Avropa komanda çempionatında sonuncu oyun keçiriləcək

Krit adasında (Yunanıstan) keçirilən Avropa komanda çempionatında Azərbaycanın kişi şahmatçılarından ibarət yığması finişə bir tur qalmış liderliyi ələ alıb.Azərtac xəbər verir ki, səkkizinci turda komandamız 3:1 hesablı qələbə ilə Rusiya yığmasına qalib gəlib. Xalları komandaya Şəhriyar Məmmədyarov, Teymur Rəcəbov və Rauf Məmmədov qazandırıblar. Şəhriyar Məmmədyarov Aleksandr Qrişşuku, Teymur Rəcəbov Yan Nepomnyaşşini, Rauf Məmmədov isə Daniil Dubovu məğlub edib. Rusiyalılara yeganə xalı Maksim Matlakov Arkadi Naydiçə qalib gəlməklə qazandırıb.Yekuna bir tur qalmış Azərbaycan 13 xalla liderliyi ələ alıb. Rusiya və Ukrayna komandaları bir xalla geri qalırlar.Sonuncu - 9-cu turda liderlərin qrupunda Azərbaycan-Ukrayna və Almaniya-Rusiya qarşılaşmaları olacaq.Azərbaycan-Ukrayna matçında Şəhriyar Məmmədyarov-Pavel Elyanov, Teymur Rəcəbov-Yuri Krivoruçko, Arkadi Naydiç-Ruslan Panomaryov və Rauf Məmmədov-Martın Kravtsiv görüşləri keçiriləcək.Azərbaycanın qadın şahmatçıları da eyni hesabla Fransa yığmasına qalib gəliblər. Zeynəb Məmmədyarova, Ülviyyə Fətəliyeva müvafiq olaraq Almira Skripçenko və Silviya Kollasdan daha güclü olublar. Günay Məmmədzadə Mari Sebaq, Gülnar Məmmədova isə Paulin Quişar ilə heç-heçə oynayıblar. Azərbaycanın qadın şahmatçıları 9 xalla İspaniya, İsrail, Niderland, Serbiya və Avstriya ilə bərabər 9-14-cü yerləri bölüşürlər.Yekun turda qadın şahmatçılarımızın rəqibi Serbiya təmsilçiləri olacaq. Bu turda Günay Məmmədzadə Yovana Eriç, Zeynəb Məmmədyarova Mila Zarkoviç, Ülviyyə Fətəliyeva Teodora İnjaç və Gülnar Məmmədova isə Marina Qayçin ilə qarşılaşacaqlar.Rusiyanın qadın şahmatçıları Aleksandra Kostenyuk, Yekaterina Laqno, Valentina Qunina, Olqa Girya və Aleksandra Qoryaçkina Kritdə keçirilən Avropa komanda çempionatının vaxtından əvvəl qalibi olublar.Səkkizinci turda Rusiya yığması Türkiyə komandasına 4:0 hesabı ilə qalib gəlib.Avropa komanda çempionatının sonuna bir tur qalmış Rusiya yığması 15 xalla turnir cədvəlində liderdir. Rusiyalılar onları təqib edən Gürcüstan və Polşa komandalarından 3 xal artıq toplayaraq turnirdə öz qələbələrini təmin ediblər.Bununla Rusiyanın qadın yığması bu uğurla öz tarixində 5-ci dəfə nail olub.Sonuncu turun oyunları bu gün keçiriləcək.xeber100.com

Sambo üzrə dünya çempionatı keçiriləcək

Noyabrın 9-13-də Soçidə sambo üzrə dünya çempionatı keçiriləcək.Azərbaycan Sambo Federasiyasından (ASF) Azərtac-a bildiriblər ki, mundialda ölkəmizi 9 idmançı təmsil edəcək.Çempionatda Azərbaycanın idman şərəfini Ağasif Səmədov (52 kq), Fuad Məmmədov (57 kq), Cavidan Qarayev (62 kq), Emil Həsənov (68 kq), Samir Kərimov (74 kq), Ceyhun Hüseynov (82 kq), Murad Rəcəbli (90 kq), Nizami Məmmədov (100 kq) qoruyacaqlar.Döyüş sambosu yarışlarında isə Məhəmməd Şahpələngli (68 kq) xalça üzərinə çıxacaq.Dünya çempionatında ölkəmizi hakim qismində Cabir İsmayılov təmsil edəcək.Millimiz Soçidə ASF-nin prezidenti Ceyhun Məmmədovun rəhbərliyi altında mübarizə aparacaq.xeber100.com

Stolüstü Tennis Federasiyasının məlumatı

Stolüstü tennisçimiz 2018-ci ildə keçiriləcək Gənclərin Olimpiya Oyunlarına lisenziya qazanıb. Bu, Azərbaycan stolüstü tennisinin tarixində ilk lisenziyadır.Azərbaycan Stolüstü Tennis Federasiyasından Azərtac-a bildiriblər ki, lisenziya noyabrın 3-5-də Xorvatiyanın Split şəhərində keçirilən Gənclərin Olimpiya Oyunlarının Avropa təsnifat turnirində qazanılıb. İlk lisenziyanı millimizin aktivinə qız tennisçimiz yazdırıb.Gənclərin Olimpiya Oyunları 2018-ci ilin oktyabrında Argentinanın paytaxtı Buenos-Ayresdə keçiriləcək.İlk dəfə 2010-cu ildə Sinqapurda təşkil olunan Gənclərin Olimpiya Oyunları 2012-ci ildə Avstriyada, 2014-cü ildə Çində, ötən il Norveçdə keçirilib. 2020-ci ildə isə Oyunlara İsveçrə ev sahibliyi edəcək.xeber100.com

“Kəpəz”–“Qarabağ” oyununda fair-pley nümunəsi qeydə alınıb

Futbol üzrə Azərbaycan Premyer Liqasının XI turu çərçivəsində Gəncə şəhər stadionunda keçirilmiş “Kəpəz”–“Qarabağ” oyununda fair-pley nümunəsi qeydə alınıb.Azərtac AFFA-ya istinadla xəbər verir ki, oyunun 26-cı dəqiqəsində hesab 0:0 olarkən “Kəpəz”in futbolçusu Viktor Oseqeyl ilə “Qarabağ”ın qapıçısı İbrahim Şehiç arasında cərimə meydançası daxilində mübarizədən sonra qarşılaşmanın baş hakimi qonaqların qapısına 11 metrlik cərimə zərbəsi təyin edib. Viktor Oseqeyl referiyə yaxınlaşaraq ona qarşı qayda pozuntusu olmadığını bildirib və hakim penalti qərarını ləğv edib.Viktor Oseqeylin ədalətli oyun prinsiplərinə sadiq hərəkəti barədə AFFA tərəfindən UEFA-nın Fair-Pley və Sosial Məsuliyyət Komitəsinə məlumat veriləcək.xeber100.com  

“Bayrağımız qürur mənbəyimizdir” devizi altında veloyürüş keçirilib

Noyabrın 5-də Dövlət Təhlükəsizliyi Xidmətinin (DTX) təşkilatçılığı ilə 9 noyabr - Dövlət Bayrağı Gününə həsr olunan “Bayrağımız qürur mənbəyimizdir” devizi altında veloyürüş keçirilib.Azərtac xəbər verir ki, DTX-nin binası qarşısından start götürən veloyürüş Heydər Əliyev Sarayının qarşısında başa çatıb. Yürüşə qatılan 200-dən artıq velosipedçi 12 kilometr məsafə qət edib.xeber100.com

“Qarabağ” klubu “Kəpəz”i məğlub edib

Futbol üzrə Azərbaycan Premyer Liqasında XI turun daha bir oyunu keçirilib.Azərtac xəbər verir ki, lider "Qarabağ" Gəncədə "Kəpəz"in qonağı olub.Görüş Ağdam komandasının qələbəsi ilə yekunlaşıb - 2:0. Qolları 41-ci dəqiqədə Elvin Yunuszadə, 43-cü dəqiqədə isə Miçel vurub. Bu qələbə ilə "Qarabağ" xallarını 25-ə çatdırıb və yenidən vahid liderə çevrilib. Qurban Qurbanovun baş məşqçi olduğu kollektivin ehtiyatda hələ bir oyunu da var.xeber100.com

Azərbaycan Premyer Liqasında XI tura yekun vurulub

Futbol üzrə Azərbaycan Premyer Liqasında XI tura yekun vurulub.Azərtac xəbər verir ki, son oyunda "Zirə" və "Neftçi" komandaları üz-üzə gəlib.Zirə İdman Kompleksinin stadionunda keçirilmiş görüş meydan sahiblərinin qələbəsi ilə yekunlaşıb - 1:0. Yeganə qolu 30-cu dəqiqədə Riçard Qadze vurub.Hazırda 13 xala malik "Neftçi" 5-ci pillədə qərarlaşıb.xeber100.com

Şahmat üzrə Avropa çempionatı davam edir

Azərbaycanın kişilərdən ibarət şahmat üzrə yığma komandası Yunanıstanda keçirilən Avropa çempionatında mübarizəni davam etdirir.Azərtac xəbər verir ki, Azərbaycan şahmatçıları səkkizinci turda turnir cədvəlinin ilk pilləsində qərarlaşan Rusiya millisi ilə qarşılaşıblar.Görüşün birinci lövhəsində Şəhriyar Məmmədyarov Aleksandr Qrişuku, ikinci lövhədə isə Teymur Rəcəbov Yan Nepomnyatçını 1:0 hesabı ilə məğlub edib.Üçüncü lövhədə keçirilən Arkadi Naydiç (Azərbaycan) - Maksim Matlakov (Rusiya) görüş isə rəqib şahmatçının 1:0 hesablı qələbəsi ilə yekunlaşıb.Dördüncü lövhədə keçirilən Rauf Məmmədov ilə Danil Dubovun görüşündə də təmsilçimiz 1:0 hesabı ilə qalib gəlib.Beləliklə, Azərbaycan komandası Rusiya yığmasını 3:1 hesabı ilə məğlub edib və turnir cədvəlində hesabındakı xallarının sayını 13-ə çatdıraraq liderliyə yüksəlib.Aktivində 12 xal olan Rusiya isə turnir cədvəlində ikinci pillədədir.Çempionata noyabrın 6-da yekun vurulacaq.Xatırladaq ki, Avropa komanda çempionatında kişilərdən ibarət 40 komanda çıxış edir. İsveçrə sistemi üzrə təşkil olunmuş yarışlar doqquz turdan ibarətdir.xeber100.com

Şahmat üzrə Avropa komanda çempionatının 6-cı turu keçirilib

Yunanıstanın Krit adasında şahmat üzrə Avropa komanda çempionatının 6-cı turu keçirilir.Azərtac xəbər verir ki, bu turda Azərbaycan yığması Ermənistan millisi ilə qarşılaşıb. Azərbaycan millisi rəqibini 2.5:1.5 hesabı ilə məğlubiyyətə uğradıb.Ağ fiqurlarla oynayan Teymur Rəcəbov 52-ci gedişdə Sergey Movsesyanı, Rauf Məmmədov isə 92-ci gedişdə Qrant Melkumyanı məğlub edib. Şəhriyar Məmmədyarov isə Levon Aronyana uduzub. Komandamızın digər üzvü Arkadi Naydiç isə erməni rəqibi Qabriel Sarqsyanla heç-heçə edib.Altı turdan sonra Azərbaycan yığmasının hesabında 9 xal var və komandamız Xorvatiya ilə 3-4-cü yerləri bölüşür.xeber100.com

“Qəbələ” komandası “Səbail”i qəbul edib

Noyabrın 4-də futbol üzrə Azərbaycan Premyer Liqasının XI turuna start verilib.Azərtac xəbər verir ki, turun açılış oyununda “Qəbələ” komandası doğma meydanda “Səbail”i qəbul edib.Baş hakim Rauf Cabbarovun idarə etdiyi matçın 15-ci dəqiqəsində “Qəbələ”nin futbolçusu Famussa Kone hesabı açıb. On üç dəqiqə sonra Baqali Dabo ikinci topu rəqib qapısından keçirib.Görüşün ilk hissəsi meydan sahiblərinin 2:0 hesablı üstünlüyü ilə başa çatıb.Qarşılıqlı hücumlar şəraitində keçən oyunun 83-cü dəqiqəsində Baqali Dabo dublunu rəsmiləşdirib. Dörd dəqiqə sonra “Səbail”in futbolçusu Eltun Yaqublu hesab arasındakı fərqi azaldıb və bu, oyunda vurulan sonuncu qol olub. Beləliklə, görüş “Qəbələ”nin 3:1 hesablı qələbəsi ilə yekunlaşıb. Günün digər oyununda isə “Sumqayıt” klubu “Keşlə” ilə qarşılaşacaq.Turun ikinci günündə “Qarabağ” səfərdə “Kəpəz”in qonağı olacaq. Günün növbəti qarşılaşmasında “Zirə” və “Neftçi” klubları üz-üzə gələcəklər.“Səbail” üzərində qələbə qazanan “Qəbələ” hesabındakı xalların sayını 22-yə çatdıraraq turnir cədvəlində ikinci pilləyə yüksəlib. Eyni xala malik olan və bir oyun az keçirən “Qarabağ” birinci pillədə qərarlaşıb. “Zirə” isə 21 xalla üçüncü pillədə yer alıb.xeber100.com