“Çelsi” klubu “Lester”lə üz-üzə gəlib

Ağdamın “Qarabağ” komandasının UEFA Çempionlar Liqasının qrup mərhələsindəki rəqibləri ölkə çempionatlarında növbəti oyunlarını keçiriblər.Azərtac xəbər verir ki, Ağdam təmsilçisinin sentyabrın 12-də qrup mərhələsi çərçivəsində Londonda səfərdə oynayacağı “Çelsi” klubu İngiltərə Premyer Liqasında “Lester”lə üz-üzə gəlib. “Çelsi” 2:1 hesabı ilə səfərdə rəqibinə qalib gələrək aktivinə üç xal əlavə edib. Hazırda dörd oyundan sonra doqquz xal toplayan “Çelsi” turnir cədvəlində üçüncü pillədə qərarlaşıb.Azərbaycan çempionunun qrup mərhələsindəki digər rəqibinin - İspaniyanın “Atletiko Madrid” komandasının səfərdə “Valensiya” ilə görüşü heç-heçə yekunlaşıb. Üç oyundan sonra beş xala malik “Atletiko Madrid” İspaniya La Liqasında beşinci sırada qərarlaşıb.“Qarabağ” klubunun qrup mərhələsində öz meydanında sentyabrın 27-də Bakıda qarşılaşacağı İtaliyanın “Roma” komandasının “Sampdoriya” ilə səfər matçı isə əlverişsiz hava şəraiti ilə əlaqədar başqa tarixə təxirə salınıb. Hazırda iki oyundan sonra üç xala malik “Roma” İtaliya çempionatında 10-cu yerdədir.xeber100.com

Güləş üzrə dünya çempionatı davam edir

Yunanıstanın paytaxtı Afinada yeniyetmə güləşçilərin dünya çempionatı davam edir.Azərtac xəbər verir ki, altıncı yarış günündə - sentyabrın 9-da 42, 50, 58 və 69 kiloqram çəki dərəcələrində sərbəst güləşçilərimiz final görüşünə çıxıblar.Dünya çempionatında 42 kiloqram çəkidə mübarizə aparan Əlihəsən Əmirli ardıcıl olaraq ABŞ, Qazaxıstan və Yaponiyadan olan rəqibləri ilə görüşləri vaxtından əvvəl və tam üstünlüklə məğlub edərək finala yüksəlib. Güləşçimiz keçirdiyi görüşlərdə rəqiblərindən 33 xal alsa da, heç bir rəqibinə xal verməyib. Həlledici görüşdə Əlihəsən Əmirli Özbəkistan idmançısına qalib gələrək dünya çempionu adına sahib olub.Mahir Məmmədzadə (50 kq) də bütün rəqiblərini məğlub edərək finala yüksəlib. Finala qədər o, Əlcəzair, ABŞ, Qazaxıstan və Almaniya idmançılarını mübarizədən kənarlaşdırıb. Son görüşdə Mahir Məmmədzadənin rəqibi Rusiya idmançısı olub. Gərgin idman mübarizəsi şəraitində keçən görüşdə güləşçimiz məğlub olub və mundialın gümüş medalı ilə kifayətlənib. Turnirdə 58 kiloqram çəkidə yarışan Turan Bayramov da bütün rəqiblərini tam üstünlüklə məğlub edib və finala vəsiqə qazanıb. Ardıcıl olaraq Qazaxıstan, İran, Türkiyə və Qırğızıstan təmsilçilərini məğlub edən güləşçimiz rəqiblərindən ümumilikdə 37 xal alıb və heç birinə xal verməyib. Final görüşündə Turan Bayramov Yaponiya idmançısına uduzaraq dünya çempionatını ikinci pillədə başa vurub.Təmsilçimiz Davud İbahimov (69 kq) Yaponiya, Ukrayna və İran idmançıları ilə qarşılaşıb. Qarşılaşdığı bütün rəqiblərindən üstün olmağı bacaran güləşçimiz finala vəsiqə qazanıb. Həlledici görüşdə Davud İbrahimovun rəqibi ABŞ təmsilçisi olub. Rəqibinə məğlub olan güləşçimiz dünya çempionatını gümüş medalla başa vurub.xeber100.com

Basketbol üzrə 40-cı Avropa çempionatı davam edir

Dörd ölkənin – Finlandiya, İsrail, Rumıniya və Türkiyənin ev sahibliyi ilə keçirilən basketbol üzrə 40-cı Avropa çempionatı davam edir.Azərtac xəbər verir ki, artıq çempionatın 4 dörddəbir finalçısı müəyyənləşib. Türkiyənin ev sahibliyi etdiyi səkkizdəbir finalda əvvəlcə Sloveniya və Ukrayna yığmaları üz-üzə gəliblər. Rəqibini 79:55 hesabı ilə məğlub edən Sloveniya millisi ilk dörddəbir finalçı olub.Daha sonra Almaniya və Fransa yığmaları qarşılaşıblar. Görüşdə 84:81 hesabı ilə qalib gələn Almaniya basketbolçuları növbəti mərhələyə adlayıblar.Sonra azarkeşlər Finlandiya-İtaliya oyununu izləyiblər. Rəqibdən üstün oyun nümayiş etdirən İtaliya millisi növbəti mərhələyə vəsiqəni təmin edib – 70:57.Litva-Yunanıstan qarşılaşması da maraq doğurub. Rəqibinə 77:64 hesabı ilə qalib gələn yunanıstanlı basketbolçular dörddəbir finala adlayıblar.Bu gün keçiriləcək Latviya-Monteneqro, Serbiya-Macarıstan, İspaniya-Türkiyə və Xorvatiya-Rusiya oyunları ilə səkkizdəbir final mərhələsinə yekun vurulacaq.Çempionatın dörddəbir final mərhələsinin görüşləri sentyabrın 12-13-də, yarımfinallar ayın 14-15-də oynanılacaq. Üçüncü yer uğrunda görüş və final qarşılaşmaları isə sentyabrın 17-də keçiriləcək.xeber100.com

Topaz Premyer Liqasında növbəti oyun keçiriləcək

Bu gün futbol üzrə Topaz Premyer Liqasında IV tur çərçivəsində növbəti oyun keçiriləcək.Azərtac xəbər verir ki, turun son oyun günündə bir matç olacaq.Üç oyundan sonra turnir cədvəlində beşinci yerdə qərarlaşan “Sumqayıt” klubu “Kapital Bank Arena”da yeddinci pillədəki paytaxt təmsilçisi “Neftçi” ilə görüşəcək. Saat 19:00-da başlayacaq qarşılaşmanı Rəhim Həsənov idarə edəcək.Bu kollektivlər arasında keçirilən son üç matçda qonaq tərəf qola və xala həsrət qalıb. “Sumqayıt” son üç ev oyununda qələbə qazanıb.Ümumiyyətlə, “Sumqayıt” komandası paytaxt təmsilçisinə qarşı keçirdiyi 20 qarşılaşmadan yeddi qələbə, iki heç-heçə və 11 məğlubiyyətlə ayrılıb.Qeyd edək ki, üç turdan sonra hesabında on xal olan “Zirə” klubu Azərbaycan çempionatının vahid lideridir. Ağdamın “Qarabağ” komandası doqquz xalla turnir cədvəlində ikinci, “Qəbələ” yeddi xalla üçüncü pillədədir.xeber100.com

Futzal üzrə reytinq cədvəli açıqlanıb

Futzal üzrə milli komandaların növbəti beynəlxalq reytinq cədvəli açıqlanıb.Azərtac xəbər verir ki, Azərbaycan millisinin mövqeyində dəyişiklik olmayıb. Hesabında 1445 xal olan milli komandamız reytinq cədvəlində 10-cu pillədə qərarlaşıb.Reytinq cədvəlinə 1929 xalla Braziliya millisi başçılıq edir. 1872 xalla İspaniya ikinci, 1765 xalla isə Rusiya yığması üçüncü pillədə yer alıb.xeber100.com

Həndbol Federasiyasının məlumatı

Sentyabrın 9-da qadın həndbolçulardan ibarət “Nur” və “Qarabağ” klubları növbəti yoldaşlıq oyununda qüvvələrini sınayıblar.Həndbol Federasiyasından Azərtac-a bildirilib ki, Mingəçevirdəki “Kür” Olimpiya Tədris-İdman Mərkəzində keçirilən ikinci yoxlama görüşündə də “Nur” komandası qalib gəlib. Belə ki, Mingəçevir təmsilçisi rəqibini 24:22 hesabı ilə məğlub edib.İlk yoxlama oyunu da “Nur”un 33:26 hesablı qələbəsi ilə başa çatmışdı.xeber100.com

Futbol üzrə Premyer Liqasının IV turuna start verilib

Sentyabrın 9-da futbol üzrə Azərbaycan Premyer Liqasının IV turuna “İnter”-“Kəpəz” oyunu ilə start verilib.Azərtac xəbər verir ki, “İnter Arena”da keçirilən oyunda hesabı meydan sahibləri açıblar. Belə ki, matçın 5-ci dəqiqəsində Fuad Bayram fərqlənib. Görüşün 21-ci dəqiqəsində Adrian Skarlatake, 32-ci dəqiqəsində isə Aqşin Quluzadə “Kəpəz”in qapısına yol tapıblar. “Kəpəz”in futbolçuları Şəhriyar Əliyev 36-cı, Kərim Diniyev isə 37-ci dəqiqədə hesab arasındakı fərqi azaldıblar. Görüşün ilk hissəsi “İnter”in 3:2 hesablı üstünlüyü ilə yekunlaşıb. İkinci hissədə komandaların cəhdlərinə baxmayaraq hesab dəyişməyib.Beləliklə, “İnter” komandası 3:2 hesabı ilə qalib gəlib. Turun digər oyunlarında isə bu gün “Qəbələ” komandası “Zirə”ni qəbul edəcək, sabah isə “Neftçi” klubu “Sumqayıt”ın qonağı olacaq. “Səbail”-“Qarabağ” oyunu isə Ağdam təmsilçisinin Çempionlar Liqasının qrup mərhələsindəki çıxışı ilə əlaqədar təxirə salınıb.xeber100.com

Azərbaycan millisi daha bir yoxlama matçını keçirib

Avropa çempionatına hazırlığı davam etdirən qadın voleybolçulardan ibarət Azərbaycan millisi daha bir yoxlama matçını keçirib.Azərtac xəbər verir ki, baş məşqçi Faiq Qarayevin yetirmələri Milan şəhərində İtaliya millisi ilə üçüncü dəfə görüşüblər.Gərgin idman mübarizəsi şəraitində keçən qarşılaşmada Azərbaycan millisi rəqibinə 3:2 hesabı ilə qalib gəlib.Qeyd edək ki, komandamızın İtaliya voleybolçuları ilə əvvəlki iki görüşü rəqibin xeyrinə başa çatmışdı - 3:0 və 3:2.xeber100.com

“Qarabağ”-“Roma” matçının biletləri satışa çıxarılıb

Sentyabrın 7-si saat 17:00-dan etibarən Ağdamın “Qarabağ” futbol klubunun Çempionlar Liqasının qrup mərhələsinin ilk ev oyununda qarşılaşacağı “Roma” ilə matçın biletləri satışa çıxarılıb.Azərtac “Qarabağ” klubuna istinadla xəbər verir ki, ilk gündə təxminən 3 min bilet satılıb.Azarkeşlər biletləri satış məntəqələrindən və onlayn olaraq - iTicket.az saytından əldə edə bilərlər. Biletləri əldə edərkən şəxsiyyət vəsiqəsi təqdim olunmalıdır.Qeyd edək ki, “Qarabağ” - “Roma” matçı sentyabrın 27-si saat 20:00-da start götürəcək.xeber100.com

Avropa çempionatının qrup mərhələsinə yekun vurulub

Dörd ölkənin – Finlandiya, İsrail, Rumıniya və Türkiyənin ev sahibliyi ilə keçirilən basketbol üzrə 40-cı Avropa çempionatının qrup mərhələsinə yekun vurulub. Hər birində altı komandanın yer aldığı dörd qrupda ilk dörd yeri tutan komandalar səkkizdəbir finala yüksəliblər.Azərtac xəbər verir ki, “A” qrupundan səkkizdəbir finala bütün görüşləri qələbə ilə başa vuran Sloveniya, eləcə də Finlandiya, Fransa və Yunanıstan yığma komandaları vəsiqə qazanıblar. Polşa və İslandiya isə qrupdan çıxa bilməyiblər.“B” qrupunda Litva, Almaniya, İtaliya və Ukrayna yığmaları növbəti mərhələyə yüksəldikləri halda, Gürcüstan və İsrail komandaları qrupda qalıblar.“C” qrupunda yüz faizli nəticə göstərən İspaniya seçməsi qrupu birinci sırada tamamlayıb. Bu qrupdan səkkizdəbir finalın digər iştirakçıları Xorvatiya, Monteneqro və Macarıstan milliləri olublar. Çexiya və Rumıniya isə qrup səddini keçməyi bacarmayıblar.Qardaş Türkiyə millisi yer aldığı “D” qrupunda sonuncu görüşdə güclü Latviya yığmasına 79:89 hesabı ilə məğlub olsa da, qrupu dördüncü sırada başa vuraraq səkkizdəbir finala yüksəlib. Bu qrupda ilk üç sırada isə Serbiya, Latviya və Rusiya milliləri qərarlaşıblar. Belçika və Böyük Britaniya yığma komandaları qrupda qalıblar.Avropa çempionatının səkkizdəbir final mərhələsinin görüşləri sentyabrın 9-da və 10-da keçiriləcək. Sentyabrın 9-da Sloveniya-Ukrayna, Almaniya-Fransa, Finlandiya-İtaliya, Litva-Yunanıstan görüşləri oynanılacaq. Bir gün sonra isə Latviya-Monteneqro, Serbiya-Macarıstan, İspaniya-Türkiyə, Xorvatiya-Rusiya oyunları təşkil olunacaq.Çempionatın dörddəbir final mərhələsinin görüşləri sentyabrın 12-13-də, yarımfinallar ayın 14-15-də oynanılacaq. Üçüncü yer uğrunda görüş və final qarşılaşmaları isə sentyabrın 17-də oynanılacaq.xeber100.com