olan N.Abdusattorov turnir cədvəlində liderliyini davam etdirir. R.Məmmədov 9 xalla ikinci, V.Hao 8 xalla üçüncü, V.Pons isə 7 xalla dördüncüdür. R.Rapport, Ş.Məmmədyarov, A.Qədimbəyli və Q.Dommaracu 5 xalla 5-8-ci yerləri bölüşürlər. S.Şenklend 4 xalla doqquzuncu, A.Süleymanlı isə 2 xalla sonuncudur. Dekabrın 22-də blits yarışına start veriləcək. Turnir Vüqar Həşimov Şahmat Fondunun təşkilatçılığı, Gənclər və İdman Nazirliyinin və Azərbaycan Şahmat Federasiyasının dəstəyi, SOCAR-ən sponsorluğu ilə təşkil olunub. Bu memorial ilk dəfə 2014-cü ildə Şəmkirdə keçirilib. Hazırkı dünya çempionu Maqnus Karlsen dörd (2014-cü, 2015-ci, 2018-ci, 2019-cu), Azərbaycan şahmatçısı Şəhriyar Məmmədyarov iki (2016-cı, 2017-ci) və ABŞ təmsilçisi Fabiano Karuana (2021-ci) isə bir dəfə turnirin qalibi olublar.xeber100.com

Formula 1 Qran-Prisində 1500-dən çox könüllünün iştirakı planlaşdırılır

Formula 1 Azərbaycan Qran-Prisində 1500-dən çox könüllünün iştirakı planlaşdırılır. Könüllüluk proqramı ilə bağlı elan verildikdən sonra ilk gün ərzində artıq 6 mindən 6 mindən çox müraciət daxil olub. Bunu jurnalistlərə müsahibəsində Bakı Şəhər Halqası Əməliyyat Şirkətinin (BŞH) İnsan resursları şöbəsinin rəhbəri İranə Əhmədova bildirib. O qeyd edib ki, könüllü olmaq üçün proqram çərçivəsində 9 mindən çox gənc qeydiyyatdan keçib. Hətta xaricdən gələn müraciətlər də var və say məhdud olduğu üçün ciddi seçimlər edilməlidir. Seçim zamanı liderlik, komanda ilə birgə işləmək bacarığı, kommunikasiya, tolerantlıq kimi kriteriyalar əsas götürülür. İ.Əhmədova bildirib ki, seçimlə bağlı 100-dən çox müsahibə keçirilir. Qeyd edək ki, Azərbaycan Qran-Prisi aprelin 28-30-da təşkil olunacaq.xeber100.com

İsveçrə Super Liqasında mövsümün rəmzi komandası açıqlanıb

İsveçrə Super Liqasında mövsümün ilk dövrəsinin rəmzi komandası açıqlanıb. Rəmzi heyətdə “Qrasshoppers”də çıxış edən azərbaycanlı hücumçu Renat Dadaşov da yer alıb. Azərbaycan yığmasının da üzvü olan forvard bu mövsüm İsveçrə çempionatında 15 oyunda 4 qol vurub, 1 məhsuldar ötürmə edib. “Qrasshoppers” Super Liqada 16 turdan sonra 20 xalla 7-ci sıradadır.xeber100.com

VIII beynəlxalq superturnirində növbəti 3 turun oyunu keçiriləcək

Vüqar Həşimovun xatirəsinə həsr olunan VIII beynəlxalq superturnirində bu gün növbəti 3 turun oyunu keçiriləcək. Dördüncü turda təmsilçimiz Şəhriyar Məmmədyarov Rumıniya idmançısı Riçard Rapport, növbəti görüşdə hindistanlı Qukeş Dommaracu, günün son qarşılaşmasında isə ispaniyalı Valeho Pons ilə qarşılaşacaq. Rauf Məmmədov startda Valeho Pons, sonra ABŞ təmsilçisi Semuel Şenklendi sınağa çəkəcək, sonda komanda yoldaşı Aydın Süleymanlı ilə görüşəcək. A.Süleymanlı isə R.Məmmədovla yanaşı, Qukeş Dommaracu və Valeho Ponsla gücünü sınayacaq. Komandamızın digər üzvü Abdulla Qədimbəyli Özbəkistan zəka sahibi Nodirbek Abdusattorov, Rumıniya idmançısı Riçard Rapport, çinli Van Hao ilə üz-üzə gələcək. Ötən üç turun nəticəsinə görə, aktivində 3 xal olan N.Abdusattorov turnir cədvəlinə liderlik edir. R.Məmmədov 2,5 xalla ikincidir. S.Şemklend, V.Pons və V.Hao 2 xalla 3-5-ci, R.Rapport, Ş.Məmmədyarov və Q.Dommaracu 2 xalla 6-8-ci yerləri bölüşürlər. A.Qədimbəyli 1 xalla doqquzuncu, xal qazana bilməyən A.Süleymanlı isə sonuncudur. İlk dəfə 2014-cü ildə Şəmkirdə keçirilən Vüqar Həşimov memorialında hazırkı dünya çempionu Maqnus Karlsen dörd (2014-cü, 2015-ci, 2018-ci, 2019-cu), Azərbaycan şahmatçısı Şəhriyar Məmmədyarov iki (2016-cı, 2017-ci) və ABŞ təmsilçisi Fabiano Karuana (2021-ci) isə bir dəfə qalib adına sahib olublar.xeber100.com

Azərbaycan Güləş Federasiyası: Güləş üzrə Azərbaycan çempionatı keçiriləcək

Dekabrın 20-dən 23-dək güləş üzrə Azərbaycan çempionatı keçiriləcək. Azərbaycan Güləş Federasiyasından bildiriblər ki, Bakı İdman Sarayında baş tutacaq yarış sərbəst və yunan-Roma güləşi üzrə milli komandalara seçim xarakteri daşıyır. Hər gün saat 10:00-da başlayacaq görüşləri beynəlxalq və milli dərəcəli hakimlərimiz idarə edəcək. Proqrama əsasən, dekabrın 20-21-də yunan-Roma güləşində medalçılar müəyyənləşəcək. Yarışın son iki günündə isə sərbəst güləşçilər mübarizə aparacaqlar.xeber100.com