Kütləvi idman tədbirləri çərçivəsində zona yarışları davam edir

IV İslam Həmrəyliyi Oyunlarının proqramına daxil edilmiş idman növlərinin məktəblilər arasında təbliğinə həsr olunmuş kütləvi idman tədbirləri çərçivəsində zona yarışları davam etdirilib.Şəmkir Olimpiya İdman Kompleksində yunan-Roma güləşi, Xaçmaz Olimpiya İdman Kompleksində atletika, Şirvan Olimpiya İdman Kompleksində basketbol, Balakən Olimpiya İdman Kompleksində boks, Masallı Olimpiya İdman Kompleksində cüdo, Salyan Olimpiya İdman Kompleksində stolüstü tennis, Hövsan Olimpiya İdman Kompleksində karate idman növləri üzrə zona yarışları keçirilib.Təhsil Nazirliyindən Azərtac-a bildiriblər ki, 900-dək məktəbli idmançının qatıldığı yarışların qaliblər diplom, medal və hədiyyələrlə mükafatlandırılıblar.Kütləvi idman tədbirlərinin keçirilməsinin məqsədi IV İslam Həmrəyliyi Oyunlarının proqramına daxil olan idman növlərini məktəblilər arasında təbliğ etmək, onların idmana marağını artırmaq, məktəbliləri sağlam həyat tərzinə cəlb etməkdir.Yarışlar ölkənin 76 şəhər və rayonu əhatə olunmaqla altı zona və 11 idman növü - sərbəst güləş, yunan-Roma güləşi, cüdo, taekvando, karate, boks, atletika, stolüstü tennis, basketbol, akrobatika gimnastikası, bədii gimnastika üzrə keçirilir. Kütləvi idman tədbirlərinə altı mindən çox şagirdin qatılması gözlənilir.Yarışlar aprelin 26-da başa çatacaq.xeber100.com

Beynəlxalq şahmat turniri başa çatıb

Türkiyənin Ordu şəhərində keçirilən beynəlxalq şahmat turniri başa çatıb. Özbəkistan nümayəndəsi, beynəlxalq dərəcəli usta Curabek Xamrakulov 9 mümkün xaldan 6,5 xal toplayaraq turnirin qalibi olub.Azərtac xəbər verir ki, Türkiyə təmsilçisi Kıvanc Xəznədaroğlu, ukraynalı Aleksandr Zubov və israilli Tamir Nabati də eyni sayda xal toplayıblar. 5-ci nəticə göstərmiş Azərbaycan qrossmeysteri Ülvi Bacarani və daha beş şahmatçı liderdən yarım xal geri qalıb.Turnirdə ölkəmizi təmsil edən digər nümayəndələrə gəldikdə, Zaur Məmmədov (5,5 xal) turniri 13-cü, Orxan Eminov (4,5xal) 24-cü, Ramil Cavadov (4 xal) 35-ci yerdə başa vurub.Xatırladaq ki, bu yarışda 49 şahmatçı, o cümlədən 11 qrossmeyster iştirak edirdi.xeber100.com

Qol güləşi üzrə respublika çempionatı keçirilib

Gənclər və İdman Nazirliyinin, Azərbaycan Qol Güləşi Federasiyasının təşkilatçılığı ilə qol güləşi üzrə kişilər arasında respublika çempionatı keçirilib. Çempionatda 15 komanda və 100-dən çox idmançı gücünü sınayıb.Azərtac xəbər verir ki, Azərbaycan Dövlət Memarlıq və İnşaat Universitetinin idman zalında keçirilən çempionatda Fövqəladə Hallar Nazirliyinin idman-sağlamlıq klubunun əməkdaşı, daxili xidmət leytenantı Rəşad Kəsəmənli 65 kiloqram çəki dərəcəsində gücünü sınayıb. İdmançı sol qolda rəqiblərinə üstün gələrək birinci yerə, sağ qolda isə üçüncü yerə layiq görülüb.Sonda idman-sağlamlıq klubunun rəisi, polkovnik Füzuli Musayev qalib idmançını təbrik edərək ona qiymətli hədiyyə təqdim edib.xeber100.com  

UEFA Çempionlar Liqasının final mərhələsinə start veriləcək

Aprelin 11-də UEFA Çempionlar Liqasının dörddəbir final mərhələsinə start veriləcək.Azərtac xəbər verir ki, “Yuventus” (İtaliya) komandası “Barselona”nı (İspaniya), “Borussiya Dortmund” (Almaniya) isə “Monako”nu (Fransa) qəbul edəcək. Hər iki oyun Bakı vaxtı ilə saat 22:45-də başlayacaq.Bu, “Barselona” və “Yuventus” komandalarının indiyədək səkkizinci görüşü olacaq. “Yuventus” doğma meydanda keçirdiyi son 21 avrokubok oyununda məğlub olmayıb (12 qələbə, 9 heç-heçə). Kataloniyalılar iki il əvvəl UEFA Çempionlar Liqasının finalında turinliləri 3:1 hesabı ilə məğlub ediblər.Digər oyunun da gərgin idman mübarizəsi şəraitində keçəcəyi gözlənilir. “Borussiya Dortmund” qitənin ən mötəbər klub turnirində keçirdiyi son 12 ev oyununda yalnız bir dəfə məğlub olub. Dortmundlular həmin oyunların doqquzunda qələbə qazanıblar. Almaniya təmsilçisi indiyədək Fransa klubları ilə keçirdiyi 16 görüşün 6-da qalib gəlib, 5-də isə heç-heçə edib. “Monako” isə Almaniya klubları ilə üz-üzə gəldiyi 16 görüşün 7-də qələbə qazanıb, 3 görüşdə heç-heçəyə nail olub.Komandalar arasında cavab görüşləri aprelin 19-da oynanılacaq.UEFA Çempionlar Liqasının dörddəbir final mərhələsinin digər qarşılaşmalarında isə “Bavariya” komandası “Real Madrid”i, “Atletiko Madrid” isə “Lester Siti”ni qəbul edəcək. Bu komandalar aprelin 12-də və 18-də üz-üzə gələcəklər.xeber100.com

IV İslam Həmrəyliyi Oyunlarının “Təhsil proqramı” çərçivəsində…

“Bakı-2017” IV İslam Həmrəyliyi Oyunlarının “Təhsil proqramı” çərçivəsində paytaxtın orta təhsil müəssisələrində keçirilən maarifləndirici tədbirlərə aprelin 10-da yekun vurulub.Azərtac xəbər verir ki, Bakıdakı 6, 18, 23, 145 və 160 nömrəli orta məktəblərdə, həmçinin Elitar Gimnaziyada keçirilən tədbirlərdə şagirdlərə mayın 12-22-də Azərbaycanda təşkil olunacaq IV İslam Həmrəyliyi Oyunları barədə ətraflı məlumat verilib.III-V sinif şagirdlərinin qatıldıqları tədbirlərdə “Bakı-2017”nin talismanları – “Cəsur” və “İncə” də iştirak ediblər.Tədbirlərdə bildirilib ki, Azərbaycanın milli sərvəti, dünyada məşhur olan Qarabağ atları IV İslam Həmrəyliyi Oyunlarının talismanı seçilib və cəmiyyətə təqdim olunub. İncəlik və cəsurluğu özündə xarakterizə edən Qarabağ atları Oyunların təbliğində mühüm rol oynamaqla yanaşı, IV İslam Həmrəyliyi Oyunlarının simaları olub. “İncə” atı zəriflik və gözəllik nümunəsi ilə bərabər, incəliyi və məlahəti əks etdirir. “İncə” adət-ənənələri və milli dəyərləri təmsil edir. Məharətli, mərd və məqsədyönlü “Cəsur” Qarabağ atları kimi özünə əminliyi və sərbəstliyi ilə seçilir. Məqsədlərinə nail olmaq üçün heç bir çətinlikdən qorxmayan, iradəli və əzmkar olan “Cəsur” mehribanlığı, hər kəsə sevgisi və diqqəti ilə tanınır.Tədbirlərdə şagirdlər arasında müsabiqələr və yarışlar təşkil olunub.DJ-lərin müşayiəti ilə rəqs edən məktəblilərə “Bakı-2017” IV İslam Həmrəyliyi Oyunları Əməliyyat Komitəsi tərəfindən hədiyyələr təqdim olunub.Maarifləndirmə tədbirləri ümumilikdə 1300-dək şagirdi əhatə edib.xeber100.com

Topaz Premyer Liqasının XXV turunun sonuncu oyununda…

Aprelin 10-da Topaz Premyer Liqasının XXV turunun sonuncu oyununda “Sumqayıt” komandası paytaxt təmsilçisi “AZAL”ın qonağı olub.Azərtac xəbər verir ki, baş hakim Rauf Cabbarovun idarə etdiyi matçın 22-ci dəqiqəsində “Sumqayıt”ın futbolçusu Amil Yunanov hesabı açıb – 1:0. Görüşün 41-ci dəqiqəsində Ruslan Əmircanov “AZAL”ın bərabərlik qolunu vurub. Oyunun 64-cü dəqiqəsində Mirabdulla Abbasov yenidən “Sumqayıt”ı hesabda irəli çıxarıb. Qalan dəqiqələrdə qapılara top vurulmayıb və oyun bu hesabla da başa çatıb.Beləliklə, 25 turdan sonra turnir cədvəlinə 53 xalla “Qarabağ” liderlik edir. “Qəbələ” 49 xalla ikinci, “İnter” isə 43 xalla üçüncü pillədədir. Digər yerləri isə müvafiq olaraq, “Zirə” (32), “Sumqayıt” (31), Kəpəz (27), “Neftçi”(26) komandaları tuturlar. Aktivində 24 xal olan “AZAL” isə sonuncu pillədədir.xeber100.com

Həndbol Federasiyasının məlumatı

Ukraynanın Zaporojye şəhərində kişilər arasında həndbol üzrə beynəlxalq turnir davam edir.Azərbaycan Həndbol Federasiyasından Azərtac-a bildiriblər ki, kişilərdən ibarət yığmamız ilk görüşdə Ukraynanın “Şaxtyor” komandasını 35:31 hesabı ilə məğlub edib.Yarışda Azərbaycan milli komandasının rəqibləri Ukraynanın “Şaxtyor”, “ZTR-Zaporojye”, “Xorta”, “Energetik”, “ZAS-Zaporojye” klublarıdır.xeber100.com

Şahmat üzrə 35-ci open-turnir davam edir

Fransanın Mets şəhərində şahmat üzrə 35-ci open-turnir davam edir.Azərtac xəbər verir ki, 73 şahmatçının, o cümlədən 11 qrossmeysterin iştirak etdiyi bu yarışmada Azərbaycanı beynəlxalq dərəcəli qrossmeyster Namiq Quliyev təmsil edir.Üç turdan sonra hərəyə 3 xal toplamış Namiq Quliyev, almaniyalı İqor Qlek, Ukrayna nümayəndələri Petro Qolubka, Vitali Sivuk və Fransa təmsilçisi Andrey Şekaçev liderlik edir.İsveçrə sistemi üzrə keçirilən open-turnir 9 turdan ibarət olacaq.xeber100.com

“Bakı-2017”nin könüllüləri arasında velosiped yarışı keçirilib

Aprelin 9-da “Bakı-2017” IV İslam Həmrəyliyi Oyunları Əməliyyat Komitəsinin təşkilatçılığı ilə “Bakı-2017”nin könüllüləri arasında velosiped yarışı keçirilib.Azərtac xəbər verir ki, yarışın keçirilməsində əsas məqsəd sağlam həyat tərzini təbliğ etmək, gənclər arasında idmana həvəsi artırmaq, eləcə də “Bakı-2017” könüllülərinin asudə vaxtlarının səmərəli təşkili olub.Bakı Ağ Şəhər bulvarında keçirilən velosiped yarışında 150-dən çox könüllü mübarizəyə qoşularaq bir kilometr məsafə qət edib və bacarıqlarını nümayiş etdiriblər. Yarışın təsnifat mərhələsi hər birində 13 könüllünün iştirak etdiyi turlardan ibarət olub. Bu turların qalibləri final mərhələsində yarışmaq hüququ əldə ediblər. Gərgin mübarizə şəraitində keçən final mərhələsinin sonunda finiş xəttinə ilk çatan beş könüllü qalib elan olunub.xeber100.com

41-ci marafon qaçışı keçirilib

Parisdə 41-ci marafon qaçışı keçirilib. Marafonda ölkəmizi Elşən Quliyev təmsil edib.146 ölkədən 57 min iştirakçının qatıldığı və “Yelisey Çölləri” küçəsindən start verilən marafon 42,195 kilometr məsafəni əhatə edib. Bastiliya meydanı, Məryəm Ana kilsəsi, Konkord meydanı, Eyfel Qülləsi və Bulony meşəsindən keçən marafon paytaxtın mərkəzində başa çatıb.42,195 km məsafəni qət edib finişə çatan Elşən Quliyev digər atletlərlə birgə medala layiq görülüb.xeber100.com