“Sent-Etyen”lə səfər matçının hakimləri müəyyənləşib

“Qəbələ” futbol klubunun Avropa Liqasında “Sent-Etyen”lə səfər matçının hakimləri müəyyənləşib. Azərtac xəbər verir ki, UEFA qrup mərhələsi çərçivəsində üçüncü tur qarşılaşmasını türkiyəli hakimlər briqadasına həvalə edib. “Joffrua Qişar” stadionunda keçiriləcək görüşdə Ali Palabıyık baş hakim olacaq. Ona Cem Satman və Əkrəm Kan kömək edəcəklər. Dördüncü hakim funksiyasını Ceyhun Sesigüzel yerinə yetirəcək. Matçın əlavə köməkçi hakimləri Alper Ulusoy və Volkan Bayarslan olacaq. Hakimlərin işinə macarıstanlı hakim-inspektor Laslo Vaqner qiymət verəcək. UEFA nümayəndəsi kimi isə israilli Yakob Erel iş başında olacaq. Qeyd edək ki, “Sent-Etyen”–“Qəbələ” oyunu oktyabrın 20-də keçiriləcək.xeber100.com

Ən çox forma satan futbol klubunun adı açıqlanıb

Dünyanın ən çox forma satan futbol klubunun adı açıqlanıb. Azərtac xəbər verir ki, “Mançester Yunayted” bütün rəqiblərini qabaqlayaraq birinci olub. Belə ki, “qırmızı şeytanlar” 2011-2016-cı illər ərzində orta hesabla hər ilə 1 milyon 750 min forma satıb. Bu göstəricinin sayəsində Mançester təmsilçisi digər klublar üçün əlçatmaz olub. İkinci pillədə Madrid “Real”ı qərarlaşıb ki, bu klub “Mançester Yunayted”dən 100 min az forma satıb. Növbəti pillələrdə “Barselona” və “Bavariya” klubları qərarlaşıb. Beşinci və altıncı yerlərə gəlincə isə yenə İngiltərə komandaları – “Liverpul” və “Çelsi” yer alıb.xeber100.com

Çempionlar Liqasının qrup mərhələsinin üçüncü turuna start veriləcək

Oktyabrın 18-də futbol üzrə UEFA Çempionlar Liqasının qrup mərhələsinin üçüncü turunun oyunlarına start veriləcək. Azərtac xəbər verir ki, turun ilk günündə “E”, “F”, “G” və “H” qruplarında mübarizə aparan komandalar meydana çıxacaq.“E” qrupunda Rusiyanın CSKA klubu Fransanın “Monako” komandasını qəbul edəcək. Qrupun digər oyununda Almaniyanın “Bayer Leverkuzen” komandası ilə İngiltərənin “Tottenhem” klubu qarşılaşacaq. “F” qrupunda Portuqaliyanın “Sportinq” klubu “Borussiya Dortmund”, “Real Madrid” isə Polşanın “Legia” komandası ilə üz-üzə gələcək. “G” qrupunda “Brügge” (Belçika) – “Portu” (Portuqaliya) və “Lester” (İngiltərə) – “Kopenhagen” (Danimarka) oyunları keçiriləcək.“H” qrupunda isə Xorvatiyanın “Dinamo Zaqreb” klubu “Sevilya”nı qəbul edəcək. Digər oyunda isə “Olimpik Lion” komandası doğma meydanda “Yuventus” ilə qarşılaşacaq. UEFA Çempionlar Liqasının qrup mərhələsinin üçüncü turunun digər oyunları oktyabrın 19-da keçiriləcək.xeber100.com

Yunan-Roma güləşi üzrə paytaxt birinciliyi keçirilib

Bakı Şəhər Gənclər və İdman Baş İdarəsi (BŞGİBİ) tərəfindən Hövsan Olimpiya İdman Kompleksində yeniyetmələr arasında sərbəst və yunan-Roma güləşi üzrə paytaxt birinciliyi keçirilib. BŞGİBİ-dən Azərtac-a bildiriblər ki, yarışda 2000-2001-ci il təvəllüdlü yeniyetmələr arasında sərbəst güləş üzrə 12 klubu təmsil edən 255 idmançı 10 çəki dərəcəsi üzrə mübarizə aparıb.Birincilikdə Elmir Cəlilov (42 kq), Mürşüd Hüseynov (46 kq), Ramin Əzimov (50 kq), Məmməd Əhmədov (54 kq), Elmar Kazımov (58 kq), Elvin Dünyamalıyev (63 kq), Hüseyn Əmir (69 kq), Fuad Mayılov (76 kq), Pərviz Həsənov (85 kq) və Ayaz İsmayılov (100 kq) qızıl medal qazanıblar. Yunan-Roma güləşi üzrə 18 klubu təmsil edən 282 idmançı 10 çəki dərəcəsində xalça üzərinə çıxıb. Nəticələrə görə, Həsrət Cəfərov (42 kq), Elmir Əliyev (46 kq), Həsən Kərimli (50 kq), Mirağa Yusifov (54 kq), Vəfadar Cəfərov (58 kq), Sənan Abdullazadə (63 kq), Elxan Rəfiyev (69 kq), Fikrət Vəliyev (76 kq), Əliheydər Əliyev (85 kq) və Sərxan Məmmədov (100 kq) fəxri kürsünün ən yüksək pilləsinə qalxıblar. Sərbəst güləş üzrə yarışlarda ilk üç, yunan-Roma güləşi üzrə yarışlarda isə ilk beş yeri tutan idmançılar açıq Respublika turnirinə vəsiqə əldə ediblər. Qalib idmançılar Baş İdarə tərəfindən müvafiq dərəcəli diplom və medallarla mükafatlandırılıblar.xeber100.com  

Milli komanda dünya çempionatına hazırlaşır

Karateçilərdən ibarət Azərbaycan yığması dünya çempionatı öncəsi Qəbələdə təlim-məşq toplanışını davam etdirir. Azərtac xəbər verir ki, oktyabrın 25-dən 30-dək Avstriyanın Linz şəhərində karate üzrə 23-cü dünya çempionatı təşkil ediləcək. İdmançılarımız son hazırlıqlarını bu həftə “İnter Arena”da yerləşən Azərbaycan Milli Karate Federasiyasının bazasında keçirəcəklər. Son Premyer Liqa turnirlərinin nəticələrinə əsasən milli komandanın heyətində bəzi dəyişikliklər edilib. Fərdi və komanda yarışlarına qatılan heyətdə dəyişikliklər yaxın günlərdə açıqlanacaq.xeber100.com  

UEFA-dan yeni təyinat…

AFFA-nın Lisenziyalaşdırma Qrupunun rəhbəri Elçin Məmmədov yeni təyinat alıb. Azərtac xəbər verir ki, E.Məmmədov UEFA Çempionlar Liqasının qrup mərhələsi çərçivəsində keçiriləcək ÇSKA (Rusiya) - "Monako" (Fransa) oyununda matçın direktoru (UEFA Venue Director) kimi fəaliyyət göstərəcək. Görüş oktyabrın 18-də Moskva şəhərindəki ÇSKA Arenada keçiriləcək.xeber100.com

Dünya İdman və Mədəniyyət Forumunda Azərbaycan da təmsil olunacaq

Oktyabrın 19-dan 22-dək Yaponiyada Dünya İdman və Mədəniyyət Forumu keçiriləcək. Yaponiya Təhsil, Mədəniyyət, İdman, Elm və Texnologiyalar Nazirliyinin təşkilatçılığı ilə keçirilən bu beynəlxalq tədbirə 60 ölkədən 300-dən çox nümayəndənin qatılacağı gözlənilir. Forumda Azərbaycanı gənclər və idman naziri Azad Rəhimovun rəhbərlik etdiyi nümayəndə heyəti təmsil edəcək. Qeyd edək ki, Dünya İdman və Mədəniyyət Forumu 2019-cu il Dünya Reqbi Kuboku, “Tokio-2020” Olimpiya və Paralimpiya Oyunları və 2021-ci il Kansay Dünya Ustaları Oyunları ərəfəsində keçirilməklə bu yarışların yüksək səviyyədə təşkilinə öz töhfələrini verəcək. Forum zamanı əsasən üç mövzunun – “İnsan keyfiyyətlərinin təkmilləşdirilməsi”, “Dünya üzrə insanlararası mübadilənin inkişafı” və “İqtisadi və mədəni yeniliklərin yaradılması” mövzularında müzakirələr nəzərdə tutulur. Dünyanın müxtəlif ölkələrindən gələn idman, mədəniyyət və biznes sahəsində tanınmış mütəxəssislər, beynəlxalq təşkilatların rəhbərləri, görkəmli tədqiqatçılar, kütləvi informasiya vasitələrinin nümayəndələri yapon həmkarları ilə birlikdə məhz həmin istiqamətlərdə müzakirələrə qatılacaqlar.xeber100.com

II Uşaq Paralimpiya İdman Oyunları keçiriləcək

Noyabrın 11-də Sumqayıt Paralimpiya İdman Kompleksində II Uşaq Paralimpiya İdman Oyunları təşkil olunacaq. Azərtac xəbər verir ki, yarışlar Azərbaycan Milli Paralimpiya Komitəsinin (AMPK), “Azercell Telekom” MMC-nin və UNICEF-in Azərbaycan nümayəndəliyinin birgə təşkilatçılığı ilə keçiriləcək. Turnirdə respublikanın müxtəlif regionlarını təmsil edən uşaq paralimpiyaçılar idmanın beş növü (cüdo, üzgüçülük, masaüstü tennis, qolbol və boccia) üzrə güclərini sınayacaqlar. Yarışda sağlamlıq imkanları məhdud 60-dan çox uşaq mübarizə aparacaq.xeber100.com  

“Neftçi” klubu müqavilə bağlayıb

“Neftçi” klubu baxışda olan 3 futbolçu ilə müqavilə bağlayıb. Klubdan Azərtac-a bildiriblər ki, müdafiəçi Mahir Şükürov, serbiyalı qapıçı Boban Baykoviç və braziliyalı yarımmüdafiəçi Jonas Enrike Pessalli mövsümün sonunadək komandanın formasını geyinəcəklər. Mahir Şükürov Azərbaycan komandaları ilə yanaşı, Türkiyənin "Antalyaspor”, "Karşıyaka” və Rusiyanın "Anji” klublarında çıxış edib. 2006-2007-ci və 2012-2014-cü illərdə "Neftçi”də çıxış etmiş M.Şükürov Azərbaycan milli komandasının heyətində 75 oyun keçirib. Mahir Şükürov bildirib ki, "Neftçi”yə qayıtmağıma görə şadam. Bu klub futbola qayıtmağım üçün şərait yaratdı, mənim üzərimə düşən isə bu etimadı doğrultmaqdır. "Neftçi” hazırda layiq olmadığı mövqedə qərarlaşıb. Vəziyyəti düzəltmək üçün əlimizdən gələni etməliyik. Boban Baykoviç Monteneqronun "Lovçen” klubunun yetirməsidir. O, həmçinin Serbiyanın "Srvena Zvezda”, "Yedinstvo”, "Radniçki”, "Rad”, "Smederevo”, "Srem Mitrovitsa” klublarının da şərəfini qoruyub. Baykoviçin sonuncu klubu Belçika "Lyers”i olub. Boban Baykoviç deyib: "Yeni komandam üçün faydalı olmaq istəyirəm. Bilirəm ki, "Neftçi” Azərbaycanın ən titullu klubudur. Azarkeşlərin yaddaşında qalmaq üçün var-gücümlə çalışacağam”. Braziliyanın "Qremio” klubunun yetirməsi olan Jonas Pessalli, həmçinin Fransanın "Anje” və "Luson” klublarında çıxış edib. Jonas Pessalli bildirib ki, Azərbaycan futbolu inkişafdadır. Şadam ki, "Neftçi”də oynamaq imkanı qazanmışam. Yeni komandamda rəsmi debütümü səbirsizliklə gözləyirəm.xeber100.com

“Qarabağ” klubu PAOK komandasını qəbul edəcək

Futbol üzrə UEFA Avropa Liqasının qrup mərhələsinin III turunda Ağdamın "Qarabağ" klubu oktyabrın 20-də Yunanıstanın PAOK komandasını qəbul edəcək. Azərtac xəbər verir ki, qarşılaşmanın biletləri oktyabrın 17-də satışa çıxarılacaq. Azarkeşlər biletləri Tofiq Bəhramov adına Respublika stadionunun kassalarından əldə edə bilərlər. Sektorlardan asılı olaraq biletlərin qiyməti 1, 2, 5, 10 və 20 manat arasında dəyişir. VİP biletlərin qiyməti isə 50 manatdır. Qeyd edək ki, "Qarabağ"-PAOK matçı oktyabrın 20-də saat 21:00-da Tofiq Bəhramov adına Respublika stadionunda start götürəcək.xeber100.com