Şahmat festivalının final yarışlarına başlanılıb

“Şahmat” fənni tədris olunan pilot ümumi təhsil müəssisələrinin şagirdləri arasında ümummilli lider Heydər Əliyevin anadan olmasının 94-cü ildönümünə həsr edilmiş şahmat festivalının ikinci mərhələsinə başlanılıb.Təhsil Nazirliyindən Azərtac-a bildiriblər ki, Bakı şəhəri 12 nömrəli tam orta məktəbdə keçirilən final yarışının açılış mərasimində təhsil nazirinin müavini Firudin Qurbanov çıxış edərək gənc şahmatçılara uğurlar arzulayıb. Nazir müavini ölkəmizdə şahmat idman növünün inkişafına göstərilən dövlət qayğısından, Azərbaycan şahmatçılarının nailiyyətlərindən, şahmatın uşaqlar üçün əhəmiyyətindən danışıb.Şəxsi-komanda xarakteri daşıyan yarışlar İsveçrə sistemi üzrə keçirilir, komandaların tərkibi 7-10 yaşlı üç oğlan və üç qız olmaqla altı nəfərdən ibarətdir.Festivalın birinci mərhələsi respublika üzrə “Şahmat” fənni tədris olunan 500-dək pilot məktəbdən 3 mindən çox şagirdin iştirakı ilə keçirilib, rayon (şəhər) üzrə qalib komandalar finalda iştirak hüququ qazanıb.400-dək şagirdin qatıldığı final yarışlarına mayın 1-də yekun vurulacaq.Qaliblər kubok, diplom və qiymətli hədiyyələrlə mükafatlandırılacaqlar.xeber100.com

Ağır atletika üzrə Azərbaycan birinciliyi davam edir

Xırdalan şəhərindəki AAAF Park Yaşayış Kompleksində yaşı 20 və 23-dək olan gənclər arasında ağır atletika üzrə Azərbaycan birinciliyi davam edir. Yarışda ölkənin bütün regionlarından klub və cəmiyyətləri təmsil edən yüzdən çox atlet iştirak edir.Azərtac xəbər verir ki, kişilərin mübarizəsində ilk günün sonuncu qalibi 62 kiloqram çəki dərəcəsində müəyyənləşib.Qızıl medala toplam 271 kiloqram (123+148) nəticə ilə Məhəmməd Məmmədli sahib çıxıb. Gümüş medala 251 kiloqram (121+130) nəticə ilə Kənan Xəlilov, bürüncə isə 227 kiloqram (100+127) nəticə ilə Elməddin Hüseynov layiq görülüblər.Çempionatın təşkilində məqsəd idmançıların ustalıq səviyyəsinin artırılması və təkmilləşdirilməsi, texniki cəhətdən hazırlıqlı və dərəcə normalarını yerinə yetirən idmançıların seçilməsi, kişilərdən və qadınlardan ibarət milli yığma komandaların tərkibinin müəyyənləşdirilməsi, qarşıdakı beynəlxalq yarışlara hazırlanmasıdır.xeber100.com

Futbol üzrə 2016-2017-ci il mövsümünə yekun vurulacaq

Aprelin 29-da futbol üzrə Azərbaycan çempionatının 2016-2017-ci il mövsümünə yekun vurulacaq.Azərtac xəbər verir ki, Topaz Premyer Liqasının mükafatçıları artıq bəlli olduğundan sonuncu turda bütün diqqətlər əsasən dördüncü yer uğrunda mübarizə aparan “Zirə” və “Kəpəz” komandalarına yönələcək. Paytaxt təmsilçisi “Zirə” səfərdə “AZAL”ın qonağı olacaq. Ayxan Abbasovun yetirmələri autsayderlə görüşdə ən azı 1 xal əldə edib UEFA Avropa Liqasının seçmə mərhələsinə vəsiqə qazanmağa çalışacaqlar.“Kəpəz” in işi isə daha çətindir. “Zirə”dən 3 xal geri qalan gəncəlilər çempionatın bürünc mükafatçısı olan “İnter”i qəbul edəcəklər. Əgər bu oyunda əyalət təmsilçisi “bankir”ləri böyük hesabla məğlub edərsə və “Zirə” komandası “Azal” ilə oyunda xal qazana bilməsə, onda gəncəlilər ölkəmizi Avropada təmsil etmək imkanına sahib olacaqlar.Turun digər oyunlarında “Sumqayıt” komandası “Qəbələ”ni, “Neftçi” isə “Qarabağ”ı qəbul edəcək.Xatırladaq ki, Ağdamın “Qarabağ” komandası artıq çempionluğunu elan edib. “Qarabağ” ardıcıl dördüncü, ümumilikdə isə beşinci dəfə ölkə çempionu tituluna sahib olub.“Qəbələ” komandası gümüş, “İnter” isə bürünc medallara layiq görülüb.xeber100.com

“Olimpiya Hərəkatı – 2017” layihəsi çərçivəsində…

“Olimpiya Hərəkatı - 2017” layihəsi çərçivəsində keçirilən respublika birinciliyinin Bakı şəhəri üzrə rayondaxili yarışları başa çatıb.Təhsil Nazirliyindən Azərtac-a bildiriblər ki, yarışlarda beş idman növü üzrə Bakının 12 rayonundan səkkiz minədək məktəbli iştirak edib. Qaydalara uyğun olaraq hər rayondan müvafiq idman növü üzrə qalib gələn komanda finala vəsiqə qazanıb.Gənclər və İdman Nazirliyinin dəstəyi ilə təşkil edilən “Olimpiya Hərəkatı - 2017” layihəsi çərçivəsində məktəblilərin respublika birinciliyi voleybol, basketbol, badminton, atletika və velosiped idman növü üzrə keçirilir. Yarışlar Bakı şəhəri ilə yanaşı, Gəncə, Sumqayıt şəhərlərində və Göygöl rayonunda təşkil olunur.Birinciliyin məktəbdaxili mərhələsinə Bakı şəhəri üzrə 294, Gəncə şəhəri üzrə 46, Sumqayıt şəhəri üzrə 42, Göygöl rayonu üzrə 24 ümumi təhsil müəssisəsindən 90 minədək məktəbli qatılıb.“Olimpiya Hərəkatı - 2017” layihəsinin məqsədi məktəblilər arasında fiziki tərbiyə fənninə marağı daha da artırmaq, məktəblərdə sağlam və fəal həyat tərzini təşviq etmək, olimpiya idman irsini davam etdirməkdir.xeber100.com

Həndbol Federasiyasının məlumatı

Qadın həndbolçulardan ibarət Azərbaycan yığması IV İslam Həmrəyliyi Oyunları ərəfəsində təlim–məşq toplanışını davam etdirir.Həndbol Federasiyasından Azərtac-a bildiriblər ki, hazırlıq çərçivəsində yığmamız aprelin 28-də və 29-da “ABU-Arena”da Rusiyanın “Rostov–2” komandası ilə yoldaşlıq oyunları keçirib. Həndbolçularımız hər iki oyunda 34:16 və 34:20 hesabı ilə qalib gəliblər.Yoldaşlıq görüşləri mayın 2-dək keçiriləcək.xeber100.com

“Shamkir Chess-2017” şahmat turnirinin altıncı turuna start verilib

Şəmkirdə Vüqar Həşimovun xatirəsinə həsr olunmuş “Shamkir Chess-2017” şahmat turnirinin altıncı turuna start verilib.Azərtac xəbər verir ki, altıncı turda Azərbaycan şahmatçıları Şəhriyar Məmmədyarov rusiyalı Vladimir Kramnik, Teymur Rəcəbov isə polşalı Radoslav Voytaşek ilə qarşılaşır.Digər görüşlərə gəlincə, ingiltərəli Maykl Adams Hindistan təmsilçisi Pentala Harikrişna, Bolqarıstan şahmatçısı Veselin Topalov ukraynalı Pavel Elyanov, ABŞ təmsilçisi Uesli So isə Sergey Karyakin (Rusiya) ilə münasibətlərinə aydınlıq gətirir.Beş turdan sonra Ş.Məmmədyarov 3,5 xalla turnir cədvəlinin vahid lideridir. P.Elyanov və M.Adams 3 xalla 2-3-cü yerləri bölüşürlər. V.Topalov, V.Kramnik, U.So və S.Karyakinin hesabında 2,5 xal var. R.Voytaşek və T.Rəcəbov 2 xalla 8-9-cu pillədə yer alıblar. P.Harikrişna isə 1,5 xalla turnir cədvəlində sonuncu pillədə qərarlaşıb.xeber100.com

Dünya çempionatının final mərhələsinə start verilib

Aprelin 27-də çimərlik futbolu üzrə dünya çempionatının final mərhələsinə start verilib.Azərtac xəbər verir ki, Baham adalarının paytaxtı Nassauda keçirilən çempionatda 16 komanda dörd qrupda mübarizə aparır.Mundialda FIFA-nın Asiya Futbol Konfederasiyası (AFC) 3, Afrika Futbol Konfederasiyası (CAF) 2, Şimali Amerika, Mərkəzi Amerika və Karib hövzəsi Konfederasiyası (CONCACAF) 2, Cənubi Amerika Futbol Konfederasiyası (CONMEBOL) 3, Okeaniya Futbol Konfederasiya (OFC) 1, UEFA isə 4 komanda ilə təmsil olunur.Ev sahibi Baham adalarının komandası “A” qrupunda - İsveçrə, Ekvador və Seneqal yığmaları ilə eyni qrupda çıxış edir.“B” qrupunda Nigeriya, İtaliya, İran, Meksika komandaları yer alıblar.“C” qrupunda Birləşmiş Ərəb Əmirlikləri (BƏƏ), Paraqvay, Portuqaliya və Panama milliləri qarşılaşacaqlar.Sonuncu – “D” qrupunda isə Braziliya, Tahiti, Yaponiya və Polşa yığmaları üz-üzə gələcəklər.Dünya çempionatının final qarşılaşması mayın 7-də keçiriləcək.Xatırladaq ki, 2015-ci ildə Portuqaliyada keçirilmiş mundialda ev sahibləri Tahiti yığmasına 5:3 hesabı ilə qalib gələrək dünya çempionu adını qazanmışdı. Üçüncü yer uğrunda görüşdə isə Rusiya millisi İtaliyanı məğlub etmişdi - 5:2.xeber100.com

UEFA İnkişaf turnirində növbəti oyununu keçirib

On yeddi yaşadək futbolçulardan ibarət Azərbaycan yığması Monteneqronun Podqoritsa şəhərində təşkil olunmuş UEFA İnkişaf turnirində növbəti oyununu keçirib.Azərtac AFFA-ya istinadla xəbər verir ki, Monteneqronun müvafiq yaş qrupundan ibarət komandası ilə qarşılaşan futbolçularımız məğlub olublar – 0:3.Yığmamız turnirdə növbəti oyununu aprelin 29-da Qazaxıstan komandasına qarşı keçirəcək.xeber100.com

Peşəkar Futbol Liqası tərəfindən mükafatlandırma mərasimi təşkil edilib

Futbol üzrə Azərbaycan birinci divizionunun 2016/2017-ci illər mövsümünün qalibi olan “Turan Tovuz”a qızıl medallar və çempionluq kuboku təqdim olunub.Azərtac xəbər verir ki, birinci divizion çərçivəsində keçirilən “Turan Tovuz”–“Qaradağ Lökbatan” oyunundan sonra Peşəkar Futbol Liqası tərəfindən mükafatlandırma mərasimi təşkil edilib.Çempion komandaya medalları və kuboku Peşəkar Futbol Liqasının direktoru Məlik Həsənov, eləcə də veteran futbolçular, AFFA İcraiyyə Komitəsinin üzvləri Vaqif Sadıqov və İsgəndər Cavadov təqdim ediblər.xeber100.com

Güləş üzrə Avropa çempionatı keçiriləcək

Mayın 2-7-də Serbiyanın Novı Sad şəhərində güləş üzrə Avropa çempionatı keçiriləcək. Çempionatında sərbəst, yunan-Roma və qadın güləşi üzrə yığma komandamız mübarizə aparacaq. Turnirin ilk günündə sərbəst və qadın güləşçilər yarışacaqlar.Azərtac xəbər verir ki, qadın güləşi üzrə yığma komandamız hazırlıqları Ukraynanın paytaxtı Kiyevdəki Konça Zaspa təlim-məşq bazasında bu ölkənin güləşçiləri ilə birgə davam etdirir.Baş məşqçi Semyon Çterev və böyük məşqçi Aslan Ağayevin rəhbərliyi altında Avropa çempionatına 7 güləşçi qatılacaq. Yarışda ölkəmizi Mariya Stadnik (48 kq), Anjela Doroqan (53 kq), Alyona Kolesnik (55 kq), Nataliya Sinişin (58 kq), Tatyana Omelçenko (60 kq), Elmira Qəmbərova (63 kq) və Elis Manolova (69 kq) təmsil edəcəklər.Proqrama əsasən, ilk yarış günündə 57 və 86 kiloqramda sərbəst, 48 və 63 kiloqram çəkidə qadın güləşçilər yarışacaqlar. Mayın 3-də 65 və 97 kiloqramda sərbəst, 53 və 60 kiloqram çəki dərəcəsində qadın güləşçilər, mayın 4-də 61 və 74 kiloqramda sərbəst, 55 və 75 kiloqramda qadın güləşçilər mübarizə aparacaqlar. 70 və 125 kiloqramda sərbəst, 58 və 69 kiloqramda qadın güləşçilər isə mayın 5-də qüvvələrini sınayacaqlar.Görüşlərin idarə edilməsində ölkəmizi I-S kateqoriyalı hakim Hicran Şərifov təmsil edəcək.xeber100.com