Klublararası dünya çempionatı Yaponiyada keçiriləcək

Klublararası dünya çempionatının keçiriləcəyi vaxt bəlli olub. Faktinfo.az xəbər verir ki, 2016-cı ildə klublararası dünya çempionatı Yaponiyada keçiriləcək. Turnir dekabr ayına planlaşdırılıb. Dekabrın 8-dən 18-nə qədər keçiriləcək turnirdə dünyanın ən yaxşı klubu bəlli olacaq. Klublararası dünya çempionatında hər bir konfederasiyanın ən güclü komandası iştirak edir. Turnirin son qalibi İspaniyanın “Barselona” komandasıdır.xeber100.com

UEFA xəbərdarlıq edib

Avropa Futbol Assosiasiyaları İttifaqı (UEFA) Fransada keçirilən futbol üzrə Avropa çempionatında iştirak edən Rusiya və İngiltərəyə xəbərdarlıq edib. Apa-nın məlumatına görə, UEFA-nın saytında yerləşdirilən xəbərdarlıqda qeyd edilib ki, əgər Rusiya və İngiltərə yığma komandalarının azarkeşləri yenə kütləvi iğtişaşlarda iştirak etsə, bu komandalar Avropa çempionatından kənarlaşdırıla bilər. UEFA artıq mümkün sanksiyalar barədə Rusiya Futbol Federasiyasını və İngiltərə Futbol Assosiasiyasını məlumatlandırıb. Qeyd edək ki, Avropa çempionatında B qrupunda keçirilən ilk turda Rusiya və İngiltərə yığmaları arasında oyun 1:1 hesabı ilə başa çatıb. Oyun başa çatandan sonra 30 rusiyalı azarkeş ingilis azarkeşlərə hücum çəkib, onların əllərindəki bayraqları cırmağa çalışıblar. Şəhərdə də azarkeşlər arasında toqquşma qeydə alınıb. Olaylar zamanı 31 nəfər xəsarət alıb. Bununla bağlı UEFA Rusiyaya münasibətdə iş açıb.xeber100.com

Avropa çempionatının ikinci günündə üç oyun keçiriləcək

İyunun 11-də futbol üzrə XV Avropa çempionatının ikinci günündə üç oyun keçiriləcək. Azərtac xəbər verir ki, Bakı vaxtı ilə saat 17:00-da “A” qrupunda yer alan Albaniya və İsveçrə milliləri qarşılaşacaq. Lens şəhərindəki 38223 tamaşaçı yerlik “Bollar-Delelis” stadionunda keçiriləcək oyunu ispaniyalı baş hakim Karlos Velasko Karbalyo idarə edəcək. Günün digər iki matçında isə “B” qrupunda münasibətlərə aydınlıq gətiriləcək. Saat 20:00-da Uels ilə Slovakiya yığma komandaları üz-üzə gələcək. Oyunda ədaləti norveçli baş hakim Sveyn Odvar Moen təmin edəcək. Görüş Bordoda, 42115 yerlik “Bordo” stadionunda oynanılacaq. Saat 23:00-da başlayan üçüncü görüşdə isə futbolun yaradıcıları, “B” qrupunun favoriti hesab edilən ingilislər Rusiya millisini məğlub etməyə çalışacaqlar. İtaliyalı referi Nikola Rizzolinin idarə edəcəyi görüş Marsel şəhərindəki “Velodrom” stadionunda keçiriləcək. Fransanın ən böyük arenalarından hesab olunan bu stadionun tamaşaçı tutumu 67 min 354-dür. Qeyd edək ki, Albaniya-İsveçrə və Uels-Slovakiya qarşılaşmaları “CBC Sport” telekanalı, İngiltərə-Rusiya oyunu isə İctimai Televiziyadan birbaşa yayımlanacaq.xeber100.com

Dünyanın ən çox qazanan idmançılarının adı açıqlanıb

Dünyanın ən çox qazanc əldə edən idmançılarının siyahısı açıqlanıb. Apa-nın məlumatına görə, "Forbes" jurnalının tərtib elədiyi siyahının ilk pilləsində Madridin “Real” klubunun və Portuqaliya yığmasının futbolçusu Kriştianu Ronaldu qərarlaşıb. K.Ronaldu "Forbes"-un siyahısına başçılıq edən ilk futbolçudur. O, ötən 1 il ərzində 88 milyon dollar qazanıb. K.Ronaldu gəlirlərinin 56 milyonunu klubu ilə müqavilədən, 32-i isə sponsorlardan qazanıb. Ən çox qazanan idmançılar arasında ikinci yeri “Barselona” klubunun və Argentina millisinin futbolçusu Lionel Messi tutur. Onun 1 ildəki gəliri 81,4 milyon dollar olub. Üçlüyü amerikalı basketbolçu Lebron Ceyms tamamlayıb - 77,2 milyon. Dünyanın ən çox qazanan 10 idmançısı: 1. Kriştianu Ronaldu (futbol) - $ 88 mln 2. Lionel Messi (futbol) - $ 81,4 mln 3. Lebron Ceyms (basketbol) - $ 77,2 mln 4. Rocer Federer (tennis) - $ 67,8 mln 5. Kevin Dürant (basketbol) - $ 56,2 mln 6. Novak Cokoviç (tennis) - $ 55,8 mln 7. Kem Nyuton (Amerika futbolu) - $ 53,1 mln 8. Fil Mikelson (qolf) - $ 52,9 mln 9. Cordan Spayet (qolf) - $ 52,8 mln 10. Kobi Brayant (basketbol) - $ 50 mln

Türkiyə Fransaya yollanacaq vətəndaşlarına xəbərdarlıq edib

Türkiyə Xarici İşlər Nazirliyi Avropa çempionatını izləmək üçün Fransaya yollanacaq vətəndaşlarına xəbərdarlıq edib. Apasport.az saytının məlumatına görə, müraciət yayımlayan XİN vətəndaşlardan xüsusilə ictimai nəqliyyatlarda və insanların kütləvi toplaşdığı məkanlarda diqqətli olmağı tövsiyə edib. Müraciətdə bir müddət öncə Fransada baş verən terror hadisələrindən sonra yerli hökumətin fövqəladə hal vəziyyətini qitə birinciliyi ilə əlaqədar 2 ay daha uzatdığını vurğulayan qardaş ölkə rəsmiləri oyunların baş tutacağı stadionlarda görüləcək təhlükəsizlik tədbirlərinə uymağa və qaydalara riayət etməyə çağırıb.xeber100.com

Litvada şahmat festivalı keçirilir

Litvanın Panevejis şəhərində şahmat festivalı keçirilir. Festivalın proqramına beş turnir daxildir. Azərtac xəbər verir ki, turnirdə Azərbaycan nümayəndələri qrossmeyster Azər Mirzəyev və FİDE ustası Rüstəm Bünyadov iştirak edirlər. Qrossmeysterlərin turnirində dörd turdan sonra 4 xal toplayan polşalı şahmatçı Marsel Kanarek liderdir. Rusiyalı Sergey Matsenko liderdən bir xal, Azərbaycan təmsilçisi Azər Mirzəyev 1,5 xal geri qalır. Beynəlxalq usta normasını nəzərdə tutan turnirdə 4 xalla ev sahibi Titas Stremaviçyus irəlidədir, rusiyalı Mixail Bereslavski bir xal geri qalır. Azərbaycan şahmatçısı Rüstəm Bünyadov 2 xalla beşinci yerdədir.xeber100.com

Futbol liqaları üçün transfer dönəminin vaxtları müəyyənləşib

2016/2017-ci il mövsümündə Azərbaycanda keçiriləcək futbol liqaları üçün transfer dönəminin vaxtları müəyyənləşib. Azərtac Peşəkar Futbol Liqasının (PFL) rəsmi saytına istinadla xəbər verir ki, yay transfer dönəmi iyunun 9-dan avqustun 31-dək, qış transfer dönəmi isə yanvarın 4-dən 31-dək olacaq.xeber100.com

“Qarabağ” futbol komandası Vyanada həvəskar klublar liqasının kubokunu qazanıb

İyunun 7-də Vyana ikinci əyalət liqasında mübarizə aparan “Qarabağ” komandası həvəskar klublar arasında kubok yarışının finalında Avstriya paytaxtının “SV Gersthof” klubu ilə qarşılaşıb. Mübarizə apardığı ikinci əyalət liqasının cədvəlində liderliyi və növbəti mövsümdə yuxarı liqaya yüksəlməyi təmin edən “Qarabağ” yaşıl meydana favorit kimi çıxıb. Qarşılaşmanın ilk yarısında qapılar qarşısında gərgin vəziyyətlər qeydə alınsa da, hesab açılmayıb. İkinci hissədə təşəbbüsü tam ələ alan “Qarabağ” hücumların sayını və kəsərini daha da artırıb. Matçın 66-cı dəqiqəsində “Qarabağ”ın hücumçusu Srdan Pavlov komandasını hesabda irəli çıxarıb. O, 77-ci dəqiqədə 11 metrlik cərimə zərbəsini də dəqiq yerinə yetirərək dubl edib və hesab arasındakı fərqi artırıb. Beləliklə, oyunda 2:0 hesabı ilə qələbə qazanan “Qarabağ” komandası 2015-2016-cı il mövsümündə həvəskar klubların yarışdığı Toto Kubokunun qalibi olub.xeber100.com

8 illik fasilədən sonra…

İyunun 17-dən 19-dək Bakıda keçiriləcək “Formula-1” Avropa Qran-prisində mübarizə aparacaq iddialı komandalardan biri də Britaniyanın “McLaren” klubudur. Komanda müxtəlif dövrlərdə fərqli yarışlarda uğurla çıxış edib. Beş dəfə “CanAm”, üç dəfə 500 mil İndianapolis, bir dəfə Le-Man və Sebrinq yarışlarının qalibi olub. “Mclaren” 8 dəfə “Formula-1” üzrə konstruktor kubokunun sahibidir. Komanda 1963-cü ildə “Formula-1” pilotları Bryus Maklaren və Tedd Mayer tərəfindən Tasmaniya avtomobil yarışı üçün Yeni Zelandiyada yaradılıb. Bryus Maklaren həmin il Tasmaniya avtomobil yarışının qalibi olur və növbəti iki ildə “Formula-1” yarışlarında “Kuper” komandasının heyətində çıxış edir. “McLaren” komandası “Formula-1” yarışlarında 1966-cı ildə Monako Qran-prisində debüt edir. “McLaren M2B”ni idarə edən Bryus Maklaren 3 xalla mövsümü 14-cü pillədə başa vurub. Növbəti ildə də komanda 3 xal toplayır. “Mclaren” komandası ilk yüksək nəticəni 1968-ci ildə qazanıb. İspaniya Qran-prisində komandanın pilotu Denni Xyum ikinci, daha sonra Belçika mərhələsində isə Bryus Maklaren birinci olub. Həmin il komanda konstruktorlar kubokunda ikinci yerin sahibi olub. Bir il sonra komanda konstruktor kubokunu dördüncü pillədə başa vurub. 1970-ci il komandanın tarixində böyük faciə ilə yadda qalıb. Belə ki, Bryus Maklaren “CanAm” seriyasında yeni avtomobili sınaqdan keçirərkən faciəvi şəkildə həlak olub. Hazırda komandanın əsas pilotlarından biri Fernando Alonso Bakıda təşkil olunacaq “Formula-1” Avropa Qran-prisinin rəsmi elçisidir. Komandanın digər pilotu isə Censon Battondur. “Mclaren” komandası hazırki çempionatda 24 xalla yeddinci sırada qərarlaşıb.xeber100.com

Sərbəst güləş üzrə dünya kuboku yarışları keçiriləcək

Los-Ancelesdə böyüklər arasında sərbəst güləşi üzrə dünya kuboku yarışları keçiriləcək. Yarışda Azərbaycanla yanaşı, ABŞ, Rusiya, İran, Türkiyə, Gürcüstan, Monqolustan və Hindistan güləşçiləri iştirak edəcəklər. Azərbaycan Güləş Federasiyasından Azərtac-a verilən xəbərə görə, dünya kuboku yarışları iyunun 11-dən 12-dək davam edəcək. Püşkatmanın nəticəsinə əsasən, Azərbaycan güləşçiləri İran, ABŞ və Hindistan komandaları ilə “B” qrupunda mübarizə aparacaq. “A” qrupunda isə Rusiya, Türkiyə, Gürcüstan və Monqolustan komandaları qüvvələrini sınayacaq. Yarışda yığma komandanın məşqçisi Sadruddin Ayqubovun rəhbərliyi altında 10 güləşçimiz iştirak edəcək. Heyətdə Mahmud Məhəmmədov (57 kq), Cahid Həsənzadə, Əhmədnəbi Qvarzatilov (hər ikisi 61 kq), Məhəmməd Müslümov (65 kq), Hacımurad Ömərov (70 kq), Əşrəf Əliyev (74 kq), Aleksandr Qostiyev, Məhəmmədhacı Xatiyev (hər ikisi 86 kq), Aslanbek Alborov (97 kq) və Səid Həmidov (125 kq) yer alıb. Yarışın proqramına əsasən, iyunun 11-də qrup görüşləri keçiriləcək. Qrup liderləri finalda, qrup ikinciləri isə üçüncülük uğrunda görüşəcək. Görüşlərin idarə edilməsində ölkəmizi beynəlxalq dərəcəli hakim Sədi Quliyev təmsil edəcək. Xatırladaq ki, ötən il keçirilən analoji yarışı sərbəst güləşçilərimiz üçüncü sırada tamamlamışdı.xeber100.com