Yüksək Liqada 2022-2023-cü il mövsümünə start veriləcək

Sentyabrın 13-də futzal liqalarında yeni mövsümün püşkü atılacaq. Ayın 26-da isə Yüksək Liqada 2022-2023-cü il mövsümünə start veriləcək.Azərbaycan Futzal Federasiyası xəbər verir ki, “Baku Fire” klubunun baş məşqçisi Teymur Eyvazov Yüksək Liqaya hazırlığın mərhələli şəkildə davam etdiyini bildirib: “Yeni mövsümün startına təxminən 20 gün qalıb və bu müddətdən maksimum istifadə etməyə calışacağıq. Ötən çempionatlarda üzləşdiyimiz çətinliklərlərlə, problemlərlə yenidən qarşılaşmaq istəmirik. Hazırlıq prosesində bunları də nəzərə almışıq. Heyətimizi komplektləşdirməyə çalışırıq. Ayrılanlar da var. Əvəzində bir neçə təcrübəli futzalçı ilə anlaşmışıq. Onlardan Elnur Zamanovun, Faiq Əliyevin adını qeyd edə bilərəm. İrandan da legionerlər dəvət etmişik. Həmin futzalçılar bu günlərdə komandamıza qosulacaq. “Baku Fire”in müxtəlif liqalarda 3 futzal komandası çıxış edir ki, onlardan Birinci Liqada oynayanlar əsasən gənclərdir. Ötən mövsüm fərqlənən, diqqətimizi cəlb edən bir neçə perspektivli futzalçını da əsas komandaya dəvət etmişik”.“Klubumuz uzun müddətdir fəaliyyət göstərir. Müxtəlif liqalarda müəyyən uğurlar qazanmışıq, Yüksək Liqada da təcrübəlilərdən hesab olunuruq. Yeni mövsümdə qazanacağımız uğurlarla yadda qalmaq istəyirik. Ümid edirəm ki, hazırkı heyətimizlə məqsədimizə nail olacağıq”, - deyə T.Eyvazov əlavə edib.Qeyd edək ki, Yüksək Liqanın yeni mövsümündə 6 komanda - “Araz-Naxçıvan”, “Neftçi”, “Baku Fire”, “Rekord club az”, “Alyans” (Lənkəran) və U-19 mübarizə aparacaq.xeber100.com

Azərbaycan Futzal Federasiyasının məlumatına görə…

Sentyabrın 13-də Bakı İdman Sarayında futzal üzrə Yüksək, Birinci və İkinci liqaların 2022-2023-cü il mövsümünün püşkatma mərasimi keçiriləcək.Azərbaycan Futzal Federasiyası xəbər verir ki, Yüksək Liqanın yeni mövsümündə 6 komanda - “Araz-Naxçıvan”, “Neftçi”, “Baku Fire”, “Rekord club az”, “Alyans” (Lənkəran) və U-19 mübarizə aparacaq.Yarışa sentyabrın 26-da start veriləcək.xeber100.com

UEFA Avropa Liqasının qrup mərhələsində

UEFA Avropa Liqasının qrup mərhələsində “Frayburq” ilə qarşılaşacaq Ağdamın “Qarabağ” klubu sentyabrın 6-da Almaniyaya yollanacaq.Ağdam təmsilçisi xəbər verir ki, komandanı aparacaq təyyarə saat 17:00-da Heydər Əliyev Beynəlxalq Aeroportundan yola düşəcək.Sentyabrın 7-də Bakı vaxtı ilə saat 21:40-da komandamızın baş məşqçisi Qurban Qurbanovun mətbuat konfransı baş tutacaq. Saat 22:00-da isə matçın keçiriləcəyi “Wolfswinkel” stadionunda (Europa-Park Stadion) komandamızın media üçün açıq məşqi (ilk 15 dəqiqəsi) reallaşacaq.Qeyd edək ki, “Frayburq” – “Qarabağ” oyunu sentyabrın 8-də Bakı vaxtı ilə saat 23:00-da başlayacaq.xeber100.com

Batumidə kadetlər arasında şahmat üzrə dünya çempionatı keçiriləcək

Batumidə kadetlər arasında şahmat üzrə dünya çempionatı keçiriləcək.Azərbaycan Şahmat Federasiyasından bildiriblər ki, 8, 10 və 12 yaşlıların iştirak edəcəyi yarışda 25-dən artıq ölkənin şahmatçılarının mübarizə aparacağı gözlənilir.Ölkəmizi çempionatda Mehriban Əhmədli, Əsnad Baxşızadə, Xanım İsmayılova, Səfa Hümmətov, Şəmsi Qaraxanov, Yunis Mahmudzadə, Cavad Abbassoy, Toğrul Abbassoy, Camal Məmmədova, Məryəm Baxışova, Əhməd Hüseynov, Ayan Hüseynli, Kənan İsbatov, Əsnad Vəliyeva, İnci Ələkbərli, Paşam Əlizadə, Lalə Hüseynova, Xaqan Əhməd və Oqtay Cəfərov təmsil edəcəklər.Sentyabrın 15-də start götürəcək dünya çempionatı 14 gün davam edəcək.xeber100.com

Karate1 Premyer Liqa turnirinə start verilib

Heydər Əliyev adına İdman-Konsert Kompleksində Karate1 Premyer Liqa turnirinə start verilib.Turnirdə 58 ölkədən 348 karateçi medallar uğrunda mübarizə aparır.Sentyabrın 4-dək davam edəcək turnirin ilk günü kata yarışları ilə başlayıb.Turnirdə ölkəmizi Əminağa Quliyev, Sultan Hüseynov (hər ikisi 60 kq), Tural Ağalarzadə, Firdovsi Fərzəliyev, Rafiz Həsənov (hamısı 67 kq), Fərid Ağayev (75 kq), Turqut Həsənov, Pənah Abdullayev, Ayxan Mamayevi (hamısı 84 kq), Asiman Qurbanlı və Murad Hacızadəni (hər ikisi +84 kq), İnci Əzizova (50 kq), Mədinə Sadiqova (55 kq), Ayla Rzazadə (61 kq), İrina Zaretska (68 kq) və Fəridə Əliyeva (+68 kq) təmsil edirlər.Bakıda Dünya Karate Federasiyasının (WKF) ən nüfuzlu yarışı olan Karate1 Premyer Liqa turniri ilk dəfədir keçirilir. Turnirin iştirakçıları arasında Olimpiya, dünya və qitə çempionları və mükafatçıları var. Turnir kişi və qadın kumiteçilərin hər birində 5 olmaqla, 10 çəki dərəcəsi üzrə, eləcə də kişi və qadın kataçılar arasında keçirilir. 12 kateqoriyanın hər birində 32 idmançı mübarizə aparır. Onlar əsasən dünya reytinq cədvəlinin ilk 32 pilləsini tutan karateçilərdir.xeber100.com

Çimərlik futbolu üzrə Azərbaycan millisi Moldova yığması ilə qarşılaşacaq

Çimərlik futbolu üzrə Azərbaycan milli komandası Dünya Çimərlik Oyunlarının Avropa zonası üzrə seçmə mərhələsində növbəti oyununu keçirib. Norveç yığması ilə üz-üzə gələn komandamız 6:3 hesabı ilə qalib gəlib. Millimizin heyətində qolları Comərd Baxşəliyev (3), İsa Zeynallı, Orxan Məmmədov və Amid Nəzərov vurublar.Millimiz Dünya Çimərlik Oyunlarında sentyabrın 3-də 9-10-cu yerlər uğrunda qarşılaşmada Moldova yığması ilə üz-üzə gələcək. Oyun Bakı vaxtı ilə saat 10:30-da başlayacaq.xeber100.com

Futbol üzrə UEFA Gənclər Liqasının H qrupu çərçivəsində

Futbol üzrə UEFA Gənclər Liqasının H qrupu çərçivəsində keçiriləcək “Benfika” (Portuqaliya) – “Makkabi” (Hayfa, İsrail) oyununun baş hakimi Elçin Məsiyev olacaq.AFFA xəbər verir ki, ona Elşad Abdullayev və Pərvin Talıbov kömək edəcəklər. Dördüncü hakim funksiyasını Ricardo Jorge Antunes Baixinho (Portuqaliya) yerinə yetirəcək.Matç sentyabrın 6-da Portuqaliyanın Seyxal şəhərində oynanılacaq.xeber100.com

Futbol üzrə Azərbaycan Premyer Liqasının V turuna start veriləcək

Bu gün futbol üzrə Azərbaycan Premyer Liqasının V turuna start veriləcək.Turun açılış matçı Gəncənin “Kəpəz” və Ağdamın “Qarabağ” komandaları arasında olacaq.Qəbələ şəhər stadionunda təşkil ediləcək qarşılaşma saat 19:00-da start götürəcək.Ağdam təmsilçisi ardıcıl yeddi qələbə qazanıb. Gəncə komandası isə son dörd görüşdə qol vurmayıb.Rəqiblərindən bir oyun az keçirən “Qarabağ” hazırda doqquz xalla ikinci pillədə qərarlaşıb. Dörd görüşdə məğlub olan “Kəpəz” sonuncu - 10-cu pillədədir.Hər iki komanda indiyədək ölkə çempionatlarında 49 dəfə üz-üzə gəlib. Bunların 26-da Ağdam klubu, 14-də meydan sahibləri qalib gəliblər. Doqquz oyun heç-heçə yekunlaşıb.Görüşün baş hakimi Əliyar Ağayev olacaq.Turun digər görüşləri sentyabrın 3-də və 4-də keçiriləcək.Sentyabrın 3-də “Şamaxı” doğma meydanda “Turan Tovuz”u qəbul edəcək. Şamaxı şəhər stadionundakı görüş saat 16:00-da başlayacaq. Eyni gün baş tutacaq digər oyunda “Neftçi” klubu “Sumqayıt”la üz-üzə gələcək. Matçın startı “Bakcell Arena”da saat 20:30-da veriləcək.Sentyabrın 4-də isə “Bank Respublika Arena”da saat 18:00-da “Sabah”-“Səbail” oyunu keçiriləcək. Həmin gün “Zirə” komandası “Qəbələ” ilə görüşəcək. Zirə İdman Kompleksinin stadionundakı oyuna saat 20:30-da start veriləcək.

Velosiped idmanının BMX növü üzrə ölkə çempionatı keçiriləcək

Sentyabrın 9-da Azərbaycanda ilk dəfə velosiped idmanının BMX növü üzrə ölkə çempionatı keçiriləcək. Gənclər və İdman Nazirliyi və Azərbaycan Velosiped Federasiyasının təşkil edəcəyi yarış Bakıda yerləşən Veloparkdakı BMX meydançasında baş tutacaq.Beynəlxalq Velosipedçilər İttifaqının mövcud qaydalarına əsasən keçiriləcək çempionatda bütün yaş kateqoriyalarında olan idmançılar iştirak edəcəklər. Bütün velosipedçilər qrup yarışında (1 dairə) mübarizə aparacaqlar. Qaliblər hər yaş kateqoriyasında ən yaxşı vaxta görə müəyyənləşəcək.Yarışda ilk üç yeri tutan velosipedçilər Gənclər və İdman Nazirliyi və Azərbaycan Velosiped Federasiyası tərəfindən medal, diplom və qiymətli hədiyyələrlə mükafatlandırılacaqlar.Ölkə çempionatının keçirilməsində məqsəd velosiped idmanının BMX növünün təbliği və inkişafı, perspektivli idmançıların aşkar edilməsi, müxtəlif yaş kateqoriyalarında idmançıları və idman həvəskarlarını aktiv velosiped sürməyə cəlb etmək, Azərbaycanın regionlarında əhali arasında bədən tərbiyəsi, sağlamlıq və idman fəaliyyətinin aktivləşdirilməsidir.Qeyd edək ki, Azərbaycan çempionatına baxmaq üçün giriş pulsuzdur.xeber100.com

Azərbaycan Şahmat Federasiyasının təşkilatçılığı ilə…

Gənclər və İdman Nazirliyi, Azərbaycan Şahmat Federasiyasının birgə təşkilatçılığı ilə Zaqatala Olimpiya İdman Kompleksində keçirilən 16 yaşadək yeniyetmələrin Respublika Şahmat Olimpiadasına yekun vurulub.Federasiyadan bildiriblər ki, Olimpiadada yarışlar iki yaş kateqoriyası üzrə A qrupu (12-16) və B (12 yaşadək) qruplarında təşkil edilib.Olimpiadanın A qrupunda mübarizə aparan Şəki şahmatçısı İslam Hacıəliyev 11 oyundan 9,5 xal toplayaraq birinci yerin sahibi olub. 2-3-cü yerləri Sumqayıt şahmatçıları Əli Həsənov ( 9 xal) və Musa Taklavi (8.5 xal) tutublar. Amin Novruz Qurbanov və Rüstəm Rüstəmov hərəyə 8,5 xal toplayaraq müvafiq olaraq 4-5-ci pillədə qərarlaşıblar.B qrupunda çempion adını 9,5 xal toplayan Murad Rzayev qazanıb. Şəmsəddin Mehdiyev (Balakən) 9 xalla ikinci, onunla eyni xal toplayan Cavad Xəlilzadə (Bakı) isə üçüncü olub.Suat İbrahimli, Yusif Babayev, Əsnad Baxşızadə və Mikayıl Şirinov 9 xalla əlavə göstəricilə görə 4-7-ci yerləri bölüşdürüblər.Eyni zamanda komanda hesabında A qrupunda birinci yeri Sumqayıt komandası tutub. 3 nömrəli UGİŞM ikinci, Gəncə komandası isə üçüncü olublar. B qrupunda isə RŞM yarışı birinci, 4 nömrəli UGİŞM ikinci, Vüqar Həşimov komandası isə üçüncü pillədə başa vurublar.Qeyd edək ki, Olimpiadada ölkənin bütün şəhər və rayonlarının, eləcə də şahmat məktəbləri, klubları və idman cəmiyyətlərinin 16 yaşadək oğlan və qız şahmatçıları iştirak ediblər. Ümumilikdə turnirdə 503 yeniyetmə mübarizə aparıb. İsveçrə sistemi üzrə 11 turdan ibarət yarış şəxsi-komanda xarakteri daşıyıb.xeber100.com