“Azərbaycan Xəzər Dəniz Gəmiçiliyi” QSC-nin təşəbbüsü ilə…

“Azərbaycan Xəzər Dəniz Gəmiçiliyi” QSC-nin (ASCO) təşəbbüsü ilə xalqımızın Ümummilli Lideri, müasir Azərbaycanın qurucusu, milli gəmiçiliyin inkişafında böyük xidmətləri olan Heydər Əliyevin və onun ömür-gün yoldaşı oftalmoloq-alim, akademik Zərifə Əliyevanın 100 illik yubileyi münasibətilə maraqlı musiqili layihə həyata keçirilib. ASCO-dan bildirilib ki, layihə çərçivəsində Ulu Öndərin və görkəmli oftalmoloqun adını daşıyan gəmilər - “Prezident Heydər Əliyev” tankeri və Ro-Pax tipli “Zərifə Əliyeva” gəmi-bərəsi bir araya gətirilib. Doğma Xəzərin qoynunda üzən gəmilərin göyərtəsində Xalq artisti Nəzakət Teymurova “Küçələrə su səpmişəm” xalq mahnısını ifa edib. Kompozisiya üçün “Küçələrə su səpmişəm” mahnısının seçilməsi xüsusi məna kəsb edir. Musiqini dərindən duyan və ona dəyər verən Ulu Öndər Heydər Əliyevin sevdiyi mahnılar sırasında “Küçələrə su səpmişəm” mahnısı xüsusi yer tutub. Bu layihənin ərsəyə gətirilməsində məqsəd Ümummilli Lider Heydər Əliyevi və Zərifə Əliyevanı yad etmək, onların əziz xatirəsinə dənizçilərin sonsuz ehtiramını çatdırmaqdan ibarətdir.xeber100.com

“Brent” markalı neftin bir barelinin qiyməti 0,47 dollar artıb

Dünya birjalarında neft qiymətləri bahalaşıb. Londonun ICE (“InterContinental Exchange Futures”) birjasında “Brent” markalı neftin bir barelinin qiyməti 0,47 dollar artaraq 75,77 dollar olub. Nyu-Yorkun NYMEX (“New York Mercantile Exchange”) birjasında “Light” markalı neftin bir barelinin qiyməti isə 0,48 dollar bahalaşaraq 71,82 dollar təşkil edib.xeber100.com

“Heydər Əliyev İli” çərçivəsində ağacəkmə aksiyası keçirilib

Ümummilli Lider Heydər Əliyevin 100 illik yubileyi ilə əlaqədar “Bakı Metropoliteni” QSC və Yeni Azərbaycan Partiyası Yasamal rayon təşkilatının dəstəyi ilə “Xocəsən” elektrik deposunda ağacəkmə kampaniyası təşkil olunub. Ötən il dekabrın 23-də Prezident İlham Əliyevin iştirakı ilə birinci mərhələ üzrə inşaat işləri yekunlaşdırılaraq istifadəyə verilmiş “Xocəsən” elektrik deposu 24,28 hektar ərazini əhatə edir. Bənövşəyi xəttə xidmət göstərən depoda bu günə qədər 1000-dən artıq ağac əkilib, yaşıllıqlar salınıb. Xocəsən qəsəbəsində yerləşən elektrik deposunda inşaat işləri 3 mərhələdə, əvvəlcədən nəzərdə tutulmuş layihəyə uyğun aparılır. Bu isə gələcəkdə elektrik deposunda işçilərin ekoloji təmiz məkanda asudə vaxtlarını keçirməsi üçün nəzərdə tutulmuş istirahət guşələrinin yaradılmasını da özündə ehtiva edir. “Bakı Metropoliteni”ndən bildirilib ki, “Heydər Əliyev İli” çərçivəsində keçirilən növbəti aksiya zamanı depo ərazisində mövsümi şərait və ərazinin torpaq xüsusiyyətləri nəzərə alınmaqla, 200-ə yaxın zeytun ağacı əkilib. Aksiyada rayon təşkilatının fəalları və “Bakı Metropoliteni” QSC-nin kollektivinin üzvləri yeni istifadəyə verilmiş depo ərazisində yaşıllıqların salınması işində yaxından iştirak etməklə gələcəyə töhfə veriblər. Deponun indiki ərazisinin bir hissəsində vaxtilə pərakəndə tikilmiş obyektlər yerləşib. Digər hissədə ekoloji mühitə mənfi təsir edən bataqlıq olub. Burada ətraf mühitin çirklənməsinə münbit şərait yaradan müxtəlif tullantıların atılması ilə antisanitar vəziyyət hökm sürüb. Deponun inşası və layihə üzrə aparılan abadlıq işləri ötən qısa müddət ərzində ərazinin ekomühitinin sağlamlaşdırılmasına hiss olunacaq təsir göstərib.xeber100.com

Qazın 1000 kubmetrinin qiyməti 407 ABŞ dollarınadək enib

Avropada qazın 1000 kubmetrinin qiyməti 407 ABŞ dollarınadək enib. Mayın 4-də iyun fyuçerslərinin qiyməti TTF (Niderlandın "Title Transfer Facility"i - Avropanın ən likvid virtual satış mərkəzi) indeksi üzrə 407,3 dollar təşkil edib, bu da öncəki hesablama qiyməti (418,4 dollar) ilə müqayisədə 2,7 faiz azdır. Qazın qiymətinin enməsi səbəblərindən biri də havaların tədricən isinməsidir. Qeyd edək ki, ötən il martın 7-də gün ərzində Avropada qazın qiyməti bir neçə dəfə rekord vuraraq, maksimum 3900 dollaradək yüksəlib.

Bakı Nəqliyyat Agentliyi: 50 nömrəli marşrut xətti üzrə ödəniş “BakıKart”la olacaq

Bakı Nəqliyyat Agentliyi (BNA) tərəfindən müntəzəm marşrut avtobuslarının mərhələli şəkildə nağdsız ödəniş sisteminə inteqrasiyası ilə bağlı tədbirlər davam etdirilir. BNA-dan bildirilib ki, bu çərçivədə mayın 8-dən etibarən “Neftçilər” metro stansiyası – Yeni Günəşli qəsəbəsini əlaqələndirən 50 nömrəli marşrut xətti üzrə hərəkət edən avtobuslarda gediş haqqı “BakıKart” vasitəsilə ödəniləcək. Bununla da gündəlik bu marşrut üzrə orta hesabla 10 minə yaxın sərnişinin rahat gediş-gəlişi təmin ediləcək. İş prosesinə uyğun olaraq, digər marşrut xətləri də mərhələli şəkildə nağdsız ödəniş sisteminə inteqrasiya ediləcək. Bununla bağlı əvvəlcədən məlumat veriləcək.xeber100.com

Əmlak Məsələləri Dövlət Xidmətinin məlumatı əsasında…

Bu ilin ilk 3 ayı ərzində 108 min 811 daşınmaz əmlakın texniki inventarlaşdırılması aparılıb və texniki pasportu tərtib edilib. Əmlak Məsələləri Dövlət Xidmətindən bildirilib ki, bu isə ötən ilin eyni dövrü ilə müqayisədə 88,2 faiz artım deməkdir. Qeydiyyata alınan ipoteka müqaviləsinin sayı ötən ilin eyni dövrü ilə müqayisədə 17,7 faiz artaraq 17 min 714 olub.xeber100.com

Dünya bazarında Azərbaycan neftinin qiyməti bahalaşıb

Dünya bazarında Azərbaycan neftinin qiyməti bahalaşıb. “Azeri Light” markalı neftin bir barelinin qiyməti 1,95 dollar artaraq 83,8 dollar olub. Xatırladaq ki, Azərbaycan neftinin bir barelinin ötən il ərzində maksimum qiyməti martın 9-da (135,99 dollar) qeydə alınmışdı.xeber100.com

SOCAR: Cari ilin birinci rübündə qaz hasilatı 15 faiz artıb

Dünya iqtisadiyyatının sürətli transformasiyası və enerji bazarlarında baş verən dəyişikliklər fonunda Azərbaycan Respublikası Dövlət Neft Şirkəti (SOCAR) 2023-cü ilin 1-ci rübünü uğurla başa vurmağa nail olub. SOCAR-dan verilən məlumata görə, müvəffəqiyyəti şərtləndirən amillər sırasında maliyyə və biznes dayanıqlığının gücləndirilməsi, əməliyyat effektivliyinin artırılması, rəqəmsal enerji texnologiyalarının tətbiqi, habelə əməyin təhlükəsizliyinin gücləndirilməsi xüsusi yer tutub. Səmərəli fəaliyyət istehsalat göstəricilərinə də öz müsbət təsirini göstərib. Cari ilin birinci rübündə SOCAR tərəfindən 20 min metrə yaxın qazma işləri həyata keçirilib. Bu da ötən ilin müvafiq dövrü ilə müqayisədə 7,6 faiz çoxdur. Hesabat dövründə şirkət tərəfindən 1,9 milyon tondan çox neft, 2,2 milyard kubmetrdən çox qaz hasil olunub. Neft hasilatı nisbətən sabit qalsa da qaz hasilatında əvvəlki illə müqayisədə 15 faiz artım qeydə alınıb. Ölkə üzrə ümumilikdə 7,7 milyon tondan çox neft və 12,2 milyard kubmetrə yaxın qaz hasil edilib. Ümumilikdə ölkə üzrə qaz hasilatı 3 faiz artıb. Hesabat dövründə SOCAR tərəfindən dünya bazarına 4,6 milyon tondan çox xam neft, Gürcüstan bazarına isə 581 milyon kubmetr təbii qaz ixrac olunub. SOCAR-ın dünya bazarına ixrac etdiyi neft həcmləri ötən ilin analoji dövrü ilə müqayisədə 13,2 faiz artıb. Qeyd edək ki, SOCAR öz imkanları ilə hasil etdiyi neftdən əlavə beynəlxalq konsorsiumlar çərçivəsində SOCAR və Azərbaycanın payına düşən neft həcmlərini də ixrac edir. Ümumilikdə isə ölkə üzrə 6,4 milyon tondan çox neft, 6,3 milyard kub metrdən çox qaz ixrac edilib. Ölkə üzrə qaz ixracında ötən ilin analoji dövrü ilə müqayisədə 7,6 faiz artım qeydə alınıb. Şirkətin Azərbaycandakı emal kompleksində 1,7 milyon tona yaxın neft, 892 milyon kubmetrdən çox təbii qaz emal olunub. Neft emalı ötən ilin müvafiq dövrü ilə müqayisədə 5,4 faiz artıb. Rüb ərzində SOCAR-ın Azərbaycandakı müəssisələrində istehsal olunan 478,1 min ton neft, neft-kimya və qaz-kimya məhsulu xarici ölkələrə ixrac edilib. Hesabat dövründə ölkə ərazisində təbii qaz istehlakı 4,8 milyard kub metr təşkil edib.xeber100.com

Hesablama Palatasının 2022-ci il üçün illik hesabatı təsdiqlənib

Milli Məclis Azərbaycan Respublikası Hesablama Palatasının illik hesabatı haqqında qanun layihəsini təsdiqləyib. Qanun layihəsi parlamentin aprelin 25-də keçirilən iclasının gündəliyinə daxil edilib. Deputatlar Hesablama Palatasının illik hesabatını qənaətbəxş hesab ediblər.xeber100.com

Bakı-Vyana-Bakı birbaşa uçuşlarına start veriləcək

Mayın 2-dən etibarən Bakı-Vyana-Bakı birbaşa uçuşlarına start veriləcək. Həftədə iki dəfə olmaqla çərşənbə axşamı və cümə günləri həyata keçirilməsi planlaşdırılan uçuşlar “Azərbaycan Hava Yolları” Qapalı Səhmdar Cəmiyyətinin (AZAL) tərəfindən icra ediləcək. Birbaşa uçuşların başlanması münasibətilə aprelin 24-də Avstriyanın paytaxtı Vyanada Dövlət Turizm Agentliyinin və Azərbaycanın Avstriyadakı səfirliyinin təşkilatçılığı ilə təqdimat keçirilib. Tədbirdə çıxış edən Dövlət Turizm Agentliyinin sədri Fuad Nağıyev Bakı-Vyana-Bakı birbaşa uçuşlarının ikitərəfli turizm əlaqələrin inkişafı ilə yanaşı, qarşılıqlı turist mübadiləsinə də töhfə verəcəyini, Azərbaycanı avropalı turistlər üçün daha əlçatan edəcəyini bildirib. Fuad Nağıyev Azərbaycanın turizm istiqaməti kimi tanıdılması məqsədilə genişmiqyaslı tədbirlərin görüldüyünü, dövlət səviyyəsində turizmin inkişafına xüsusi diqqət ayrıldığını, pandemiyadan sonrakı bərpa prosesində Avropadan gələn turist sayının artacağına inamını ifadə edib. Azərbaycan Respublikasının Avstriya Respublikasındakı səfiri Rövşən Sadıqbəyli tədbirdə çıxış edərək Azərbaycan və Avstriya arasında iqtisadi-ticari əlaqələrin dinamik inkişaf etdiyini, turizm əlaqələrinin genişlənməsinin dostluq və tərəfdaşlıq münasibətlərinə töhfə verəcəyini qeyd edib. Avstriya Respublikasının Federal Əmək və İqtisadiyyat Nazirliyinin turizm üzrə Dövlət katibi Suzanne Kraus-Vinkler birbaşa hava uçuşlarının turizm sahəsində mühüm rol oynayaraq, insanlara rahat səyahət seçimləri verdiyini, həmçinin iqtisadi faydalar gətirdiyini bildirib. O, Vyana-Bakı uçuşlarının ölkələrimiz arasında turizm və iqtisadi əlaqələrin güclənməsində əsaslı rol oynayacağını, turizm üzrə uğurlu əməkdaşlıqlara təkan verəcəyini diqqətə çatdırıb. “Azərbaycan Hava Yolları” Qapalı Səhmdar Cəmiyyətinin birinci vitse-prezidenti Samir Rzayev AZAL tərəfindən yerinə yetiriləcək birbaşa uçuşlarda sərnişinlərin daşınmasının, uçuşların rahatlığının və xidmətin yüksək keyfiyyətlə həyata keçiriləcəyinə əminliyini ifadə edib. O, növbəti mərhələdə AZAL tərəfindən Avropanın digər şəhərlərinə də birbaşa uçuşların həyata keçiriləcəyini vurğulayıb.