Azərbaycan Super Liqasının 2015/2016 mövsümünün simvolik yığması açıqlanıb

Qadın voleybolçular arasında Azərbaycan Super Liqasının 2015/2016 mövsümünün simvolik yığması açıqlanıb. Apasport.az saytının məlumatına görə, artıq tarixin yaddaşına qovuşan “Rabitə”nin 8 illik çempionluq seriyasını qıraraq, qızıl medallara yiyələnən “Azərreyl”in 5 oyunçusu bu komandada yer alıb. Belə ki, yarışın ən dəyərli voleybolçusu (MVP) adını Madison Kinqdon qazanıb. O, bu titulu hazırda komanda yoldaşı, ötən il “Rabitə”də oynamış Nutsara Tomkomdan təhvil alıb. Tailandlı toppaylayıcı buna baxmayaraq, Super Liqada yenə ən güclü olduğunu ortaya qoyub və mövqeyində birinciliyi əldən verməyib. Həmçinin, Azərbaycan çempionatının bombardiri və müdafiəçisi də dəyişməz qalıb. Super Liqada bu dəfə bürünc medal qazanan Aneta Havlikova yenə ən çox xal topladığı halda, Brenda Kastillo ən yaxşı müdafiəçi nominasiyasında liderliyini qoruyub. Ümumilikdə “doqquzluğ”da “Azərreyl”in 5 oyunçusu ilə yanası, ikinci yeri tutan “Telekom”dan 1, “Lokomotiv”dən 2 oyunçu yer alıb. “Azəryol” isə 4-cü yerdə qərarlaşmasına baxmayaraq, simvolik komandada 2 oyunçu ilə təmsil olunub. 2015/2016 mövsümünün simvolik komandası Ən dəyərli voleybolçu – Madison Kinqdon (Azərreyl) Ən yaxşı bombardir – Anita Havlikova (Lokomotiv) Ən yaxşı hücumçular – Yelizaveta Səmədova (Telekom), Stefani Niemer (Azəryol) Ən yaxşı blokçu – Cessika Cons ((Susan), Azərreyl)) Ən yaxşı toppaylayıcı – Nutsara Tomkom (Azərreyl) Ən yaxşı topqəbuledici – Odina Bayramova (Azərreyl) Ən yaxşı müdafiəçi – Brenda Kastillo (Lokomotiv) Ən yaxşı libero – Valeriya Məmmədova (Azərreyl) Topu oyuna ən yaxşı daxil edən – Malika Kanzonq (Azəryol) Qeyd edək ki, Super Liqanın ən yaxşı topqəbuledicisi olan “Azərreyl”in kapitanı Odina Bayramova həmçinin final mərhələsinin ən dəyərli oyunçusu seçilib.  

Təmas xəttində baş verənlərlə bağlı bəyanat

Ermənistan Boks Federasiyasının prezidenti, deputat Artur Qevorqyan təmas xəttində baş verənlərlə bağlı bəyanatla çıxış edib. armtoday.info xəbər verir ki, bu barədə Ermənistan Boks Federasiyasının rəsmi saytında məlumat verilib. Bəyanatda bildirilir: “Hazırkı hərbi vəziyyəti nəzərə alaraq, Ermənistan Boks Federasiyasının prezidenti kimi idmançılarımıza Türkiyə və Azərbaycanda keçiriləcək Olimpiya oyunlarının təsnifat mərhələlərində iştirak etməyə icazə vermirəm. Ən vacib məsələ Ermənistan vətəndaşlarının həyatının təhlükəsizliyidir. Əminəm ki, azarkeşlərimiz bizi anlayacaq. Sərbəst qrafik üzrə fəaliyyət göstərən idmançılarımız hərbi hissələrə qayıdıb, tam hərbi xidmət keçəçəklər ki, lazım olduğu təqdirdə döyüşə hazır olsunlar”.

AVRO-2020-nin final mərhələsi

Apasport.az bildirir ki, indiyədək güləş, boks, bədii gimnastika və digər idman növləri üzrə mundiallara ev sahibliyi edən ölkəmiz futbol üzrə dünya çempionatı keçirmək iddiasındadı. Bunu FİFA-nın prezidenti Canni İnfantino açıqlayıb. Uruqvayın DÇ-2030-a namizədliyinə münasibət bildirən İnfantino qeyd edib ki, ilk növbədə, 2026-cı ildə keçiriləcək yarışı düşünmək lazımdı. Onun sözlərinə görə, artıq iddiaçı ölkələr də bəllidi. Belə ki, bu ölkələr sırasında Azərbaycanla Türkiyənin birgə ev sahibliyi etmək istəyi də var. Həmçinin, Kanada, Meksika, Kolumbiya, Mərakeş, ABŞ, İngiltərə, Qazaxıstan, eyni zamanda Avstraliya ilə Yeni Zelandiya birlikdə mundialı qəbul etmək arzusundadılar. Amma bu istəklərin heç də hamısı müraciətlərini hələlik rəsmiləşdirməyiblər. Qeyd edək ki, DÇ-2018 Rusiyada, DÇ-2022 Qətərdə keçiriləcək. Azərbaycan isə AVRO-2020-nin final mərhələsinin 4 oyununa ev sahibliyi edəcək.  

“Sarı-qırmızı”lara limit tətbiqi

Qadın voleybolçular arasında CEV kubokunun final mərhələsi üçün Rusiyaya yollanan “Qalatasaray” ciddi problemlə üzləşib. Apasport.az saytının məlumatına görə, şimal qonşularımız “Dinamo” ilə qarşılaşmaq üçün Krasnodara gəlməli olan “sarı-qırmızı”lara limit tətbiq ediblər. Belə ki, komandaya cəmi 30 viza verilməsi qərara alınıb. Sonradan isə “Qalatasaray”ın prezidenti Dursun Özbək və klub rəsmiləri də həlledici oyunu canlı izləmək istəyinə düşsə də, ruslar onların arzusunun üstündən xətt çəkiblər. Nəticədə komanda rəhbəri Krasnodara yollana bilməyib. Rusiya tərəfi bunu yeni viza aça bilməməkləri ilə əsaslandırıb. Qeyd edək ki, Türkiyədə baş tutan matçda “Qalatasaray” 3:2 hesabı ilə qalib gəlib. Oyundan sonra azarkeşlərlə “Dinamo” voleybolçuları arasında gərginlik də yaşanıb və Krasnodar təmsilçisi CEV-ə şikayət edib. Cavab matçı isə aprelin 2-də olacaq.  

“Qarabağ”-1000

“Qarabağ” Azərbaycan çempionatları tarixində 1000-ci qoluna imza atıb. Apasport.az saytının məlumatına görə, 1992-ci ildən keçirilən milli çempionatların daimi iştirakçısı olan Ağdamtəmsilçisi yubiley qolunu Topaz Premyer Liqasının XXVII turunun “Rəvan”la oyununda vurub. Bu topun müəllifi makedoniyalı yarımmüdafiəçi Murem Muaremdi. 2 il əvvəl 900-cü qolun müəllifi kimi tarixə düşən 28 yaşlı legioner iki əlamətdar qolu 703 gün intervalla vurub. “Rəvan”ı 5:1 hesabı ilə məğlub edən “Qarabağ” 1000-ə oyundakı 2-ci qolla çatmaqla kifayətlənməyib, bu göstəricidə 1003-ə qədər irəliləyib.Ağdam təmsilçisi ölkə çempionatlarında “Neftçi”dən sonra 1000-i keçən 2-ci komandadı. “Qarabağ” mininci qolu 684-cü oyununda vurub.  Bu matçların 21-də texniki nəticə qeydə alınıb. Texniki nəticə və ləğv olunan matçlar nəzərə alınmamaqla, 1003 dəfə fərqlənən “Qarabağ” ilk qolunu 1992-ci ildə vurub. Mayın 3-də Sabirabad “İnşaatçı”sı ilə görüşdə hesabı açan Mehman Alışanov nəinki klubun, ümumiyyətlə ölkə çempionatlarının ilk qoluna imza atıb.

Stolüstü tennis çempionatı başa çatdı

Martın 28-dən etibarən Azərbaycan Stolüstü Tennis Federasiyasının və Təhsil Respublika İdman Mərkəzinin birgə təşkilatçılığı ilə ali təhsil müəssisələrinin tələbələri arasında keçirilən stolüstü tennis üzrə respublika çempionatı bu gün başa çatıb. Federasiyadan  verilən məlumata görə, 13 komandanın iştirak etdiyi çempionatda I yeri Azərbaycan Dövlət Bədən Tərbiyəsi və İdman Akademiyası, II yeri Milli Aviasiya İnstitutu, III yeri isə Bakı Dövlət Universiteti tutub.    

“Formula-1” Avropa Qran Prisi Bakıda

Azərbaycanın paytaxtında iyun ayında keçiriləcək "Formula-1" Avropa Qran Pri-sində Baku City Circuit trası dünyada bütün şəhər trasları arasında ən sürətlisi olacaq. Bunu German Tilke Baku City şirkətinin saytında yerləşdirilən müsahibəsində deyib. Qeyd edək ki, məhz onun layihələri əsasında "Formula-1"in əksər trasları qurulur. Layihəçinin sözlərinə görə Bakı şəhər trası digər traslardan bir çox amillərə görə fərqlənir: "Bu, dünyada ən sürətli şəhər trası olacaq. Bu trass şəhərin tarixi mərkəzi ətrafında qurulub ki, bu da istər tribunalarda əyləşən, istərsə də evlərində "Formula-1" i seyr edənlər və sevənlər üçün təkrarolunmaz maraqlı bir atmosfer yaradacaq". Tilkenin sözlərinə görə, Bakıdakı "Formula-1" trası nadirdir: "Bakı mərhələsi təqvimdə ən həyacanlı mərhələlərdən biri olacaq. Əlbəttə, Bakıdakı trası digər traslarla müqayisə etmək olmaz, çünki şəhərin içində qurulub. Bununla yanaşı, digər şəhər traslarından fərqlənir. Bizim hesablamalara görə, bir dairəni keçmə müddəti təxminən 1 dəqiqə 41 saniyə təşkil edəcək, lakin əlbəttə ki, bu, yarışçıların hazırlığından asılı olacaq. Trasda ən mürəkkəb döngələrdən biri 8-ci olacaq, burada maksimum sürət saatda 204 kilometr olacaq. 8-ci ilə 9-cu döngələr arasındakı məntəqədə minumum sürətin saatda 86 kilometr olacağı gözlənilir". Onun sözlərinə görə, bu tras tarixi və müasir Bakı arasında ahəngdarlığı nümayiş etdirmək üçün məxsusi qurulub. Xatırladaq ki, "Formula-1" Avropa Qran Prisi Bakıda 2016-cı il iyunun 17-19 da keçiriləcək.

Məşqçimiz güclülərin siyahısında…

Məşqçilərin yeni reytinq cədvəli açıqlanıb. Futbolxeber.az saytının məlumatına görə, ötən siyahı ilə müqayisədə “Qarabağ”ın baş məşqçisi Qurban Qurbanov sıralamada irəliləyib. Belə ki. daha əvvəl 475-ci olan Qurbanov hazırda 469-cu pillədə qərarlaşıb. Təcrübəli mütəxəssisin aktivində 1238 reytinq xalı var. “Qarabağ”ın çalışdırıcısı Dik Advokat, Henrik Larsson. Sami Hyuppya, Tomas Şaaf, Dan Petresku. Mustafa Dənizli, Filippo İnzagi. Roberto Di Matteo, Şota Arveladze kimi tanınmışları geri qoyub. “Qəbələ”nin baş məşqçisi Roman Qriqorçuk isə dünya reytinqində 578-ci pillədə qərarlaşıb. Ötən siyahı ilə müqayisədə 2 pillə irəliləyən ukraynalı çalışdırıcının aktivində 937 reytinq xalı var.

Avropa çempionatına növbəti vəsiqə…

Daha iki ölkənin 17 yaşadək futbolçulardan ibarət milli komandası Bakıda keçiriləcək Avropa çempionatına vəsiqə qazanıb. Sportnet.az xəbər verir ki, onlar İngiltərə və Ukrayna yığmalarıdır. Hər iki komanda elit-raundun İngiltərədə keçirilən 2-ci qrupunda ilk 2 turun nəticələrinə əsasən, bu hüquqa yiyələnib. Qrup autsayderləri Finlandiya və Türkiyəni Ukrayna 3:0, İngiltərə isə müvafiq olaraq, 1:0 və 3:1 hesabı ilə yenib. Martın 29-da qrupun şərikli liderləri arasında son turun oyunu keçiriləcək. Bu matçın nəticəsindən asılı olmayaraq, İngiltərə və Ukrayna mayın 5-də Azərbaycan paytaxtında start götürəcək final mərhələsinə qatıla biləcək. Əvəzində Rusiyanın ardından Türkiyə yığması da Bakıya gələ bilməyəcək. Beləliklə, Avropa çempionatının 16 iştirakçısından yarısının adına aydınlıq gəlib. Daha öncə Portuqaliya, İsveç, Belçika, İtaliya, Bosniya və Herseqovina, eləcə də təşkilatçı Azərbaycan milliləri də bu hüquqa yiyələnib. Qeyd edək ki, çempionat mayın 21-dək davam edəcək.

Avstriyada təlim-məşq toplanışı olacaq

Mayın 23-dən iyunun 4-dək Azərbaycan millisinin Avstriyada təlim-məşq toplanışı olacaq. Apasport.az saytının məlumatına görə, bu toplanış zamanı üç yoxlama görüşü planlaşdırılır. Bu barədə sayta AFFA-nın baş katibi Elxan Məmmədov məlumat verib. Antalyada Azərbaycan – Qazaxıstan (0:1) hazırlıq matçından sonra əməkdaşımıza açıqlama verən baş katib milli komandanın Avstriya toplanışında 3 yoxlama görüşü keçirəcəyini deyib: “Artıq Kanada ilə razılaşmışıq. İkinci rəqib böyük ehtimalla Makedoniya millisi olacaq. Bu dəqiqləşəndən sonra üçüncü sınaqçının da kimliyinə aydınlıq gələcək”.