Avropa çempionatının ilkin seçmə mərhələsində…

Futbol üzrə 17 yaşadək qızlardan ibarət komandalar arasında Avropa çempionatının ilkin seçmə mərhələsində Azərbaycan yığması ikinci oyununu keçirib. Azərtac xəbər verir ki, Polşa komandası ilə qarşılaşan yığmamız 0:4 hesabı ilə məğlub olub. Komandamız turnirdə son oyununu oktyabrın 13-də Estoniya yığmasına qarşı keçirəcək.xeber100.com

Avropa çempionatının iştirakçıları müəyyənləşib

2017-ci ildə Azərbaycan və Gürcüstanın birgə təşkil edəcəyi qadın voleybolçular arasında Avropa çempionatının iştirakçılarının tam siyahısı müəyyənləşib. Azərtac xəbər verir ki, yarışda 16 komanda birincilik uğrunda mübarizə aparacaq. Avropa çempionatında ev sahibləri Azərbaycan və Gürcüstanla yanaşı, “Avro-2015”in mükafatçıları – Rusiya, Hollandiya və Serbiya, həmçinin ilk beşlikdə qərarlaşan Türkiyə və Almaniya yığmaları yarışacaq. İkinci seçmə mərhələdə onlara İtaliya, Belçika, Polşa, Xorvatiya, Bolqarıstan və Belarus qoşulub. Pley-off mərhələsində Çexiya, Ukrayna və Macarıstan da onaltılıqda iştirak hüququ qazanıb. “Avro-2017”də Gürcüstanda cəmi 1 qrupun oyunları və 1/4 final matçları baş tutacaq. Digər 3 qrup - biri Quba, ikisi Bakıda olmaqla, Azərbaycanda mübarizə aparacaq. Çempionatın yarımfinal və final oyunları da paytaxtımızda təşkil olunacaq.xeber100.com

Azərbaycan Avtomobil Federasiyasının dəstəyi ilə…

Oktyabrın 9-da Bakıda Heydər Əliyev Mərkəzinin və Azərbaycan Avtomobil Federasiyasının dəstəyi ilə “Red Bull Soapbox” yarışı keçirilib. Azərtac xəbər verir ki, yarışın qalibi adına “Bull & Co” komandası layiq görülüb. “Nostandart” komandası ikinci, “Angry Birds” isə üçüncü yeri tutub. Yarışın münsiflər heyətinə Azərbaycanın şou-biznes və incəsənət aləminin tanınmış simaları daxil idi. Münsiflər heyəti iştirakçıları yaradıcılıq və startdan öncə qurduqları səhnəciklər əsasında qiymətləndirib. Digər bir meyar isə arabanın finişədək bütün maneələri dəf edərək çatdığı vaxt olub. “Red Bull Soapbox” yarışları bütün dünyada şəhər yollarında keçirilir və komandalar yerli həvəskarlardan təşkil olunur. Yarışda 44 komanda öz dördtəkərli arabaları ilə iştirak edir. Arabalar heç bir texniki vasitə olmadan, yalnız insanın fiziki qüvvəsi ilə hərəkətə gətirilir. İlk “Red Bull Soapbox” yarışı 2000-ci ildə Belçikada təşkil edilib. O vaxtdan bəri bu yarış dünyanı fəth edərək 100-dən çox ölkədə keçirilib və böyük tamaşaçı rəğbəti qazanıb.xeber100.com

NTV telekanalının məlumatına görə…

“Mercedes”in pilotları Niko Rosberq və Luis Hemilton Yaponiya Qran-prisində öz komandasına vaxtından əvvəl “Formula-1” konstruktorlarının kubokunu qazandırıb. Rusiyanın NTV telekanalı xəbər verir ki, birinci mövqedə start götürən Niko Rosberq liderliyini finişədək qoruyub saxlaya bilib və yürüşün qalibi olub. Onun komanda yoldaşı Luis Hemilton isə yürüşə ikinci çıxsa da, starta yol verdiyi səhv nəticəsində birinci onluğun axırına düşüb. Bununla belə, britaniyalı itirilmiş mövqelərin böyük hissəsini geri qaytarmağa nail olaraq, finişə üçüncü çatıb. Beləliklə Rosberq və Hemiltonun yığdıqları xallar “Mercedes” komandasının ardıcıl olaraq üçüncü dəfə “Formula-1” konstruktorlarının kubokunu qazanmasına kifayət edib.xeber100.com

Avrasiya çempionatı keçiriləcək

Oktyabrın 16-da Bakı Şəhər Gənclər və İdman Baş İdarəsinin, Şərq Döyüş Növləri Federasiyaları Assosiasiyasının dəstəyi və “Toğrul” şərq əlbəyaxa döyüş növləri və təkmübarizlik sənəti klubunun təşkilatçılığı ilə Bakıda kempo full və kempo submission idman növü üzrə Avrasiya çempionatı keçiriləcək. Azərbaycan Kempo Federasiyasının mətbuat xidmətinin rəhbəri Fuad Rəsulun Azərtac-a verdiyi məlumata görə, çempionatda Avropa və Asiyadan olan idmançıların iştirakı gözlənilir. Çempionat artıq ikinci dəfə Bakıda təşkil olunacaq. Avrasiya çempionatı Şağan Olimpiya İdman Kompleksində keçiriləcək.xeber100.com

Azərbaycan Taekvondo Federasiyasının birgə təşkilatçılığı ilə…

Gənclər və İdman Nazirliyinin, Azərbaycan Taekvondo Federasiyasının (ATF) birgə təşkilatçılığı ilə yeniyetmələrin X Respublika Oyunlarının proqramında yer alan taekvondo üzrə zona yarışları keçiriləcək. Azərtac xəbər verir ki, yarışlar taekvondonun təbliği və inkişaf etdirilməsi, respublikada fəaliyyət göstərən taekvondo bölmələrinin işinin təkmilləşdirilməsi, yığma komandaların tərkibinin müəyyənləşdirilməsi, idmançıların yarış təcrübəsinin və ustalığının artırılması məqsədi daşıyır. Yarış 2003-cü, 2004-cü və 2005-ci il təvəllüdlü yeniyetmələr arasında təşkil ediləcək. Turnirdə müxtəlif zona və bölgələrdə, o cümlədən Bakıda, Sabirabadda, Göyçayda, Balakəndə fəaliyyət göstərən taekvondo bölmələrinin yeniyetmə oğlan və qız idmançıları on çəki dərəcəsində qüvvələrini sınayacaqlar. Bu mərhələdə fərqlənmiş idmançılar noyabrın 26-dan 29-dək Tovuzda təşkil ediləcək final yarışlarında mübarizə aparacaqlar.xeber100.com

Gürcüstan Milli Olimpiya komitələrinin forumu işə başlayıb

Rusiyanın Soçi şəhərində MBD-yə üzv, həmçinin Baltikyanı ölkələrin və Gürcüstan Milli Olimpiya komitələrinin forumu işə başlayıb. Azərtac xəbər verir ki, tədbirdə Azərbaycan Milli Olimpiya Komitəsinin (MOK) vitse-prezidenti Çingiz Hüseynzadə iştirak edir. Oktyabrın 7-dək davam edəcək Forumun məqsədi Olimpiya dəyərlərinin və təhsilinin təbliği üçün müvafiq Milli Olimpiya komitələri tərəfindən planın hazırlanmasıdır.xeber100.com

“Gənclərin Avropa TOP-10” turniri keçiriləcək

Oktyabrın 7-9-da Çexiyanın Praqa şəhərində stolüstü tennis üzrə “Gənclərin Avropa TOP-10” turniri keçiriləcək. Azərbaycan Stolüstü Tennis Federasiyasından Azərtac-a bildiriblər ki, turnirdə gənclərin və yeniyetmələrin Avropa reytinqində ilk onluqda qərarlaşan idmançılarımız da yarışacaqlar. Turnir Avropa reytinqində ilk onluqda yer tutmuş gənc və yeniyetmə oğlan və qızlar arasında təşkil ediləcək.xeber100.com

2016/2017-ci il mövsümünün püşkü atılıb

Oktyabrın 6-da futbol üzrə Azərbaycan kuboku yarışlarının 2016/2017-ci il mövsümünün püşkü atılıb. Azərtac xəbər verir ki, yeni mövsümdə mükafat uğrunda 18 klub mübarizə aparacaq. Püşkatmanın nəticəsinə əsasən, 1/16 və 1/8 finalda mübarizə aparacaq cütlüklər müəyyənləşib. Onaltıdabir final mərhələsində "Turan Tovuz" - "Bakılı" və "Şəmkir" - "Qaradağ Lökbatan" görüşləri oynanılacaq. Səkkizdəbir finalda isə "Kəpəz" "Şahdağ", "Neftçi" "Şərurspor", "Sumqayıt" MOİK, "Qarabağ" "Səbail", "Zirə" - "Turan Tovuz"/"Bakılı", "Qəbələ" "Zaqatala", "İnter" - "Şəmkir"/"Qaradağ Lökbatan" və AZAL komandası isə "Rəvan" ilə qarşılaşacaq. Onaltıdabir final mərhələsinin matçları oktyabrın 12-də, növbəti görüşlər isə dekabrın 2-3-də oynanılacaq.xeber100.com  

Bakı Olimpiya Stadionu yeni bir layihəyə start verib

Bakı Olimpiya Stadionu daha bir layihəyə start verib. Azərtac xəbər verir ki, Azərbaycanın ən böyük idman arenası yeni fəaliyyət növü ilə istifadəçilərə xidmət göstərməyə başlayıb. Belə ki, bunadək idmansevərlərə bir sıra xidmətlər təklif edən stadionda “Olympiski” fitnes mərkəzi açılıb. Oktyabrın ilk günündən fəaliyyətə başlayan mərkəz Bakı Olimpiya Stadionunda 900 kvadratmetr ərazidə yerləşir. Burada ən son ağıllı və erqonomik texnologiyalar vasitəsilə bütün əzələ qruplarını inkişaf etdirmək mümkündür. Stadion rəhbərliyinin təşəbbüsü ilə fitnes müştəriləri peşəkar qaçış zolağında qaçaraq təmiz havada isinmə hərəkətlərin tamamlaya bilərlər. Ən son idman avadanlıqlarından əlavə “Olimpiski” geniş və təmiz soyunma otağı, rahat duş, sauna və hamam xidmətləri də təklif edir. Mərkəzin direktoru Zaur Rəsulov da fəaliyyətləri haqda fikirlərini açıqlayıb: “Biz hər kəsin istədiyi bədənə sahib olmasına dəstəyimizi göstəririk və məşqçilərimizin məsləhətləri ilə müştərilərimizə düzgün idman ritmi yaratmağa kömək edirik”. Qeyd edək ki, hər gün səhər saat 07:00-dan axşam 23:00-dək fəaliyyət göstərəcək mərkəzdə aylıq ödəniş 25 manatdan başlayır.xeber100.com