“Statoil” şirkəti adını “Equinor” olaraq dəyişdirib

Norveçin enerji nəhəngi “Statoil” şirkəti adını “Equinor” olaraq dəyişdirib.Azərtac xəbər verir ki, bu barədə şirkət məlumat yayıb. Bildirilir ki, şirkət təkcə neft şirkəti deyil və enerjinin bütün sahələrində çalışır.Şirkətin yeni adı ingilis dilinə “bərabər” sözü kimi tərcümə olunan “equal” Norveçin adının ilk 3 hərfindən “nor” sözlərinin birləşməsindən yaranıb.Şirkətin baş icraçı direktoru Eldar Saetre deyib: “Dəyişən dünya düzənində “Statoil”un da adı dəyişib. Beynəlxalq arenada təbii qaz, neft və bərpaolunan enerji sahələrində böyüməyə davam edəcəyik.“Equinor”un səhmlərinin 67 faizi Norveç hökumətinə məxsusdur. Qalan 33 faiz isə digər şirkətlər üçün və ya açıq şəkildə satılır.Qeyd edək ki, 25 ildir Azərbaycanda fəaliyyət göstərən “Statoil” şirkəti “Azəri-Çıraq-Günəşli” (AÇG) layihəsində 7,27 faiz, Bakı–Tbilisi–Ceyhan əsas ixrac neft boru kəməri (BTC) layihəsində isə 8,71 faiz paya sahibdir.xeber100.com

Əməkdaşlığa dair memorandum imzalanacaq

Mayın 17-də Əmlak Məsələləri Dövlət Komitəsi (ƏMDK) ilə Dövlət Şəhərsalma və Arxitektura Komitəsi arasında əməkdaşlığa dair memorandum imzalanacaq.ƏMDK-dan Azərtac-a bildirilib ki, memorandumun əsas hədəfi daşınmaz əmlakın kadastrı, xüsusi (sahəvi) təyinatlı geodeziya işlərinin aparılması, şəhərsalmanın planlaşdırılması, o cümlədən birgə layihələrin həyata keçirilməsi, bu sahədə innovasiyaların tətbiqidir.Tədbir çərçivəsində daşınmaz əmlak və torpaq idarəçiliyi sahəsindəki mühüm layihələrdən olan Torpaqların Elektron Kadastr Uçotu Sistemi, yeni yanaşmalara əsasən yaradılmış ünvan reyestri sistemi, o cümlədən müvafiq proqram təminatları və bu sahədə tətbiq olunan innovasiyalar canlı şəkildə nümayiş ediləcək.xeber100.com

Beynəlxalq Enerji Agentliyinin aylıq hesabatında

Neft İxrac edən Ölkələr Təşkilatı (OPEC) aprel ayında neft hasilatının azaldılması üzrə Vyana sazişinə 172 faiz əməl edib.Azərtac xəbər verir ki, bu barədə Beynəlxalq Enerji Agentliyinin (IEA) neft bazarına dair aylıq hesabatında deyilir. Martda bu göstərici 165 faiz olub.Bildirilir ki, OPEC-in xam neft istehsalı apreldə gündəlik 130 min barrel azalaraq 31,65 milyon barrelə geriləyib. Bu, Venesuela və Afrikada neft hasilatının azalması ilə bağlıdır.Qeyd edək ki, 2016-cı il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Həmin il dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. 2017-ci il mayın 25-də OPEC Nazirlər Şurasının 172-ci iclası çərçivəsində Neft İxrac edən Ölkələr Təşkilatına üzv və qeyri-üzv dövlətlər arasında neft hasilatının azaldılmasına dair sazişin müddətinin 2018-ci ilin birinci rübünün sonunadək uzadılması barədə razılıq əldə olunub. Ötən ilin noyabrın 30-da isə OPEC Nazirlər Şurasının 173-cü iclası çərçivəsində Neft İxrac edən Ölkələr Təşkilatına üzv və kartelə daxil olmayan dövlətlərin nazirlərinin üçüncü görüşündə neft hasilatının azaldılmasına dair sazişin müddətinin 2018-ci ilin sonuna kimi uzadılması ilə bağlı qərar qəbul olunub. OPEC və qeyri-OPEC ölkələrinin bu razılaşmasına Azərbaycan da qoşulub.xeber100.com

Neftin qiyməti müxtəlif istiqamətlərdə dəyişib

Dünya birjalarında neftin qiyməti müxtəlif istiqamətlərdə dəyişib.Azərtac xəbər verir ki, “Azeri Light” markalı neftin bir barrelinin qiyməti 0,81 dollar bahalaşaraq 78,61 dollar olub.Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,06 dollar ucuzlaşaraq 78,17 dollar, Nyu-Yorkun NYMEX (“New York Mercantile Exchange”) birjasında “Light” markalı neftin bir barrelinin qiyməti isə 0,08 dollar azalaraq 70,88 dollar təşkil edib.xeber100.com

Avtomobil Yolları Dövlət Agentliyinin məlumatı

Üç avtomobil yolunda nəqliyyatın hərəkəti məhdudlaşdırılır.Azərbaycan Avtomobil Yolları Dövlət Agentliyinin ictimaiyyətlə əlaqələr şöbəsindən Azərtac-a bildirilib ki, agentliyin sifarişi əsasında, Bakı şəhərində avtonəqliyyat vasitələrinin təhlükəsiz hərəkətinin tənzimlənməsi məqsədilə, Binəqədi rayonu, Balaxanı-Xırdalan, Novxanı-Binəqədi, həmçinin Qaradağ rayonu, Lökbatan-Qobu-Hökməli avtomobil yollarında üfüqi nişanlanma xətlərinin çəkilişi işləri aparılır. Bu məqsədlə sözügedən yollar boyu axşam saatlarınadək avtonəqliyyat vasitələrinin hərəkəti tam və ya qismən məhdudlaşdırılacaq.Sürücülərdən öncədən hərəkət istiqamətlərinə uyğun alternativ yollardan istifadə etmələri, sözügedən avtomobil yolu ilə hərəkətdə olarkən isə diqqətli olmaları, müvəqqəti yol nişanlarına və yol hərəkəti qaydalarına əməl etmələri xahiş olunur.xeber100.com

Manatın ortaçəkili məzənnəsi 1,7000 səviyyəsində formalaşıb

Mayın 15-də Mərkəzi Bankda Dövlət Neft Fondunun da iştirakı ilə hərrac keçirilib.Azərtac banka istinadla bildirir ki, hərracda manatın ortaçəkili məzənnəsi 1,7000 səviyyəsində formalaşıb.xeber100.com

“Bakcell” şirkətinin məlumatı əsasında…

Mobil internet provayderi “Bakcell” ali məktəblərin 3-cü və 4-cü kursunda təhsil alan bakalavrlar, magistrlər və yeni məzunları şirkətin “2018 Yay Təcrübə Proqramı”nda iştirak etməyə dəvət edir.Şirkətdən Azərtac-a bildirilib ki, tələbə və məzunlar üçün nəzərdə tutulmuş 2 aylıq proqramın əsas məqsədi karyerasında ilk addımlarını atmağa başlayan gəncləri Azərbaycanın ən nüfuzlu və innovativ şirkətlərindən birində iş mühiti ilə tanış etmək, praktiki biliklərlə təmin etmək və onların işə hazırlıq bacarıqlarını inkişaf etdirməkdir.Seçimdən uğurla keçən namizədlər “Bakcell”in satış və marketinq şöbələrində 2 ay müddətində təcrübə keçmək imkanına malik olacaqlar. Təcrübə müddətində gənclər şirkətin aparıcı mütəxəssisləri arasından seçilmiş təcrübə rəhbərləri vasitəsilə müvafiq bilik və bacarıqlara yiyələnərək şirkətin ümumi strukturunu və iş prinsiplərini öyrənəcək, eyni zamanda, karyera planlaşdırılması, biznes etikasi, vaxtın səmərəli bölgüsü, effektiv kommunikasiya, özünü kəşfetmə, əməyin təhlükəsizliyi və ətraf mühit, sağlamlıq və digər mövzularda praktiki biliklər əldə edəcəklər. Təcrübə proqramı başa çatdıqda bütün iştirakçılar qiymətləniriləcək və layihədə iştirak etdiklərini təsdiq edən sənədlə təltif olunacaqlar.xeber100.com

“Light” markalı neftin qiyməti ucuzlaşıb

Dünya birjalarında neftin qiyməti ucuzlaşır.Azərtac xəbər verir ki, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti 0,41 dollar azalaraq 76,71 dollar, Nyu-Yorkun NYMEX (“New York Mercantile Exchange”) birjasında “Light” markalı neftin bir barrelinin qiyməti isə 0,27 dollar ucuzlaşaraq 70,43 dollar olub.xeber100.com

Neft İxrac edən Ölkələr Təşkilatı üzrə gündəlik neft istehsalı artıb

Aprel ayında Neft İxrac edən Ölkələr Təşkilatı (OPEC) üzrə gündəlik neft istehsalı artıb.Azərtac xəbər verir ki, bu barədə OPEC-in aylıq hesabatında deyilir. Bildirilir ki, OPEC-in xam neft istehsalı apreldə mart ayı ilə müqayisədə gündəlik 12 min barrel artaraq 31 milyon 930 min barrel olub. OPEC-in dünya neft hasilatındakı payı isə dəyişməyərək 32,6 faiz təşkil edib.Ötən ay OPEC üzrə xam neft istehsalı ən çox Səudiyyə Ərəbistanı, Əlcəzair və İranda artım göstərib. Belə ki, apreldə mart ayı ilə müqayisədə Səudiyyə Ərəbistanının sutkalıq neft hasilatı 46 min 500 barrel, Əlcəzairdə 17 min 700 barrel və İranda 10 min barrel artıb.Venesuela, Qabon və Nigeriyada isə neft istehsalı azalıb. İqtisadi və siyasi baxımdan çətinliklər yaşayan Venesuelada gündəlik neft istehsalı apreldə martla müqayisədə 41 min 700 barrel azalaraq 1 milyon 436 barrelə düşüb. Keçən ay Qabonda gündəlik neft hasilatı 9 min 300 barrel, Nigeriyada isə 8 min 300 barrel azalıb.Apreldə dünya üzrə 2 min 170 neft quyusu istismara verilib. Bu quyulardan 561-i OPEC-ə üzv olan ölkələrdədir.xeber100.com

Beynəlxalq Aeroportun məlumatı əsasında…

Heydər Əliyev Beynəlxalq Aeroportu 2018-ci ilin ilk dörd ayı ərzində 1 milyon 239 min sərnişinə xidmət göstərib. Bu göstərici ötən ilin analoji göstəricisindən 15 faiz çoxdur.Aeroportun mətbuat xidmətindən Azərtac-a bildirilib ki, “Azərbaycan Hava Yolları” (AZAL) milli aviadaşıyıcısının payına 495 min sərnişin, milli loukoster “Buta Airways”in payına isə 139 min sərnişin düşüb.1 milyon 66 min sərnişin (ümumi sərnişin dövriyyəsinin 86 faizi) beynəlxalq reyslərlə daşınıb. Beynəlxalq sərnişinlərin ümumi sayının 30 faizi AZAL-ın, 13 faizi isə “Buta Airways”in payına düşüb.Hazırda Beynəlxalq Aeroportu 40-dan çox istiqamət üzrə 30 aviaşirkətə xidmət göstərir. Ən məşhur beynəlxalq istiqamətlərin onluğuna əvvəlki kimi İstanbul, Moskva, Dubay, Kiyev, Doha, Şarja, Tbilisi, Bağdad, Tehran və Sankt-Peterburq daxildir. Yanvar-aprel ayları ərzində bu istiqamətlərə 818 min sərnişin uçub.Beynəlxalq Aeroportunun yeni aerovağzal kompleksi (Terminal 1) 2014-cü ilin aprel ayında istifadəyə verilib. Onun ümumi sahəsi 65 min kvadratmetr təşkil edir.2018-ci ilin may ayında Beynəlxalq Aeroportu dünyada müxtəlif aviaşirkətlər və hava limanları tərəfindən göstərilən xidmətlərin keyfiyyətinin öyrənilməsi üzrə ixtisaslaşan Böyük Britaniyanın nüfuzlu konsaltinq şirkəti “Skytrax”ın ən yüksək 5 ulduzuna layiq görülüb.Beynəlxalq Aeroportu ardıcıl olaraq ikinci dəfə Rusiya və MDB ölkələrinin bütün hava limanları arasında göstərilən xidmət səviyyəsinə görə ən yaxşılar siyahısına başçılıq edərək “Skytrax World Airport Awards” mükafatına layiq görülüb.xeber100.com